សភាថៃលើកពេលបោះឆ្នោតនាយករដ្ឋមន្រ្តីមួយថ្ងៃក្រោយបក្សភឿថៃក្បត់ ដោះដៃចេញពីបក្សកាវក្លៃ
ចុះផ្សាយនៅថ្ងៃ៖
មួយថ្ងៃក្រោយ គណបក្សភឿថៃប្រកាសផាត់ គណបក្សកាវក្លៃ ចេញពីអនាគតរដ្ឋាភិបាលចម្រុះថ្មី តុលាការធម្មនុញ្ញថៃបានប្រកាសលើកពេល បើកសវនាការលើពាក្យបណ្តឹង របស់អ្នកគាំទ្រគណបក្សកាវក្លៃ ដែលចង់ឲ្យតុលាការធម្មនុញ្ញវិនិច្ឆ័យ ក្នុងរឿងដែលសភាថៃបោះឆ្នោត ប្រឆាំងបេក្ខភាពនាយករដ្ឋមន្រ្តីថៃរបស់លោកភិថា លីមចៈរើនរ៉ាត់ កាលពីថ្ងៃទី ១៩ខែកក្កដា។ នៅថ្ងៃព្រហស្បតិ៍ទី ៣ សីហា ប្រធានសភាថៃ បានប្រកាសលើកពេលការបោះឆ្នោតជ្រើសរើសនាយករដ្ឋមន្រ្តី ជាលើកទី៣ ដែលត្រូវគ្រោងធ្វើនៅថ្ងៃទី ៤សីហា ឆ្នាំ២០២៣។ ថៃកំពុងជាប់គាំងក្នុងវិបត្តិនយោបាយ មិនទាន់រកឃើញនាយករដ្ឋមន្រ្តី បើទោះបី ការបោះឆ្នោតបានកន្លងផុតទៅ ជាង ១ខែ ចំណែកគណបក្សកាវក្លៃ ដែលមានការគាំទ្រពីយុវជន បានទទួលសំឡេងច្រើនជាងគេនៅក្នុងការបោះឆ្នោតក្តី។
ហេតុអ្វីសភាថៃលើកពេលការបោះឆ្នោតជ្រើសរើសនាយករដ្ឋមន្រ្តី?
បន្ទាប់ពីប្រកាសលើកពេលបោះឆ្នោតជ្រើសរើសនាយករដ្ឋមន្រ្តី ដោយគ្មានកាលកំណត់ កាលពីថ្ងៃទី ២៥កក្កដា កន្លងទៅ ប្រធានរាជសភាថៃ លោកវ៉ាន់ មូហាម៉ាត់ ណរ ម៉ៈថា បានប្រកាស នៅថ្ងៃព្រហស្បតិ៍ទី ៣សីហា ថា ការបោះឆ្នោតជ្រើសរើសនាយករដ្ឋមន្រ្តីថៃដែលត្រូវប្រព្រឹត្តទៅ នៅថ្ងៃសុក្រទី ៤សីហា នឹងត្រូវលើកពេលសាជាថ្មី។ តាមលោកវ៉ាន់ មូហាម៉ាត់ ណរ ម៉ៈថា ក្នុងនាមជាប្រធានសភាថៃ លោកត្រូវសម្រេចលើកពេលការបោះឆ្នោតជ្រើសរើសនាយករដ្ឋមន្រ្តីថៃថ្មី ក្នុងពេលរង់ចាំការសម្រេចរបស់តុលាការធម្មនុញ្ញថៃ នៅថ្ងៃទី ១៦សីហាខាងមុខ។
ការប្រកាសរបស់ប្រធានសភាថៃបានទៅបន្ទុចបង្អាក់ដំណើរការចរចារបស់គណបក្សភឿថៃជាមួយគណបក្សគាំទ្រយោធាថៃ នៅមួយថ្ងៃក្រោយ ដែលបក្សភឿថៃប្រកាសកាត់ផ្តាច់ចំណងជាមួយ គណបក្សកាវក្លៃ នៅក្នុងគម្រោងបង្កើតរដ្ឋាភិបាលចម្រុះថ្មី។
ហេតុអ្វីគេត្រូវចាំការសម្រេចរបស់តុលាការធម្មនុញ្ញថៃ?
តាមប្រធានសភាថៃ ការបោះឆ្នោតជ្រើសរើសនាយករដ្ឋមន្រ្តីថៃ ត្រូវលើកពេល ព្រោះត្រូវរង់ចាំការសម្រេចរបស់តុលាការធម្មនុញ្ញស្តីពីការបដិសេធបេក្ខភាពនាយករដ្ឋមន្រ្តីរបស់លោកភិថា លីមចៈរើនរ៉ាត់ នៅក្នុងការបោះឆ្នោតសភា កាលពីថ្ងៃទី ១៩កក្កដា។
នៅថ្ងៃនោះ សមាជិកសភាទាំង២ថ្នាក់ ដែលភាគច្រើនជាសមាជិកព្រឹទ្ធសភា ដែលតែងតាំងដោយពួកយោធា និងសមាជិកអ្នកតំណាងរាស្រ្តរបស់គណបក្សគាំទ្រពួកយោធាបានបោះឆ្នោតបដិសេធ បេក្ខភាពនាយករដ្ឋមន្រ្តី របស់លោកភិថា លីមចៈរើនរ៉ាត់ ដែលបានស្នើបេក្ខភាពរបស់លោកជាលើកទី២ បន្ទាប់ពីបរាជ័យក្នុងការបោះឆ្នោតសភា នៅថ្ងៃទី ១៣កក្កដា។ តាមការលើកឡើងរបស់ក្រុមប្រឆាំងលោកភីថា វាផ្ទុយនឹងមាត្រាទី៤១ នៃបទបញ្ជាផ្ទៃក្នុងរបស់សភា ដែលចែងថា គេមិនអាចបោះឆ្នោត២ដងលើរឿងតែមួយ ពោលគឺមិនអាចបោះឆ្នោតលើបេក្ខភាពដដែល ដែលមិនបានទទួលសំឡេងគាំទ្រគ្រប់គ្រាន់ក្នុងការបោះឆ្នោតនៅលើកទី១។ ប៉ុន្តែ អ្នកគាំទ្រលោកភិថា លីមចៈរើនរ៉ាត់ និងអ្នកជំនាញខាងធម្មនុញ្ញថៃ យល់ឃើញផ្ទុយទៅវិញ និងបានតវ៉ា ដាក់ពាក្យបណ្តឹង តាមរយៈអ្នកសម្របសម្រួល ទៅកាន់តុលាការធម្មនុញ្ញថៃ ដើម្បីឲ្យតុលាការធម្មនុញ្ញបកស្រាយពីភាពស្របច្បាប់នៅក្នុងការឈរឈ្មោះជាលើកទី២ សម្រាប់បេក្ខភាពនាយករដ្ឋមន្រ្តី។
នៅថ្ងៃព្រហស្បតិ៍ទី ៣ សីហា តុលាការធម្មនុញ្ញថៃបានចេញសេចក្តីប្រកាសព័ត៌មាន ពន្យល់ពីការលើកពេល បើកសវនាការជំនុំជម្រះលើពាក្យបណ្តឹងរបស់ក្រុមគាំទ្ររបស់បក្សកាវក្លៃ ដោយថា ពាក្យបណ្តឹងមានជាប់ពាក្យប្រទាក់ក្រឡានឹងគោលការណ៍រដ្ឋបាលនៅក្នុងប្រព័ន្ធរាជានិយមអាស្រ័យរដ្ឋធម្មនុញ្ញ។ ដូច្នេះ តុលាការធម្មនុញ្ញត្រូវការពេលវេលាច្រើនដើម្បីសិក្សាស៊ីជម្រៅ ប្រមូលបានព័ត៌មានឲ្យបានច្រើន។
តើលោកភិថា លីមចៈរើនរ៉ាត់ ត្រូវបក្សភឿថៃ ក្បត់ លួចចាក់ពីក្រោយខ្នង?
នៅក្នុងសន្និសីទកាសែតកាលពីថ្ងៃពុធ គណបក្សភឿថៃបានប្រកាសដើរចេញពីបក្សសម្ព័ន្ធដើម្បីប្រជាធិបតេយ្យ ដែលបក្សកាវក្លៃរួមគ្នាបង្កើតជាមួយគណបក្សចំនួន ៧ ដើម្បីបង្កើតរដ្ឋាភិបាលចម្រុះ។ ជាលទ្ធផល គណបក្សភឿថៃ ត្រូវបង្កើតបក្សសម្ព័ន្ធថ្មី ដើម្បីបង្កើតអនាគតរដ្ឋាភិបាលចម្រុះមួយ ដែលគ្មានការចូលរួមពីគណបក្សកាវក្លៃ។
តាមការប្រកាសរបស់ប្រធានបក្សភឿថៃ នៅក្រោយលោកភិថា លីមចៈរើនរ៉ាត់បរាជ័យ ២លើកនៅក្នុងការបោះឆ្នោតសភា ជ្រើសរើសនាយករដ្ឋមន្រ្តីថៃ គណបក្សចូលរួមនៅក្នុងបក្សសម្ព័ន្ធបានដាក់បន្ទុកឲ្យគណបក្សភឿថៃ ស្វែងរកដៃគូថ្មី សម្រាប់បង្កើតរដ្ឋាភិបាលចម្រុះ។ តាមប្រធានបក្សភឿថៃ លោក ចុលណាន ស្រីកែវ ដោយសារតែគណបក្សអភិរក្សនិយមមួយចំនួន នៅក្រៅក្រុមបក្សសម្ព័ន្ធប្រជាធិបតេយ្យ បានបដិសេធមិនចូលរួមបង្កើតរដ្ឋាភិបាលចម្រុះ បើសិនជាមានការចូលរួមពីបក្សកាវក្លៃ បក្សភឿថៃបានប្រាប់ទៅបក្សកាវក្លៃថា បក្សកាវក្លៃគួរនៅជាបក្សប្រឆាំងនៅសភា ចំណែក បក្សភៀថៃនឹងប្រមែប្រមួលគណបក្សផ្សេងទៀត ដើម្បីបង្កើតរដ្ឋាភិបាលចម្រុះ។ នៅថ្ងៃពុធ បក្សភឿថៃបានប្រកាសជ្រើសតាំងមហាសេដ្ឋីអចលនទ្រព្យ សេដ្ឋា ទ្វីសិនជាបេក្ខជននាយករដ្ឋមន្រ្តីថៃ។
ការប្រកាសដោះដៃរបស់បក្សភឿថៃ បានបណ្តាលឲ្យមានប្រតិកម្មរិះគន់ វាយប្រហារពីខាងគណបក្សកាវក្លៃ ។ សមាជិកសភាមកពីគណបក្សកាវក្លៃមួយចំនួនបាននិយាយថា ពួកភ្ញាក់ផ្អើលនឹងការសម្រេចចិត្តរបស់បក្សភឿថៃ ចំណែក អ្នកគាំទ្រគណបក្សកាវក្លៃ ដែលបាលើកគ្នាទៅតវ៉ាមុនទីស្នាក់ការគណបក្សភភឿថៃ នៅទីក្រុងបាងកក បានចាត់ទុកការប្រកាសដោះដៃរបស់បក្សភឿថៃ ថា ជាទង្វើក្បត់ លួចចាក់ពីក្រោយខ្នង បក្សកាវក្លៃ។
គណបក្សកាវក្លៃដែលបានទទួលសំឡេងគាំទ្រភាគច្រើនពីយុវជន ដែលស្រេកឃ្លានសេរីភាព ចង់ឲ្យមានការផ្លាស់ប្តូរក្នុងសង្គមថៃ បានទទួលសំឡេងឆ្នោត ច្រើនជាងគេនៅក្នុងការបោះឆ្នោតសភា ដោយទទួលបាន១៥១អាសនៈនៅសភាជាន់ទាប។ ប៉ុន្តែ ក្រុមអភិរក្សនិយម ដែលចោទប្រកាន់លោកភិថា លីមចៈរើនរ៉ាត់ ថា មានគោលនយោបាយ ចង់ធ្វើកំណែទម្រង់ច្បាប់ជេរប្រមាថព្រះមហាក្សត្រ និងការកាន់អំណាចរបស់ពួកយោធាថៃ បាន បោះឆ្នោត ប្រឆាំងមិនឲ្យលោកភិថា នៅក្នុងការបោះឆ្នោតជ្រើសរើសនាយករដ្ឋមន្រ្តីនៅសភា។
គ្មានលោកភីថា លីមចៈរើនរ៉ាត់ដែលត្រូវផាត់ចេញពីបក្សសម្ព័ន្ធបង្កើតរដ្ឋាភិបាលថ្មី តើបក្សភឿថៃមានសំឡេងគ្រប់គ្រាន់នៅសភាសម្រាប់គាំទ្របេក្ខជននាយករដ្ឋមន្រ្តីរបស់ខ្លួន?
ដើម្បីទទួលបានតំណែងនាយករដ្ឋមន្រ្តី លោក សេដ្ឋា ទ្វីសិន របស់បក្សភឿថៃ ត្រូវទទួលបានសំឡេងគាំទ្រភាគច្រើនបូកចូលគ្នាពីសមាជិកសភា និងព្រឹទ្ធសភា ដែលមានសរុប ៧៥០នាក់ ដែលនៅក្នុងនោះ ២៥០នាក់ជាសមាជិកព្រឹទ្ធសភា តែងតាំងដោយកងទ័ព។ សំឡេងគាំទ្រភាគច្រើនដែលបក្សភឿថៃ ត្រូវរកសម្រាប់គាំទ្របេក្ខភាពនាយករដ្ឋមន្រ្តីរបស់សេដ្ឋា ទ្វីសិន គឺ ៣៧៦សំឡេង។ ប៉ុន្តែ ដោយ ដោយដោះដៃចេញពីគណបក្សកាវក្លៃ ដែលបានទទួលអាសនៈ ១៥១ ច្រើនជាង គណបក្សភឿថៃ ដែលបានទទួលត្រឹម ១៤១អាសនៈ គណបក្សភឿថៃ ត្រូវបាត់សំឡេងច្រើននៅក្នុងបោះឆ្នោតគាំទ្របេក្ខជននាយករដ្ឋមន្រ្តីរបស់គណបក្សភឿថៃ គឺលោក សេដ្ឋា ទ្វីសិន។
នៅថ្ងៃពុធ គណបក្សភឿថៃ អះអាងថា គេអាចចាប់ដៃជាមួយគណបក្សភុំចៃថៃ ដែលធ្លាប់ចូលរួមក្នុងរដ្ឋាភិបាលចម្រុះមុន ដែលដឹកនាំដោយលោកនាយករដ្ឋមន្រ្តីប្រាយុទ្ធចាន់អូចា
គណបក្សភុំចៃថៃ បានទទួលអាសនៈតែ ១៩ប៉ុណ្ណោះ គឺតិចជាង បក្សកាវក្លៃច្រើនណាស់ ដែលបានទទួលអាសនៈដល់ទៅ ១៥១អាសនៈ។ ប៉ុន្តែ គេមើលឃើញថា ទោះជាគណបក្សភុំចៃថៃ មានអាសនៈតិចមែន ប៉ុន្តែ គណបក្សអភិរក្សនិយមមួយនេះអាចទាក់ទាញ សមាជិកព្រឹទ្ធសភា តែងតាំងដោយពួកយោធា ឲ្យបោះឆ្នោតបេក្ខជននាយករដ្ឋមន្រ្តីរបស់គណបក្សភឿថៃ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ