តៃវ៉ាន់៖ចិនបានដំឡើងថវិកាការពារជាតិដើម្បីត្រៀមក្រសោបយកកោះតៃវ៉ាន់ដោយប្រើកម្លាំងបាយ
នៅតៃវ៉ាន់ រដ្ឋមន្រ្តីក្រសួងការពារជាតិលោកឈៀវ គួចឹងបានបញ្ចេញប្រតិកម្មក្នុងថ្ងៃចន្ទ ទី៦ មីនាថា ការដំឡើងថវិកាការពារជាតិរបស់ចិនសម្រាប់ឆ្នាំ ២០២៣ មានន័យថា ចិនកំពុងត្រៀមប្រើកម្លាំងនៅក្នុងករណីចាំបាច់ដើម្បីវាយប្រហារក្រសោបយកកោះតៃវ៉ាន់។ តែការលើកឡើងរបស់រដ្ឋមន្រ្តីការពារជាតិតៃវ៉ាន់ត្រូវបានចិនទាត់ចោលភ្លាមៗ។ គួរបញ្ជាក់ថាក្នុងថ្ងៃអាទិត្យ ទី៥ មីនា ក្រុងប៉េកាំងបានប្រកាសដំឡើងថវិកាការពារជាតិចំនួន ៧,២% សម្រាប់ឆ្នាំ ២០២៣។ នេះជាកំណើនមួយដ៏ខ្ពស់មិនធ្លាប់មានគិតតាំងពីឆ្នាំ ២០១៩។
ចុះផ្សាយនៅថ្ងៃ៖
ស្តាប់ - ០២:២០
ជាមួយនឹងកំណើនចំនួន ៧,២% ការចំណាយក្នុងវិស័យយោធារបស់ចិនសម្រាប់ឆ្នាំ ២០២៣ នឹងមានទឹកប្រាក់ ២២៥ ០០០លានដុល្លារ។ ថ្លែងនៅចំពោះមុខក្រុមអ្នកតំណាងរាស្រ្តនៅក្នុងសភា រដ្ឋមន្រ្តីក្រសួងការពារជាតិតៃវ៉ាន់លោកឈៀវ គួចឹងបានបញ្ជាក់ច្បាស់ៗថា ចិនកំពុងត្រៀមខ្លួនប្រើកម្លាំងបើចាំបាច់នាពេលអនាគត។ តាមលោកឈៀវ គួចឹង ដំណើរទស្សនកិច្ចរបស់អ្នកទទួលខុសត្រូវជាន់ខ្ពស់បរទេសនៅតៃវ៉ាន់ ឬមួយក៏ការធ្វើសមយុទ្ធរបស់ទ័ពតៃវ៉ាន់ជាមួយនឹងទ័ពសម្ព័ន្ធមិត្តអាចត្រូវបានចិនយកធ្វើជាលេសដើម្បីចូលឈ្លានពានតៃវ៉ាន់។
« ខ្ញុំគិតថា ចិនកំពុងរង់ចាំហេតុផលដ៏ល្អមួយដើម្បីបញ្ជូនទ័ពចូលតៃវ៉ាន់ ដូចយ៉ាងទស្សនកិច្ចរបស់អ្នកទទួលខុសត្រូវជាន់ខ្ពស់បរទេសនៅតៃវ៉ាន់ ឬមួយក៏សកម្មភាពញឹកញាប់រវាងកងទ័ពយើង និងកងទ័ពប្រទេសផ្សេង » នេះជាការថ្លែងរបស់លោកឈៀវ គួចឹង។ តែរដ្ឋមន្រ្តីការពារជាតិតៃវ៉ាន់រូបនេះដដែលមិនភ្លេចគូសបញ្ជាក់ថា តៃវ៉ាន់បានត្រៀមខ្លួនទុកមុនពីការចូលឈ្លានពានរបស់ទ័ពចិននៅក្នុងដែនទឹកជុំវិញកោះតៃវ៉ាន់។ យ៉ាងណាក៏ដោយ ចិនតាមរយៈអ្នកនាំពាក្យក្រសួងការបរទេសលោកស្រីម៉ាវ នីងបានទាត់ចោលលើការលើកឡើងរបស់លោកឈៀវ គួចឹង។
តាមលោកស្រីម៉ាវ នីង ចិននឹងចាត់វិធានការម៉ឺងម៉ាត់ដើម្បីការពារអធិបតេយ្យភាព និងបូរណភាពទឹកដីទាំងមូលរបស់ខ្លួន។ ដោយឡែកក្នុងថ្ងៃអាទិត្យ ទី៥ មីនា នាយករដ្ឋមន្រ្តីចិនលោកលី ខឺជាំងបានបញ្ជាក់ជាថ្មីពីការជំទាស់របស់ចិនចំពោះឯករាជ្យភាពរបស់តៃវ៉ាន់។ ចំណែកនាយរដ្ឋមន្រ្តីតៃវ៉ាន់លោកឆិន ជៀនយឹនបានស្នើចិនឲ្យគោរពតៃវ៉ាន់។ តាមលោកឆិន ជៀនយឹន ទំនាក់ទំនងចិន និងតៃវ៉ាន់គួរត្រូវបានចង្អុលបង្ហាញដោយគោលការណ៍សមហេតុផល សមភាព និងការគោរពគ្នាទៅវិញទៅមក។ គួរបញ្ជាក់ថា តៃវ៉ាន់ត្រូវបានចិនដីគោកចាត់ទុកជាខេត្តឧទ្ទាមមួយរបស់ខ្លួន និងព្រមានវាយប្រហារដោយកម្លាំងទ័ព បើកោះមួយនេះហ៊ានប្រកាសឯករាជ្យនៅថ្ងៃណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ