សន្និសីទអាកាសធាតុ៖ អឺរ៉ុបថានឹងប្រឹងប្រែងបន្ថែមទៀត ប៉ុន្តែ ប្រទេសខាងត្បូងថា នៅតែមិនគ្រប់គ្រាន់
នៅសន្និសីទអន្តរជាតិស្តីពីអាកាសធាតុ នៅប្រទេសអេហ្ស៊ីប Cop27 សហភាពអឺរ៉ុបបានបង្ហាញមហិច្ឆតាចង់កាត់បន្ថយការបញ្ចេញឧស្ម័នកាបូនិក ឲ្យបានច្រើនបន្ថែមទៀត ពោល គឺឲ្យបាន៥៧%ពីពេលនេះដល់ឆ្នាំ២០៣០ ប៉ុន្តែ មិនមែន៥៥%ដូចការអនុវត្តសព្វថ្ងៃ។ ប៉ុន្តែ ការសន្យាបន្ថែមរបស់សហភាពអឺរ៉ុបមិនបានទទួលស្វាគមពីក្រុមប្រទេសក្រីក្រ។ ប្រទេសនៅភាគខាងត្បូងផែនដី ដែលបញ្ចេញឧស្ម័នកាបូនិកតិចតួច ប៉ុន្តែ រងគ្រោះច្រើនខ្លាំងដោយសារកត្តាប្រែប្រួលអាកាសធាតុ បានរិះគន់សាជាថ្មីក្រុមប្រទេសអ្នកមាន ដែលទទួលខុសត្រូវបញ្ចេញឧស្ម័នកាបូនិកខ្លាំង ថាពុតត្បុត គិតតែប្រយោជន៍ផ្ទាល់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
នៅក្នុងសន្និសីទអាកាសធាតុនៅប្រទេសអេហ្ស៊ីប អនុប្រធានគណៈកម្មការអឺរ៉ុបព្យាយាមបង្ហាញថា សហភាពអឺរ៉ុបមិនបានព្រងើយកន្តើយក្នុងរឿងកាត់បន្ថយឧស្ម័នកាបូនិក ឧស្ម័នផ្ទះកញ្ចក់ដែលជាដើមហេតុនៃការឡើងកំដៅផែនដី។ សម្រាប់អ្នកទទួលខុសត្រូវអឺរ៉ុប សង្រ្គាមរុស្ស៊ីឈ្លានពានអ៊ុយក្រែនដែលកំពុងបង្កឲ្យមានវិបត្តិថាមពលនៅទឹកដីអឺរ៉ុបមិនបានធ្វើឲ្យអឺរ៉ុបភ្លេចការប្រឹងប្រែងរបស់ខ្លួនដើម្បីបុព្វហេតុអាកាសធាតុ។
“សូមកុំស្តាប់ពាក្យឃោសនាដែលថា សង្រ្គាមអ៊ុយក្រែនបានបំផ្លាញការប្រឹងប្រែងប្រយុទ្ធប្រឆាំងនឹងការប្រែប្រួលអាកាសធាតុ។ សង្រ្គាមរុស្ស៊ីឈ្លានពានអ៊ុយក្រែនមិនបានធ្វើឲ្យយើងងាកត្រលប់ទៅប្រើឧស្ម័នច្រើនជាងមុននោះទេ។” នេះជាប្រសាសន៍របស់អនុប្រធានគណៈកម្មការអឺរ៉ុប។
ដើម្បីបង្ហាញការប្រឹងប្រែងរបស់ភាគីអឺរ៉ុប អ្នកទទួលខុសត្រូវអឺរ៉ុបលើកឡើងថា តាមរយៈច្បាប់ដែលសហភាពអឺរ៉ុបបានបោះឆ្នោតអនុម័តនៅប៉ុន្មានថ្ងៃចុងក្រោយនេះ អឺរ៉ុបត្រៀមខ្លួនដើម្បីកាត់បន្ថយការបញ្ចេញឧស្ម័នកាបូនិកឲ្យបានច្រើនបន្ថែមទៀត រហូតដល់៥៧% ពីពេលនេះដល់ឆ្នាំ ២០៣០។
២% នេះជាការប្រឹងប្រែងបន្ថែមរបស់សហភាពអឺរ៉ុប ព្រោះថាអឺរ៉ុបសព្វថ្ងៃកំពុងព្យាយាមកាត់បន្ថយការបញ្ចេញឧស្ម័នកាបូនិកឲ្យបាន៥៥%។
សម្រាប់សកម្មជនអាកាសធាតុ ការប្រកាសប្រឹងប្រែងបន្ថែមរបស់សហភាពអឺរ៉ុបតិចតួចស្តួចស្តើង មិនគ្រប់គ្រាន់ ដើម្បីឆ្លើយតបនឹងបញ្ហាអាកាសធាតុ។ ម្យ៉ាងការសន្យារបស់សហភាពអឺរ៉ុប គឺមានតែនៅលើក្រដាស និងមិនស្តែងពីការពិតជាក់ស្តែងនោះឡើយ។ ការពិតដែលថា បណ្តាប្រទេសអឺរ៉ុបជាច្រើនកំពុងងាកទៅប្រើថាមពលធ្យូងថ្ម ដើម្បីជំនួសឧស្ម័នរុស្ស៊ី ទាំងដឹងថាធ្យូងថ្មបញ្ចេញឧស្ម័នពុលច្រើនជាងគេទៅក្នុងបរិយាកាស។ ក្រៅពីអឺរ៉ុប មានប្រទេសសំខាន់មួយចំនួនទៀត ដូចជា ចិន និងអារ៉ាប៊ី សាអូឌីតជាដើម ដែលមិនចង់សើរើគោលនយោបាយ កាត់បន្ថយឧស្ម័នកាបូនិក។
នៅសន្និសីទអាកាសធាតុ Cop 27 សហភាពអឺរ៉ុប និងក្រុមប្រទេសអ្នកមានរងការរិះគន់ផងដែរថា ពុតត្បុត ធ្វើមិនដឹងមិនលឺ នៅពេលគេនិយាយពីកញ្ចប់ថវិកាជំនួយសម្រាប់ប្រទេសក្រីក្រ ដែលបញ្ចេញឧស្ម័នកាបូនិកតិច ប៉ុន្តែ រងការខូចខាតធ្ងន់ធ្ងរ ដោយសារកត្តាប្រែប្រួលអាកាសធាតុ។ ក្រុមប្រទេសកំពុងអភិវឌ្ឍ ប្រទេសក្រីក្រខកចិត្តផងដែរដែលឃើញក្រុមប្រទេសមហាឧស្សាហកម្មនៅតែអរិភាព មិនចង់ឲ្យគេបង្កើតយន្តការច្បាស់លាស់សម្រាប់ការខាតបង់ និងការខូចខាត ដោយសារការប្រែប្រួលអាកាសធាតុ។ នៅក្នុងអត្ថបទព្រាងដែលគេត្រូវសម្រេចនៅថ្ងៃចុងក្រោយនៃសន្និសីទ គេបានប្រើពាក្យត្រឹម តម្រូវការកញ្ចប់ថវិកា ដែលជាការទាមទារចង់បានតាំងពីដំបូងទីរបស់អាមេរិក និងសហភាពអឺរ៉ុប។
តើគេត្រូវការសន្និសីទអាកាសធាតុប៉ុន្មានដងទៀត និងត្រូវខាតបង់ជីវិតមនុស្សអស់ប៉ុន្មាន ទើបគេអាចធ្វើសកម្មភាពជាក់ស្តែងដើម្បីប្រយុទ្ធប្រឆាំងនឹងការប្រែប្រួលអាកាសធាតុ? អ្នកចូលរួមក្នុងសន្និសីទអាកាសធាតុនៅអេហ្ស៊ីបកំពុងរង់ចាំចំណាត់ការជាក់ច្បាស់របស់ក្រុមប្រទេសមហាឧស្សាហកម្មហ្សេ ២០ដែលកំពុងបន្តប្រជុំគ្នានៅថ្ងៃពុធនេះ នៅកោះបាលី ប្រទេសឥណ្ឌូណេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ