ថៃ៖សភាគ្រោងបោះឆ្នោតលើកទី២នៅថ្ងៃទី១៩ កក្កដាដើម្បីជ្រើសរើសនាយករដ្ឋមន្រ្តីថ្មី
នៅក្នុងប្រទេសថៃ ការបោះឆ្នោតជ្រើសរើសនាយករដ្ឋមន្រ្តីថ្មីនៅក្នុងសភាគ្រោងរៀបចំលើកទី២ នាថ្ងៃពុធ ទី១៩ កក្កដាសប្តាហ៍ក្រោយ។ ការសម្រេចនេះបានធ្វើឡើងនៅក្រោយបរាជ័យនាការបោះឆ្នោតក្នុងថ្ងៃព្រហស្បតិ៍ ទី១២ កក្កដាដែលបេក្ខជននាយករដ្ឋមន្រ្តីលោកភិថា លីមចៈរើនរ៉ាត់មិនបានទទួលសំឡេងគាំទ្រគ្រប់គ្រាន់។ តែប្រធានគណបក្សកាវក្លៃដែលបានឈ្នះឆ្នោតនាការបោះឆ្នោតសភានាថ្ងៃ ទី១៤ ឧសភារូបនេះបានសន្យាមិនបោះបង់ចោលត្រឹមនេះទេ។
ចុះផ្សាយនៅថ្ងៃ៖
ស្តាប់ - ០២:២៣
ក្រោយពីបេក្ខភាពប្រធានគណបក្សកាវក្លៃលោកភិថា លីមចៈរើនរ៉ាត់ត្រូវបានសភាបោះឆ្នោតមិនទទួលយកមក សភាគ្រោងបោះឆ្នោតលើកទី២ នៅថ្ងៃពុធ ទី១៩ កក្កដាដោយគេនៅមិនទាន់ដឹងឈ្មោះបេក្ខជននាយករដ្ឋមន្រ្តីនៅឡើយទេ។ អ្វីដែលគេអាចនិយាយបាន ក្រុមសម្ព័ន្ធមិត្តដែលមាន ៨គណបក្សទើបឈ្នះឆ្នោតថ្មីថ្មោងនាការបោះឆ្នោតសភាក្នុងថ្ងៃទី១៤ ឧសភាអាចសម្រេចស្នើបេក្ខជនថ្មីម្នាក់ទៀតក្រៅពីលោកភិថា លីមចៈរើនរ៉ាត់។ តែប្រធានគណបក្សកាវក្លៃរូបនេះបានបញ្ជាក់រួចហើយថា លោកនឹងមិនបោះបង់ចោលទេ។
ពិតណាស់ លោកភិថា លីមចៈរើនរ៉ាត់អាចឈរឈ្មោះម្តងទៀតបាន ប្រសិនបើពីពេលនេះដល់ថ្ងៃសភាបោះឆ្នោតក្នុងថ្ងៃទី១៩ កក្កដា លោកមិនត្រូវបានតុលាការសម្រេចដកសិទ្ធិទេនោះ។ ចូរកុំភ្លេចថា ប្រធានគណបក្សកាវក្លៃរូបនេះកំពុងជាប់ក្នុងនីតិវិធីតុលាការជាច្រើន។ តុលាការអាចសម្រេចដាក់លោកឲ្យនៅក្រៅឆាកនយោបាយ។ តែជាមួយនឹងជ័យជំនះដ៏ធំធេងរបស់គណបក្សកាវក្លៃនាការបោះឆ្នោតសភា ការសម្រេចបញ្ចប់ជីវិតនយោបាយរបស់លោកភិថា លីមចៈរើនរ៉ាត់អាចបង្កចេញជាហានិភ័យសម្រាប់ស្ថិរភាពប្រទេស។
មិនទាន់អីផងនៅក្រោយការបោះឆ្នោតក្នុងសភាមិនទទួលយកបេក្ខភាពលោកភិថា លីមចៈរើនរ៉ាត់ ក្រុមអ្នកគាំទ្រលោកភិថា លីមចៈរើនរ៉ាត់បានចុះផ្លូវតវ៉ាដែលបង្ខំឲ្យរដ្ឋអំណាចដាក់ពង្រាយកម្លាំងប៉ូលិសក្នុងក្រុងបាងកក។ ក្រុមអ្នកគាំទ្រលោកភិថា លីមចៈរើនរ៉ាត់បានមើលឃើញថា នីតិវិធីតុលាការដែលលោកភិថា លីមចៈរើនរ៉ាត់កំពុងប្រឈមពេលនេះមានលក្ខណៈនយោបាយ និងជាសក្ខីកម្មដែលបញ្ជាក់ថា ក្រុមអ្នកអ្នកគាំទ្ររាជានិយម និងកងទ័ពមិនចង់បោះបង់អំណាចទេ។
បើថៃនៅមិនទាន់រកបាននាយករដ្ឋមន្រ្តីថ្មីនាការបោះឆ្នោតលើកទី២ នៅក្នុងសភានាថ្ងៃទី១៩ កក្កដាខាងមុខ ការបោះឆ្នោតនឹងបន្តមានជាហូរហែរហូតដល់បេក្ខជននាយករដ្ឋមន្រ្តីម្នាក់អាចទទួលបានសំឡេងគាំទ្រភាគច្រើនពីសភា និងព្រឹទ្ធសភា។ ទោះជាយ៉ាងនេះក្តី ក្រុមអ្នកវិភាគបានបារម្ភពីអស្ថិរភាពនយោបាយ បើការបោះឆ្នោតទទួលបរាជ័យជាថ្មីទៀតនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ