អំពើពុករលួយធ្វើឲ្យសហភាពអឺរ៉ុបខាតបង់ ១២០ពាន់លានអឺរ៉ូ
កាលពីថ្ងៃចន្ទទី ៣ កុម្ភៈ គណៈកម្មការអឺរ៉ុបបានចេញផ្សាយរបាយការណ៍មួយដែលបានបង្ហាញពីការរីករាលដាល នៃអំពើពុករលួយ នៅក្នុងសហភាពអឺរ៉ុប។ តាមរបាយការណ៍ អំពើពុករលួយ បានធ្វើឲ្យសេដ្ឋកិច្ចសហភាពអឺរ៉ុបខាតបង់ប្រមាណ ១២០ពាន់លានអឺរ៉ូ ក្នុងមួយឆ្នាំៗ។
ចុះផ្សាយនៅថ្ងៃ៖
ស្តាប់ - ០២:០៧
ជាលើកទីមួយ គណៈកម្មការអឺរ៉ុបបានធ្វើការសិក្សាលើអំពើពុករលួយនៅអឺរ៉ុប។ ការសាកសួរ នៅក្នុងប្រទេសសមាជិកសហភាពអឺរ៉ុប ទាំង ២៨បានបង្ហាញថា អំពើពុករលួយ មិនត្រឹមតែធ្វើឲ្យសេដ្ឋកិច្ចរបស់បណ្តាប្រទេសនៅសហភាព អឺរ៉ុបខាតបង់ថវិកាសន្ធឹកសន្ធាប់ ប៉ុន្តែ វាថែមទាំងបានធ្វើឲ្យប្រជាជនបាត់បង់ជំនឿទុកចិត្ត ទៅលើស្ថាប័នប្រជាធិបតេយ្យ និងទៅលើនីតិរដ្ឋ។ លើសពីនោះ អំពើពុករលួយបានបំផ្លាញផលចំណេញពន្ធគយ ដែលរដ្ឋាភិបាលនីមួយៗត្រូវទទួលបាន និងត្រូវការជាចាំបាច់នោះ។
យោងតាមលោកស្រី Cécilia Malmström អធិការអឺរ៉ុបទទួលបន្ទុកកិច្ចការផ្ទៃក្នុង រដ្ឋសមាជិករបស់សហភាពអឺរ៉ុបបានខំធ្វើការប្រយុទ្ធប្រឆាំងនឹងអំពើពុករលួយ ប៉ុន្តែ នៅតែមិនទាន់គ្រប់គ្រាន់។
នៅក្នុងរបាយការណ៍ ៧៦ភាគរយនៃអ្នកដែលត្រូវគេស្រង់មតិបានវាយតម្លៃថា អំពើពុករលួយបានកើនឡើង និងរីករាលដាលជាងមុន។ មនុស្ស៨ភាគរយនិយាយប្រាប់ថា ពួកគេរងគ្រោះ ដោយអំពើពុករលួយ ឬជាសាក្សីបានឃើញការប្រព្រឹត្តអំពើពុករលួយ ក្នុងរយៈមួយឆ្នាំចុងក្រោយនេះ។
របាយការណ៍របស់គណៈកម្មាការអឺរ៉ុបមិនបានបែងចែកចំណាត់ថ្នាក់ប្រទេសណាមួយ ដែលសំបូរអំពើពុករលួយជាងគេ ឬតិចជាងគេនោះទេ។ ប៉ុន្តែ អ្នកស្រាវជ្រាវគ្រាន់តែកត់សំគាល់ពីចន្លោះខ្វះខាត ដែលកើតមាន នៅក្នុងយន្តការប្រយុទ្ធប្រឆាំងនឹងអំពើពុករលួយ នៅថ្នាក់អឺរ៉ុប។ គេសោកស្តាយផងដែរពីការខ្វះ ការត្រួតពិនិត្យម៉ត់ចត់នៅក្នុងរដ្ឋបាលសាធារណៈ អប្រសិទ្ធិភាព ក្នុងការដាក់ពាក្យប្តឹង ឬបង្រ្កាបអ្នកដែលបានប្រព្រឹត្តអំពើពុករលួយ។ អំពើពុករលួយ កើតមាននៅក្នុងរូបភាព តាំងពីសំណូក សូកប៉ាន់ ការបន្លំលុយរដ្ឋ និងចំណាយមិនច្បាស់លាស់នៃថវិការដ្ឋ ដើម្បីគោលដៅរបស់គណបក្សនយោបាយ។ អំពើពុករលួយ ក្នុងកិច្ចការជំនួញពាណិជ្ជកម្មបរទេស ក៏ជាមូលហេតុសំខាន់មួយដែរ ដែលធ្វើឲ្យប៉ះពាល់ដល់សេដ្ឋកិច្ចរបស់សហភាពអឺរ៉ុប។ នៅក្រូអាត រ៉ូម៉ានី ក្រិក ប៊ុលហ្គារី ជាដើម មនុស្សពី៦ ទៅ ២៩ភាគរយនិយាយថា ពួកគេត្រូវបង្ខំឲ្យបង់ថ្លៃសំណូក ដើម្បីបានទទួលសេវាសុខភាព។ មនុស្ស៤នាក់ ក្នុងចំណោម១០នាក់ ដែលត្រូវបានគេសម្ភាសន៍បាននិយាយថា អំពើពុករលួយជាឧបសគ្គរារាំងការធ្វើជំនួញ នៅអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ