កូរ៉េខាងជើងកំពុងប្រឈមនឹងគ្រោះអត់ឃ្លានសាជាថ្មី?
ចុះផ្សាយនៅថ្ងៃ៖
ស្តាប់ - ០៦:២៧
មេដឹកនាំកូរ៉េខាងជើង លោកគីម ជុងអ៊ុនបានបើកកិច្ចប្រជុំគណៈកម្មាធិការកណ្តាលរបស់បក្សពលករកូរ៉េខាងជើង កាលពីថ្ងៃអាទិត្យម្សិលមិញ ដើម្បីផ្តោតទៅលើបញ្ហាសេដ្ឋកិច្ចនិងកសិកម្ម ក្នុងពេលដែលកំពុងមានការព្រួយបារម្ភពីគ្រោះអត់ឃ្លាននៅក្នុងប្រទេស។ នៅថ្ងៃចន្ទនេះ អ្នកនាំពាក្យរបស់ក្រសួងរបស់កូរ៉េខាងត្បូង ដើម្បីការបង្រួបបង្រួម បានលើកឡើង ពីករណីមនុស្សស្លាប់ដោយសារគ្រោះអត់ឃ្លាន នៅកូរ៉េខាងជើង។ តើកូរ៉េខាងជើងកំពុងប្រឈមគ្រោះអត់ឃ្លាន ដូចកាលពីទសវត្សរ៍ឆ្នាំ ១៩៩០ ដែលបានសម្លាប់មនុស្សជិត១លាននាក់ ឬយ៉ាងណា?
មេដឹកនាំកូរ៉េខាងជើង គីម ជុងអ៊ុនបានបើកកិច្ចប្រជុំបក្សពលករ កាលពីថ្ងៃអាទិត្យម្សិលមិញ។ តាមការចុះផ្សាយរបស់ទីភ្នាក់ងារព័ត៌មានរដ្ឋKCNA គណៈកម្មាធិការកណ្តាលរបស់បក្សត្រូវបន្តកិច្ចប្រជុំ នៅក្នុងសប្តាហ៍នេះ ដើម្បីវិភាគគ្រប់គ្រងកម្មវិធីបដិវត្តជនបទក្នុងសករាជថ្មី។ ក្នុងរយៈពេល ២ខែដើមឆ្នាំ នេះជាលើកទី២ដែលមេដឹកនាំកូរ៉េខាងជើងបើកកិច្ចប្រជុំពេញអង្គ បក្សពលករកូរ៉េខាងជើង។
តាមទីភ្នាក់ងារព័ត៌មានរដ្ឋកូរ៉េខាងជើង KCNA កិច្ចប្រជុំបក្សផ្តោតសំខាន់ទៅលើការងារសំខាន់ និងបន្ទាន់ ក្នុងកាលៈទេសៈដែលប្រទេសត្រូវដោះស្រាយបញ្ហាកសិកម្ម។ មេដឹកនាំកូរ៉េខាងចើងបើកកិច្ចប្រជុំបក្សពលករ ក្នុងខណៈពេលដែលអ្នកជំនាញ និងអង្គការអន្តរជាតិកំពុងព្រួយបារម្ភពីការបញ្ហាខ្វះស្បៀង នៅកូរ៉េខាងជើង។
តាមអ្នកនាំពាក្យរបស់ក្រសួងកូរ៉េខាងត្បូង ដើម្បីការបង្រួបបង្រួមកូរ៉េ កូរ៉េខាងជើងកំពុងជួបបញ្ហាខ្វះស្បៀងធ្ងន់ធ្ងរ និងថា កូរ៉េខាងត្បូងបានទទួលសេចក្តីរាយការណ៍ដែលថា មានមនុស្សស្លាប់ ដោយសារគ្រោះអត់ឃ្លាន នៅកូរ៉េខាងជើង។ នៅសប្តាហ៍មុននេះ រូបភាពផ្កាយរណបរបស់អាជ្ញាធរកូរ៉េខាងត្បូងបានបង្ហាញពីការធ្លាក់ចុះ នៃការផលិតស្បៀង នៅកូរ៉េខាងជើង។ តាមធម្មតា កូរ៉េខាងជើងត្រូវការស្បៀង ៥,៥លានតោនសម្រាប់ចិញ្ចឹមប្រជាជន២៥លាននាក់របស់ខ្លួន។ ប៉ុន្តែ នៅឆ្នាំមុននេះ កូរ៉េខាងជើងផលិតបានតែ ៤,៥លានតោនប៉ុណ្ណោះ មានន័យថា នៅខ្វះ១លានតោនសម្រាប់ចិញ្ចឹមប្រជាជន នៅឆ្នាំនេះ។
ហេតុអ្វីកូរ៉េខាងជើងត្រូវជួបវិបត្តិខ្វះស្បៀងនៅឆ្នាំនេះ?
កូរ៉េខាងជើងជួបវិបត្តិខ្វះស្បៀងមិនមែនជារឿងថ្មី។ កូរ៉េខាងជើងឧស្សាហ៍ជួបគ្រោះអត់ឃ្លាន ដ៏ធំមួយ កាលពីទសវត្សរ៍ឆ្នាំ ១៩៩០ ដែលបានសម្លាប់មនុស្សជិត ១លាននាក់។ ទោះជាកូរ៉េខាងជើងមិនជួបគ្រោះទុរភិក្ស ដែលអាចសម្លាប់មនុស្សច្រើនដូចទសវត្សរ៍ឆ្នាំ ១៩៩០ ប៉ុន្តែ អ្នកជំនាញវាយតម្លៃថា បញ្ហាខ្វះស្បៀង សព្វថ្ងៃ នឹងអាចសម្លាប់មនុស្សច្រើន នៅកូរ៉េខាងជើង។
កូរ៉េខាងជើងធ្លាប់ជួបបញ្ហាខ្វះស្បៀង ជាញឹកញយ ដោយសារ គ្រោះធម្មជាតិផង ការដាក់ទណ្ឌកម្មសេដ្ឋកិច្ចដោយសារកម្មវិធីផលិតនុយក្លេអ៊ែរផង។ នៅចុងឆ្នាំមុន ទីភ្នាក់ងារព័ត៌មានរដ្ឋកូរ៉េខាងជើង KCNA ធ្លាប់ទទួលស្គាល់ថា កូរ៉េខាងជើងជួបបញ្ហាខ្វះស្បៀងធ្ងន់ធ្ងរ ដោយសារគ្រោះទឹកជំនន់ និងគ្រោះរាំងស្ងួតជាប់ៗគ្នា។ ដោយសារតែខ្វះហេដ្ឋារចនាសម្ព័ន្ធ នៅតាមទីជនបទ កូរ៉េខាងជើងងាយនឹងរងគ្រោះខូចខាត ខ្លាំង នៅរាល់ពេលមានគ្រោះទឹកជំនន់ ឬគ្រោះរាំងស្ងួត។
បន្ថែមពីលើគ្រោះធម្មជាតិ និងការដាក់ទណ្ឌកម្មសេដ្ឋកិច្ច ការបិទព្រំដែនដើម្បីទប់ស្កាត់ការឆ្លងរាលដាលមេរោគកូវីដ នៅ៣ឆ្នាំមកនេះ បានរឹតបន្តឹង ការនាំចូលទំនិញ ជាពិសេស ពីប្រទេសចិន ដែលផ្គត់ផ្គង់៩០%នៃទំនិញនាំចូលកូរ៉េខាងជើង។ តាមការចុះផ្សាយរបស់វិបសៃតិ៍ 38 North.org តម្លៃពោតបានកើនឡើង២០% បន្ទាប់ពីប្រជាជនកូរ៉េខាងជើងសម្រុកទិញសម្រាប់ធ្វើស្បៀងជំនួសអង្ករ ដែលមានតម្លៃខ្ពស់កប់ពពក។
ការនាំចូលតិចជាងមុនបានធ្វើឲ្យទំនិញឡើងថ្លៃ។ បូកផ្សំនឹងសង្រ្គាមរុស្ស៊ីឈ្លានពានអ៊ុយក្រែន ដែលបានធ្វើឲ្យតម្លៃទំនិញ កើនឡើងសព្វសារពើ។ ប្រេង និងជីគីមី ដែលគេត្រូវការខ្លាំងសម្រាប់វិស័យកសិកម្ម បានកើនឡើងដល់កម្រិតកំពូល។ កូរ៉េខាងជើងផ្ទាល់ធ្លាប់បានប្រកាសផលិតជីកសិកម្មខ្លួនឯង សម្រាប់ការប្រើប្រាស់ក្នុងស្រុក ដោយមិនចាំបាច់ត្រូវការពឹងនាំចូលពីបរទេស ដែលអាចជាប់ទណ្ឌកម្មសេដ្ឋកិច្ច។ ប៉ុន្តែ ការខ្វះគ្រឿងចក្រ ដោយសារការដាក់ទណ្ឌកម្មពីសហគមន៍អន្តរជាតិ និងការវិនិយោគមិនគ្រប់គ្រាន់ពីរដ្ឋាភិបាល វិស័យកសិកម្មរបស់កូរ៉េខាងជើងនៅតែដើរអូសជើង ខ្វះខាតខ្លាំង បើប្រៀបធៀបនឹងវិស័យកងទ័ព និងកម្មវិធីផលិតមីស៊ីល ដែលមេដឹកនាំកូរ៉េខាងជើងចាត់ទុកជានយោបាយអាទិភាព សម្រាប់ការរស់រានមានជីវិតរបស់កូរ៉េខាងជើង។
មេដឹកនាំកូរ៉េខាងជើងផ្តោតសំខាន់លើការសម្រួចកម្មវិធីផលិតអាវុធនុយក្លេអ៊ែរ
សម្រាប់អ្នកជំនាញ កូរ៉េខាងជើងអាចជួបគ្រោះទុរភិក្សសាជាថ្មី ក៏ដោយសារតែនយោបាយដឹកនាំមិនត្រឹមត្រូវរបស់លោកគីម ជុងអ៊ុន នៅប៉ុន្មានឆ្នាំមកនេះ ដែលផ្តោតការចំណាយភាគច្រើនទៅលើកម្មវិធីផលិតអាវុធនុយក្លេអ៊ែរ ជាជាងគិតទៅដល់សុខទុក្ខរបស់ប្រជាជន។
ជាក់ស្តែង នៅពេលប្រទេសកំពុងប្រឈមនឹងបញ្ហាខ្វះស្បៀង កូរ៉េខាងជើងគិតតែពីសម្រួចកម្មវិធីអាវុធនុយក្លេអ៊ែររបស់ខ្លួន ដោយបានបង្កើនការបាញ់សាកល្បងមីស៊ីលដល់ទៅ ៧០គ្រាប់ កាលពីឆ្នាំមុន។ មិនយកចិត្តទុកដាក់ជួយប្រជាជនហើយ រដ្ឋអំណាចកូរ៉េខាងជើងនៅបានបែរខ្នង បដិសេធមិនទទួលជំនួយបរទេស។ នៅសប្តាហ៍មុន ទីភ្នាក់ងារKCNAបានសរសេរថា រាល់ជំនួយបរទេស គឺជាស្ករគ្រាប់បង្កប់ដោយថ្នាំពុល ដែលមានគោលដៅសំខាន់ គឺលួច និងដាក់ប្រទេសដែលទទួលជំនួយ ឲ្យក្រោមអំនាចរបស់បរទេស។
អង្គការកម្មវិធីស្បៀងអាហារពិភពលោក ដែលជាស្ថាប័នរបស់អង្គការសហប្រជាជាតិធ្លាប់បានទទូចសុំឲ្យមានការសម្រួលការនាំចូលជំនួយស្បៀងសម្រាប់ប្រជាជនកូរ៉េខាងជើង ប៉ុន្តែ ដោយសារតែ កូរ៉េខាងជើងបិទទ្វារ មិនស្វាគមបរទេស ការនាំជំនួយស្បៀងអន្តរជាតិ ទៅកូរ៉េខាងជើង ជួបការលំបាកខ្លាំង។ ការិយាល័យ ដើម្បីការសម្របសម្រួលជំនួយមនុស្សធម៌ របស់អង្គការសហប្រជាជាតិបានបង្ហាញថា នៅ ឆ្នាំមុន កូរ៉េខាងជើងបានទទួលជំនួយប្រមាណ ២,៣លានដុល្លារ ពី អង្គការអន្តរជាតិ និងស្ថាប័នបរទេស ពោលគឺធ្លាក់ចុះ ពី ចំនួន ១៤លានដុល្លារ នៅឆ្នាំ ២០២១។
នៅ ឆ្នាំមុន របាយការណ៍របស់អង្គការសហប្រជាជាតិវាយតម្លៃថា ប្រជាជនកូរ៉េខាងជើង ប្រមាណ១០លាននាក់ ស្មើនឹង៤០%នៃប្រជាជនសរុប រងគ្រោះខ្វះអាហារូបត្ថម្ភនៅកូរ៉េខាងជើង គិតចាប់ពីឆ្នាំ ២០១៩ ដល់ឆ្នាំ ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ