បារាំងនិងអាល្លឺម៉ង់ប្រារព្ធខួប ៦០ឆ្នាំនៃសន្ធិសញ្ញាមិត្តភាព ខណៈដែលទ្វីបអឺរ៉ុបកំពុងស្គាល់សង្រ្គាមជាថ្មី
ចុះផ្សាយនៅថ្ងៃ៖
ស្តាប់ - ០៦:៤៤
នៅថ្ងៃអាទិត្យ ទី២២ មករានេះ ប្រទេសបារាំង និងប្រទេសអាល្លឺម៉ង់ប្រារព្ធខួប ៦០ឆ្នាំនៃសន្ធិសញ្ញាមិត្តភាព។ សន្ធិសញ្ញាមួយនេះត្រូវបានចុះហត្ថលេខាកាលពីថ្ងៃទី២២ មករា ឆ្នាំ ១៩៦៣ ក្នុងជំនាន់ប្រធានាធិបតីបារាំងលោកឆាល៍ ដឺហ្គោល និងនាយករដ្ឋមន្រ្តីអាល្លឺម៉ង់លោកកុនរ៉ាដ អាដឺណាអូអេ។ ពិធីប្រារព្ធខួប ៦០ឆ្នាំនៃសន្ធិសញ្ញាមិត្តភាពបារាំង អាល្លឺម៉ង់ធ្វើឡើង ខណៈដែលទ្វីបអឺរ៉ុបកំពុងប្រឈមនឹងសង្រ្គាមរុស្ស៊ីឈ្លានពានអ៊ុយក្រែន។ សង្រ្គាមមួយនេះហាក់កំពុងបង្កឲ្យមានភាពខុសគ្នា និងការយល់ខុសគ្នារវាងក្រុងប៉ារីស និងក្រុងប៊ែរឡាំង។
នៅពេលដែលគេនិយាយពីសន្ធិសញ្ញាមិត្តភាពរវាងបារាំង និងអាល្លឺម៉ង់ គឺគេចង់ផ្តោតលើសន្ធិសញ្ញាអេលីហ្សេដែលបារាំង និងអាល្លឺម៉ង់បានចុះហត្ថលេខាកាលពី ៦០ឆ្នាំមុននៅវិមានប្រធានាធិបតីបារាំងអេលីហ្សេ។ គេអាចហៅសន្ធិសញ្ញាអេលីហ្សេជាសន្ធិសញ្ញានៃការផ្សះផ្សា និងបង្រួបបង្រួមរវាងបារាំង និងអាល្លឺម៉ង់ ក្រោយពីប្រទេសទាំងពីរបានស្គាល់សង្រ្គាមបង្ហូរឈាមគ្នានៅក្នុងសម័យសង្រ្គាមលោក។ តាមរយៈសន្ធិសញ្ញាមួយនេះកាលណោះ បារាំង និងអាល្លឺម៉ង់ចង់បញ្ជាក់ពីការទុកមួយអន្លើនូវរឿងរ៉ាវអតីតកាលល្វីងជូរចត់ និងចាប់ដៃរួមសាមគ្គីគ្នាក្នុងនាមជាប្រទេសជិតខាង និងដើម្បីកសាងសហគមន៍អឺរ៉ុបមួយ។
គឺតាមរយៈសន្ធិសញ្ញាអេលីហ្សេកាលពី ៦០ឆ្នាំមួយនេះដែលក្រុងប៉ារីស និងក្រុងប៊ែរឡាំងបានយកធ្វើជាមូលដ្ឋានដើម្បីបន្តពង្រឹងកិច្ចសហប្រតិបត្តិការ និងមិត្តភាពរវាងគ្នា ពិសេសក្នុងវិស័យនយោបាយការបរទេស វិស័យការពារ វិស័យសន្តិសុខ វិស័យយុវជន និងវិស័យវប្បធម៌។ តែគេមិនត្រូវភ្លេចនិយាយទេថា សន្ធិសញ្ញាដដែលមួយនេះត្រូវបានថ្នាក់ដឹកនាំបារាំង និងអាល្លឺម៉ង់ធ្វើការកែសម្រួល និងធ្វើឲ្យកាន់តែចម្រើនជាបន្តបន្ទាប់ក្នុងរយៈពេល ៦០ឆ្នាំកន្លងទៅនេះ។ ជាក់ស្តែងក្នុងឆ្នាំ ១៩៨៨សន្ធិសញ្ញានេះត្រូវបានជំនាន់ប្រធានាធិបតីបារាំងលោកហ្រ្វង់ស័រ មីតេរ៉ង់ និងនាយករដ្ឋមន្រ្តីអាល្លឺម៉ង់លោកហ៊ែលមុត ខូលពង្រីកបន្ថែមដោយបង្កើតឲ្យមានក្រុមប្រឹក្សាបារាំង អាល្លឺម៉ង់សម្រាប់សន្តិសុខ និងគោលនយោបាយសេដ្ឋកិច្ច និងរូបិយវត្ថុ។
ក្រៅពីកិច្ចសហប្រតិបត្តិការ និងមិត្តភាពទ្វេភាគីបារាំង និងអាល្លឺម៉ង់ក៏ជាប្រទេសស្ថាបនិក និងជាក្បាលម៉ាស៊ីននៃវត្តមានសហភាពអឺរ៉ុបនាពេលបច្ចុប្បន្នដែរ។
ពិធីប្រារព្ធខួប ៦០ឆ្នាំនៃមិត្តភាពបារាំង អាល្លឺម៉ង់រៀបចំក្នុងប្រទេសបារាំង
ពិធីប្រារព្ធខួប ៦០ឆ្នាំនៃមិត្តភាពបារាំង អាល្លឺម៉ង់រៀបចំក្នុងប្រទេសបារាំងនៅសកលវិទ្យាល័យស័កប៊នក្រុងប៉ារីសដោយមានការថ្លែងសុន្ទរកថារបស់ប្រធានាធិបតីបារាំងលោកអេម៉ានុយអែល ម៉ាក្រុង និងនាយករដ្ឋមន្រ្តីអាល្លឺម៉ង់លោកអូឡាហ្វ ស្ហុលស៍នៅចំពោះមុខក្រុមអ្នកតំណាងរាស្រ្តនៃប្រទេសទាំងពីរ។ បន្ទាប់មក មានការរៀបចំនូវកិច្ចប្រជុំក្រុមប្រឹក្សាគណៈរដ្ឋមន្រ្តីនៃប្រទេសទាំងពីរ និងការទទួលទានអាហារពេលល្ងាចរវាងលោកម៉ាក្រុង លោកស្ហុលស៍។ អ្វីជាការកត់សម្គាល់ ខួប ៦០ឆ្នាំនៃមិត្តភាពបារាំង អាល្លឺម៉ង់ពេលនេះបានធ្វើឡើង ខណៈដែលទ្វីបអឺរ៉ុបកំពុងប្រឈមនឹងសង្រ្គាមថ្មីដែលជាសង្រ្គាមរុស្ស៊ីឈ្លានពានអ៊ុយក្រែន។
សង្រ្គាមបង្កឡើងដោយរុស្ស៊ីមួយនេះហាក់កំពុងធ្វើឲ្យបារាំង និងអាល្លឺម៉ង់មានភាពរកាំរកូសខ្លះ ពិបាកមើលមុខគ្នាចំ និងយល់ឃើញមិនដូចគ្នា។ តាមពិត ភាពតានតឹង និងរកាំរកូសរវាងក្រុងប៊ែរឡាំង និងក្រុងប៉ារីសទើបកើតមានខ្លាំងនៅក្នុងជំនាន់នាយករដ្ឋមន្រ្តីអាល្លឺម៉ង់លោកអូឡាហ្វ ស្ហុលស៍។ គួររម្លឹកថា កិច្ចប្រជុំក្រុមប្រឹក្សាគណៈរដ្ឋមន្រ្តីនៃប្រទេសទាំងពីរត្រូវធ្វើតាំងពីឆ្នាំ ២០២២ មកម្ល៉េះ តែត្រូវបានបារាំងជាអ្នកសម្រេចលើកពេល។ តែទោះជាមានការខ្វែងគំនិតគ្នា និងភាពមិនចុះសម្រុងគ្នាក៏ដោយក៏បារាំង និងអាល្លឺម៉ង់តែងព្យាយាមបង្ហាញការឯកភាព និងសាមគ្គីភាពរវាងគ្នាជានិច្ច។
សង្រ្គាមអ៊ុយក្រែនរុញអាល្លឺម៉ង់ឲ្យគិតប្រយោជន៍ផ្ទាល់ខ្លួនជាងប្រយោជន៍រួម?
គឺសង្រ្គាមរុស្ស៊ីឈ្លានពានអ៊ុយក្រែនដែលបារាំង និងអាល្លឺម៉ង់ផ្តើមមានភាពតានតឹងខ្លះរវាងគ្នា។ ភាពមិនចុះសម្រុងគ្នា ឬការយល់ឃើញមិនដូចគ្នានេះមិនអាចកំបាំងភ្នែកអ្នកដទៃបានឡើយ ពិសេសនៅក្នុងរង្វង់ប្រទេសសមាជិកសហភាពអឺរ៉ុបដែលបារាំង និងអាល្លឺម៉ង់ជាប្រទេសស្ថាបនិកដូចគ្នា ពោលមិនត្រឹមជាប្រទេសសមាជិកប៉ុណ្ណោះទេ។ គេអាចនិយាយបានថាជាងពេលណាៗទាំងអស់ ពិសេសតាំងពីការដួលរលំជញ្ជាំងប៊ែរឡាំងក្នុងខែវិច្ឆិកា ឆ្នាំ ១៩៨៩ មក គេមិនដែលឃើញបារាំង និងអាល្លឺម៉ង់ស្គាល់ភាពតានតឹងដូចពេលនេះទេ។
ពិតណាស់ ក្រុងប៉ារីស និងក្រុងប៊ែរឡាំងបានថ្កោលទោសសង្រ្គាមរុស្ស៊ីឈ្លានពានអ៊ុយក្រែនដូចគ្នា។ តែប្រទេសទាំងពីរយល់ឃើញមិនដូចគ្នាពីការបន្តប្រឹងប្រែងជួយអ៊ុយក្រែន និងពីការបញ្ជៀសកុំឲ្យសង្រ្គាមមួយនេះរីករាលដាលកាន់តែធំ។ មួយវិញទៀត សង្រ្គាមអ៊ុយក្រែនហាក់កំពុងរុញឲ្យអាល្លឺម៉ង់យល់ផ្សេង និងមានវិធានការផ្សឹងដាច់ដោយឡែកពីបារាំង និងពីអឺរ៉ុប។ គេអាចនិយាយដោយខ្លីថា អាល្លឺម៉ង់ហាក់បានគិតប្រយោជន៍ផ្ទាល់ខ្លួនជាងប្រយោជន៍រួមរបស់សហភាពអឺរ៉ុបដែលបារាំងចង់បាន ពិសេសនៅក្នុងវិស័យការពារ និងវិស័យថាមពល។
នៅពេលបារាំងសង្ឃឹមពង្រឹងអធិបតេយ្យភាពអឺរ៉ុបដើម្បីធានាសន្តិសុខរបស់សហភាពអឺរ៉ុបទាំងមូល អាល្លឺម៉ង់បានងាកទៅពង្រឹងវិស័យការពារសម្រាប់តែខ្លួនឯងដោយសម្រេចបង្កើនថវិកាការពារជាតិ និងងាកទៅទិញគ្រឿងសព្វាវុធរបស់អ្នកផ្សេង ពិសេសយន្តហោះចម្បាំងអាមេរិក F-៣៥។ ទន្ទឹមគ្នានេះ អាល្លឺម៉ង់មានភាពអាល់អែលខ្លាំងនៅក្នុងគម្រោងអភិវឌ្ឍវិស័យការពាររួមនៅក្នុងចំណោមប្រទេសសមាជិកអឺរ៉ុប។ ទាក់ទងនឹងវិស័យថាមពលដែលជាប្រធានបទចម្រូងចម្រាសទី២ រដ្ឋាភិបាលអាល្លឺម៉ង់របស់លោកស្ហុលស៍ដែលពឹងខ្លាំងលើឧស្ម័នរុស្ស៊ីអាល់អែលមិនចង់ឲ្យអឺរ៉ុបកំណត់តម្លៃប្រេងទិញពីរុស្ស៊ី និងមិនឃើញអឺរ៉ុបជាអ្នកចេញមុខទិញឧស្ម័នរួមសម្រាប់ចែកចាយឲ្យប្រទេសសមាជិក។ គេត្រូវរង់ចាំដល់ខែធ្នូ ឆ្នាំ ២០២២ ទើបលោកស្ហុលស៍សម្រេចដើរតាមផ្លូវរបស់អឺរ៉ុប។
យ៉ាងណាក៏ដោយ បារាំង និងអាល្លឺម៉ង់សង្ឃឹម និងចាំបាច់ជម្រះភាពយល់ឃើញមិនដូចគ្នា និងបិទបញ្ចប់ភាពមិនចុះសម្រុងគ្នាតាមរយៈពិធីប្រារព្ធខួប ៦០ឆ្នាំនៃមិត្តភាពរវាងគ្នាពេលនេះ។ បារាំង និងអាល្លឺម៉ង់បានយល់ដូចគ្នាថា ទំនាក់ទំនងល្អរវាងគ្នាមិនមែនកម្រិតត្រឹមទ្វេភាគី និងដើម្បីតែប្រយោជន៍រវាងប្រទេសទាំងពីរប៉ុណ្ណោះទេ តែក៏ដើម្បីប្រយោជន៍រួមសម្រាប់សហភាពអឺរ៉ុបទាំងមូលដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ