ប្រតិបត្តិការប្រឆាំងអំពើពុករលួយនៅផ្ទៃក្នុងសភាអឺរ៉ុបបានឈានដល់ការចាប់មនុស្សច្រើននាក់
ចុះផ្សាយនៅថ្ងៃ៖
ស្តាប់ - ០៧:១៤
នៅក្នុងប្រទេសបែលហ្សិក កម្លាំងប៉ូលិសបានប្រតិបត្តិការប្រឆាំងអំពើពុករលួយទ្រង់ទ្រាយធំនៅផ្ទៃក្នុងសភាអឺរ៉ុបកាលពីថ្ងៃសុក្រ ទី៩ ធ្នូ។ ប្រតិបត្តិនេះបានឈានដល់ការចាប់ខ្លួនមនុស្សជាច្រើននាក់ ក្នុងនោះមានអនុប្រធានសភាអឺរ៉ុបលោកស្រីអេវ៉ា កាយលីជាជនជាតិក្រិក។ អនុប្រធានសភាអឺរ៉ុបរូបនេះបានជាប់ចោទពីបទទទួលលុយពីប្រទេសអារ៉ាប់មួយជាថ្នូរនឹងការការពារប្រទេសអារ៉ាប់មួយនេះនៅសភាអឺរ៉ុប។ នៅថ្ងៃសៅរ៍ ទី១០ ធ្នូ ប្រធានសភាអឺរ៉ុបបានសម្រេចព្យួរបណ្តោះអាសន្ននូវគ្រប់អំណាច និងកាតព្វកិច្ចរបស់លោកស្រីអេវ៉ា កាយលី។
រឿងអាស្រូវពុករលួយនៅផ្ទៃក្នុងសភាអឺរ៉ុបជារឿងស្មុគស្មាញ និងកំពុងបន្តជំពាក់វាក់វិននឹងមនុស្សជាច្រើននាក់ដូចសម្លកំពិស។ តាមពិត ការស៊ើបអង្កេតរឿងអំពើពុករលួយនៅផ្ទៃក្នុងសភាអឺរ៉ុបបានចាប់ផ្តើមក្នុងខែកក្កដា ហើយអ្នកដែលបានដឹកនាំការស៊ើបអង្កេតនេះ គឺចៅក្រមបែលហ្សិកលោកមីសែល ឃ្លែរស៍ដែលជាអ្នកជំនាញផ្នែកហិរញ្ញវត្ថុ អំពើពុករលួយ និងការលាងលុយកខ្វក់។ មហាអយ្យការបែលហ្សិកបានផ្សព្វផ្សាយសេចក្តីប្រកាសព័ត៌មានមួយក្នុងថ្ងៃសុក្រ ទី៩ ធ្នូដោយបញ្ជាក់ថា ការស៊ើបអង្កេតបានផ្តោតសំខាន់លើអង្គហេតុដែលសង្ស័យមានបណ្តាញឧក្រិដ្ឋកម្ម អំពើពុករលួយ និងការលាងលុយកខ្វក់។
ចៅក្រមមីសែល ឃ្លែរស៍សង្ស័យថា មានប្រទេសអារ៉ាប់មួយនៅឈូងសមុទ្រពែក្សបានឲ្យលុយ ឬឲ្យជាកាដូទៅភាគីទី៣ ដើម្បីឲ្យភាគីទី៣ ប្រើឥទ្ធិពលទៅលើសេចក្តីសម្រេចនយោបាយ និងសេដ្ឋកិច្ចរបស់សភាអឺរ៉ុបក្នុងផលប្រយោជន៍របស់ខ្លួន។ ភាគីទី៣ ដែលគេចង់និយាយ គឺថ្នាក់ដឹកនាំក្នុងសភាអឺរ៉ុប សមាជិកសភាអឺរ៉ុប ឬមួយក៏មន្រ្តីអឺរ៉ុប។ ចំណែកប្រទេសអារ៉ាប់មួយនៅឈូងសមុទ្រពែក្សដែលគេចង់សំដៅ គឺប្រទេសកាតា។ ក្រោយពីបានស៊ើបអង្កេតរយៈពេល ៤ខែ កម្លាំងប៉ូលិសបែលហ្សិកបានបើកប្រតិបត្តិការចូលឆែកឆេរទ្រង់ទ្រាយធំកាលពីថ្ងៃសុក្រ ទី៩ ធ្នូនៅតាមផ្ទះជនសង្ស័យច្រើននាក់ក្នុងទីក្រុងព្រុចសែល។
តាមមហាអយ្យការបែលហ្សិក ប្រតិបត្តិការចូលឆែកឆេរបានរឹបអូសម៉ាស៊ីនកុំព្យូទ័រ ទូរស័ព្ទដៃ លុយប្រមាណ ៦០០ ០០០អឺរ៉ូ ពិសេសរបអូសបានលុយមួយថង់ក្នុងផ្ទះរបស់លោកស្រីអេវ៉ា កាយលី។។ ទន្ទឹមគ្នានេះ មានមនុស្សយ៉ាងតិចចំនួន ៥នាក់ត្រូវបានឃាត់ខ្លួនដើម្បីសួរនាំ ក្នុងនោះមានអនុប្រធានសភាអឺរ៉ុបលោកស្រីអេវ៉ា កាយលីជាជនជាតិក្រិកមានអាយុ ៤៤ឆ្នាំ អតីតសមាជិកសភាអឺរ៉ុបជនជាតិអ៊ីតាលី អ្នកជំនួយការសភា និងអគ្គលេខាធិការសហព័ន្ធសហជីពអន្តរជាតិ។ អ្វីជាការកត់សម្គាល់ អ្នកចាប់ខ្លួនភាគច្រើនជាសមាជិកក្នុងក្រុមសម្ព័ន្ធចម្រើនសង្គមនិយម និងប្រជាធិបតេយ្យហៅកាត់ S&D នៅសភាអឺរ៉ុប។
កាតាទិញទឹកចិត្តសមាជិកសភាអឺរ៉ុបដើម្បីរួចពីទណ្ឌកម្ម?
ការស៊ើបអង្កេតបានបង្ហាញលើការសង្ស័យថា មានសមាជិកសភាអឺរ៉ុបមួយក្តាប់តូចបានព្យាយាមបោះឆ្នោតប្រឆាំងនឹងសេចក្តីសម្រេចរបស់សភាអឺរ៉ុបដើម្បីដាក់ទណ្ឌកម្មប្រឆាំងកាតានៅក្នុងសំណុំរឿងរំលោភសិទ្ធិមនុស្ស ឬនៅក្នុងសំណុំរឿងចម្រូងចម្រាសផ្សេងទៀត។ ជាថ្នូរត្រឡប់វិញដើម្បីជាការដឹងគុណ កាតាបានផ្តល់ជាលុយកាក់ ឬជាកាដូទៅឲ្យសមាជិកសភាអឺរ៉ុបដែលបានការពារខ្លួន។ បើរូបភាពនេះមិនមែនជារូបភាពពុករលួយ តើវាជារូបភាពស្អីទៅ នេះជាការចោទសួររបស់សមាជិកសភាអឺរ៉ុបមួយចំនួន។
គួរបញ្ជាក់ថា កាតាដែលកំពុងធ្វើជាម្ចាស់ផ្ទះរៀបចំការប្រកួតកីឡាបាល់ទាត់ពិភពលោកបានជាប់ចោទពីបទរំលោភសិទ្ធិមនុស្ស និងមានលក្ខខណ្ឌការងារមិនល្អចំពោះពលករបរទេសដោយបានបណ្តាលឲ្យស្លាប់ពលករបរទេសច្រើនរយនាក់នៅក្នុងការសាងសង់ពហុកីឡាដ្ឋានសម្រាប់រៀបចំការប្រកួតកីឡាបាល់ទាត់ពិភពលោក។ ជាទូទៅ រដ្ឋអំណាចបានចាត់ទុកការស្លាប់របស់ពលករបរទេសថាជាការស្លាប់ដោយជំងឺ ពោលមិនមែនដោយការធ្វើការងារដោយបង្ខំ។
ដូច្នេះដើម្បីគេផុតពីទណ្ឌកម្មរបស់អឺរ៉ុប និងដើម្បីបិទបាំងរូបភាពអាក្រក់របស់ខ្លួន កាតាដែលជាប្រទេសជង្រុកឧស្ម័នបានប្រើទឹកលុយយ៉ាងច្រើនសម្បើមដើម្បីទិញទឹកចិត្តសមាជិកសភាអឺរ៉ុបមួយចំនួនឲ្យការពារខ្លួន។
អឺរ៉ុបត្រូវបោសសំអាតមន្រ្តីពុករលួយដើម្បីលើកស្ទួយ និងការពារតម្លៃរបស់ខ្លួន?
ក្រុមសម្ព័ន្ធចម្រើនសង្គមនិយម និងប្រជាធិបតេយ្យហៅកាត់ S&D នៅក្នុងសភាអឺរ៉ុបបានបញ្ចេញប្រតិកម្មក្នុងថ្ងៃសុក្រ ទី៩ ធ្នូថា មានការភ្ញាក់ផ្អើល និងស្រឡាំងកាំង ហើយបញ្ជាក់ពីការមិនអត់ឱនឲ្យជាដាច់ខាតចំពោះរឿងពុករលួយ។ ទន្ទឹមគ្នានេះ ក្រុម S&D ក៏បានបញ្ជាក់ពីការចូលរួមពេញលេញនៅក្នុងការស៊ើបអង្កេតដើម្បីស្វែងរកការពិត។ តែ S&D បានបដិសេធមិនធ្វើអត្ថាធិប្បាយជាសាធារណៈលើនីតិវិធីផ្លូវច្បាប់ដែលកំពុងដំណើរការ។ ការបដិសេធដូចគ្នានេះក៏មានពីសភាអឺរ៉ុបដែលបានសម្រេចត្រឹមព្យួរបណ្តោះអាសន្ននូវសិទ្ធិអំណាច និងកាតព្វកិច្ចរបស់លោកស្រីអេវ៉ា កាយលីក្នុងនាមជាអនុប្រធានសភាអឺរ៉ុប។
ពីខាងប្រទេសកាតា រដ្ឋាភិបាលបានច្រានចោលលើព័ត៌មានដែលមានការសង្ស័យលើខ្លួន។ យ៉ាងណាក៏ដោយ ការស៊ើបអង្កេតនៅក្នុងរឿងរ៉ាវមួយនេះទើបចាប់ផ្តើម។ តែទោះជាយ៉ាងនេះក្តី អឺរ៉ុបមិនអាចមើលរំលង ឬធ្វើព្រងើយកន្តើយលើរឿងរ៉ាវមួយនេះបានឡើយ។ បើពុំនោះសោតទេ ស្ថាប័នអឺរ៉ុប និងតម្លៃដែលអឺរ៉ុបបានការពារនឹងចោទជាបញ្ហា។ អង្គការ Transparency International បានមើលឃើញថា រឿងរ៉ាវមួយនេះហាក់មិនមែនជារឿងថ្មី និងថា តាំងពីច្រើនទសវត្សរ៍ដែលសភាអឺរ៉ុបបានទុលចោលឲ្យមានការអភិវឌ្ឃន៍នូវវប្បធម៌និទណ្ឌភាព។ អ្វីដែលអង្គការក្រៅរដ្ឋាភិបាលមួយនេះចង់និយាយ គឺអឺរ៉ុបត្រូវផ្តន្ទាទោសជនពុករលួយដែលស៊ីរូងនៅក្នុងស្ថាប័នសភារបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ