នាយករដ្ឋមន្រ្តីអង់គ្លេសសន្យាប្រគល់រថក្រោះChallenger 2ទៅឲ្យកងទ័ពអ៊ុយក្រែន
ក្រុមប្រទេសលោកខាងលិចប្រកាសបញ្ជូនរថក្រោះ រថពាសដែកជាបន្តបន្ទាប់គ្នាទៅឲ្យអ៊ុយក្រែន។ បន្ទាប់ពីបារាំង អាល្លឺម៉ង់ អាមេរិក ប៉ូឡូញ អង់គ្លេសជាប្រទេសចុងក្រោយគិតត្រឹមថ្ងៃសៅរ៍ ដែលបានប្រកាសផ្តល់រថក្រោះទៅឲ្យកងទ័ពអ៊ុយក្រែន។ នៅក្នុងជំនួបវីដេអូកាលពីថ្ងៃសៅរ៍ទី ១៤មករា លោកនាយករដ្ឋមន្រ្តីអង់គ្លេស រីស៊ី ស៊ូណាក់បាននិយាយប្រាប់ប្រធានាធិបតីអ៊ុយក្រែន លោកវ៉ូឡូឌីមៀរ ហ្សេឡេនស្គីថា អង់គ្លេសនឹងប្រគល់រថក្រោះធុនធ្ងន់ និងសម្ភារៈយោធាផ្សេងទៀតទៅឲ្យអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
នៅក្នុងជំនួបវីដេអូជាមួយ ប្រធានាធិបតីអ៊ុយក្រែន នាយករដ្ឋមន្រ្តីអង់គ្លេស រីស៊ី ស៊ូណាក់បានគូសបញ្ជាក់ពីមហិច្ឆតារបស់អង់គ្លេសដើម្បីបង្កើនការគាំទ្រ តាមរយៈការផ្តល់រថក្រោះ Challenger 2 ទៅឲ្យកងទ័ពអ៊ុយក្រែន។ តាមអ្នកនាំពាក្យរបស់នាយករដ្ឋមន្រ្តីអង់គ្លេស មេដឹកនាំប្រទេសទាំងពីរយល់ស្របគ្នាពីការទាញយកប្រយោជន៍នៃជ័យជំនះថ្មីៗរបស់កងទ័ពអ៊ុយក្រែន ក្នុងការវាយរុញច្រានកងទ័ពរុស្ស៊ី នៅលើសមរភូមិ។
រថក្រោះ Challenger 2 ផលិតឡើងដោយបច្ចេកវិទ្យាអង់គ្លេស ធ្លាប់បានកងទ័ពអង់គ្លេសប្រើប្រាស់តាំងពី១៩៩៤ នៅក្នុងសង្រ្គាមកូសូវ៉ូ និងនៅសមរភូមិអ៊ីរ៉ាក់។ នេះបើតាមក្រសួងការពារជាតិអង់គ្លេស។
នៅក្នុងសារធ្វីតធ័រ ប្រធានាធិបតីអ៊ុយក្រែន លោកហ្សេឡេនស្គីនិយាយអរគុណអង់គ្លេសដែលបានសម្រេចចិត្តផ្តល់រថក្រោះទំនើប Challenger 2 ឲ្យអ៊ុយក្រែន។ សម្រាប់មេដឹកនាំអ៊ុយក្រែន ការសម្រេចចិត្តរបស់អង់គ្លេសមិនត្រឹមទៅជួយពង្រឹងកម្លាំងប្រយុទ្ធរបស់កងទ័ពអ៊ុយក្រែន ប៉ុន្តែវាជាសញ្ញាផងដែរសម្រាប់ប្រទេសដៃគូផ្សេងទៀតរបស់អ៊ុយក្រែន។
គិតចាប់តាំងពីសង្រ្គាមរុស្ស៊ីឈ្លានពានអ៊ុយក្រែន សម្ព័ន្ធមិត្តអឺរ៉ុបរបស់អ៊ុយក្រែន បានផ្តល់ទៅឲ្យអ៊ុយក្រែន នូវរថក្រោះ៣០០គ្រឿងផលិតឡើងនៅសម័យសហភាពសូវៀត ប៉ុន្តែត្រូវបានគេធ្វើទំនើបកម្មយកប្រើប្រាស់ឡើងវិញ។ អ៊ុយក្រែនធ្លាប់បានទាមទារចង់បានសព្វាវុធទំនើបៗផលិតនៅប្រទេសលោកខាងលិច ដើម្បីយកទៅប្រើប្រយុទ្ធទប់ទល់នឹងកងទ័ពរុស្ស៊ី។ ប៉ុន្តែ ប្រទេសលោកខាងលិចមិនព្រម។
ទើបនៅដើមខែ មករា បារាំងបាននាំមុខគេដោយបានប្រកាសផ្តល់រថពាសដែកធុនស្រាលផលិតដោយបច្ចេកវិទ្យាបារាំងទៅឲ្យអ៊ុយក្រែន។ នៅប៉ុន្មានថ្ងៃក្រោយមកទៀត អាល្លឺម៉ង់បានសន្យាប្រគល់រថក្រោះMarder ៤០គ្រឿង ចំណែកអាមេរិកប្រកាសផ្តល់រថក្រោះប្រភេទ Bradley ៥០គ្រឿង។ នៅថ្ងៃពុធសប្តាហ៍នេះ ប៉ូឡូញ ដែលនៅជាប់របងជាមួយអ៊ុយក្រែនបានប្រកាសត្រៀមខ្លួនបញ្ជូនរថក្រោះប្រភេទLeopard 2ផលិតនៅអាល្លឺម៉ង់ ដែលត្រូវគេចាត់ទុក ជាអាវុធដ៏ទំនើប មានប្រសិទ្ធិភាពខ្ពស់នៅក្នុងសមរភូមិប្រយុទ្ធ។
តាមអ្នកនាំពាក្យរបស់ប្រមុខរដ្ឋាភិបាលអង់គ្លេស នៅក្នុងជំនួបតាមវីដេអូ កាលពីថ្ងៃសៅរ៍ នាយករដ្ឋមន្រ្តីអង់គ្លេស និងប្រធានាធិបតីអ៊ុយក្រែនថ្លែងស្វាគមជំនួយអន្តរជាតិ ជាពិសេសប៉ូឡូញដែលផ្តល់រថក្រោះទំនើប Leopard2។
លោកនាយករដ្ឋមន្រ្តីអង់គ្លេស រីស៊ី ស៊ូណាក់បានសង្កត់ធ្ងន់ថា លោកនិងរដ្ឋាភិបាលអង់គ្លេសនឹងធ្វើការយ៉ាងសកម្មជាមួយដៃគូអន្តរជាតិ ដើម្បីផ្តល់ឲ្យបានលឿនបំផុត គ្រឿងសព្វាវុធដែលគេបានសន្យាប្រគល់ទៅឲ្យកងទ័ពអ៊ុយក្រែន។ ការផ្តល់សព្វាវុធបន្ថែមទៅឲ្យអ៊ុយក្រែននឹងអាចត្រូវគេប្រកាសឲ្យដឹងនៅថ្ងៃទី ២០មករាខាងមុខ នៅក្នុងកិច្ចប្រជុំប្រទេសសម្ព័ន្ធមិត្តរបស់អ៊ុយក្រែន ដែលធ្វើឡើងនៅទីក្រុង Ramstein ប្រទេសអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ