ជាលើកទី១ អាមេរិកសម្រេចផ្តល់ជំនួយយោធាដោយផ្ទាល់ ដល់តៃវ៉ាន់
រដ្ឋាភិបាលអាមេរិក បានសម្រេចផ្តល់ជំនួយយោធាដោយផ្ទាល់ ដល់កោះតៃវ៉ាន់ ក្នុងទឹកប្រាក់ចំនួន ៨០លានដុល្លារ។ ជាចំនួនតិចតួចស្តួចស្តើងណាស់ បើប្រៀបធៀបទៅទំហំទឹកប្រាក់ ដែលតៃវ៉ាន់បានទិញអាវុធពីអាមេរិក។ តែយ៉ាងណា នេះជាលើកទីមួយហើយ ដែលរដ្ឋាភិបាលអាមេរិក ផ្តល់ជំនួយយោធាដោយផ្ទាល់ទៅឲ្យតៃវ៉ាន់ ដោយអនុឡោមទៅតាម ច្បាប់កម្មវិធីជួយទំនុកបំរុងបរទេស។
ចុះផ្សាយនៅថ្ងៃ៖
ស្តាប់ - ០៣:១៣
ភ្លាមៗក្រោយដំណឹងនេះ ក្រសួងការពារជាតិតៃវ៉ាន់ បានប្រកាសថ្លែងអំណរគុណដល់សហរដ្ឋអាមេរិក ដែលជួយចូលរួម ក្នុងការរក្សាសន្តិភាព និងស្ថិរភាពតំបន់។ គួរកត់សំគាល់ថា មិនទាន់មានការបញ្ជាក់លំអិត ថាជំនួយយោធានេះនឹងផ្តោតទៅលើអ្វីខ្លះទេ។ តែបើផ្អែកតាមប្រភពដ៏ស្និទ្ធបំផុតនឹងសំណុំរឿងនេះ គឺអាមេរិកនឹងផ្តល់សម្ភារៈបច្ចេកទេស ឲ្យតៃវ៉ាន់ ដើម្បីបង្កើនសមត្ថភាព ប្រមូលទិន្នន័យ និងតាមដានសន្តិសុខផ្លូវអាកាស។ ក្រសួងការបរទេសអាមេរិក បានជូនដំណឹងទៅកាន់សភាខុសហ្ក្រេស អំពីការសម្រេចជំនួយយោធាដោយផ្ទាល់នេះ កាលពីថ្ងៃអង្គារទី២៩សីហា។ ជំហានបន្ទាប់ គឺសភាទាំង២អង្គ ដែលត្រូវអនុម័តយល់ព្រម។ បើតាមការរំពឹងទុក គឺនឹងគ្មានឧបសគ្គទេ ព្រោះទាំងគណបក្សសាធារណរដ្ឋ ទាំងបក្សប្រជាធិបតេយ្យ សុទ្ធតែគាំទ្រ ឲ្យសហរដ្ឋអាមេរិកជួយកោះតៃវ៉ាន់។
លោក Mike McCaul សមាជិកសភាមកពីបក្សសាធារណរដ្ឋ និងជាប្រធានគណកម្មការទទួលបន្ទុកកិច្ចការបរទេស នៅសភាតំណាង បានលើកសរសើរ ចំពោះគោលនយោបាយលោកចូ បៃដិន ដែលជួយទំនុកបម្រុងផ្នែកកងទ័ពដល់កោះតៃវ៉ាន់។ សមាជិកសភារូបនេះ បន្តថា ការជួយនេះគឺមិនត្រឹមតែជួយតៃវ៉ាន់តែមួយទេ តែគឺជួយបណ្តាប្រទេសប្រជាធិបតេយ្យផ្សេងទៀតនៅក្នុងតំបន់ ហើយថែមទាំងពង្រឹងគោលជំហរសំឡុតតបវិញ របស់សហរដ្ឋអាមេរិក ប្រឈមជាមួយចិនដែលកាន់តែអាងយ៉ាង។
គួរបញ្ជាក់ថា យោងតាមអ្នកនាំពាក្យក្រសួងការបរទេសអាមេរិក ជំនួយយោធាដោយផ្ទាល់ជាលើកទី១ ទៅឲ្យតៃវ៉ាន់នេះ គឺនឹងមិនធ្វើឲ្យប្រែប្រួលដល់គោលការណ៍ ទទួលស្គាល់ចិនតែមួយ របស់អាមេរិកឡើយ។ ពោលគឺជាគោលនយោបាយរបស់អាមេរិក ដែលប្រកាន់ជំហរ ជួយតៃវ៉ាន់ ក្នុងការការពារខ្លួនតែប៉ុណ្ណោះ។ អ្នកនាំពាក្យដដែល បន្ថែមថា សហរដ្ឋអាមេរិកមានផលប្រយោជន៍ ដែលត្រូវរក្សាការពារតំបន់ច្រកសមុទ្រតៃវ៉ាន់ ឲ្យស្ថិតនៅក្នុងស្ថិរភាព សន្តិភាពជានិច្ច។
សូមរំលឹកថា ប៉ុន្មានខែចុងក្រោយនេះ សហរដ្ឋអាមេរិកបានប្រឹងប្រែងបើកផ្លូវចរចា ជាមួយចិន ជាច្រើនសំណុំរឿង រាប់ទាំងសេដ្ឋកិច្ច និងសន្តិសុខ។ ក៏ប៉ុន្តែសំណុំរឿងកោះតៃវ៉ាន់ គឺជាចំណុចដែលមហាអំណាចទាំង២ មានការខ្វែងខ្ទាស់គ្នាជាខ្លាំង។ មន្ត្រីជាន់ខ្ពស់អាមេរិកជាច្រើន បានសង្កេតឃើញថា លោកស៊ី ជីនពីង កំពុងដើរលើផ្លូវ ចាកឆ្ងាយពីលក្ខខន្តិកៈ Statu quo ទាក់ទិនកោះតៃវ៉ាន់។ អ្នកជំនាញខ្លះទៀត កំពុងសង្ស័យថាចិនអាចនឹងបើកប្រតិបត្តិវាយដណ្តើមគ្រប់គ្រងតៃវ៉ាន់វិញ ខណៈសេដ្ឋកិច្ចចិនកាន់តែដុនដាប ធ្វើឲ្យបក្សកុម្មុយនីស្តចិនត្រូវរកវិធីដើម្បីធ្វើឲ្យប្រជាជនងាកមកគិតរឿងស្នេហាជាតិ ភ្លេចពីការលំបាកផ្នែកជីវភាព។
ដោយសង្កេតឃើញកត្តាទាំងនេះ អាមេរិកបានបន្ថែមជំនួយយោធាដល់តៃវ៉ាន់ ក្នុងក្តីសង្ឃឹមធ្វើឲ្យចិនដកថយ។ ជាក់ស្តែងកាលពីខែកក្កដា អាមេរិកបានដកគ្រឿងសព្វាវុធពីស្តុករបស់កងទ័ពខ្លួន យកទៅឲ្យតៃវ៉ាន់ ក្នុងទំហំទឹកប្រាក់ប្រមាណ ៣៤៥លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ