ជំនួបកំពូលសហភាពអឺរ៉ុបបើកធ្វើជាមួយនឹងវិបត្តិអន្តោប្រវេសន៍
ប្រមុខរដ្ឋឬរដ្ឋាភិបាលនៃប្រទេសទាំង ២៨ ជាសមាជិកសហភាពអឺរ៉ុបបានមកជួបជុំគ្នា នៅទីក្រុងព្រុចសែល ដើម្បីបើកធ្វើជំនួបកំពូលរយៈពេលពីរថ្ងៃ គឺថ្ងៃព្រហស្បតិ៍ ដល់ថ្ងៃសុក្រ។ ជាការពិតណាស់ថា របៀបវារៈនៃជំនួបកំពូលនេះច្រើន ក្នុងនោះរួមមានដូចជា គម្រោងកំណែទម្រង់តំបន់ចាយលុយអឺរ៉ូ និងការចរចាបញ្ចប់សមាជិកភាពរបស់អង់គ្លេស ជាដើម។ ក៏ប៉ុន្តែ មានសំណុំរឿងដ៏ចម្រូងចម្រាសមួយ ដែលនឹងលុបលើសំណុំរឿងផ្សេងៗទៀត ហើយដែលអាចនឹងធ្វើឲ្យជំនួបកំពូលត្រូវបរាជ័យ ព្រមទាំងអាចនឹងធ្វើឲ្យប៉ះពាល់ទៅដល់អនាគតរបស់សហភាពអឺរ៉ុបទាំងមូល គឺវិបត្តិអន្តោប្រវេសន៍។
ចុះផ្សាយនៅថ្ងៃ៖ កែប្រែថ្ងៃទី៖
ជំនួបកំពូលសហភាពអឺរ៉ុប នៅថ្ងៃព្រហស្បតិ៍ និងថ្ងៃសុក្រនេះ ត្រូវបានអ្នកខ្លះហៅថាជា “ជំនួបកំពូលជាប្រវត្តិសាស្រ្ត” ដោយសារតែវាជាជំនួបកំពូល ដែលមានបញ្ហាធំៗ និងដ៏សែនស្មុគស្មាញជាច្រើន ដែលមេដឹកនាំប្រទេសជាសមាជិកទាំង ២៨ ត្រូវជជែកនិងស្វែងរកជំហររួម ដោយនៅក្នុងនោះ គ្រាន់តែបញ្ហាអន្តោប្រវេសន៍មួយកំពុងតែធ្វើឲ្យប្រទេសក្នុងសហភាពអឺរ៉ុបត្រូវប្រេះឆាគ្នាយ៉ាងខ្លាំង រហូតធ្វើឲ្យអ្នកខ្លះបារម្ភថា វាអាចនឹងធ្វើឲ្យសមហរ័ណកម្មអឺរ៉ុបទាំងមូលត្រូវទទួលបរាជ័យ។
នៅក្នុងពេលបច្ចុប្បន្ននេះ គេសង្កេតឃើញថា បណ្តាប្រទេសនៅប៉ែកខាងត្បូងជាប់នឹងសមុទ្រមេឌីទែរ៉ាណេ ជាពិសេស អ៊ីតាលី ដែលគណបក្សស្តាំនិយមទើបនឹងជាប់ឆ្នោតឡើងកាន់អំណាច បដិសេធមិនឲ្យទូកដឹកជនអន្តោប្រវេសន៍ចូលចតនៅកំពង់ផែរបស់ខ្លួន ហើយព្រមទាំងបរិហាររិះគន់ប្រទេសសមាជិកផ្សេងទៀតថាមិនជួយរំលែកបន្ទុកគ្នា។
បណ្តាប្រទេសនៅអឺរ៉ុបខាងកើតវិញ នាំគ្នាបដិសេធមិនទទួលយកជាដាច់ខាតសូម្បីតែជនភៀសខ្លួន ដែលទទួលស្គាល់ដោយអ.ស.ប ហើយដែលខ្លួនជាប់កាតព្វកិច្ចក្នុងអនុសញ្ញាជនភៀសខ្លួន។
នៅអាល្លឺម៉ង់ អ្វីៗក៏មានការប្រែប្រួលខុសពីមុនស្រឡះផងដែរ។ លោកស្រីអង់ហ្គេឡា មែរកិល ដែលធ្លាប់តែជាមេដឹកនាំដ៏មានអំណាចនៅអឺរ៉ុប ហើយដែលធ្លាប់ជាអ្នកមាននយោបាយអនុគ្រោះដល់ជនអន្តោប្រវេសន៍ បច្ចុប្បន្ននេះ កំពុងតែប្រឈមមុខនឹងវិបត្តិនយោបាយក្នុងប្រទេសអាល្លឺម៉ង់ខ្លួនឯង ដែលសូម្បីតែរដ្ឋាភិបាលចម្រុះក្រោមការដឹកនាំរបស់លោកស្រី ក៏កំពុងតែប្រឈមមុខនឹងអនាគតមិនច្បាស់លាស់ផងដែរ ដោយគណបក្សជាដៃគូបានគំរាមដកខ្លួនចេញពីរដ្ឋាភិបាលចម្រុះ ប្រសិនបើលោកស្រីមែរកិលមិនអាចស្វែងរកដំណោះស្រាយបញ្ឈប់លំហូអន្តោប្រវេសន៍ចូលទៅក្នុងប្រទេសអាល្លឺម៉ង់។
នៅក្នុងលិខិតផ្ញើជូនប្រមុខដឹកនាំប្រទេសសមាជិក លោកប្រធានសហភាពអឺរ៉ុប ដូណាល់ ទូសក៍ (Donald Tusk) បានលើកឡើងថា វិបត្តិអន្តោប្រវេសន៍គឺជាបញ្ហាដ៏ធ្ងន់ធ្ងរដែលចាំបាច់ត្រូវតែដោះស្រាយ ហើយពេលវេលាសម្រាប់ដោះស្រាយវិបត្តិនេះក៏មានមិនច្រើននោះដែរ។ លោកក៏បានព្រមានទុកជាមុនផងដែរថា បរាជ័យក្នុងការដោះស្រាយបញ្ហាអន្តោប្រវេសន៍នេះអាចនឹងធ្វើឲ្យសហភាពអឺរ៉ុបត្រូវប្រឈមមុខកាន់តែធ្ងន់ធ្ងរចំពោះការរីករាលដាលនៃគំនិតជាតិនិយម និងការកើនឡើងនៃចលនានយោបាយប្រជាភិថុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ