UNWTO៖ចំនួនភ្ញៀវទេសចរអន្តរជាតិងើបឡើងវិញក្នុងឆ្នាំ ២០២២ តែនៅតិចជាងកម្រិតមុនផ្ទុះកូវីដ១៩
ចុះផ្សាយនៅថ្ងៃ៖
ស្តាប់ - ០៧:៤២
នៅថ្ងៃអង្គារ ទី១៧ មករា អង្គការទេសចរណ៍ពិភពលោកហៅកាត់ជាភាសាអង់គ្លេស (UNWTO) បានផ្សព្វផ្សាយរបាយការណ៍មួយស្តីពីស្ថានភាពវិស័យទេសចរណ៍ក្នុងលោកកាលពីឆ្នាំ ២០២២។ តាម UNWTO ក្រោយពីបានធ្លាក់ចុះខ្លាំង និងមានភាពរអាក់រអួលចំនួន ២ឆ្នាំមក វិស័យទេសចរណ៍ពិភពលោកបានផ្តើមងើបឡើងវិញក្នុងឆ្នាំ ២០២២ ដោយមានចំនួនភ្ញៀវទេសចរអន្តរជាតិជាង ៩០០លាននាក់។ តែចំនួននេះនៅតិចជាងឆ្ងាយបើធៀបនឹងពេលមុនផ្ទុះវិបត្តិកូវីដ១៩។ យ៉ាងណាក៏ដោយ UNWTO រំពឹងមានកំណើនចំនួនភ្ញៀវទេសចរអន្តរជាតិបន្ថែមទៀតក្នុងឆ្នាំ ២០២៣ នេះ។
គួររម្លឹកថាក្នុងឆ្នាំ ២០១៩ ចំនួនភ្ញៀវទេសចរអន្តរជាតិមានដល់ទៅ ១ ៤៦០លាននាក់ ហើយនៅពេលដែលពិភពលោកផ្តើមផុងជើងចូលក្នុងវិបត្តិកូវីដ១៩ នាចុងឆ្នាំ ២០១៩ ដើមឆ្នាំ ២០២០ ចំនួនភ្ញៀវទេសចរអន្តរជាតិបានដាំក្បាលចុះយ៉ាងគំហុកដល់ទៅជិត ៨០% ក្នុងរយៈពេល ២ឆ្នាំជាប់គ្នា គឺឆ្នាំ ២០២០ និង ឆ្នាំ ២០២១។ បើតាមរបាយការណ៍របស់អង្គការសហប្រជាជាតិចេញផ្សាយក្នុងឆ្នាំ ២០២១ ការធ្លាក់ចុះវិស័យទេសចរណ៍អន្តរជាតិដោយសារវិបត្តិកូវីដ១៩ រយៈពេល ២ឆ្នាំជាប់គ្នា គឺឆ្នាំ ២០២០ និង ២០២១ បានធ្វើឲ្យសេដ្ឋកិច្ចសកលខាតបង់ប្រាក់ជាង ៤ទ្រីលានដុល្លារ។ តែឆ្នាំ ២០២២ ដែលទើបបិទបញ្ចប់ថ្មីៗនេះ វិស័យទេសចរណ៍ពិភពលោកបានផ្តើមងើបឡើងវិញដោយមានចំនួនភ្ញៀវទេសចរជាង ៩០០លាននាក់។
ចំនួននេះមានការកើនឡើងជាងពាក់កណ្តាលបើធៀបនឹងឆ្នាំ ២០២១ ដែលមានជិត ៤៥០លាននាក់។ តែចំនួនជាង ៩០០លាននាក់ក្នុងឆ្នាំ ២០២២ នៅដាច់ឆ្ងាយពីចំនួននៅមុនផ្ទុះវិបត្តិកូវីដ១៩ ដែលមានដល់ទៅ ១ ៤៦០លាននាក់។ តាមរបាយការណ៍របស់អង្គការទេសចរណ៍ពិភពលោក UNWTO មានតំបន់សឹងទាំងអស់ ពិសេសនៅអាស៊ី ប៉ាស៊ីហ្វិក មជ្ឈិមបូព៌ា និងនៅអឺរ៉ុបដែលបានស្គាល់កំណើនភ្ញៀវទេសចរអន្តរជាតិក្នុងឆ្នាំ ២០២២។ តែ UNWTO បានមើលឃើញថា មជ្ឈិមបូព៌ា និងអឺរ៉ុបជាតំបន់ដែលបានស្គាល់កំណើនភ្ញៀវទេសចរអន្តរជាតិច្រើនជាងគេ ពោលជិតស្មើនឹងកម្រិតនៅមុនផ្ទុះវិបត្តិកូវីដ១៩។ ក្នុងចំនួនភ្ញៀវទេសចរអន្តរជាតិទាំងជាង ៩០០លាននាក់ក្នុងឆ្នាំ ២០២២ មជ្ឈិមបូព៌ា និងអឺរ៉ុបបានស្រូបយកដល់ទៅ ៥៨៥លាននាក់។
UNWTO រំពឹងភ្ញៀវទេសចរមកពីចិន
កូវីដនៅមិនទាន់ទៅណាឆ្ងាយពីយើងនៅឡើយទេ ព្រោះជំងឺសកលមួយនេះកំពុងបន្តឆ្លង និងកំពុងបន្តសម្លាប់មនុស្សជារៀងរាល់ថ្ងៃ។ តែគេហ៊ានទទួលស្គាល់ថា កូវីដលែងជាជំងឺលាក់មុខដូចកាលពី ២ឆ្នាំមុន ហើយកូវីដបានក្លាយជាជំងឺមួយធម្មតាដែលពិភពលោកត្រូវរស់នៅជាមួយ។ លើសពីនេះ ពិភពលោកមានថ្នាំ និងមានវ៉ាក់សាំងបង្ការ។ ទាំងនេះជាកត្តាដែលជំរុញឲ្យមនុស្សផ្តើមធ្វើដំណើរកំសាន្តជាថ្មីនៅបរទេស ទោះជិត ឬឆ្ងាយ។ ក៏ប៉ុន្តែ កត្តាដែលអង្គការទេសចរណ៍ពិភពលោក UNWTO រំពឹងមានកំណើនចំនួនភ្ញៀវទេសចរអន្តរជាតិបន្ថែមក្នុងឆ្នាំ ២០២៣ គឺភ្ញៀវទេសចរមកពីចិន ព្រោះក្នុងថ្ងៃទី៨ មករា រដ្ឋាភិបាលចិនបានបើកប្រទេសទាំងស្រុងឡើងវិញ ក្រោយពីបានបិទខ្ទប់រយៈពេល ៣ឆ្នាំ។
គួររម្លឹកថាក្នុងឆ្នាំ ២០១៩ ពោលមុនផ្ទុះកូវីដ១៩ មានពលរដ្ឋចិនចំនួន ១៥៤លាននាក់បានចេញដើរកំសាន្តនៅបរទេស។ លើសពីនេះ ភ្ញៀវទេសចរជនជាតិចិនជាអ្នកដែលបានចាយវាយច្រើនជាងគេគិតសរុបជាទឹកប្រាក់មាន ២៥៥ ០០០លានដុល្លារក្នុងឆ្នាំ ២០១៩។ ទឹកប្រាក់សរុបដែលភ្ញៀវទេសចរជនជាតិចិនបានចាយនៅបរទេសនេះស្មើនឹង ១៧% នៃការចាយសរុបរបស់ភ្ញៀវទេសចរអន្តរជាតិក្នុងលោកក្នុងឆ្នាំ ២០១៩។ គឺការចេញដើរកំសាន្តនៅបរទេសជាថ្មីរបស់ពលរដ្ឋចិនដែល UNWTO រំពឹងមានកំណើនភ្ញៀវទេសចរអន្តរជាតិបន្ថែមទៀតក្នុងឆ្នាំ ២០២៣។
តែទោះជាយ៉ាងនេះក្តី UNWTO បានព្យាករណ៍ថា កម្រិតភ្ញៀវទេសចរអន្តរជាតិក្នុងឆ្នាំ ២០២៣ នៅមិនទាន់អាចមានកម្រិតដូចមុនពេលផ្ទុះវិបត្តិកូវីដ១៩ នៅឡើយទេ ពោលអាចមានត្រឹមចន្លោះពី ៨០% ទៅ ៩៥% នៃចំនួនដែលមាននៅមុនផ្ទុះវិបត្តិកូវីដ១៩ ប៉ុណ្ណោះ។
សង្រ្គាមអ៊ុយក្រែនជាផលវិបាកថ្មីដល់វិស័យទេសចរណ៍ពិភពលោក?
ខណៈដែលវិបត្តិកូវីដនៅមិនទាន់ទៅណាឆ្ងាយផង ពិភពលោកបានផុងជើងចូលទៅក្នុងវិបត្តិថ្មីមួយទៀត គឺសង្រ្គាមរុស្ស៊ីឈ្លានពានអ៊ុយក្រែនដែលបាន និងកំពុងបន្តអូសបន្លាយតាំងពីចុងខែកុម្ភៈ ឆ្នាំ ២០២២។ ដូច្នេះគេអាចនិយាយបានថាពេលនេះ ពិភពលោកកំពុងរងនូវផលវិបាកចេញពីវិបត្តិវិបត្តិសង្រ្គាមអ៊ុយក្រែន និងវិបត្តិកូវីដ១៩។ វិបត្តិទាំងពីរនេះបានជះផលវិបាកដល់សេដ្ឋកិច្ចសកលដូចគ្នា។ ពិតណាស់ អង្គការទេសចរណ៍ពិភពលោក UNWTO បានរំពឹងខ្លាំងលើការត្រឡប់វិញនូវភ្ញៀវទេសចរចិនសម្រាប់វិស័យទេសចរណ៍ពិភពលោក។ តែការវិលត្រឡប់វិញរបស់ភ្ញៀវទេសចរអន្តរជាតិ និយាយជារួម និងភ្ញៀវទេសចរចិន និយាយដោយឡែកពេលនេះ គឺអាស្រ័យលើកត្តាច្រើន ពិសេសកត្តាសេដ្ឋកិច្ច។
កត្តាសេដ្ឋកិច្ចដែលគេចង់និយាយនេះ គឺលទ្ធភាពក្នុងការចំណាយរបស់មនុស្សម្នាក់ៗ។ ចូរកុំភ្លេចថាសព្វថ្ងៃនេះ ជាមួយនឹងកំណើនអតិផរណាដែលបង្កចេញពីសង្រ្គាមអ៊ុយក្រែន ទំនិញគ្រប់សព្វបានឡើងថ្លៃខ្លាំង។ ដូច្នេះ ការចាយវាយសម្រាប់ដំណើរកំសាន្ត ឬទៅលើអ្វីផ្សេងៗអាចធ្វើឲ្យមនុស្សមានការថ្លឹងថ្លែង និងប្រយ័ត្នប្រយែងជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ