សភាប្រជាជនចិនបោះឆ្នោតឲ្យលោកស៊ីជីនពីងកាន់តំណែងប្រធានាធិបតី អាណត្តិទី៣
ចុះផ្សាយនៅថ្ងៃ៖
ស្តាប់ - ០៧:៥៨
លោកស៊ី ជីនពីង ប្រធានាធិបតីផុតអាណត្តិ ត្រូវសភាប្រជាជនចិនបោះឆ្នោត នៅថ្ងៃសុក្រទី ១០មីនានេះ ឲ្យបន្តដឹកនាំប្រទេសមួយអាណត្តិបន្ថែមទៀត។ លោកពូទីន ប្រធានាធិបតីរុស្ស៊ី ដែលជាប្រទេសដៃគូសេដ្ឋកិច្ច និងការទូតជាមួយចិន បានផ្ញើសារជាបន្ទាន់ អបអរការជាប់ឆ្នោត សម្រាប់អាណត្តិថ្មី អាណត្តិទី៣របស់លោកស៊ី ជីនពីង ក្នុងនាមជាប្រធានាធិបតីចិន។ ការបោះឆ្នោត របស់សភាប្រជាជនចិន អនុញ្ញាតឲ្យលោកស៊ីជីនពីងដឹកនាំមួយអាណត្តិបន្ថែមទៀត សបញ្ជាក់ពីការឡើងបុណ្យសក្តិរបស់លោកស៊ី ជីនពីង តាំងពីនៅជាអ្ននយោបាយដែលគេមិនធ្លាប់ស្គាល់ រហូតដល់ក្លាយជាមេដឹកនាំដ៏មានអំណាចកំពូលរបស់មហាយក្សចិន។ សភាប្រជាជនចិនបោះឆ្នោតជ្រើសរើសលោកស៊ី ជីនពីងឲ្យដឹកនាំប្រទេស សម្រាប់អាណត្តិទី៣។
លោកប្រធានាធិបតី ចិន ស៊ី ជីនពីងនឹងដឹកនាំប្រទេសមួយអាណត្តិបន្ថែមទៀត។ នៅក្នុងសម័យប្រជុំពេញអង្គប្រចាំឆ្នាំ នៅទីក្រុងប៉េកាំង នៅថ្ងៃសុក្រនេះ សភាប្រជាជនចិនបោះឆ្នោតជ្រើសរើសលោកស៊ី ជីនពីងឲ្យបន្តកាន់តំណែងប្រធានាធិបតីនៅអាណត្តិទី៣។ ក្នុងប្រវត្តិដឹកនាំនៅប្រទេសចិន នេះជាលើកទី១ ដែលប្រធានាធិបតីត្រូវសភាបោះឆ្នោតឲ្យបន្តកាន់តំណែងលើស ២ អាណត្តិ។
នេះជាលើក១ នៅក្នុងប្រវត្តិដឹកនាំសម័យថ្មីរបស់ចិន ដែលចិនមានប្រធានាធិបតីដឹកនាំប្រទេសលើសពី ២អាណត្តិ។ នៅក្នុងអតីតកាល ដើម្បីជៀសវាងចលាចលនយោបាយ និងអំណាចដឹកនាំដោយបុគ្គលតែម្នាក់ ដូចជាម៉ៅ សេទុង គណបក្សកុម្មុយនិស្តចិនធ្លាប់បានសម្រេចថា ប្រធានាធិបតីអាចកាន់អំណាចតែ ២អាណត្តិ ប៉ុណ្ណោះ និងត្រូវដើរចេញ ក្រោយកាន់អំណាច ១០ឆ្នាំ ដើម្បីអនុញ្ញាតអ្នកផ្សេងដឹកនាំប្រទេសម្តង។
ប៉ុន្តែ នៅថ្ងៃ សុក្រនេះ សភាប្រជាជនចិន បានបោះឆ្នោត ជាឯកច្ឆន្ទ ដោយគ្មានខ្វះសូម្បី ១ សំឡេង ពោលគឺ សំឡេងគាំទ្រទាំងស្រុង ២៩៥២ គ្មានសំឡេងប្រឆាំង ឬអនុប្បវាទ ដើម្បីគាំទ្រឲ្យលោកស៊ី ជីនពីងកាន់តំណែងប្រធានាធិបតី មួយអាណត្តិបន្ថែមទៀត បន្ទាប់ពី ដឹកនាំប្រទេសបានពីរ អាណត្តិ ចំនួន១០ឆ្នាំ។
ការសម្រេចជាផ្លូវការរបស់សភាប្រជាជនចិន ដើម្បីអនុញ្ញាតឲ្យលោកស៊ី ជីនពីងបន្តដឹកនាំប្រទេស អាណត្តិទី៣ អាចជាលើកទី១ ក្នុងប្រវត្តិសាស្រ្តដឹកនាំសម័យថ្មីរបស់ចិន ព្រោះថា ប្រធានាធិបតីចិនមុនៗ ដូចជាលោកចាង ជាមីន និងលោកហ៊ូជីនតាវជាដើម ដឹកនាំប្រទេសបានតែ២អាណត្តិប៉ុណ្ណោះ។ ប៉ុន្តែ លោកស៊ី ជីនពីង មានជោគវាសនាខុសពីប្រធានាធិបតីមុនៗ។
លោកស៊ី ជីនពីងត្រូវបានគណបក្សបោះឆ្នោត តាំងពីខែតុលាឆ្នាំមុន ឲ្យបន្តជាអគ្គលេខាធិការបក្សកុម្មុយនិស្ត និង ប្រធានគណៈកម្មការកងទ័ពមជ្ឈិមរបស់បក្ស ដែលជាតំណែងដឹកនាំកំពូល នៅប្រទេសចិន។
លោកស៊ី ជីនពីង អាចពង្រឹងអំណាច ដឹកនាំប្រទេសចិន មួយអាណត្តិបន្ថែមទៀត បន្ទាប់ពី លោកបានទាមទារ នៅឆ្នាំ ២០១៨ ឲ្យសភាចិនបោះឆ្នោត លុបចោល វិធានសំខាន់ នៅក្នុងរដ្ឋធម្មនុញ្ញចិន ដែលមានចែង កំណត់អាណត្តិដឹកនាំរបស់ប្រធានាធិបតីតែ ២អាណត្តិ។ នៅក្នុងការដឹកនាំប្រទេស ១០ឆ្នាំមកនេះ លោកប្រធានាធិបតីចិន បានអភិវឌ្ឍ កសាងរូបភាពរបស់ខ្លួន ក្នុងនាមជាមេដឹកនាំកំពូលដ៏មានអំណាច ដូចកាលសម័យ ម៉ៅ សេទុង។ ដោយបើកយុទ្ធនាការបង្រ្កាបរាល់អ្នកប្រឆាំង អ្នកប្រជែងអំណាចនៅក្នុងបក្ស រួម ទាំងគ្មានការកំណត់អាណត្តិដឹកនាំរបស់ប្រធានាធិបតី នៅក្នុងរដ្ឋធម្មនុញ្ញតទៅទៀត យ៉ាងដូច្នេះ លោកស៊ី ជីនពីង ដែលសព្វថ្ងៃ អាយុ ៦៩ឆ្នាំ នឹងអាចបន្តកាន់តំណែងប្រធានាធិបតីចិន យូរឆ្នាំតទៅទៀត សឹងមួយជីវិត មិនមែនត្រឹម ៣អាណត្តិ។
សមាសភាពក្បាលម៉ាស៊ីនថ្មីរបស់បក្ស សុទ្ធសឹងជាមនុស្សស្មោះត្រង់ នឹងលោកស៊ី ជីនពីង
ក្រៅតែពីបោះឆ្នោតផ្តល់សេចក្តីទុកចិត្តឲ្យលោកស៊ី ជីនពីងដឹកនាំប្រទេសមួយអាណត្តិបន្ថែមទៀត នៅថ្ងៃសុក្រនេះ សភាប្រជាជនចិនត្រូវបោះឆ្នោតជ្រើសរើសសមាសភាពថ្នាក់ដឹកនាំថ្មី ដែលមានតាំងពីប្រធានសភា និងអនុប្រធានាធិបតី។
នៅក្នុងសម័យប្រជុំពេញអង្គប្រចាំឆ្នាំ របស់សភាប្រជាជនចិន នៅថ្ងៃសុក្រនេះ មានបុគ្គលបីរូបដែលបានស្បថចូលកាន់តំណែង នៅក្រោយការបោះឆ្នោតជ្រើសតាំងជាផ្លូវការរបស់សភា។ ទី១គឺ លោកស៊ី ជីនពីង បន្ទាប់គឺចាវ ឡឺជី ដែលត្រូវសភាបោះឆ្នោតតែងតាំងជាប្រធានសភា ដែលមានសមាជិក ៣ពាន់នាក់។
លោកចាវ ឡឺជី មានអាយុ ៦៧ឆ្នាំ ជាមនុស្សស្និទ្ធខ្នាំងនឹងលោកស៊ី ជីនពីង។ លោកចាវ ឡឺជីបានទទួលទំនុកចិត្តពីលោកស៊ី ជីនពីង ដើម្បីដឹកនាំក្រុមប្រយុទ្ធប្រឆាំងអំពើពុករលួយរបស់បក្សកុម្មុយនិស្តចិន។ អ្នកជំនាញវាយតម្លៃថា លោកចាវ ឡឺជី ជាមនុស្សស្មោះត្រង់ខ្លាំងនឹងលោកស៊ីជីនពីង។ ក្នុងនាមជាប្រធានក្រុមប្រឆាំងអំពើពុករលួយ លោកចាវ ឡឺជី ធ្លាប់បានយកលេសអនុវត្តច្បាប់ប្រឆាំងអំពើពុករលួយ ដើម្បីបោសសម្អាតរាល់បេក្ខជនដែលមានសក្តានុពល អាចប្រឆាំងប្រជែងអំណាចរបស់លោកស៊ី ជីនពីង ទាំងនៅក្នុងជួរបក្សកុម្មុយនិស្ត និងនៅក្នុងពិភពអ្នកជំនួញ ល្បីឈ្មោះនៅប្រទេសចិន។
បុគ្គលសំខាន់ម្នាក់ទៀត ដែលស្បថចូលកាន់តំណែងនៅថ្ងៃនេះ ដែរ គឺលោក ហាន់ ចេង អាយុ ៦៩ឆ្នាំ។ ជាសមាជិករបស់គណៈអចិន្ត្រៃយ៍ ការិយាល័យនយោបាយរបស់បក្ស លោក ហាន់ចេងដែលធ្លាប់ជាប្រធានបក្សកុម្មុយនិស្ត ប្រចាំក្រុងសៀងហៃ ត្រូវដំឡើងឋានៈ ជាអនុប្រធានាធិបតី។
ជារួម សម័យប្រជុំពេញអង្គរបស់សភាប្រជាជនចិន នៅថ្ងៃសុក្រនេះ ជាឱកាសឲ្យគេស្គាល់មុខរបស់សមាជិកសំខាន់៦រូបផ្សេងទៀត របស់ការិយាល័យនយោបាយរបស់បក្សកុម្មុយនិស្តចិន ដែលមានតួនាទីសំខាន់ កំណត់ ដៅនយោបាយរបស់ប្រទេស។ ដូចអនុប្រធានាធិបតី និងប្រធានសភា សមាជិកសំខាន់ៗទាំង៦រូបរបស់គណៈអចិន្ត្រៃយ៍ ការិយាល័យនយោបាយរបស់បក្ស សុទ្ធសឹងជាមនុស្សដែលស្និទ្ធ ស្មោះត្រង់នឹងលោកស៊ី ជីនពីង។
អ្វីដែលគេតាមដានចង់ដឹងនៅក្នុងសម័យប្រជុំពេញអង្គរបស់សភា នៅថ្ងៃសុក្រនេះដែរ គឺសមាសភាពរដ្ឋាភិបាលថ្មី។ រហូតមកដល់ពេលនេះ គេដឹងរួចហើយថា អនាគតនាយករដ្ឋមន្រ្តីថ្មី គឺលោកលី ឈាំង ដែលជាមនុស្សស្មោះត្រង់ម្នាក់ទៀត របស់លោកស៊ី ជីនពីង។ លោកលីឈាំង នឹងចូលកាន់តំណែង នាយករដ្ឋមន្រ្តីបន្តពីលោកលី ខឺឈាំង។
បញ្ហាប្រឈមដែលកំពុងរង់ចាំ លោកស៊ី ជីនពីង នៅអាណត្តិទី៣
ម្ចាស់និពន្ធសៀវភៅស្តីពីជីវប្រវត្តិរបស់លោកប្រធានាធិបតី ចិន ស៊ី ជីនពីង អ្នកកាសែតស្វ៊ីស លោក Adrian Geiges និយាយថា លោកស៊ី ជីនពីង ចង់បន្តកាន់អំណាចច្រើនឆ្នាំ នៅប្រទេសចិន មិនមែនគ្រាន់តែដើម្បីបង្កើនភាពមានបាន ជាលក្ខណៈបុគ្គលតែប៉ុណ្ណោះទេ ប៉ុន្តែ លោកស៊ី ជីនពីង ពិតជាមានចក្ខុវិស័យ សម្រាប់ប្រទេសចិន។ លោកចង់ឲ្យប្រទេសចិន ប្រែក្លាយជាមហាអំណាច ទាំងផ្នែកសេដ្ឋកិច្ច និងយោធា ក្នុងពិភពលោក។
ប៉ុន្តែ ដើម្បីសម្រេចមហិច្ឆតាមួយនេះ លោកស៊ី ជីនពីង ត្រូវប្រឈមនឹងបញ្ហា៤ចំបង ដែលលោកត្រូវដោះស្រាយ នៅក្នុងអាណត្តិទី៣។
ទី១ គឺ សេដ្ឋកិច្ចចិនដែលកំពុងដើរយឺត នៅក្នុងបរិបទវិបត្តិសេដ្ឋកិច្ចសកល ដោយសារសង្រ្គាមរុស្ស៊ី ឈ្លានពានអ៊ុយក្រែន។ ដោយសារនយោបាយរឹតបន្តឹងទប់ស្កាត់ជំងឺកូវីដ អស់៣ឆ្នាំ កំណើនសេដ្ឋកិច្ចចិននៅឆ្នាំ ២០២២ មានត្រឹម ៣% ប៉ុណ្ណោះ គឺតិចជាងការព្យាករទុក។ នៅក្នុងសម័យប្រជុំពេញអង្គរបស់សភា នាយករដ្ឋមន្រ្តីផុតអាណត្តិ លោកលី ខឺឈាំងបានដៅកំណត់កំណើនសេដ្ឋកិច្ចរបស់ចិន តែ ៥%នៅឆ្នាំ ២០២៣ ពោលគឺទាបខ្លាំង ខុសសព្វដង។
បញ្ហាទី២ ដែលប្រធានាធិបតីចិនត្រូវប្រឈម គឺភាពតានតឹងជាមួយវ៉ាស៊ីនតោន។ នៅក្រោមអាណត្តិដឹកនាំរបស់លោកស៊ី ជីនពីង ទំនាក់ទំនងចិន និងអាមេរិកកាន់តែតានតឹង ដោយសារការប្រជែងពាណិជ្ជកម្ម ប្រជែងយុទ្ធសាស្រ្តយោធានៅអាស៊ីប៉ាស៊ីហ្វិក និងចុងក្រោយ គឺការបាញ់ទម្លាក់បាឡុងចិន ដែលអាមេរិកចោទថា ធ្វើចារកម្ម យកការណ៍សម្ងាត់ក្នុងទឹកដីអាមេរិក។
បញ្ហាទី៣ គឺ កោះតៃវ៉ាន់។ លោកស៊ី ជីនពីងធ្លាប់និយាយថា ចិននឹងយកតៃវ៉ាន់មកគ្រប់គ្រងវិញបើទោះបីប្រើកម្លាំងយោធា។
នៅខែតុលាកន្លែងទៅ បក្សកុម្មុយនិស្តចិនបានចែងជាលើកទី១នៅក្នុងរដ្ឋធម្មនុញ្ញ ប្រឆាំងការប្រកាសឯករាជ្យភាពរបស់តៃវ៉ាន់។ អ្នកជំនាញវាយតម្លៃថា ចិននឹងអាចវាយយកតៃវ៉ាន់មកគ្រប់គ្រងនៅឆ្នាំ ២០៤៩។
បញ្ហាទី៤ គឺការរិះគន់ ពីសហគមន៍អន្តរជាតិ នៅក្នុងសំណុំរឿងរំលោភសិទ្ធិមនុស្សនៅប្រទេសចិន។ ក្រោមការគ្រប់គ្រងរបស់លោកស៊ី ជីនពីង នៅ១០ឆ្នាំ មកនេះ សង្គមស៊ីវិល និងអ្នកចេញមុខប្រឆាំង ត្រូវគេបង្រ្កាប ចាប់ដាក់ពន្ធនាគារ។ របាយការណ៍របស់អង្គការសហប្រជាជាតិធ្លាប់បានបរិហារ សង្រ្គាមប្រឆាំងមនុស្សជាតិ នៅក្រោយមានសេចក្តីរាយការណ៍ពីការរំលោភសិទ្ធិមនុស្សធ្ងន់ធ្ងរនៅខេត្តស៊ីនជាំង។ គេវាយតម្លៃបញ្ហារំលោភសិទ្ធមនុស្សនឹងកាន់តែធ្លាក់ចុះខ្លាំង នៅក្នុងអាណត្តិដឹកនាំថ្មី របស់លោកស៊ី ជីនពីង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ