ក្រុមប្រឹក្សាសិទ្ធិមនុស្សថ្កោលទោសម្ចាស់បំណុលអាហ្សង់ទីន
នៅទីបំផុត អាហ្សង់ទីនបានទទួលយុត្តិធម៌សម្រាប់ខ្លួននៅលើឆាកអន្តរជាតិ។ កាលពីថ្ងៃសុក្រទី ២៦ កញ្ញា នៅក្នុងឱកាសកិច្ចប្រជុំលើកទី ២៧របសខ្លួន ក្រុមប្រឹក្សាការពារសិទ្ធិមនុស្ស ដែលជាស្ថាប័នជាន់ខ្ពស់មួយរបស់អង្គការសហប្រជាជាតិបានចេញសេចក្តីសម្រេចថ្កោលទោសក្រុមហ៊ុនវិនិយោគពីររបស់អាមេរិក។ ក្រុមហ៊ុនវិនិយោគទាំងពីររបស់អាមេរិកធ្លាប់បានឈ្នះក្តីនៅតុលាការទីក្រុងញូវយ៉ក ក្នុងបណ្តឹងទាមទារប្រាក់បំណុល ដែលរដ្ឋអាហ្សង់ទីនធ្លាប់ជំពាក់រហូតមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
សេចក្តីសម្រេចរបស់ក្រុមប្រឹក្សាសិទ្ធិមនុស្ស ថ្កោលទោសទៅលើមូលនិធិវិនិយោគទាំងពីររបស់អាមេរិក ត្រូវបានបោះឆ្នោតអនុម័តគាំទ្រដោយសំឡេងចំនួន ៣៣ និងប្រឆាំង៥។ ប្រេស៊ីល រុស្ស៊ី អាល់ហ្សេរី និងវេណេស៊ុយអេឡាបានបោះឆ្នោតគាំទ្រ ក្នុងពេលអាមេរិកដែលជាម្ចាស់ប្រទេសរបស់មូលនិធិវិនិយោគដែលជាចុងចោទ បានបោះឆ្នោតប្រឆាំង។ សម្រាប់អាមេរិក សេចក្តីសម្រេចថ្កោលទោសរបស់ក្រុមប្រឹក្សារឹតតែធ្វើបញ្ហាកាន់តែធ្ងន់ធ្ងរទៅវិញទេ។
អាហ្សង់ទីនកូនបំណុលរបស់មូលនិធិអាមេរិកពីរបានចាញ់ក្តីនៅតុលាការញូវយ៉ក រហូតធ្វើឲ្យអាហ្សង់ទីនត្រូវជួបវិបត្តិមិនអាចសងប្រាក់ទៅម្ចាស់បំណុលដទៃទៀត។ តុលាការក្រុងញូវយ៉កធ្លាប់បានដាក់លក្ខខណ្ឌមួយថា បើអាហ្សង់ទីនមិនសងបំណុលទៅមូលនិធិវិនិយោគរបស់អាមេរិក ដែលជាដើមបណ្តឹងទេ អាហ្សង់ទីនមិនអាចប្រើប្រព័ន្ធហិរញ្ញវត្ថុ និងប្រព័ន្ធធនាគារអាមេរិក ដើម្បីសងបំណុលម្ចាស់បំណុលផ្សេងទៀតបានទេ។ ពោលគឺ ម្ចាស់បំណុលដែលសុខចិត្តកាត់បន្ថយបំណុលជាង ៧០% ហើយដែលនៅសល់ជិត ៣០% ទៀត ដែលអាហ្សង់ទីនដល់កំណត់ត្រូវសងយ៉ាងយូរបំផុត នៅត្រឹមថ្ងៃទី៣០កក្កដា។
តាមរដ្ឋមន្រ្តីការបរទេសអាហ្សង់ទីន អាហ្សង់ទីនត្រូវបង្ខំចិត្តប្រកាសក្ស័យធនពាក់កណ្តាល កាលពីខែកក្កដា។ ជារួម វិបត្តិបំណុលបង្កដោយមូលនិធិវិនិយោគអាមេរិកបានធ្វើឲ្យសាលារៀន ជាច្រើនត្រូវបិទ មន្ទីរពេទ្យគ្មានថ្នាំ គ្រោះអត់ឃ្លាន រដ្ឋាភិបាលក្ស័យធន ការស្អប់ច្រណែន អសន្តិសុខ និងអំពើហិង្សានៅអាហ្សង់ទីន។ មូលនិធិវិនិយោគអាមេរិកទាំងពីរដែលមានចរិកដូចជាត្មាត អាចបញ្ឈប់មហិច្ឆតារបស់ខ្លួន នៅពេលគេ(អន្តរជាតិ ជាពិសេសអាមេរិក)បញ្ឈប់វា។ នេះបើតាមប្រមុខការបរទេសអាហ្សង់ទីន។ គេ ដែលអាហ្សង់ទីនចង់សំដៅគឺអាមេរិក ដែលអាហ្សង់ទីនបានសុំឲ្យជួយអន្តរាគមបញ្ជាឲ្យតុលាការក្រុងញូវយ៉កប្តូរជំហររបស់ខ្លួនវិញ។
សម្រាប់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ មូលនិធិវិនិយោគអាមេរិកបានប្រើតុលាការ និងមធ្យោបាយផ្សេងៗដើម្បីស្រូបយកលុយពីប្រទេសជាប់ប្រាក់បំណុល រហូតធ្វើឲ្យប្រទេសទាំងនោះមិនអាចធានាការអនុវត្តន៍សិទ្ធិជាមូលដ្ឋាន សម្រាប់ប្រជាពលរដ្ឋរបស់ខ្លួន។
ចុងក្រោយ ក្រុមប្រឹក្សារបស់អង្គការសហប្រជាជាតិអំពាវនាវឲ្យគ្រប់ប្រទេសចូលរួមពិភាក្សាដើម្បីបង្កើតយន្តការតុលាការមួយដើម្បីដោះស្រាយបញ្ហាប្រាក់បំណុលរដ្ឋ។ មូលនិធិរូបិយវត្ថុអន្តរជាតិ FMI ធ្លាប់បានលើកសំណើនេះ កាលពីឆ្នាំ ២០០៣ ប៉ុន្តែ បានបោះបង់ទៅវិញ បន្ទាប់ពីមានគំនាបរបស់អាមេរិក និងប្រទេសអ្នកមានថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ