ក្រុងគៀវគាំទ្រគំនិតម៉ូស្គូ ខាងពង្រាយទ័ពមួកខៀវនៅខាងកើតអ៊ុយក្រែន ប៉ុន្តែអមដោយល័ក្ខខ័ណ្ឌខ្លួន
ថ្ងៃព្រហស្បត៏៧ កញ្ញា លោកប្រធានាធិបតីអ៊ុយក្រែន ប៉េត្រូ ប៉ូរ៉ូឆេនកូ ចាត់ទុកប្រតិបត្តិការ រក្សាសន្តិភាព នៅតំបន់ខាងកើតអ៊ុយក្រែន ថាអាចជា"ការបុកទម្លាយ" ក្នុងជម្លោះនៅទីនោះ ប៉ុន្តែគាត់ចងជាល័ក្ខខ័ណ្ឌរបស់គាត់ដល់គំនិតនេះ ដែល៣ថ្ងៃមុន ត្រូវបានបំផុសមកជាលើកដំបូង ដោយលោកប្រធានាធិបតីរុស្ស៊ី វ៉្លាឌីមៀរ ពូទីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ក្រោយពីជំទាស់អស់ពេលយ៉ាងយូរ ទល់នឹងសំណូមពរក្រុងគៀវ សុំឲ្យបញ្ជូនទ័ពមួកខៀវ ទៅកាន់តំបន់ខាងកើតអ៊ុយក្រែន នៅថ្ងៃអង្គារសប្តាហ៏នេះ លោកប្រធានាធិបតីរុស្ស៊ី ស្រាប់តែយល់ព្រមឲ្យពង្រាយកងកម្លាំងរក្សាសន្តិភាព នៅទីនោះ ប៉ុន្តែ សម្រាប់តែ ការពារពួកអ្នកសង្កេតការណ៍របស់អង្គការដើម្បី សន្តិសុខនិងសហប្រតិបត្តិការនៅទ្វីបអឺរ៉ុប OSCE ហើយ ត្រូវប្រចាំការតែនៅតាមបណ្តោយខ្សែដែលខ័ណ្ឌ ដែនដីក្រោមការត្រួតត្រារបស់ក្រុងគៀវ និងដែនដីក្រោមការត្រួតត្រារបស់ពួកឧទ្ទាមផ្តាច់ទឹកដី ដែលរុស្ស៊ីនិយម។
ថ្លែងសារប្រចាំឆ្នាំទៅកាន់រដ្ឋសភា ថ្ងៃព្រហស្បត៏ម្សិលមិញ លោកប្រមុខរដ្ឋអ៊ុយក្រែន ប៉េត្រូ ប៉ូរ៉ូឆេនកូ ប្រមាណថា “បើទ័ពមួកខៀវរបស់អ.ស.ប. ពង្រាយនៅពេញលើតំបន់ដុនបាស់ ប៉ែកខាងកើតអ៊ុយក្រែន គឺមុខជាជួយបុកទម្លាយមែនពិត ដល់ដំណោះស្រាយដោយសន្តិវិធីឲ្យជម្លោះនៅទីនោះ។ គាត់បន្ថែមថា៖ បេសកកម្មជាយថាហេតុនេះ ត្រូវប្រចាំការនៅពេញលើដែនដីក្រោមការកាន់កាប់ បូកទាំងចន្លោះនៃ ព្រំប្រទល់រុស្ស៊ី-អ៊ុយក្រែន ដែលមិនត្រួតត្រាដោយក្រុងគៀវ ហើយដែលតាមចន្លោះនេះ ស្របនឹងមតិ ក្រុងគៀវនិងបស្ចិមលោក តែងប្រព្រឹត្តទៅ ការជ្រៀតចូលនៃអាវុធនិងពួកយុទ្ធជនស្ម័គ្រចិត្ត ទៅក្នុងតំបន់បះបោរនោះ ចេញពីប្រទេសរុស្ស៊ីទៅ។ តាមដែលលោកប៉ូរ៉ូឆេនកូ ទទូច៖ ក្នុងកងកម្លាំងរក្សាសន្តិភាពនោះមិនត្រូវមានទាហានរុស្ស៊ីណាម្នាក់ឡើយ។
រុស្ស៊ីបានសុំទៅហើយ ឲ្យក្រុមប្រឹក្សាសន្តិសុខអ.ស.ប អនុញ្ញាត ដល់ការពង្រាយពួកយោធាដែលបំពាក់ដោយអាវុធធុនស្រាល ប្រចាំនៅតំបន់ខាងកើតអ៊ុយក្រែន តែក្នុងគោលដៅការពារពួកអ្នកសង្កេតការណ៍ OSCE ដែលបន្តតាមដានអំពីដំណើរគោរពតាមបទឈប់បាញ់នៅតំបន់នោះ ជាទីក្នុងសង្គ្រាម តាំងពីខែមេសា ឆ្នាំ២០១៤មក មានមនុស្សធ្លាក់ខ្លួនស្លាប់ជាង១ម៉ឺននាក់ទៅហើយ។
ក្នុងសារប្រចាំឆ្នាំនោះ ប្រធានាធិបតីអ៊ុយក្រែនព្រមានថា៖ ធ្វើការងារលើគំនិតផ្តួចផ្តើមនេះរបស់រុស្ស៊ី មិនមែនមានន័យជាលេស សម្រាប់លុបទណ្ឌកម្មអន្តរជាតិប្រឆាំងម៉ូស្គូឡើយ។ ទណ្ឌកម្មនេះ ត្រូវបន្តទៅលុះរហូតទាល់តែរដ្ឋអ៊ុយក្រែនស្តារអធិបតេយ្យ និង បូរណភាពដែនដីខ្លួនបានពេញលេញវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ