មនុស្ស៥៥នាក់ស្លាប់ និងជាច្រើនរយនាក់បាត់ខ្លួននៅក្នុងសោកនាដកម្មភ្លើងឆេះនៅកោះហាវ៉ៃ
ទីក្រុងទេសចរមួយរបស់កោះ Maui ដែលជាកូនកោះមួយរបស់ប្រជុំកោះហាវ៉ៃរបស់អាមេរិកត្រូវភ្លើងឆេះព្រៃលេបត្របាក់ បំផ្លិចបំផ្លាញសឹងទាំងស្រុង។ តាមការប្រកាសរបស់អាជ្ញាធរអាមេរិកក្នុងរដ្ឋហាវ៉ៃ មនុស្សយ៉ាងហោច ៥០នាក់ស្លាប់ ចំណែកមនុស្សជាច្រើនរយនាក់ផ្សេងទៀតកំពុងបាត់ខ្លួន នៅក្នុងគ្រោះមហន្តរាយធម្មជាតិលើកនេះ។ ប្រធានាធិបតីអាមេរិកលោកចូ បៃដិនប្រកាសចាត់ទុកភ្លើងឆេះព្រៃនៅហាវ៉ៃជាគ្រោះថ្នាក់ធម្មជាតិដែលត្រូវទទួលជំនួយបន្ទាន់ពីរដ្ឋសហព័ន្ធ។
ចុះផ្សាយនៅថ្ងៃ៖
ស្តាប់ - ០២:៣៣
រូបភាពវីដេអូថតពីលើអាកាស បង្ហាញទីក្រុងជាប់មាត់សមុទ្រ ទីក្រុងប្រវត្តិសាស្រ្ត Lahainaរបស់កោះ Mauiនៃប្រជុំកោះហាវ៉ៃត្រូវភ្លើងឆេះបំផ្លិចបំផ្លាញក្លាយទៅជាផេះផង់។ ដោយសារកម្លាំងខ្យល់បក់ខ្លាំងដែលទទួលឥទ្ធិពលពីព្យុះកំណាច Doraដែលកំពុងសកម្មក្នុងមហាសមុទ្រប៉ាស៊ីហ្វិក ភ្លើងឆេះព្រៃដ៏សន្ធោសន្ធៅបានឆេះរាលដាល ដុតបំផ្លាញទីក្រុងតែក្នុងមួយប៉ប្រិចភ្នែក។ តាមអាជ្ញាធរអាមេរិកលើកោះ Maui ដោយសារតែមិនបានប្រុងប្រៀបខ្លួន មនុស្សជាច្រើនរយនាក់ បានលោតចូលទឹកសមុទ្រដើម្បីគេចចេញពីអណ្តាតភ្លើង ចំណែកមនុស្សមួយចំនួនទៀតត្រូវជាប់គាំង ស្លាប់ឆេះខ្លោចនៅក្នុងគ្រោះអគ្គិភ័យ។ តាមតុល្យការបឋមរបស់អាជ្ញាធរ មនុស្សជាង ៥០នាក់បាត់បង់ជីវិត នៅក្នុងគ្រោះថ្នាក់ភ្លើងឆេះព្រៃ ចំណែក មនុស្សជាច្រើនរយនាក់កំពុងបាត់ខ្លួន។ ប្រការនេះធ្វើឲ្យអាជ្ញាធរបារម្ភថា ចំនួនមនុស្សរងគ្រោះថ្នាក់បាត់បង់ជីវិត នឹងអាចមានចំនួនជាង៦០នាក់។
សម្រាប់អភិបាលរដ្ឋហាវ៉ៃ ភ្លើងឆេះព្រៃជាគ្រោះមហន្តរាយធម្មជាតិដ៏ធំដែលកោះហាវ៉ាមិនធ្លាប់ជួបប្រទះក្នុងប្រវត្តិសាស្រ្ត។ ហាវ៉ៃធ្លាប់រងគ្រោះម្តង មានមនុស្សស្លាប់៦១នាក់ ដោយសារការវាយបោករបស់រលកយក្ស នៅ ឆ្នាំ ១៩៦០ ប៉ុន្តែ មិនធ្ងន់ធ្ងរអាក្រក់ដូចភ្លើងឆេះព្រៃលើកនេះ។ នៅថ្ងៃព្រហស្បតិ៍ អាជ្ញាធរបានជម្លៀសប្រជាជន និងទេសចរចេញពីតំបន់រងគ្រោះដោយសារភ្លើងឆេះព្រៃ ទៅនៅព្រលានយន្តហោះ និងមជ្ឈមណ្ឌលសង្រ្គោះបន្ទាន់។
លោកប្រធានាធិបតីចូ បៃដិនវិញ បានចុះហត្ថលេខាលើសេចក្តីប្រកាស ចាត់ទុកសោកនាដកម្មភ្លើងឆេះនៅហាវ៉ៃជាគ្រោះធម្មជាតិ ដែលនឹងបើកផ្លូវឲ្យមានការផ្តល់ជំនួយបន្ទាន់ របស់រដ្ឋសហព័ន្ធ ទាំងផ្នែកថវិកា សម្ភារៈ សម្រាប់តំបន់រងគ្រោះដោយភ្លើងឆេះព្រៃនៅហាវ៉ៃ។ តាមវិបសៃតិ៍ ឈ្មោះ Power Outage ដោយសារភ្លើងឆេះព្រៃ ផ្ទះជាង ១ម៉ឺនខ្នង និងហាងទំនិញជាច្រើនគ្មានភ្លើងអគ្គិសនីប្រើប្រាស់។
អ្នកជំនាញវាយតម្លៃថា ភ្លើងឆេះព្រៃ ឆេះរាលដាលលឿននៅលើកោះMauiរបស់ហាវ៉ៃ ដោយសាររុក្ខជាតិ ស្មៅដើមឈើនៅលើកោះ Mauiស្ងួតខុសប្លែកពីធម្មតា ដោយសារតែខ្វះទឹកភ្លៀង។ ភាពរាំងស្ងួតជាប្រចាំ បូកផ្សំនឹងអាកាសធាតុក្តៅខ្លាំង ជាកត្តាជំរុញឲ្យមានភ្លើងឆេះព្រៃ កាន់តែច្រើន និងឆេះសន្ធោសន្ធៅរាលដាលក្នុងល្បឿនដ៏លឿន ពិបាកនឹងទប់ស្កាត់។ ករណីភ្លើងឆេះព្រៃ នៅកាណាដា និងនៅភាគខាងត្បូងអាមេរិកជាឧទាហរណ៍ស្រាប់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ