ហេតុអ្វីបានជាមានមនុស្សស្លាប់ច្រើន នៅក្នុងភ្លើងឆេះនៅហាវ៉ៃ?
ចុះផ្សាយនៅថ្ងៃ៖
ចំនួនមនុស្សស្លាប់នៅក្នុងភ្លើងឆេះនៅលើកោះMauiរបស់រដ្ឋហាវ៉ៃបានកើនឡើងដល់ចំនួន១០១នាក់។ នេះបើតាមតួលេខចុងក្រោយដែលអភិបាលរដ្ឋហាវ៉ៃ លោកJosh Green បានប្រកាសកាលពីថ្ងៃអង្គារទី ១៥ សីហា។ តាមអភិបាលរដ្ឋហាវ៉ៃដដែល លោកប្រធានាធិបតី ចូ បៃដិនដែលកំពុងរងការរិះគន់ដោយសាររឿងភ្លើងឆេះព្រៃ ឆេះក្រុងប្រវត្តិសាស្រ្តនៅហាវ៉ៃ មានគម្រោងធ្វើដំណើរទៅជួបប្រជាជនរងគ្រោះនៅហាវ៉ៃ។ ដោយបំផ្លាញប្រមាណ ៨៥%នៃទីក្រុងប្រវត្តិសាស្រ្ត Lahaina ភ្លើងឆេះនៅលើកោះMauiត្រូវគេចាត់ទុកជាភ្លើងកំណាច ប្រល័យជីវិតមនុស្សដ៏ច្រើនមិនធ្លាប់មាននៅអាមេរិក នៅ១សតវត្សរ៍មកនេះ។ នៅក្នុងពេល ក្រុមជួយសង្រ្គោះបន្តស្វែងរក កំណត់អត្តសញ្ញាណជនរងគ្រោះនៅក្នុងភ្លើងឆេះ ចម្ងល់ ចោទសួរជាច្រើនលេចឡើងទាក់ទងនឹងសមត្ថភាពរបស់អាជ្ញាធរអាមេរិកក្នុងការគ្រប់គ្រងគ្រោះមហន្តរាយធម្មជាតិនៅលើកោះហាវ៉ៃ។
តួលេខមនុស្សស្លាប់ដោយសារភ្លើងឆេះនៅលើកោះMauiបានកើនឡើងដល់១០១នាក់គិតត្រឹមថ្ងៃអង្គារទី ១៥សីហា។ តាមតួលេខចុងក្រោយរបស់អភិបាលរដ្ឋហាវ៉ៃ ៨៥%នៃទីក្រុងប្រវត្តិសាស្រ្ត Lahainaត្រូវអណ្តាតភ្លើងឆេះលេបត្របាក់ ដោយវាបានឆេះបំផ្លាញផ្ទះជាង ២៧០០ខ្នង សម្លាប់មនុស្សយ៉ាងតិច១០០នាក់ ចំណែកមនុស្សប្រមាណ១៣០០នាក់ កំពុងបាត់ខ្លួន។
គេនៅមិនទាន់ដឹងពីមូលហេតុដែលធ្វើឲ្យកើតមានភ្លើងឆេះនៅលើកោះMaui ប៉ុន្តែវាជាភ្លើងដ៏កំណាចដែលសម្លាប់មនុស្សច្រើនជាងគេបង្អស់នៅអាមេរិក នៅក្នុងរយៈពេល១០០ឆ្នាំចុងក្រោយនេះ បន្ទាប់ពីភ្លើងឆេះព្រៃប្រល័យជីវិតមនុស្ស នៅរដ្ឋវីស្កូស៊ីន និងមីនីសូតា នៅឆ្នាំ ១៩១៨ ដែលបានសម្លាប់មនុស្ស៤៥៣នាក់។
អភិបាលរដ្ឋហាវ៉ៃបានព្រមានជាច្រើនលើកថា ចំនួនមនុស្សស្លាប់ដោយសារភ្លើងឆេះនៅកោះMaui នឹងអាចមានច្រើនជាងតួលេខបច្ចុប្បន្ន ៣ ឬ៤ដង ព្រោះថា ការស្វែងរុករកសាកសពជនរងគ្រោះទើបតែធ្វើបាននៅក្នុងតំបន់១ភាគ៤នៃតំបន់សរុបដែលត្រូវភ្លើងកំណាចដុតឆេះបំផ្លាញ កាល១សប្តាហ៍មុន។
មនុស្សស្លាប់នៅក្នុងភ្លើងឆេះនៅលើកោះMaui អាចមានចំនួនច្រើន ដោយសារភ្លើងឆេះព្រៃកើតឡើងភ្លាមៗ និងឆេះរាលដាលក្នុងល្បឿនមួយដ៏លឿន ដែលធ្វើឲ្យប្រជាជនរស់នៅ កោះMaui តក់ស្លុតត្រូវជាប់គាំង ស្លាប់ក្នុងអណ្តាតភ្លើង។ ប្រជាជននៅលើកោះMauiជាច្រើននិយាយថា ពួកគេត្រូវរត់ប្រាសអាយុ ព្រោះថា ដោយសារតែកម្លាំងខ្យល់បក់ខ្លាំង អណ្តាតភ្លើងដែលគេឃើញនៅចម្ងាយដីជាង១គីឡូម៉ែត្រ អាចរាលដាលមកដល់ផ្ទះរបស់ពួកគេក្នុងរយៈពេលតែ ១ ឬ២នាទីប៉ុណ្ណោះ។ សាក្សីជាច្រើននិយាយថា ពួកគេមិនបានដឹងថា មានភ្លើងឆេះព្រៃដែលអាចរាលដាលឆេះបំផ្លាញដ៏មហន្តរាយបែបនេះទេ។ នៅថ្ងៃកើតហេតុទៀតសោត នៅថ្ងៃអង្គារទី ៨សីហា ពួកគេមិនបានលឺសំឡេងស៊ីរ៉ែនប្រកាសអាសន្ន ហើយក៏មិនបានទទួលសាររបស់អាជ្ញាធរដែលប្រាប់ឲ្យពួកគេចាកចេញពីផ្ទះសម្បែង។ ម្នាក់ៗត្រូវរត់គេចពីអណ្តាតភ្លើងដោយប្រថុចញ៉ុច តាមរយៈការមើលឃើញភ្លើងឆេះដោយផ្ទាល់ភ្នែក ឬការស្រែករបស់អ្នកជិតខាងថាឲ្យរត់ចេញភ្លាមៗ បើសិនមិនចង់ស្លាប់ខ្លួន។
ហេតុអ្វីប្រជាជនមិនលឺសំឡេងប្រកាសអាសន្ន ឬសារឲ្យរត់ភៀសខ្លួន?
នៅលើកោះMauiដែលជាកោះធំទី២របស់រដ្ឋហាវ៉ៃ គេមានស៊ីរ៉ែនបន្លឺសំឡេងចំនួន៨០ដែលគេធ្វើតេស្តសាកល្បងរៀងរាល់ខែ ដើម្បីទាញសញ្ញាអាសន្នឲ្យប្រជាជនដឹងពីគ្រោះមហន្តរាយធម្មជាតិ ដូចជា រលកយក្សស៊ូណាមី គ្រោះភ្នំភ្លើង គ្រោះរញ្ជួយដី ខ្យល់ព្យុះ ឬភ្លើងឆេះព្រៃនៅលើកោះ។ ប៉ុន្តែ នៅថ្ងៃកើតហេតុ ថ្ងៃដែលអណ្តាតភ្លើងចាប់ឆាបឆេះ អាជ្ញាធរនៅលើកោះMauiទទួលស្គាល់ថា ពួកគេខកខាន មិនអាចបន្លឺសំឡេងស៊ីរ៉ែនដើម្បីប្រកាសអាសន្ន។ រដ្ឋអាជ្ញារបស់រដ្ឋហាវ៉ៃកំពុងបើកការស៊ើបអង្កេតរកមូលហេតុដែលធ្វើអាជ្ញាធរនៅលើកោះMaui មិនអាចប្រើស៊ីរ៉ែនទាញសញ្ញាអាសន្នពីគ្រោះថ្នាក់ភ្លើងឆេះព្រៃ។
អភិបាលរដ្ឋហាវ៉ៃទទួលស្គាល់ថា មិនបានទាញសញ្ញាអាសន្ន ដើម្បីជូនដំណឹងឲ្យប្រជាជនរត់ភៀសខ្លួន ប៉ុន្តែ យ៉ាងណាក៏ដោយ លោកនៅតែការពារសកម្មភាពរបស់អាជ្ញាធរនៅលើកោះហាវ៉ៃថា បានធ្វើអស់ពីលទ្ធភាព ប៉ុន្តែ មិនអាចយកឈ្នះលើភ្លើងកំណាចដែលអាចបក់ឆាបឆេះក្នុងល្បឿនជាង១គីឡូម៉ែត្រក្នុងមួយនាទី។
ក្រៅតែមិនលឺសំឡេងស៊ីរ៉ែនរោទិ៍ ប្រជាជននៅលើកោះMauiជាច្រើនមិនបានទទួលសាររបស់អាជ្ញាធរ ឲ្យរត់គេចខ្លួនពីភ្លើងឆេះព្រៃ។ នៅថ្ងៃដែលមានភ្លើងឆេះព្រៃ បណ្តាញអ៊ីនធ័រនែតត្រូវរអាក់រអួលដាច់ដោយកន្លែង ចំណែកភ្លើងអគ្គិសនីសម្រាប់បណ្តាញទូរស័ព្ទក៏ត្រូវដាច់ដោយសារខ្យល់ព្យុះដែលបក់វិលនៅមិនឆ្ងាយប៉ុន្មានពីប្រជុំកោះហាវ៉ៃ។
ហេតុអ្វីការកំណត់អត្តសញ្ញាណត្រូវការពេលវេលាយូរ?
ចំនួនមនុស្សស្លាប់នៅក្នុងគ្រោះមហន្តរាយភ្លើងឆេះនៅលើកោះMauiចេះតែកើនឡើង ប៉ុន្តែ មានជនរងគ្រោះតិចណាស់ដែលគេអាចកំណត់អត្តសញ្ញាណ។ មួយសប្តាហ៍ក្រោយគ្រោះអគ្គិភ័យ មានតែសាកសពមនុស្សប៉ុន្មាននាក់ប៉ុណ្ណោះដែលគេអាចកំណត់អត្តសញ្ញាណបាន។ នោះក៏ដោយមកពីមានសំណាកANDរបស់ក្រុមគ្រួសារដែលបានប្រកាសបាត់បង់សមាជិកសាច់ញាតិនៅបន្ទាប់ពីរត់គេចខ្លួនពីអគ្គិភ័យ។
តាមអាជ្ញាធរ សាកសពជាច្រើនត្រូវឆេះខ្លោចខ្លាំងរហូត បាក់បែកជាបំណែកតូចៗដែលជាហេតុធ្វើឲ្យគេពិបាកកំណត់អត្តសញ្ញាណ។ គេរំពឹងថា ADNរបស់ក្រុមគ្រួសារនឹងអាចជួយឲ្យគេអាចកំណត់អត្តសញ្ញាណរបស់ជនរងគ្រោះ ប៉ុន្តែ អ្នកជំនាញខាងកោសល្យវិច្ឆ័យព្រមានរួចហើយថា ការងារកំណត់អត្តសញ្ញាណសាកសពនៅក្នុងភ្លើងឆេះនៅលើកោះMaui នឹងអាចស៊ីពេលវេលាយូរ ច្រើនឆ្នាំក៏អាចថាបាន។
ការងារអាទិភាពនៅពេលនេះ គឺការស្វែងរកសាកសព ព្រោះថានៅមួយសប្តាហ៍មកនេះ ប្រតិបត្តិការស្វែងរកអ្នកដែលអាចនៅមានជីវិត ឬសាកសពជនរងគ្រោះ ទើបធ្វើបាននៅក្នុងទំហំ១ភាគ៤នៃតំបន់ដែលត្រូវភ្លើងឆេះបំផ្លាញតែប៉ុណ្ណោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ