អាមេរិកនិងសម្ព័ន្ធមិត្តប្រជុំគ្នាជាលើកទី៣ ដើម្បីជជែកពីការបន្ថែមជំនួយសព្វាវុធដល់អ៊ុយក្រែន
ចុះផ្សាយនៅថ្ងៃ៖
ស្តាប់ - ០៨:៥០
រដ្ឋមន្រ្តីការពារជាតិរបស់ប្រទេសចំនួន៥០ ដែលមានអាមេរិក និងប្រទេសសម្ព័ន្ធមិត្តក្នុងអង្គការអូតង់ត្រូវជួបប្រជុំគ្នា នៅថ្ងៃសុក្រនេះ នៅមូលដ្ឋានទ័ពអាមេរិក Ramstein ក្នុងប្រទេសអាល្លឺម៉ង់ ដើម្បីជជែកពីការបន្ថែមអាវុធទៅជួយកងទ័ពអ៊ុយក្រែន។ នៅថ្ងៃព្រហស្បតិ៍ ប្រធានាធិបតីអ៊ុយក្រែន លោកវ្លូឌីមៀរ ហ្សេឡេនស្គីនិយាយថា អ៊ុយក្រែនកំពុងរង់ចាំស្តាប់ការសម្រេចចិត្តដ៏សំខាន់ នៅក្នុងកិច្ចប្រជុំរបស់សម្ព័ន្ធមិត្តនៅប្រទេសអាល្លឺម៉ង់។ ជំហររារែករបស់អាល្លឺម៉ង់ ក្នុងការបញ្ជូនរថក្រោះ Leopard 2 ទៅឲ្យអ៊ុយក្រែននឹងអាចក្លាយជាសំណុំរឿងនាំមុខគេ នៅក្នុងកិច្ចប្រជុំនៅថ្ងៃសុក្រនេះ។ អាល្លឺម៉ង់ផ្តល់ជំនួយយោធាច្រើនមកហើយ សម្រាប់ជួយអ៊ុយក្រែន ប៉ុន្តែ ហេតុអ្វីបានជានៅអល់អែក មិនផ្តល់រថក្រោះ Leopard 2តាមការចង់បានរបស់អ៊ុយក្រែន?
ប្រទេសចំនួន៥០ជួបប្រជុំគ្នាថ្ងៃសុក្រនេះ នៅមូលដ្ឋានទ័ពអាមេរិក នៅប្រទេសអាល្លឺម៉ង់ដើម្បីនិយាយពីការបន្ថែមជំនួយយោធា ដល់ប្រទេសអ៊ុយក្រែន។ តាំងពីមុនបើកកិច្ចប្រជុំម្ល៉េះ ការសន្យាផ្តល់សព្វាវុធដល់កងទ័ពអ៊ុយក្រែនបានធ្លាក់ជាបន្តបន្ទាប់ កាលពីថ្ងៃព្រហស្បតិ៍។
ដើម្បីជាការលើកទឹកចិត្ត ជំរុញឲ្យមានការផ្តល់ជំនួយសព្វាវុធបន្ថែមដល់អ៊ុយក្រែន ប្រទេសជាង ១០ នាំមុខដោយអាមេរិកបានប្រកាសកញ្ចប់ជំនួយយោធា និងសព្វាវុធសំខាន់ៗ ដើម្បីជួយឲ្យកងទ័ពអ៊ុយក្រែន ប្រយុទ្ធវាយដណ្តើមយកទឹកដីរបស់ខ្លួនពីកងទ័ពរុស្ស៊ីមកវិញ។
អាមេរិកបានប្រកាសផ្តល់ជំនួយយោធា តម្លៃ២,៥ពាន់លានដុល្លារ បន្ថែមទៀត ដែលធ្វើឲ្យជំនួយយោធាសរុបរបស់អាមេរិកសម្រាប់អ៊ុយក្រែន កើនដល់២៦,៧ពាន់លានដុល្លារ គិតចាប់តាំងផ្ទុះកើតឡើងសង្រ្គាមរុស្ស៊ី ឈ្លានពានអ៊ុយក្រែន។
នៅក្នុងការថ្លែងបើកកិច្ចប្រជុំនៅមូលដ្ឋានទ័ព នៅប្រទេសអាល្លឺម៉ង់ ប្រមុខការពារជាតិអាមេរិក លោក Llyode Austin បានអំពាវនាវឲ្យប្រទេសលោកខាងលិចផ្តល់ជំនួយបន្ថែមដល់អ៊ុយក្រែន នៅក្នុងពេលវេលាដ៏សំខាន់ ដែលរុស្ស៊ី កំពុងជិតអស់សព្វាវុធ និងបាត់បង់ ខូចខាតអស់ច្រើននៅក្នុងសង្រ្គាម។
តាមការលម្អិតរបស់មន្ទីរបញ្ចកោន កញ្ចប់ជំនួយយោធាបន្ថែមសម្រាប់អ៊ុយក្រែន មានរាប់បញ្ចូល រថពាសដែករបស់អាមេរិក Bradley ៥៩គ្រឿង រថពាសដែកដឹកទាហានStryker ចំនួន ៩០គ្រឿង រថពាសដែកប្រឆាំងមីន ៥៣គ្រឿង និងរថយន្តដឹកទាហាន Humvee ចំនួន ៣៥០គ្រឿង។
បន្ទាប់ពីអាមេរិក នៅមានប្រទេសស៊ុយអែត ដែលបានប្រកាសផ្តល់រថពាសដែកសម្រាប់បាញ់ប្លោង Archer ហ្វាំងឡង់ ដែលជាប់របងជាមួយរុស្ស៊ីបានប្រកាសនៅថ្ងៃបើកកិច្ចប្រជុំនេះតែម្តង ដោយបានសម្រេចផ្តល់ថវិកា៤០០លានអឺរ៉ូ ដែលជាជំនួយយោធាលើកទី១២ ប៉ុន្តែ ដែលធំបំផុតរបស់ប្រទេសហ្វាំងឡង់សម្រាប់អ៊ុយក្រែន។
នៅមុនជំនួបធំ នៅប្រទេសអាល្លឺម៉ង់ ប្រទេសសមាជិករបស់អូតង់ចំនួន១១បានជួបប្រជុំ កាលពីថ្ងៃព្រហស្បតិ៍ម្សិលមិញ នៅមូលដ្ឋានទ័ពរបស់អូតង់ ក្នុងប្រទេសអេស្តូនី ដែលនៅក្នុងប្រទេសចំនួន៩បានសន្យាផ្តល់ជំនួយបន្ថែមដល់អ៊ុយក្រែន។
អង់គ្លេសសន្យាផ្តល់មីស៊ីលBrimstone ចំនួន ៦០០ដើមបន្ថែមទៀតឲ្យអ៊ុយក្រែន។ ដាណឺម៉ាក បានប្រកាសផ្តល់កាំភ្លើងធំ Caesar ដែលផលិតដោយប្រទេសបារាំង ចំនួន ១៩គ្រឿងទៅឲ្យកងទ័ពអ៊ុយក្រែន។ អេស្តូនី សន្យាបញ្ជូនកាំភ្លើងធំHowitzers គ្រាប់កាំភ្លើង និងគ្រាប់បែកប្រឆាំងរថក្រោះ។ ឡេតូនីផ្តល់ប្រព័ន្ធការពារដែនអាកាស ឧទ្ធម្ភាគចក្រ និងដ្រូន ចំណែក ប៉ូឡូញ សន្យាផ្តល់កាំភ្លើង និងគ្រាប់ប្រឆាំងយន្តហោះ។
ប្រទេសចំនួន៥០ជួបប្រជុំដើម្បីនិយាយពីការបន្ថែមជំនួយសព្វាវុធ ទៅឲ្យអ៊ុយក្រែន នៅក្នុងខណៈពេលដែលទីភ្នាក់ងារស៊ើបការណ៍សម្ងាត់អាមេរិកបានព្រមានពីការប្រមូលកម្លាំងកងទ័ព និងការត្រៀមវាយប្រហាររបស់រុស្ស៊ី នៅតំបន់ដុនបាស់ ភាគខាងកើតអ៊ុយក្រែន នៅរដូវផ្ការីកខាងមុខ។
អ៊ុយក្រែននៅតែចង់បានរថក្រោះLeopard 2របស់អាល្លឺម៉ង់
នៅក្នុងវីដេអូសន្និសីទ ទៅកាន់ កិច្ចប្រជុំ របស់ប្រទេសសម្ព័ន្ធមិត្ត នៅថ្ងៃសុក្រនេះ ប្រធានាធិបតី អ៊ុយក្រែន លោកហ្សេឡេនស្គីបានថ្លែងអំណរគុណប្រទេសសម្ព័ន្ធមិត្ត ជាពិសេសអាមេរិកដែលបានបន្ថែមជំនួយយោធា ជួយកងទ័ពអ៊ុយក្រែន។ ប៉ុន្តែ ប្រធានាធិបតីអ៊ុយក្រែនបានអំពាវនាវឲ្យប្រទេសសម្ព័ន្ធមិត្តបង្កើនល្បឿន ក្នុងការផ្តល់ជំនួយសព្វាវុធធុនធ្ងន់ ជាពិសេស រថក្រោះ និងមីស៊ីលចម្ងាយឆ្ងាយ ដែលអ៊ុយក្រែនត្រូវការចាំបាច់ខ្លាំង សម្រាប់ប្រយុទ្ធយកឈ្នះរុស្ស៊ី។
ដោយសារតែរថក្រោះ និងយន្តហោះចម្បាំង មួយភាគធំត្រូវបំផ្លាញខ្ទេចខ្ទីរ ដោយសារការវាយប្រហារមីស៊ីលរបស់រុស្ស៊ីចាប់តាំងពីដើមសង្រ្គាមនៅខែកុម្ភៈ ឆ្នាំមុន អ៊ុយក្រែនត្រូវការ ចង់បានសព្វាវុធធុនធ្ងន់ពីប្រទេសលោកខាងលិច ដូចជា រថក្រោះ មីស៊ីល និងប្រព័ន្ធការពារដែនអាកាសមកជំនួសសព្វាវុធដែលខ្លួនបានបាត់បង់។
នៅប៉ុន្មានថ្ងៃមុននេះ ប្រធានាធិបតីអ៊ុយក្រែន បានបង្ហាញបញ្ជី សព្វាវុធដែលកងទ័ពអ៊ុយក្រែន ត្រូវការសម្រាប់យកទៅប្រយុទ្ធនៅតំបន់ដុនបាស់ ភាគខាងកើតរបស់អ៊ុយក្រែន ដែលនៅក្នុងនោះ មានរថក្រោះ ផលិតឡើងនៅសម័យសហភាពសូវៀត T-72 ដែលកងទ័ពអ៊ុយក្រែនចេះប្រើស្ទាត់ជំនាញ។ តាមប្រធានសេនាធិការកងទ័ព Valéri Zaloujny អ៊ុយក្រែន គេត្រូវការរថក្រោះ ប្រមាណ៣០០គ្រឿង។ កន្លងមក ប្រទេសអឺរ៉ុបខាងកើត ដូចជាប៉ូឡូញជាដើម ដែលធ្លាប់មានរថក្រោះផលិតឡើងនៅសម័យសហភាពសូវៀត បានប្រគល់រថក្រោះ ប្រភេទនេះ សរុប ៣០០គ្រឿងទៅឲ្យអ៊ុយក្រែន ប៉ុន្តែ វានៅតែមិនគ្រប់គ្រាន់។
អង់គ្លេស ផ្ទាល់បានសន្យាផ្តល់រថក្រោះChallenger 2១៤គ្រឿង ប៉ុន្តែ ចំនួននេះនៅតែតិចតួច បើប្រៀបធៀបនឹងតម្រូវការចង់បានរបស់អ៊ុយក្រែន។ ម្យ៉ាង អ៊ុយក្រែនចង់បានខ្លាំង នៅពេលនេះ គឺរថក្រោះ ផលិតឡើង នៅប្រទេសលោកខាងលិច ជាពិសេស រថក្រោះ Leopard 2ប្រទេសអាល្លឺម៉ង់។
នៅក្នុងវីដេអូសន្និសីទទៅកាន់រដ្ឋមន្រ្តីការពារជាតិរបស់ប្រទេសសម្ព័ន្ធមិត្ត ប្រធានាធិបតីអ៊ុយក្រែន បាននិយាយថា អ៊ុយក្រែន កំពុងរង់ចាំការសម្រេចចិត្តដ៏សំខាន់មួយ នៅក្នុងកិច្ចប្រជុំនៅថ្ងៃនេះ។ ដោយមិននិយាយចំឈ្មោះអាល្លឺម៉ង់ មេដឹកនាំអ៊ុយក្រែនពន្លយថា គេត្រូវរង់ចាំការសម្រេចចិត្តរបស់ប្រទេសមួយប៉ុណ្ណោះ។
ហ្វាំងឡង់ លីទុយអានី និងប៉ូឡូញបានប្រកាសត្រៀមខ្លួនផ្តល់រថក្រោះ ប្រភេទLeopard 2ទៅឲ្យអ៊ុយក្រែន ប៉ុន្តែ គេត្រូវរង់ចាំ ភ្លើងខៀវពីប្រទេសអាល្លឺម៉ង់ ដែលជាម្ចាស់កម្មសិទ្ធិបញ្ញារថក្រោះ Leopard2។
នៅមុនកិច្ចប្រជុំ ចាប់ផ្តើម រដ្ឋមន្រ្តីការពារជាតិរបស់ប្រទេសលីទុយអានីនិយាយថា នឹងមានប្រទេសជាច្រើនដែលអាចប្រកាសផ្តល់រថក្រោះ Leopard 2ទៅឲ្យអ៊ុយក្រែន។ ប៉ុន្តែ នៅទីបំផុត គេត្រូវរង់ចាំការសម្រេចរបស់អាល្លឺម៉ង់។
មេបញ្ជាកកងទ័ពអាមេរិក ប្រចាំអូតង់បានបញ្ជាក់ថា រថក្រោះតែមួយមុខនឹងមិនអាចធ្វើឲ្យអ៊ុយក្រែនឈ្នះសង្រ្គាមនោះទេ។ អ៊ុយក្រែន ត្រូវការអាវុធ គ្រប់ប្រភេទ។
អ្នកនាំពាក្យរបស់វិមានក្រេមឡាំង លោកឌីមីទ្រី ប៉េស្កូវ បានប្រតិកម្ម ដែរថា ទោះអ៊ុយក្រែន មានរថក្រោះទំនើប ក៏នឹងគ្មានអ្វីផ្លាស់ប្តូរនៅក្នុងសមរភូមិដែរ។
ហេតុអ្វីអាល្លឺម៉ង់បដិសេធមិនផ្តល់រថក្រោះ Leopard 2ឲ្យអ៊ុយក្រែន?
អាល្លឺម៉ង់បានរងការដាក់សម្ពាធខ្លាំងណាស់ពីប្រទេសសម្ព័ន្ធមិត្ត និងអ៊ុយក្រែន ដែលទាមទារចង់ឲ្យអាល្លឺម៉ង់ផ្តល់រថក្រោះ Leopard 2ទៅឲ្យកងទ័ពអ៊ុយក្រែន។ អាល្លឺម៉ង់មិនព្រមប្រគល់រថក្រោះ Leopard 2ទៅឲ្យអ៊ុយក្រែនមែន ប៉ុន្តែ អាល្លឺម៉ង់នាំមុខគេ នៅសហភាពអឺរ៉ុប ខាងផ្តល់ជំនួយយោធាច្រើនសន្ធឹកសន្ធាប់ដល់កងទ័ពអ៊ុយក្រែន បន្ទាប់ពីសហរដ្ឋអាមេរិក។
នៅក្រោយបារាំងប្រកាសផ្តល់រថពាសដែក ធុនស្រាល ជួយអ៊ុយក្រែន អាល្លឺម៉ង់ បានប្រកាស ផ្តល់រថពាសដែក ប្រភេទ Marder ៤០គ្រឿង។ ប៉ុន្តែ ជំនួយរបស់អាល្លឺម៉ង់ នៅតែមិនទាន់ធ្វើឲ្យអ៊ុយក្រែន ពេញចិត្ត ព្រោះអ៊ុយក្រែននៅតែចង់បានរថក្រោះ Leopard 2 ដែលទំនើប មានសមត្ថភាពប្រយុទ្ធ ជួយឲ្យកងទ័ពអ៊ុយក្រែន អាចបាញ់ចំគោលដៅទីតាំងអាវុធរបស់សត្រូវ។ ម្យ៉ាង អ៊ុយក្រែន ទាមទារចង់បានរថក្រោះ Leopard 2 ព្រោះថា បើសិនអាល្លឺម៉ង់បើកភ្លើងខៀវមែន នោះ អ៊ុយក្រែន នឹងទទួលបានរថក្រោះ រថក្រោះ Leopard 2ក្នុងចំនួនច្រើន។ ត្រូវដឹងថា ប្រទេសអឺរ៉ុបជាច្រើនដែលបានទិញរថក្រោះរបស់អាល្លឺម៉ង់ បានសន្យាហើយថា គេនឹងផ្តល់រថក្រោះ Leopard 2ប៉ុន្តែ គេរង់ចាំតែការអនុញ្ញាតរបស់អាល្លឺម៉ង់។
ហេតុអ្វី អាល្លឺម៉ង់បានបដិសេធមិនប្រគល់រថក្រោះ Leopard 2ទៅឲ្យអ៊ុយក្រែន? នាយករដ្ឋមន្រ្តីអាល្លឺម៉ង់ លោកអូឡាហ្វ ស្ហុល៍ផ្ទាល់ ធ្លាប់បាននិយាយទៅកាន់សមាជិកសភាអាមេរិក នៅក្នុងវេទិកាដាវ៉ូស ថា អាល្លឺម៉ង់នឹងបញ្ជូនរថក្រោះ Leopard 2ទៅឲ្យអ៊ុយក្រែន បើសិនអាមេរិក យល់ព្រម ប្រគល់រថក្រោះ Abrams ដ៏ទំនើបរបស់អាមេរិកទៅឲ្យកងទ័ពអ៊ុយក្រែនដែរ។ សម្រាប់ប្រមុខរដ្ឋាភិបាលអាល្លឺម៉ង់ ប៊ែរឡាំងត្រូវការសហការចាំបាច់ជាមួយសម្ព័ន្ធមិត្តអាមេរិក ក្នុងរឿងផ្តល់អាវុធទៅឲ្យអ៊ុយក្រែន។ ប៉ុន្តែ អាមេរិកបានបញ្ជាក់ហើយថា ខ្លួនមិនអាចផ្តល់រថក្រោះ Abrams ទៅឲ្យអ៊ុយក្រែនបានទេ ដោយសាររថក្រោះថ្លៃ និងទំនើបខ្លាំង (មានបំពាក់ដោយម៉ាស៊ីនយន្តហោះ) ត្រូវការថែទាំជួសជុលសំខាន់ ហើយទាហានអ៊ុយក្រែន នៅមិនទាន់មានសមត្ថភាពប្រើប្រាស់វានៅឡើយ។
រដ្ឋាភិបាលអាល្លឺម៉ង់ រារែកមិនចង់ផ្តល់រថក្រោះទំនើបរបស់ខ្លួនទៅបើកចរាចរណ៍ក្នុងសមរភូមិប្រយុទ្ធក្នុងទឹកដីអ៊ុយក្រែន ដោយសារម្យ៉ាង ប៊ែរឡាំងខ្លាចមានការសងសឹកពីរុស្ស៊ី។ រហូតមក ប្រទេសលោកខាងលិចបានផ្តល់សព្វាវុធ ឲ្យអ៊ុយក្រែន ដើម្បីធ្វើយ៉ាងណាឲ្យអ៊ុយក្រែន អាចត្រឹមការពារខ្លួន និងបើកការប្រយុទ្ធក្នុងចម្ងាយខ្លី ព្រោះថា គេខ្លាចបើសិនបានអាវុធទំនើបៗ នោះអ៊ុយក្រែននឹងអាចបាញ់ចូលដល់ទឹកដីរុស្ស៊ី ដែលនឹងធ្វើឲ្យរុស្ស៊ីខឹងឆេះដុំ។ ទី២ អាល្លឺម៉ង់មិនចង់ឲ្យរថក្រោះ អាល្លឺម៉ង់មានវត្តមានក្នុងសមរភូមិអ៊ុយក្រែន ព្រោះអាល្លឺម៉ង់មិនចង់ជាន់ដានចាស់ ក្នុងសម័យសង្រ្គាមលោកលើកទី២ នៅពេលរថក្រោះអាល្លឺម៉ង់ ក្រោមរបបណាហ្ស៊ី ហ៊ីត្លែរ បង្កមហន្តរាយសម្លាប់ជីវិតមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ