ថៃ ៖ លោកប្រាយុទ្ធអំពាវនាវសុំភាពស្ងប់ស្ងាត់ ក្រោយបរាជ័យរបស់លោកភិថានៅសភា
គ្រាន់តែសភាថៃទាំងពីរប្រកាសមិនទទួលយកបេក្ខភាពនាយករដ្ឋមន្ត្រីរបស់លោក ភិថា លឹមចៈរើនរ៉ាត់ ជាលើកទីពីរ នៅថ្ងៃពុធម្សិលមិញភ្លាម ពលរដ្ឋថៃជាច្រើននាក់បានមកជួបជុំគ្នានៅទីលានប្រជាធិបតេយ្យ ដើម្បីបញ្ចេញកំហឹង។ នៅចំពោះមុខស្ថានភាពបែបនេះ នាយករដ្ឋមន្ត្រីផុតអាណត្តិ លោកប្រាយុទ្ធចាន់អូចា បានចេញសេចក្តីអំពាវនាវនៅថ្ងៃព្រហស្បតិ៍ទី២០កក្កដានេះ ឱ្យមានភាពស្ងប់ស្ងាត់។
ចុះផ្សាយនៅថ្ងៃ៖
ស្តាប់ - ០២:១២
តាមរយៈសំដីរបស់អ្នកនាំពាក្យ លោកប្រាយុទ្ធចាន់អូចា នាយករដ្ឋមន្ត្រីផុតអាណត្តិ ដែលបានឡើងកាន់អំណាចដោយធ្វើរដ្ឋប្រហារនៅឆ្នាំ២០១៤ និងបន្តកាន់តួនាទីស្តីទីនេះរហូតដល់មានប្រមុខរដ្ឋាភិបាលថ្មី បានប្រកាសយល់ចិត្តនិងកំហឹងរបស់សកម្មជនបក្សកាវក្លៃ ដែលបានឈ្នះនាំមុខ ក្នុងសម័យបោះឆ្នោតថ្ងៃទី ១៤ឧសភា២០២៣។ ជាមួយនឹងសេចក្តី អំពាវនាវ ឱ្យមានអត់ធ្មត់និងរក្សាភាពស្ងប់ស្ងាត់ លោកប្រាយុទ្ធចាន់អូចាបានអះអាងថាគ្រប់គ្នាត្រូវធ្វើការដើម្បីឱ្យប្រទេសថៃអាចបោះជំហានទៅមុខតាមបែបប្រជាធិបតេយ្យស្របតាមគន្លងរាជានិយម។
សូមបញ្ជាក់ថា នៅរសៀលថ្ងៃពុធម្សិលមិញ គ្រាន់តែលោកភិថាលឹមចៈរើនរ៉ាត់បរាជ័យមិនអាចក្លាយជាប្រមុខដឹកនាំរដ្ឋាភិបាលថៃថ្មីបានភ្លាម សកម្មជន បាតុករអ្នកគាំទ្របក្សកាវក្លៃប្រមាណ៣០០នាក់បានចុះស្រនៅពេលរសៀល និងឡើងដល់ច្រើនពាន់នាក់នៅពេលយប់ មកជួបជុំគ្នានៅទីលានប្រជាធិបតេយ្យកណ្តាលក្រុងបាងកក ដើម្បីបញ្ចេញកំហឹងប្រឆាំងនឹងសេចក្តីសម្រេចសភានិងព្រឹទ្ធសភា។ បន្ទាប់ពីតស៊ូមតិអស់រយៈពេលជាង៧ម៉ោង នាថ្ងៃពុធទី ១៩កក្កដា សភាទាំងពីរបានសម្រេចច្រានចោលបេក្ខភាពលោក ភិថា លឹមចៈរើនរ៉ាត់ ជានាយករដ្ឋមន្ត្រី ជាលើកទីពីរ។ សភាថៃសម្រេចរៀបចំការបោះឆ្នោតជាលើកទីបី នៅថ្ងៃ២៧កក្កដាសប្តាហ៍ក្រោយ។
ថៃអាចនឹងធ្លាក់ក្នុងវិបត្តិនយោបាយជាថ្មី ក្នុងករណីមិនអាចរកបេក្ខជននាយរដ្ឋមន្ត្រីមកជំនួសលោកភិថាដែលត្រូវគេកៀសចេញ។ គ្រប់ចក្ខុកំពុងផ្តោតទៅលើបក្សភឿថៃ ដែលមានទម្ងន់នយោបាយខ្លាំង ដឹកនាំដោយគ្រួសារត្រកូលស៊ីណាវ៉ាត់។ គណបក្សមានបេក្ខជននាយករដ្ឋមន្ត្រីដែលកមានសំណាងឡើងដឹកនាំរដ្ឋាភិបាលជាថ្មី ប៉ុន្តែតើជារដ្ឋាភិបាលចម្រុះបែបណា បើមិនចូលជាមួយគណបក្សកាវក្លៃ? ដើម្បីទទួលសំឡេងចាំបាច់ពីសភានិងព្រឹទ្ធសភា បក្សភឿថៃអាចនឹងចងមេត្រីជាមួយបក្សផ្សេងទៀត ក្នុងនោះខ្លះជាបក្សស្និទ្ធនឹងក្រុមយោធាផង។ បើផ្តាច់ចំណងពីបក្សកាវក្លៃ ភឿថៃអាចខូចប្រយោជន៍នាពេលអនាគត។ នេះបើតាមការវិភាគរបស់អ្នកជំនាញនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ