អាមេរិក៖ ភ្លើងឆេះព្រៃដុតបំផ្លាញ អគារ ផ្ទះសម្បែងជាង ៥០០ខ្នង នៅរដ្ឋកូឡូរ៉ាដូ
នៅរដ្ឋកូឡូរ៉ាដូ ប្រជាជនអាមេរិកជាច្រើនម៉ឺននាក់គ្មានឱកាសបានសប្បាយអបអរបុណ្យចូលឆ្នាំថ្មី នៅយប់ថ្ងៃសុក្រនេះ។ តាំងពីថ្ងៃព្រហស្បតិ៍ម្សិលមិញ អាជ្ញាធរបានជម្លៀសពួកគេចេញពីផ្ទះសម្បែង ដែលកំពុងប្រឈមខ្លាំងនឹងអណ្តាតភ្លើងឆេះព្រៃ។ នៅក្នុងសន្និសីទកាសែតកាលពីថ្ងៃព្រហស្បតិ៍ ប្រធានប៉ូលិសក្រុងBoulderបាននិយាយថា ភ្លើងឆេះព្រៃ ដុតបំផ្លាញ លំនៅឋានជាង ៥០០ខ្នង នៅក្នុងក្រុងចំនួន២របស់រដ្ឋកូឡូរ៉ាដូ។
ចុះផ្សាយនៅថ្ងៃ៖
ស្តាប់ - ០១:៤៦
អាកាសធាតុក្តៅស្ងួតហួតហែងជាច្រើនឆ្នាំ បន្តបន្ទាប់គ្នា ដែលមិនធ្លាប់មាននៅក្នុងប្រវត្តិរបស់រដ្ឋកូឡូរ៉ាដូ រួមផ្សំនឹងកម្លាំងខ្យល់បក់ខ្លាំង អំណោយផលដល់ភ្លើងឆេះព្រៃ កាលពីថ្ងៃព្រហស្បតិ៍។ ប្រធានប៉ូលិសក្រុងBoulder លោកJoe Pell បានព្រមានពីគ្រោះថ្នាក់ជីវិតមនុស្ស ព្រោះថា ភ្លើងឆេះព្រៃលើកនេះរាលដាលខ្លាំង សំដៅតំបន់ទីប្រជុំជន។
តាមកាសែតក្នុងស្រុកColorado Sun មនុស្សជាច្រើននាក់បានរត់រកការព្យាបាលសម្រាប់ការរលាក ចំណែក មនុស្សរបួស ៦នាក់ ត្រូវគេបញ្ជូនទៅកាន់មន្ទីរពេទ្យ។
ក្រៅតែពីឆេះបំផ្លាញ ផ្ទះជាង ៥០០ខ្នង នៅទីក្រុងតូចៗពីរ គឺSagamore និងSuperior អណ្តាតភ្លើងឆេះព្រៃលេបត្របាក់ ផ្សារទំនិញ សណ្ឋាគារ និងដីកសិកម្មជាង៦៥០ហិចតា។
រហូតមកដល់ថ្ងៃសុក្រ ក្រុមពន្លត់អគ្គិភ័យនៅបន្តបាញ់ទឹកពន្លត់ភ្លើង ប៉ុន្តែ មិនសូវជោគជ័យ ដោយសារកម្លាំងខ្យល់បក់ខ្លាំងនៅតាមតំបន់ខ្លះ ដែលអាចមានល្បឿនដល់ទៅ ១៦០គីឡូម៉ែត្រក្នុងមួយម៉ោង។
ដូចជារដ្ឋភាគច្រើន ដែលស្ថិតនៅភាគខាងលិចអាមេរិក រដ្ឋកូឡូរ៉ាដូបានជួបប្រទះគ្រោះរាំងស្ងួតពិសេស នៅប៉ុន្មានឆ្នាំចុងក្រោយនេះ។ អ្នកជំនាញខាងឧតុនិយមវាយតម្លៃថា ដោយសារការប្រែប្រួលអាកាសធាតុ ដែលជាសា្នដៃសុទ្ធសាធរបស់មនុស្ស ជាដើមហេតុមួយធ្វើឲ្យកើតមានខ្យល់ព្យុះ ខុសរដូវ អាកាសធាតុក្តៅខ្លាំង និងគ្រោះរាំងស្ងួត។ លោកDaniel Swain អ្នកឧតុនិយមនៅសកលវិទ្យាល័យកាលីហ្វនីញ៉ាបាននិយាយថា គេពិបាកនឹងជឿថា អាចកើតមានភ្លើងឆេះព្រៃ នៅរដូវត្រជាក់បែបនេះ។ ប៉ុន្តែ គ្រោះរាំងស្ងួត អាកាសធាតុក្តៅខ្លាំង ជាមួយកម្លាំងខ្យល់បក់ដ៏លឿនជាបច្ច័យ បង្កឲ្យកើតមានយ៉ាងងាយ ភ្លើងឆេះព្រៃ ដូចជានៅរដ្ឋកូឡូរ៉ាដូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ