ចិនដាក់ទណ្ឌកម្មក្រុមហ៊ុនអាមេរិក២ដែលផលិតលក់សព្វាវុធឲ្យតៃវ៉ាន់
ចុះផ្សាយនៅថ្ងៃ៖
ប៉េកាំងប្រកាសដាក់ទណ្ឌកម្មសាជាថ្មីលើក្រុមហ៊ុនផលិតអាវុធរបស់អាមេរិកចំនួនពីរ នៅថ្ងៃសុក្រទី ១៥កញ្ញា។ តាមអ្នកនាំពាក្យរបស់ក្រសួងការបរទេសចិន ទណ្ឌកម្មលើក្រុមហ៊ុនអាមេរិក ជាការឆ្លើយតបទៅនឹងការសម្រេចជាលើកទី១របស់អាមេរិកក្នុងការផ្តល់កញ្ចប់ជំនួយយោធាដល់តៃវ៉ាន់។ ម្យ៉ាង ការប្រកាសដាក់ទណ្ឌកមរបស់ចិន ធ្វើឡើងនៅមួយថ្ងៃក្រោយដែលចិនបញ្ជូនយន្តហោះចម្បាំង និងនាវា ជាច្រើនគ្រឿងទៅហោះហែលឆ្វែលកៀកនឹងតៃវ៉ាន់ នៅក្នុងបរិបទនៃភាពតានតឹងកាន់តែខ្លាំងរវាង ចិន និងអាមេរិកក្នុងសំណុំរឿងតៃវ៉ាន់។
តើក្រុមហ៊ុនណាខ្លះដែលជាប់ទណ្ឌកម្មរបស់ចិន?
រដ្ឋាភិបាលចិនសម្រេចដាក់ទណ្ឌកម្មលើក្រុមហ៊ុនអាមេរិកពីរ គឺក្រុមហ៊ុនLockheed Martin និងក្រុមហ៊ុនNorthrop Grumman ដោយសារតែក្រុមហ៊ុនទាំងពីរមានជាប់ពាក់ព័ន្ធនឹងផែនការផ្តល់ជំនួយយោធារបស់អាមេរិក កាលពីចុងខែសីហាកន្លងទៅ។
តាមការពន្យល់របស់អ្នកនាំពាក្យក្រសួងការបរទេសចិន ក្រុមហ៊ុនផលិតអាវុធអាមេរិក Lockheed Martin ដើរតួនាទីសំខាន់នៅក្នុងគម្រោងការលក់អាវុធរបស់អាមេរិកទៅឲ្យតៃវ៉ាន់ ចំណែក ក្រុមហ៊ុន Northrop Grumman ធ្លាប់ចូលរួមចំណែកនៅក្នុងការលក់សព្វាវុធកន្លងមក ទៅឲ្យតៃវ៉ាន់។
នៅចុងខែសីហា រដ្ឋបាលលោកចូ បៃដិនបានប្រកាសផ្តល់ជំនួយយោធា ជាលើកទី១ ដល់តៃវ៉ាន់ ក្នុងទំហំទឹកប្រាក់ ៨០លានដុល្លារ។ ៨០លានដុល្លារជាចំនួនដ៏តិចតួច បើប្រៀបធៀបទៅនឹងទំហំទឹកប្រាក់ដែលតៃវ៉ាន់ចំណាយដើម្បីទិញអាវុធពីអាមេរិក ប្រមាណ ១ពាន់លានដុល្លារ។ ប៉ុន្តែ វាសបញ្ជាក់ពីការបង្កើនការយកចិត្តទុកដាក់របស់អាមេរិកដើម្បីជួយតៃវ៉ាន់ក្នុងការការពារខ្លួននៅចំពោះមុខសកម្មភាពបំភិតបំភ័យ របស់យន្តហោះ កប៉ាល់ចម្បាំងចិន។
នៅថ្ងៃសុក្រ អ្នកនាំពាក្យក្រសួងការបរទេសចិន បានព្រមានអាមេរិកសាជាថ្មី បន្ទាប់ពីអាមេរិក នៅតែបន្តផ្គើនផ្គត់ផ្គង់សព្វាវុធដល់តៃវ៉ាន់ ដែលនៅក្នុងក្រសែភ្នែករបស់ចិន វាជាការគំរាមកំហែងធ្ងន់ធ្ងរដល់ដែនអធិបតេយ្យភាព ផលប្រយោជន៍សន្តិសុខរបស់ចិន។
ទណ្ឌកម្មរបស់ចិននឹងជះផលអាក្រក់ដល់ក្រុមហ៊ុនផលិតអាវុធអាមេរិកដែរឬទេ?
សម្រាប់ក្រុមហ៊ុន Lockheed Martin ដែលជាដៃគូសំខាន់របស់រដ្ឋាភិបាលអាមេរិក ដើម្បីលក់អាវុធទៅបរទេស នេះមិនមែនជាលើកទី១ ដែលក្រុមហ៊ុនរងការដាក់ទណ្ឌកម្មពីរដ្ឋាភិបាលចិន ជុំវិញ ការលក់សព្វាវុធឲ្យតៃវ៉ាន់។ កាលពីខែ កុម្ភៈ ដើមឆ្នាំនេះ ក្រុមហ៊ុន Lockheed Martinបានជាប់សំណាញ់ទណ្ឌកម្មរបស់ចិន ជាមួយក្រុមហ៊ុនអាមេរិកមួយទៀត គឺ Raytheon ដែលមានជំនាញខាងផលិតមីស៊ីល និងប្រព័ន្ធការពារដែនអាកាស។
នៅក្នុងក្របខ័ណ្ឌនៃការលក់អាវុធ តម្លៃ ១ពាន់លានដុល្លារទៅឲ្យតៃវ៉ាន់ ក្រុមហ៊ុនRaytheonទទួលបានកិច្ចសន្យា នៅខែកញ្ញាឆ្នាំ ២០២២ ដើម្បីលក់អាវុធ តម្លៃ៤១២លានដុល្លារ សម្រាប់ពង្រឹងសមត្ថភាព បច្ចេកវិទ្យាប្រព័ន្ធរ៉ាដារបស់កងទ័ពតៃវ៉ាន់។ ចំណែក ក្រុមហ៊ុន Lockheed Martinទទួលបានសិទ្ធិលក់ទៅឲ្យតៃវ៉ាន់ នូវ រ៉ាដា ឧទ្ធម្ភាគចក្រ និងឧបករណ៍តាមដានចរាចរក្នុងអាកាស និងបំពាក់ឧបករណ៍លើយន្តហោះចម្បាំងF16ដើម្បីតាមដានចាប់សញ្ញារបស់យន្តហោះសត្រូវ នៅក្នុងលំហអាកាស។
ប្រតិកម្មតបនឹងការសម្រេចចិត្តរបស់អាមេរិក កាលណោះ ក្រសួងពាណិជ្ជកម្មចិនបានប្រកាសដាក់បញ្ចូលក្រុមហ៊ុន Lockheed Martin និងក្រុមហ៊ុន Raytheonទៅក្នុងបញ្ជីក្រុមហ៊ុនដែលមិនអាចទុកចិត្តបាន។ ទៅតាមការដាក់ទណ្ឌកម្មរបស់ក្រសួងពាណិជ្ជកម្មចិន ក្រុមហ៊ុនផលិតអាវុធអាមេរិកទាំងពីរត្រូវបានហាមឃាត់មិនឲ្យវិនិយោគនៅចិន និងធ្វើសកម្មភាពនាំចេញ និងនាំចូលទៅប្រទេសចិន។ គោលដៅ គឺដើម្បីទប់ស្កាត់កុំឲ្យក្រុមហ៊ុនផលិតអាវុធអាមេរិកអាចយកផលិតផលចិនទៅប្រើសម្រាប់សកម្មភាពផលិតអាវុធរបស់ខ្លួន។
សម្រាប់ការដាក់ទណ្ឌកម្មសាជាថ្មីលើក្រុមហ៊ុនផលិតអាមេរិក នៅថ្ងៃសុក្រ អ្នកនាំពាក្យរបស់ក្រសួងការបរទេសចិន មិនបានលម្អិតពីវិធានការដែលរដ្ឋាភិបាលចិនប្រុងនឹងដាក់ទៅលើក្រុមហ៊ុនអាមេរិកដូចការដាក់ទណ្ឌកម្មលើកមុនៗ។
ម្យ៉ាង គេនៅតែមិនទាន់អាចវាយតម្លៃពីទំហំខូចខាតរបស់ក្រុមហ៊ុនអាមេរិក ដោយសារ ការដាក់ទណ្ឌកម្មរបស់ចិន។ ប៉ុន្តែ ចង់ ឬមិនចង់ វិធានការរឹតបន្តឹងរបស់ចិននឹងប៉ះពាល់ដល់ការនាំចេញ នាំចូលរបស់ក្រុមហ៊ុនផលិតអាវុធរបស់អាមេរិក។
បើទោះបីជាអាមេរិកចេញច្បាប់ហាមមិនឲ្យក្រុមហ៊ុនរបស់ខ្លួនលក់សព្វាវុធដែលមានភ្ជាប់ជាមួយបច្ចេកវិទ្យាទៅឲ្យចិន ប៉ុន្តែ ក្រុមហ៊ុនអាមេរិកជាច្រើននៅក្នុងឧស្សាហកម្មផលិតអាវុធរបស់អាមេរិកធ្វើជំនួញពាណិជ្ជកម្មក្នុងផ្នែកស៊ីវិល ដូចជា ក្នុងវិស័យអវកាស និងនៅទីផ្សារបច្ចេកវិទ្យាស៊ីវិលដទៃទៀត។ ជាក់ស្តែង ក្រុមហ៊ុនLockheed Martin មានក្រុមហ៊ុនផលិតឧទ្ធម្ភាគចក្រមួយឈ្មោះ Sikorsky ដែលបោះទីតាំងនៅក្នុងប្រទេសចិនតាំងពីឆ្នាំ ១៩៨០។
អ្វីជាគោលដៅនៃការដាក់ទណ្ឌកម្មរបស់ចិនទៅលើក្រុមហ៊ុនផលិតអាវុធអាមេរិក?
ជុំវិញ រឿងលក់អាវុធឲ្យតៃវ៉ាន់ រដ្ឋាភិបាលចិនរហូតមកដល់ពេលនេះ បានដាក់ទណ្ឌកម្មទៅលើក្រុមហ៊ុនអាមេរិកចំនួន ៤ គឺ Lockheed Martin Raytheon ក្រុមហ៊ុនប៊ូអ៊ីង និងចុងក្រោយ គឺក្រុមហ៊ុន Northrop Grumman។ ប៉ុន្តែ ខុសពីក្រុមហ៊ុនបីផ្សេងទៀត ក្រុមហ៊ុន Lockheed Martinដែលជាក្រុមហ៊ុនផលិតសព្វាវុធធំជាងគេរបស់អាមេរិក ត្រូវប៉េកាំងដាក់ទណ្ឌកម្មច្រើនសាជាងគេ។ តាមអ្នកវិភាគ ការណ៍ដែលចិនដាក់ទណ្ឌកម្មម្តងហើយ ម្តងទៀត ទៅលើក្រុមហ៊ុនផលិតអាវុធ Lockheed Martinយ៉ាងដូច្នេះ គឺមកពីចិន ចង់ជំរុញឲ្យក្រុមហ៊ុនអាមេរិកដាក់សម្ពាធលើរដ្ឋាភិបាលអាមេរិកឲ្យឈប់លក់អាវុធ និងផ្តល់ជំនួយ យោធាទៅឲ្យតៃវ៉ាន់។
ប៉ុន្តែ ចិនត្រូវខកបំណងរាល់លើក ព្រោះថា នៅក្រោយ ចិនប្រកាសដាក់ទណ្ឌកម្មទៅលើក្រុមហ៊ុនផលិតអាវុធអាមេរិកម្តងៗ រដ្ឋាភិបាលអាមេរិក មួយរយៈក្រោយមក នៅតែប្រកាសកញ្ចប់លក់អាវុធ ទៅតៃវ៉ាន់ ដែលធ្វើឲ្យចិនខឹងក្តៅក្រហាយជានិច្ច។ ចិនត្រូវខកបំណងព្រោះថា ចង់ ឬមិនចង់តៃវ៉ាន់ ជាអតិថិជនសំខាន់របស់អាមេរិក ដែលហ៊ានចំណាយលុយរាប់ពាន់លានដុល្លារ ដើម្បីទិញសព្វាវុធមកបំពាក់ឲ្យកងទ័ពរបស់ខ្លួន សម្រាប់ត្រៀមទប់ទល់ក្រែងមានការវាយប្រហារឈ្លានពានណាមួយរបស់ចិន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ