បារាំង-អូស្រា្តលី សង្ឃឹមបំភ្លេចរឿងចាស់និងបើក«ទំព័រថ្មី»
ចុះផ្សាយនៅថ្ងៃ៖
ស្តាប់ - ០៨:១២
នៅប្រទេសបារាំង ថ្ងៃចន្ទទី ៣០មករា មានជំនួបថ្នាក់រដ្ឋមន្រ្តីការពារជាតិ និងរដ្ឋមន្រ្តីការបរទេស រវាងបារាំង និងអូស្រា្តលី នៅក្នុងទីក្រុងប៉ារីស។ ភាគីទាំងពីរ សង្ឃឹមបំភ្លេចចោលនូវវិបត្តិនាវាមុជដែលកើតចេញពីកិច្ចព្រមព្រៀងត្រីភាគី អូគូស ( AUKUS ) គឺ អង់គ្លេស អូស្ត្រាលី និងសហរដ្ឋអាមេរិក។
«របួសចាស់»
បារាំង និងអូស្រា្តលី បានស្គាល់ភាពរកាំរកូស មើលមុខគ្នាមិនចំតាំងពី ខែកញ្ញា ឆ្នាំ២០២១ ក្នុងរជ្ជកាលអតីតនាយករដ្ឋមន្រ្តីអូស្រ្តាលី លោក ស្កុត ម៉ូរីសុន។ អតីតថ្នាក់ដឹកនាំអូស្ត្រាលី លុបចោលកុងត្រាទិញនាវាមុជទឹកបារាំង ចំនួន ១២គ្រឿង ក្នុងទឹកប្រាក់ចំនួន ៥៦ ០០០ លានអឺរ៉ូ ដែលចុះហត្ថលេខា ក្នុងខែធ្នូ ឆ្នាំ២០១៦។ អូស្ត្រាលី ងាកទៅទិញ នាវាមុជទឹកដើរដោយថាមពលនុយក្លេអ៊ែររបស់សហរដ្ឋអាមេរិក។ រឿងនេះ បារាំង ចាត់ទុកការសម្រេចចិត្ត របស់អូស្ត្រាលី ថា ជាការក្បត់ និង រំលោភទំនុកចិត្ត។ បារាំង ខឹងក្តៅក្រហាយ រហូតកោះហៅឯកអគ្គរដ្ឋទូតរបស់ខ្លួន ពីអូស្ត្រាលី និងអាមេរិក ទៀតផង។
ខែឧសភា ឆ្នាំ២០២២ ពេលដែល អូស្ត្រាលី មាននាយករដ្ឋមន្ត្រីថ្មី គឺលោក អង់តូនី អាល់បានីស៊ី បានសូមអនុញ្ញាតបារាំង ដើម្បីចាប់ផ្តើមបើកទំព័រទាក់ទងគ្នា ជាថ្មី និងបានបញ្ចូនសញ្ញាជាវិជ្ជមានជាច្រើនជាបន្តបន្ទាប់ មកកាន់ទីក្រុងប៉ារីស។ ខែកក្កដាឆ្នាំមុន លោក អង់តូនី អាល់បានីស៊ី បោះជំហានមុន ដោយលើកឡើងពី«ទំនុកចិត្ត ការគោរពគ្នា និងសេចក្តីស្មោះត្រង់»។ ប្រធានាធិបតីបារាំង អេម៉ានុយអែល ម៉ាក្រុង ក៏ទទួលជួបនាយករដ្ឋមន្ត្រីអូស្ត្រាលី។ អូស្ត្រាលី សងលុយជំងឺចិត្ត ចំពោះបារាំង សម្រាប់ការផ្តាច់កុងត្រា ក្នុងទឹកប្រាក់ ៥៥០ លានអឺរ៉ូ។ របួសដំបៅចាស់ ផ្តើមសះជាបណ្តើរៗ ហើយភាគីទាំងពីរ ក៏បានស្កាត់ជួបគ្នាបន្ថែមទៀត នៅក្នុងឱកាសប្រជុំអន្តរជាតិផ្សេងៗនៅតំបន់អាស៊ី ។
ដូច្នេះ ជំនួបថ្នាក់រដ្ឋមន្ត្រី ការបរទេស និងអូស្ត្រាលីការពារជាតិ នៅទីក្រុងប៉ារីសថ្ងៃច័ន្ទ គឺ ឈរលើស្មារតីពង្រឹងកិច្ចសហការគ្នា ដែលបណ្តុះបណ្តាលឡើងដោយប្រមុខថ្នាក់ដឹកនាំនៃប្រទេសទាំងពីរ កាលពីខែកក្កដា ឆ្នាំទៅវិញ។ នេះបើតាមការបញ្ជាក់របស់អ្នកនាំពាក្យក្រសួងការបរទេសបារាំង។
ជំនួបថ្នាក់រដ្ឋមន្ត្រី ២+២ នៅប៉ារីស តើ បារាំង និង អូស្ត្រាលី គ្រោងថានឹងចាប់ដៃគ្នា សហការគ្នា លើវិស័យអ្វីខ្លះ?
នៅមុនជំបួន២+២នេះ គេទទួលព័ត៌មានបានតាមរយៈសេចក្តីថ្លែងការណ៍រួម ពីភាគីទាំងសងខាង។ ពីភាគីបារាំង និងប្រភពស្និទ្ធនឹងរដ្ឋមន្ត្រីការពារជាតិនិងការបរទេសបារាំង បញ្ជាក់ថា ទំនាក់ទំនងបានតភ្ជាប់វិញហើយ តែភាគីទាំងទ្វេ ត្រូវតែនាំគ្នាមុជឲ្យជ្រៅទៅឲ្យឆ្ងាយ ដើម្បីនាំមកនូវ «សកម្មភាពជាក់ស្តែង»។ ក៏ប៉ុន្តែ គេពុំបានបញ្ជាក់ចំៗថាសកម្មភាពណាទេ។
ចំណែក សេចក្តីថ្លែងការណ៍រួម របស់ រដ្ឋមន្ត្រីការបរទេសអូស្ត្រាលី អ្នកស្រី ផែន្នី វង្ស (Penny Wong) និង រដ្ឋមន្ត្រីការពារជាតិ Richard Marles បានគូសបញ្ជាក់ច្បាស់ថា «ការជួបជជែកពិភាក្សាជាមួយគូភាគីបារាំង គឺអនុញ្ញាតឲ្យទំនាក់ទំនងទ្វេភាកីរីកចម្រើនផង និងដើម្បីសហការរួមគ្នាផង នៅក្នុងសំណុំបញ្ហាដ៏លំបាក ដែលកំពុងតែកើតឡើង នៅតំបន់ឥណ្ឌូប៉ាស៊ីហ្វិក និងនៅតំបន់អឺរ៉ុប។» បើតាមសេចក្តីថ្លែងការណ៍ដដែល គឺ ភាគីទាំងពីរត្រូវជជែកគ្នាពីយុទ្ធសាស្ត្ររួម នៅលើវិស័យការពារជាតិ សន្តិសុខ និងបរិស្ថានអាកាសធាតុ។
នៅ អឺរ៉ុប បញ្ហាជាច្រើនត្រូវ បារាំង និងអូស្ត្រាលី អាចសហការគ្នា ព្រោះ វិបត្តិជាច្រើនដែលកើតនិងបន្តលេចចេញបញ្ហាផ្សេងទៀត ក្នុងនោះ ក៏មានកត្តាត្រូវប្រឈមនឹង រុស្ស៊ី ព្រោះតែវិបត្តិសង្គ្រាមអ៊ុយក្រែនផង។ ចំណែក ឥណ្ឌូប៉ាស៊ីហ្វិក វិញ គឺ បើតាមប្រភពស្និទនឹងក្រសួងការពារជាតិបារាំង ឥណ្ឌូប៉ាស៊ីហ្វិក ជាតំបន់មួយដ៏សំខាន់សម្រាប់អាមេរិកផងនិងសម្រាប់ចិនផង ក្នុងពេលជាមួយគ្នា។ ដើម្បីទប់ទល់នឹងបរិបទនេះ គេចាំបាច់ត្រូវរៀបចំយុទ្ធសាស្ត្រឆ្លើយតបដោយប្រុងប្រយ័ត្នជាទីបំផុត។
ក្រៅពីរឿងនេះ ភាគីទាំងពីរ ក៏នឹងគិតគូរ ពីកិច្ចការសហការសន្តិសុខផ្លូវសមុទ្រ ហើយនិង វិបត្តិបច្ចេកវិទ្យាព័ត៌មានវិទ្យា ជាសំណុំរឿងដែលរស៊ើបនិងដែលគេមើលមិនសូវឃើញ ដែលភាគីទាំងពីរ ត្រូវសហការគ្នា និងចែករំលែកយុទ្ធសាស្ត្រគ្នា ។
ចិន ជះសាយឥទ្ធិពលច្រើននិងខ្លាំងឡើងៗ ក្នុងតំបន់ឥណ្ឌូប៉ាស៊ីហ្វិក។ តើ បារាំង និង អូស្ត្រាលី ប្រុងធ្វើយ៉ាងដូចម្តេច?
មិនថាបារាំង អូស្ត្រាលី សហរដ្ឋអាមេរិក ឬប្រទេសអឺរ៉ុបណាផ្សេងទេ យល់ស្របគ្នាថា មហាយក្សចិន ពង្រីកនិងពង្រឹងឥទ្ធិពខ្លាំងឡើងៗ នៅក្នុងតំបន់ឥណ្ឌូប៉ាស៊ីហ្វិក។ តំបន់ឥណ្ឌូប៉ាស៊ីហ្វិក សម្រាប់ប្រទេសលោកខាងលិច ក៏ជាតំបន់ទីផ្សារពាណិជ្ជកម្មធំសម្បើមណាស់ដែររបស់ពួកគេ។ ពួកគេនឹងមិនបណ្តោយឲ្យចិនលេចមុខតែម្នាក់ងងបាននោះទេ។
អូស្ត្រាលី បន្តពង្រឹងសមត្ថិភាពយោធា ហើយបន្តទិញអាវុធបន្ថែមជាបន្តបន្ទាប់ ក្នុងពេលចុងក្រោយនេះ ហើយបន្ទាប់ពី ជួបជាមួយបារាំង គឺរដ្ឋមន្ត្រីអូស្ត្រាលីទាំងពីរ នឹងបន្តចេញទៅប្រទេសអង់គ្លេស ជាសម្ព័ន្ធមិត្ត ក្នុង កិច្ចព្រមព្រៀងត្រីភាគី អូគូស ( AUKUS ) គឺ អង់គ្លេស អូស្ត្រាលី និងសហរដ្ឋអាមេរិក។ អូស្ត្រាលី ទៅអង់គ្លេស ក៏នឹងឆ្លៀតជជែកគ្នាពីការទិញអាវុធសម្រាប់ការពារនៅដែនសមុទ្រ ថែមទៀតដែរ។ អូស្ត្រាលី អាមេរិក និងប្រទេសអឺរ៉ុប ក៏ប្រឹងបន្តសកម្មភាពយោធា តាមរយៈសមុទ្រច្រើនៗឡើង ជាមួយប្រទេសក្នុងតំបន់ ដូចយើងឃើញស្រាប់នាពេលកន្លងទៅ សមយុទ្ធផ្សេងៗគ្នា ទាំងទ្វេភាគីផង ពហុភាគីផង ជាមួយ ឥណ្ឌា ជប៉ុន កូរ៉េខាងត្បូង តៃវ៉ាន ឥណ្ឌូនេស៊ី ហ្វីលីពីន និងថៃ ជាដើម។
ចំពោះ បារាំង ប្រទេសបារាំងបង្កើនទ័ពនិងពង្រឹងយុទ្ធសាស្ត្រយោធានៅតំបន់នេះ។ គឺ បន្ទាត់នយោបាយរបស់ប្រធានាធិបតី ម៉ាក្រុង នៅអាស៊ី ពិសេសនៅឥណ្ឌូប៉ាស៊ីហ្វីក គឺ«រក្សាឥទ្ធិពលអំណាចលុត្យភាព» បានសេចក្តីថា បារាំងនៅតែបន្តពង្រឹងឥទ្ធិពលរបស់ខ្លួន ហើយសហការជាមួយសម្ព័ន្ធមិត្តផ្សេងៗ រួមទាំងចិនផង។ និយាយរួម គឺបារាំងរក្សាចន្លោះកណ្តាល មិនចូលខាងចិន ឬចូលខាងអាមេរិក ហើយនិង ធ្វើយ៉ាងណា កុំឲ្យចិនគិតថា សកម្មភាពរបស់បារាំង គឺប្រឆាំងចិន។ ជំហរនេះ ជាការលំបាក។ សមាជិកព្រឹទ្ធសភាបារាំង ជាច្រើនរូប ក៏បានចោទសួរពីចំណុចនេះដែរ កាលពីពេលថ្មីៗ និងនៅតែមានមន្ទិលសង្ស័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ