UNODC៖ការប្រែប្រួលអាកាសធាតុជាកត្តាដែលបានធ្វើឲ្យការជួញដូរមនុស្សកើនកាន់តែខ្លាំង
ចុះផ្សាយនៅថ្ងៃ៖
ស្តាប់ - ០៦:០៨
នៅថ្ងៃអង្គារ ទី២៤ មករានេះ ការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្មហៅកាត់ជាភាសាអង់គ្លេស UNODC បានចេញផ្សាយរបាយការណ៍មួយស្តីពីការជួញដូរមនុស្សក្នុងលោក។ UNODC បានលើកឡើងនៅក្នុងរបាយការណ៍ថា ការប្រែប្រួលអាកាសធាតុជាកត្តាចម្បងមួយដែលបានធ្វើឲ្យការជួញដូរមនុស្សកើនឡើងកាន់តែខ្លាំង។ ក្រៅពីនេះ កត្តាផ្សេងៗទៀតដូចជាសង្រ្គាម ជម្លោះអាវុធ និងកូវីដ១៩ក៏កំពុងបន្តផ្តល់អំណោយផលល្អ និងភាពងាយស្រួលដល់ក្រុមអ្នកជួញដូរមនុស្សដែរ។
បើមើលមួយភ្លែតទៅ ការចាត់ទុកការប្រែប្រួលអាកាសធាតុជាកត្តាចម្បងមួយនៃកំណើនជួញដូរមនុស្សពិតជាគួរឲ្យឆ្ងល់ និងហាក់មិនសូវទំនងសោះឡើយ។ តែគេមិនត្រូវភ្លេចនិយាយទេថា លទ្ធផលដែលទទួលបានពីការប្រែប្រួលអាកាសធាតុ និយាយជារួម និងគ្រោះមហន្តរាយធម្មជាតិ និយាយដោយឡែក គឺដូចគ្នាបិះបិតនឹងលទ្ធផលដែលទទួលបានពីសង្រ្គាម និងជម្លោះប្រដាប់អាវុធ។ លទ្ធផលដែលគេចង់និយាយនេះ គឺការរត់ភៀសខ្លួនរបស់ប្រជាជនដើម្បីគេចពីសង្រ្គាម ជម្លោះប្រដាប់អាវុធ និងពីតំបន់ដែលបានរងគ្រោះដោយគ្រោះធម្មជាតិ ដូចជាគ្រោះរាំងស្ងួត គ្រោះទឹកជំនន់ ឬមួយក៏ព្យុះសង្ឃរាជាដើម។
ការរត់ភៀសខ្លួនរបស់ប្រជាជនត្រូវបាន UNODC ចែកចេញជាពីរប្រភេទ គឺអ្នកបម្លាស់ទីក្នុងស្រុកពីកន្លែងមួយទៅកន្លែងមួយទៀត និងអ្នកចាកចេញពីស្រុកកំណើតទៅកាន់ប្រទេសផ្សេង។ គួរបញ្ជាក់ថា ប្រឈមនឹងគ្រោះធម្មជាតិដែលជាផលវិបាកនៃការប្រែប្រួលអាកាសធាតុ មានស្រុក និងតំបន់ខ្លះបានក្លាយជាទីកន្លែងដែលលែងរស់នៅបានទៀតឡើយ ហើយប្រជាជនត្រូវបង្ខំចិត្តចាកចេញទៅរស់នៅកន្លែងផ្សេង។ មួយវិញទៀត ប្រជាជនដែលភៀសខ្លួនចាកចេញមួយចំនួនលែងមានអ្វីទីពឹងដោយសារពួកគេបានបាត់បង់គ្រប់យ៉ាង ពិសេសការងារ និងចំណូលប្រចាំថ្ងៃ។
នៅក្នុងករណីនេះ ក្រុមជួញដូរមនុស្សបានឆក់យកឱកាសនេះដើម្បីអូសទាញអ្នកគ្មានទីពឹងទាំងនោះដោយផ្តល់យោបល់ឲ្យទៅរស់នៅកន្លែងនេះ ឬកន្លែងនោះ ឲ្យធ្វើការងារនេះ ឬការងារនោះ។ តែការពិត នេះគ្រាន់ជាអន្ទាក់របស់ក្រុមជួញដូរមនុស្សដើម្បីយកពួកគេឲ្យធ្វើទៅធ្វើអ្វីផ្សេង ដូចយ៉ាងឲ្យធ្វើការដោយបង្ខំ ឬឲ្យរកស៊ីផ្លូវភេទ។ នេះហើយជាហេតុផលរបស់ UNODC ដោយសំអាងលើទិន្នន័យដែលប្រមូលបានពី ១៤១ប្រទេសពីឆ្នាំ ២០១៧ ដល់ឆ្នាំ ២០២០ និងការសិក្សា វិភាគលើសំណុំរឿងតុលាការចំនួន ៨០០ករណី។
អាស៊ីជាតំបន់រងគ្រោះខ្លាំងជាងគេ
អាស៊ីត្រូវបាន UNODC សម្គាល់ឃើញពីកំណើនជួញដូរមនុស្សដោយការប្រែប្រួលអាកាសធាតុ។ នេះក៏ដោយសារតែប្រទេសខ្លះនៅអាស៊ីបានរងគ្រោះខ្លាំងជាងគេពីផលវិបាកកើតចេញពីការប្រែប្រួលអាកាសធាតុ។ នៅក្នុងរបាយការណ៍ UNODC បានផ្តោតលើប្រទេសចំនួនពីរ គឺហ្វីលីពីន និងបង់ក្លាដែសដែលឧស្សាហ៍កើតមាន និងប្រឈមខ្លាំងនឹងខ្យល់ព្យុះសង្ឃរា។ UNODC បានកត់សម្គាល់ឃើញពីកំណើនជួញដូរមនុស្សនៅក្នុងប្រទេសទាំងពីរនេះតាមរយៈរូបភាពនៃការរៀបចំយុទ្ធនាការជ្រើសរើសពលករ។ តែនៅទីបំផុត ពលករទាំងនោះត្រូវបានគេយកទៅឲ្យធ្វើការដោយបង្ខំដែលនេះជារូបភាពមួយនៃការជួញដូរមនុស្ស។
ក្រៅពីអាស៊ី របាយការណ៍របស់ UNODC ក៏បានលើកឡើងពីប្រទេសនៅអាហ្រ្វិក ពិសេសហ្កាណាដែលរងគ្រោះដោយភាពរាំងស្ងួត និងគ្រោះទឹកជំនន់។ ចំណែកតំបន់ការ៉ាអ៊ីបជាតំបន់ដែលប្រឈមខ្លាំងនឹងព្យុះសង្ឃរា និងកំណើនទឹកសមុទ្រ។ ក្រៅពីផលវិបាកកើតចេញពីការប្រែប្រួលអាកាសធាតុដែលជាកត្តាថ្មីនៃកំណើនការជួញដូរមនុស្ស UNODC មិនភ្លេចរម្លឹកពីផលវិបាកដែលកើតចេញពីជម្លោះប្រដាប់អាវុធដែលកំពុងបន្តចិញ្ចឹមឲ្យមានការជួញដូរមនុស្សយ៉ាងសកម្មខ្លាំង។
ត្រង់ចំណុចនេះ អាហ្រ្វិកត្រូវបាន UNODC ចាត់ទុកជាតំបន់ដែលកំពុងគ្របដណ្តប់ខ្លាំង និងកំពុងផ្តល់ភាពងាយស្រួលដល់ក្រុមជួញដូរមនុស្ស។ ចំណែកនៅអឺរ៉ុបត្រូវបាន UNODC បានទាញសញ្ញាអាសន្នពីស្ថានភាពគ្រោះថ្នាក់ជាយថាហេតុកើតចេញពីសង្រ្គាមរុស្ស៊ីឈ្លានពានអ៊ុយក្រែន។ បើតាមអង្គការសហប្រជាជាតិ សង្រ្គាមមួយនេះកំពុងបង្កឲ្យមានអ្នកបម្លាស់ទីក្នុងស្រុក និងអ្នកចាកចេញពីស្រុកកំណើតសរុបមិនតិចជាង ១៥លាននាក់ទេ។
គ្រប់គ្រងជនបម្លាស់ទីឲ្យបានត្រឹមត្រូវ
នៅក្នុងរបាយការណ៍ UNODC បានផ្តល់ដំណោះស្រាយតែមួយគត់ដើម្បីទប់ស្កាត់នឹងការជួញដូរមនុស្សដែលកើតចេញពីផលវិបាកអាកាសធាតុ ឬផលវិបាលសង្រ្គាម។ ដំណោះស្រាយនោះ គឺការគ្រប់គ្រងលើអ្នករត់គេចពីគ្រោះធម្មជាតិ និងជម្លោះប្រដាប់អាវុធឲ្យបានត្រឹមត្រូវ ទោះជាការរត់ចេញរបស់ពួកគេជាការបម្លាស់ទីក្នុងស្រុក ឬមួយក៏ជាការភៀសខ្លួនចេញពីស្រុកកំណើតទៅកាន់ប្រទេសផ្សេងក៏ដោយ។ អ្វីដែល UNODC ចង់និយាយត្រង់ចំណុចនេះ គឺធ្វើយ៉ាងណាកុំឲ្យពួកគេធ្លាក់ក្នុងអន្ទាក់ និងការបោកបញ្ឆោតរបស់ពួកជួញដូរមនុស្ស។
ទាក់ទងនឹងពលរដ្ឋអ៊ុយក្រែនដែលរត់គេចពីសង្រ្គាមទៅជ្រកកោណក្នុងប្រទេសក្បែរខាង ពិសេសប៉ូឡូញត្រូវបាន UNODC កោតសរសើរលើចំណាត់ការរបស់រដ្ឋាភិបាលប៉ូឡូញ និងសហភាពអឺរ៉ុបដែលបានខ្នះខ្នែងចាត់ចែងរៀបចំទីកន្លែងសម្រាប់ពួកគេ រួមទាំងផ្តល់ជំនួយចាំបាច់គ្រប់គ្រាន់។ UNODC បានទទួលស្គាល់ថា ការទប់ស្កាត់នឹងការជួញដូរមនុស្សដែលកើតពីផលវិបាកអាកាសធាតុ ឬផលវិបាលសង្រ្គាមមិនមែនជារឿងស្រួលឡើយ។ តែ UNODC យល់ថា បើមានឆន្ទៈនយោបាយ និងមនុស្សធម៌ គេមិនពិបាកដោះស្រាយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ