ហ្វីលីពីន ៖ អូស្ត្រាលីម្នាក់ជាប់ទោស១២៩ឆ្នាំ ពីប្រព្រឹត្តអំពើហិង្សាលើកុមារ
តុលាការហ្វីលីពីនបានប្រកាសនៅថ្ងៃពុធទី ៩ វិច្ឆិកា ២០២២ ដាក់ទោសជនជាតិអូស្ត្រាលីម្នាក់ ឱ្យជាប់ពន្ធនាគារ ចំនួន ១២៩ឆ្នាំ ពីបទប្រព្រឹត្តអំពើហិង្សាផ្លូវភេទលើកុមារ ដែលក្នុងនោះមានម្នាក់ជាទារិកាអាយុទើបតែ១៨ខែ។ ជាទោសដ៏ធ្ងន់ ដែលរដ្ឋអាជ្ញាហ្វីលីពីនសង្ឃឹមថាអាចព្រមានដល់គ្រប់ជនខិលខូចនិងអ្នកជួញដូរមនុស្សបាន។
ចុះផ្សាយនៅថ្ងៃ៖
ស្តាប់ - ០២:០២
Peter Gerard Scully ទណ្ឌិតជាតិអូស្ត្រាលីនេះ មានទោសអស់មួយជីវិតរួចស្រាប់ទៅហើយពីបទរំលោភនិងជួញដូរមនុស្ស (ក្មេងស្រី)។ នៅថ្ងៃនេះ តុលាការក្រុងCagayan de Oro បានសម្រេចសាលក្រមថ្មីមួយបន្ថែមទៀត លើរូបអ្នកទោសអូស្រ្តាលីនេះនិងជនជាប់ចោទជាដៃគូគ្នាចំនួនបីនាក់ផ្សេងទៀត។
នាង Lovely Margallo ជាមិត្តស្រី ក៏ត្រូវបានតុលាការហ្វីលីពីន កាត់ទោសឱ្យជាប់ពន្ធនាគារ១២៩ឆ្នាំដែរ។ ពីរនាក់ទៀត ត្រូវជាប់ពន្ធនាគារម្នាក់ៗលើសពី៩ឆ្នាំ។ ជនទាំងបួនរងការចោទប្រកាន់ពីតុលាការចំនួន ៦០ករណីល្មើស មានជាអាទិ៍ អំពើជួញដូរមនុស្ស ប្រព្រឹត្តអំពើហិង្សាផ្លូវភេទលើកុមារ ចាប់រំលោភបំពានផ្លូវភេទ និងជួញដូររូបភាពអាភាសផ្លូវភេទរបស់កុមារ។ ជនរងគ្រោះដែលក្មេងជាងគេបំផុតមានអាយុទើបតែ១៨ខែ។ ប្តីប្រពន្ធទណ្ឌិត បានធ្វើបាបក្នុងកំរិតខ្លាំងហួសបំផុតលើជនរងគ្រោះចំនួន៧នាក់។ នេះបើតាមការរៀបរាប់រដ្ឋអាជ្ញាហ្វីលីពីន។
ចាប់ខ្លួនបាននៅឆ្នាំ២០១៥ នៅភាគខាងត្បូងប្រទេសហ្វីលីពីន ទណ្ឌិតScully បានរត់ចេញពីប្រទេសកំណើតអូស្ត្រាលីដើម្បីគេចខ្លួនពីបទចោទប្រកាន់លួចបន្លំ នៅឆ្នាំ២០១១ ហើយបានបង្កើតក្រុមហ៊ុនលក់រូបភាពអាសអាភាសតាមអនឡាញ ថតកុនកូនជ្រូករបស់ក្មេងជំទង់ៗ រួមរក្សជាមួយមនុស្ស ជាមួយវត្ថុ យកទៅលក់ឱ្យអតិថិជននៅអាល្លឺម៉ង់ សហរដ្ឋអាមេរិក និងប្រេស៊ីល។
បើតាមអាជ្ញាធរហ្វីលីពីន មានកុមាររាប់ពាន់នាក់ជាជនរងគ្រោះ ហើយជាញឹកញយមានការព្រមព្រៀងពីឪពុកម្តាយទៀត។ ភាពក្រីក្រ និយាយភាសាអង់គ្លេស និងភាពរីកចម្រើនផ្នែកអ៊ីនធ័រនែត បានធ្វើឱ្យជំនួញផ្លូវភេទកុមារកាន់តែមានសន្ទុះនៅហ្វីលីពីន។ កាលពីឆ្នាំ២០២១ មូលនិធិដើម្បីកុមាររបស់អង្គការសហប្រជាជាតិបានប្រកាស ថាហ្វីលីពីនបានក្លាយជាប្រភពផលិតកម្មផ្លូវភេទកុមារនៅលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ