G20 ប្រកាសបន្តគោរពកម្មវត្ថុអាកាសធាតុ ទប់សីតុណ្ហភាពផែនដីកំុឲ្យឡើងលើស១,៥៌°c
ក្រុមប្រទេសសេដ្ឋកិច្ចនាំមុខ G20 ដែលកំពុងតែជួបប្រជុំគ្នានៅកោះបាលី បានចេញសេចក្តីថ្លែងការណ៍រួមមួយ ដោយបានសន្យារួមគ្នា ថានឹងប្រឹងប្រែងបន្តគោរពឲ្យបាន នូវកម្មវត្ថុកាត់បន្ថយការកើនឡើងកំដៅផែនដី មិនឲ្យលើសពី១,៥°c។ ជាការប្រឹងប្រែងដើម្បីស្រោចស្រង់ភពផែនដី ពីគ្រោះមហន្តរាយនានា បង្កឡើងដោយវិបត្តិអាកាសធាតុ។ សេចក្តីថ្លែងការណ៍រួមរបស់ G20 នេះ គឺជាការផ្តល់សញ្ញាវិជ្ជមាន និងក្តីសង្ឃឹមមួយ ទៅលើការចរចាគ្នានៅឯសន្និសីទអន្តរជាតិស្តីពីអាកាសធាតុ COP27 ដែលកំពុងជិតដល់ថ្ងៃបិទទ្វារហើយ នៅឯប្រទេសអេហ្ស៊ីប។
ចុះផ្សាយនៅថ្ងៃ៖
ស្តាប់ - ០២:២០
ក្រុមប្រទេសសេដ្ឋកិច្ចនាំមុខG20 បានប្រកាសទទួលស្គាល់ថា ការវាយតម្លៃរបស់ក្រុមអ្នកជំនាញអាកាធាតុ នៃអង្គការសហប្រជាជាតិ GIEC ដែលថាក្នុងករណីសីតុណ្ហភាពផែនដី កើនឡើង១,៥°c គឺមានផលប៉ះពាល់តិចជាងឆ្ងាយ បើប្រៀបទៅកំណើនសីតុណ្ហភាព ២°c នោះ គឺវាជាការត្រឹមត្រូវណាស់។ ក្នុងន័យនេះ ក្រុមប្រទេសG20 សូមសន្យា បន្តប្រឹងប្រែង ធ្វើឲ្យអស់ពីសមត្ថភាព ដើម្បីកាត់បន្ថយការបញ្ចេញឧស្ម័នផ្ទះកញ្ចក់ ដើម្បីធ្វើយ៉ាងណា កុំឲ្យផែនដីឡើងកំដៅលើសពី ១,៥°c ។
សេចក្តីថ្លែងការណ៍រួមរបស់ក្រុមប្រទេសG20នេះ ត្រូវបានគេអបអរជាខ្លាំង ខណៈដែលសន្និសីទអន្តរជាតិស្តីពីអាកាសធាតុCOP27 កំពុងតែឈានចូលជិតដល់ថ្ងៃចុងក្រោយ។ លោក Ani Dasgupta ប្រធានមជ្ឈមណ្ឌល World Resources Instiute បានលើកឡើងថា វានឹងផ្តល់ខ្យល់សង្ឃឹមទៅឲ្យការចរចាគ្នា នៅCOP27។ វាជាដំណឹងល្អណាស់ ដែលក្រុមប្រទេសអ្នកមានទទួលស្គាល់ថា ត្រូវតែប្រឹងប្រែង និងជាពិសេសនោះគឺត្រូវជួយផ្តល់ថវិកាចាំបាច់ ដើម្បីជួយប្រទេសក្រីក្រ ប្រទេសដែលប្រឈមខ្លាំងនឹងវិបត្តិអាកាសធាតុ។
ដូចគ្នាដែរ លោកស្រី Fionna Smyth តំណាងអង្គការ Christian Aid បានលើកឡើងថា ដោយយោងទៅលើទម្ងន់សេដ្ឋកិច្ច និងទំហំបញ្ចេញឧស្ម័នកាបូនិក របស់ក្រុមប្រទេសសេដ្ឋកិច្ចនាំមុខទាំងនេះ វាគឺជាដំណឹងល្អណាស់ ដែលប្រទេសទាំងនេះសន្យាបន្តប្រឹងប្រែង។ វាគឺជាកម្លាំងចលករនាំមុខ ដើម្បីដោះស្រាយវិបត្តិអាកាសធាតុសកលលោក។
ដោយឡែក លោក Sébastien Treyer នាយកវិទ្យាស្ថានដើម្បីការអភិវឌ្ឍន៍ប្រកបដោយចីរភាព និងទំនាក់ទំនងអន្តរជាតិ បានលើកឡើងថា ការប្រកាសរបស់ក្រុមប្រទេសសេដ្ឋកិច្ចនាំមុខទាំង២០នេះ វាគឺជាដំណឹងល្អមែនហើយ។ ក៏ប៉ុន្តែអ្វីដែលលោកចង់ឃើញ គឺចង់ឲ្យក្រុមប្រទេសអ្នកមានទាំងនេះ រួមគ្នាធ្វើកំណែទម្រង់ចាំបាច់ ឲ្យបានឆាប់បំផុត ទៅលើប្រព័ន្ធហិរញ្ញវត្ថុអន្តរជាតិ ដើម្បីធ្វើយ៉ាងណាផ្តល់លទ្ធភាព ឲ្យក្រុមប្រទេសក្រីក្រងាយរងគ្រោះ បានទទួលថវិកាដើម្បីយកទៅវិនិយោគ ទប់ទល់ជាមួយវិបតិ្តអាកាសធាតុ។ វាគឺជាកំណែទម្រង់ជាក់ស្តែង ដែលនឹងស្តារទំនុកចិត្ត រវាងក្រុមប្រទេសអ្នកមានស្ថិតនៅភាគខាងជើង និងក្រុមប្រទេសក្រីក្រងាយរងគ្រោះ ស្ថិតនៅភាគខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ