លោក គីម ជុងអ៊ុន ទទួលស្គាល់ថាកូរ៉េខាងជើងកំពុងឆ្លងកាត់វិបត្តិខ្វះស្បៀង
នៅក្នុងមហាសន្និបាតនៃគណៈកម្មការមជ្ឈិមបក្សពលករកូរ៉េខាងជើង ប្រមុខដឹកនាំ គីម ជុងអ៊ុន បានអះអាងថាស្ថានភាពសេដ្ឋកិច្ចជាតិបានប្រសើរឡើងបន្តិចហើយ ប៉ុន្តែជាមួយគ្នានេះ លោក គីម ជុងអ៊ុន ក៏បានទទួលស្គាល់ដែរ ថា កូរ៉េខាងជើងកំពុងឆ្លងកាត់វិបត្តិខ្វះស្បៀង។ នេះបើតាមការចុះផ្សាយរបស់ទីភ្នាក់ងារសារព័ត៌មានផ្លូវការរដ្ឋKCNAនៅថ្ងៃ ពុធទី ១៦មិថុនា ២០២១។
ចុះផ្សាយនៅថ្ងៃ៖
នៅឆ្នាំ២០២០ វិបត្តិកូរ៉ូណាវីរុស គ្រោះខ្យល់ព្យុះ និងទឹកជំនន់ បានមកសង្កត់កសេដ្ឋកិច្ចកូរ៉េខាងជើងខ្លាំងណាស់។ តែស្ថានភាពសេដ្ឋកិច្ចនៅឆ្នាំនេះ បានប្រសើរឡើងវិញ ដោយសកម្មភាពផលិតកម្មឧស្សាហកម្ម មានកំណើនចំនួន២%។ នេះបើតាមប្រសាសន៍របស់លោក គីម ជុងអ៊ុន ទៅកាន់អង្គប្រជុំគណៈកម្មការមជ្ឈិមបក្ស។
ប៉ុន្តែជាមួយនឹងអំណរ ប្រមុខដឹកនាំកូរ៉េខាងជើងវ័យក្មេង គីម ជុងអ៊ុន ក៏បានប្រកាសទទួលស្គាល់ដែរថាប្រទេសកំពុងឆ្លងកាត់បញ្ហាខ្វះស្បៀងអាហារខ្លាំង។ ស្ថានភាពស្បៀងអាហារជួបការខ្វះខាត បណ្តាលមកពី កម្មវត្ថុកសិកម្មមិនអាចសម្រេចតាមផែនការ។ ផលិតផលធញ្ញជាតិ បានរងការខូតខាតខ្លាំង ដោយខ្យល់ព្យុះកាលពីឆ្នាំទៅ។ ខ្យល់ព្យុះ និងទឹកជំនន់បានបំផ្លិចបំផ្លាញផ្ទះសម្បែងរាប់ពាន់ខ្នង និងដីស្រែកសិកម្មអស់ជាច្រើន។ ដូច្នេះកូរ៉េខាងជើងត្រូវតែអនុម័តវិធានការ យ៉ាងណាទប់ស្កាត់កុំឱ្យប្រទេសរងផលវិបាកធ្ងន់ធ្ងរខ្លាំង ពីគ្រោះធម្មជាតិ។ បង្កើនទិន្នផលស្រូវ គឺជាអាទិភាពចំបងលំដាប់ទីមួយដែលបក្សត្រូវគិតគូរ។ នេះបើតាមការបញ្ជាក់បន្ថែមរបស់លោក គីម ជុងអ៊ុន។
តាមការពិត វិបត្តិខ្វះស្បៀង មិនមែនជាបញ្ហាថ្មីថ្មោងសម្រាប់កូរ៉េខាងជើងទេ។ ទណ្ឌកម្មសេដ្ឋកិច្ចរបស់សហគមន៍អន្តរជាតិបានដាក់លើព្យុងយ៉ាងដែលចចេសអភិវឌ្ឍន៍កម្មវិធីនុយក្លេអ៊ែរយោធា បានរុញច្រានសេដ្ឋកិច្ចកូរ៉េខាងជើងឱ្យធ្លាក់ដុនដាប និងធ្វើឱ្យប្រទេសជួបគ្រោះខ្វះស្បៀងធ្ងន់ធ្ងរតាំងពី យូរមកហើយ។ ប៉ុន្តែវិបត្តិកូវីដ១៩ និងភាពឯកា បានមកពង្រឹងវិបត្តិនេះឱ្យរឹតតែយ៉ាប់យឺនបន្ថែមទៀត។
ដើម្បីប្រយុទ្ធប្រឆាំងនឹងជំងឺរាតត្បាតកូវីដ១៩ កូរ៉េខាងជើង បានសម្រេចបិទព្រំដែនជាមួយចិនដែលជាប្រភពទំនាក់ទំនងលោកខាងក្រៅតែមួយគត់របស់ខ្លួន។ វិធានការនេះ បានធ្វើឱ្យសេដ្ឋកិច្ចជាតិចុះរួញ និងកាន់តែលំបាក មួយកម្រិតទៀត។ រហូត កាលពីខែមេសា២០២១ លោក គីម ជុងអ៊ុន បានព្រលយម្តងហើយ អំពីគ្រោះខ្វះស្បៀង តិចតួច ដោយបានអំពាវនាវឱ្យថ្នាក់ដឹកនាំបក្សពលករបើកយុទ្ធការជួយប្រជាពលរដ្ឋ តាមផែនការ “ដំណើរបង្ខំ”។ ផែនការសង្គ្រោះគ្រោះទុរ្ភិក្ស កាលពីទសវត្សរ៍ឆ្នាំ១៩៩០។ គ្រោះទុរ្ភិក្សដែលបានសម្លាប់ជីវិតមនុស្សអស់រាប់លាននាក់។
បើតាមការប៉ាន់ស្មានរបស់ការិយាល័យទទួលបន្ទុកមនុស្សធម៌របស់អង្គការសហប្រជាជាតិ កូវីដ១៩ ទំនងជាបានធ្វើស្ថានភាពមនុស្សធម៌នៅកូរ៉េខាងជើងធ្លាក់ធ្ងន់ធ្ងរខ្លាំង ដោយមានពលរដ្ឋយ៉ាងហោច១០,៦លាននាក់កំពុងរស់ក្នុងភាពខ្វះខាតស្បៀងអាហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ