លោកម៉ាក្រុង ទៅបំពេញទស្សនកិច្ចនៅលីបង់ក្រោយហេតុការណ៍ផ្ទុះនៅកំពង់ផែក្រុងបេរូត
ចុះផ្សាយនៅថ្ងៃ៖
ស្តាប់ - ០៦:៤៧
ប្រធានាធិបតីបារាំងលោក អេម៉ានុយអែល ម៉ាក្រុង នៅថ្ងៃព្រហស្បតិ៍នេះបានចេញទៅបំពេញទស្សនកិច្ចនៅទីក្រុងបេរូត ប្រទេសលីបង់។ នេះ រាប់ចាត់ទុកថាជាដំណើរទស្សនកិច្ចលើកដំបូងគេបង្អស់របស់មេដឹកនាំពិភពលោកទៅកាន់ក្រុងបេរូត បន្ទាប់ពីហេតុការណ៍ផ្ទុះដ៏សាហាវ។ តាមការគ្រោងទុក លោកម៉ាក្រុង ទៅដល់លីបងនៅម៉ោង ១២ រសៀលថ្ងៃព្រហស្បតិ៍ដដែលនេះម៉ោងនៅលីបង់។ ហេតុអ្វីបារាំងចេញមុខចេញមាត់ខ្លាំងម្ល៉េះក្នុងបញ្ហាលីបង់នេះ? តើលោកម៉ាក្រុង រំពឹងថានឹងអាចធ្វើអ្វីបានខ្លះ ក្នុងការជួយលីបង់ក្នុងដំណើរទស្សនកិច្ចភ្លាមៗនេះ?
ហេតុអ្វីបានជាបារាំងយកចិត្តទុកដាក់នឹងបញ្ហានៅលីបង់ខ្លាំងម្ល៉េះ?
ហេតុការណ៍ផ្ទុះដ៏ធំសម្បើមនៅឃ្លាំងផ្ទុកសារធាតុគីមីអាម៉ូញ៉ូមនីត្រាតក្នុងទីក្រុងបេរូត ប្រទេសលីបង់ គិតត្រឹមថ្ងៃព្រហស្បតិ៍នេះ បានបណ្តាលឲ្យមនុស្សយ៉ាងហោចណាស់ ១៣៧ នាក់ស្លាប់ បណ្តាលឲ្យមនុស្សច្រើនជាង ៥ ពាន់នាក់រងរបួស ព្រមទាំងធ្វើឲ្យអ្នកស្រុករស់នៅក្នុងក្រុងបេរូតប្រមាណ ៣ សែននាក់បាត់បង់ទីជម្រក។
ហេតុការណ៍ផ្ទុះនៅក្រុងបេរូតនេះ គឺជាគ្រោះមហន្តរាយដ៏ធំធេងខ្លាំងណាស់សម្រាប់ប្រទេសលីបង់។ ឧបទ្ទវហេតុនេះ បានទៅដាក់បន្ទុកមួយដ៏ធ្ងន់បន្ថែមទៀតដល់លីបង់ ដែលកំពុងតែរុំព័ទ្ធទៅដោយវិបត្តិធំៗជាច្រើនស្រាប់ទៅហើយ មានជាអាទិ៍វិបត្តិសេដ្ឋកិច្ច វិបត្តិនយោបាយ និងវិបត្តិកូវីដ។ លីបង់ នៅពេលនេះជួបទុក្ខជាន់លើទុក្ខដូចពាក្យខ្មែរយើងថា ក្រហើយកូនឈឺទៀត។
ដោយមើលឃើញ និងយល់អំពីទុក្ខលំបាកដ៏ធំក្រាស់ក្រែលដែលប្រទេសជាតិលីបង់ បាននិងកំពុងពើបប្រទះបែបនេះហើយទើបប្រធានាធិបតីបារាំងលោកអេម៉ានុយអែល ម៉ាក្រុង បានប្រកាសភ្លាមៗថាលោកនឹងទៅធ្វើទស្សនកិច្ចនៅលីបង់។
តាមការចុះផ្សាយរបស់ទីភ្នាក់ងារព័ត៌មានបារាំង AFP លោកម៉ាក្រុងបានអញ្ជើញទៅដល់ទីក្រុងបេរូតប្រទេសលីបង់មុននេះបន្តិច ពោលគឺនៅម៉ោងប្រមាណ ១២ រសៀលថ្ងៃព្រហស្បតិ៍ ទី ៦ សីហានេះម៉ោងនៅលីបង់ ឬក៏ស្មើនឹងម៉ោងខ្ទង់ ៦ ល្ងាច នៅខ្មែរ។
បារាំងរបស់លោកម៉ាក្រុងចេញមុខចេញមាត់លឿន និងខ្លាំងជាងគេក្នុងបញ្ហានៅលីបង់ទំនងមកពីប្រទេសលីបង់ធ្លាប់ជាប្រទេសស្ថិតនៅក្រោមអាណានិគមរបស់បារាំង។
សម្រាប់លោកប្រធានាធិបតីម៉ាក្រុង ការបោះដៃទៅរកលីបង់ ការធ្វើដំណើរទៅលីបង់ ខណៈពេលដែលប្រទេសជាអតីតដែនដីអាណានិគមបារាំងមួយនេះរុំព័ទ្ធទៅដោយបញ្ហាចាក់ស្រែះនោះ វាបង្ហាញពីការយកចិត្តទុកដាក់របស់បារាំងដែលជាអតីតអាណាព្យាបាល និងថាបារាំងនៅទីនេះ ដើម្បីជាចំណែកមួយជួយលីបង់ដើម្បីដោះស្រាយបញ្ហានានា។
ពីខាងលីបង់ឯណោះវិញ មន្ត្រីរដ្ឋាភិបាលលីបង់ដែលក្នុងនោះមានដូចជាលោក នាយករដ្ឋមន្ត្រី ហាសាន ឌីយ៉ាប និងលោកប្រធានាធិបតី មីស្ហ៊ែល អាអ៊ូន បានស្វាគមន៍ចំពោះដំណើរទៅដល់ទីក្រុងបេរូតរបស់លោកម៉ាក្រុងជាខ្លាំង។
សកម្មភាពរបស់លោកម៉ាក្រុង ពេលទៅដល់ប្រទេសលីបង់
ដំណើរទស្សកិច្ចទៅកាន់ប្រទេសលីបង់របស់លោកម៉ាក្រុង ធ្វើឡើងត្រឹមតែរយៈពេលពីរថ្ងៃប៉ុណ្ណោះក្រោយឧបទ្ទវហេតុផ្ទុះនៅក្រុងបេរូត។ ការទៅដល់លីបង់របស់លោកប្រធានាធិបតីបារាំងនេះ ត្រូវបានគេចាត់ទុកថា ជាការបំពេញទស្សនកិច្ចផ្លូវការមុនគេបង្អស់ដោយឥស្សរជនបរទេសជាន់ខ្ពស់បំផុតចាប់ពីមានសោកនាដកម្មកាលពីថ្ងៃអង្គាររួចមក។
បើតាមការណ៍ឲ្យដឹងពីវិមានប្រធានាធិបតីបារាំង លោកម៉ាក្រុង នឹងជួបពិភាក្សជាមួយនឹងឥស្សរជននយោបាយសំខាន់ៗរបស់លីបង់ដែលក្នុងនោះរួមទាំងលោកនាយករដ្ឋមន្ត្រីលីបង់ ហាសាន ឌីយ៉ាប និងលោកប្រធានាធិបតី មីស្ហ៊ែល អាអ៊ូន។
តាមការចុះផ្សាយរបស់សារព័ត៌មានបារាំង ក្នុងពេលជជែកពិភាក្សាជាមួយថ្នាក់ដឹកនាំកំពូលៗលីបង់ គេរំពឹងថាលោក ម៉ាក្រុង នឹងនិយាយពីការជួយជំរុញឲ្យមានកំណែទម្រង់មួយនៅលីបង់ដើម្បីជាផ្លូវត្រួសត្រាសឲ្យលីបង់អាចដើរងើបចេញពីវិបត្តិមិនថាវិបត្តិនយោបាយឬក៏វិបត្តិសេដ្ឋកិច្ចឡើយ។
ជាមួយគ្នានេះ លោកប្រធានាធិបតីបារាំងក៏នឹងទៅពិនិត្យមើលផងដែរ កន្លែងផ្ទុះដែលបានបំផ្លាញផ្នែកខ្លះនៃកំពង់ផែបេរូត ហើយនិងធ្វើឲ្យមានការខូតខាតនៅពាសពេញទីក្រុងបេរូតទាំងមូល។
លោក ម៉ាក្រុង រំពឹងថានឹងអាចធ្វើអ្វីបានខ្លះក្នុងការជួយលីបង់ក្នុងដំណើរទស្សនកិច្ចនេះ?
ក្រៅពីចង់ជួយស្រោចស្រង់លីបង់ឲ្យងើបផុតពីវិបត្តិនយោបាយនិងសេដ្ឋកិច្ច លោកប្រធានាធិបតីបារាំង អេម៉ានុយអែល ម៉ាក្រុង ទៅលីបង់ថ្ងៃនេះក្នុងគោលបំណងជំរុញឲ្យមានការចូលរួមពីប្រទេសដទៃទៀតក្នុងការជួយផ្តល់ជំនួយទៅឲ្យលីបង់។ លីបង់ ដែលគេដឹងហើយថាកំពុងតែធ្លាក់ខ្លួនផុងចូលក្នុងវិបត្តិធំៗជាច្រើន ដូចបានរៀបរាប់ខាងលើមុននេះរួចមកហើយ មានតាំងពីវិបត្តិសេដ្ឋកិច្ច វិបត្តិនយោបាយ វិបត្តិកូវីដ និងចុងក្រោយគេគឺវិបត្តិផ្ទុះដ៏ប្រល័យនៅឃ្លាំងផ្ទុកសារធាតុគីមីអាម៉ូញ៉ូមនីត្រាតនៅឯកំពង់ផែទីក្រុងបេរូត។
លោកម៉ាក្រុងដែលបានអញ្ចើញទៅដល់ប្រទេសលីបង់នៅមុននេះបន្តិច បានមានប្រសាសន៍ថាចង់សម្របសម្រួលជំនួយអន្តរជាតិទៅឲ្យលីបង់។ លោកបានរៀបរាប់ពន្យល់ថា លោកចង់រៀបចំឲ្យមានកិច្ចសហប្រតិបត្តិការអឺរ៉ុបហើយនិងកិច្ចសហប្រតិបត្តិការកាន់តែទូលំទូលាយថែមទៀត គឺកិច្ចសហប្រតិបត្តិការអន្តរជាតិដើម្បីរួមពួតជាកម្លាំងគ្នាផ្តល់ជំនួយនិងជួយដល់ប្រទេសលីបង់ដែលមានសេដ្ឋកិច្ចកំពុងដើរអូសជើងដូចសព្វថ្ងៃនេះ។
គួរជម្រាបជូនថា រហូតមកទល់នឹងពេលនេះ មានប្រទេសមួយចំនួនហើយដែលបានប្រកាសផ្តល់ជំនួយមនុស្សធម៌និងបោះដៃជួយប្រទេសលីបង់ដែលក្នុងនោះមានជាអាទិ៍ សហភាពអឺរ៉ុប ប្រទេសអូស្ត្រាលី រុស្ស៊ី ឥណ្ឌូណេស៊ី ន័រវែស និងអង្គការសុខភាពពិភពលោកជាដើម។ល។
ចំណែកប្រទេសបារាំងឯណេះវិញ កាលពីថ្ងៃពុធម្សិលមិញ អាជ្ញាធរបារាំងបានបញ្ជូនយន្តហោះពីរគ្រឿងដែលមានផ្ទុកទៅដោយបុគ្គលិកសន្តិសុខចំនួន ៥៥ នាក់ ក្រុមគ្រូពេទ្យជំនាញសង្គ្រោះបន្ទាន់ ១០ នាក់ និងសម្ភារៈបរិក្ខារពេទ្យទម្ងន់រហូតដល់ ៦ តោនដើម្បីចូលរួមចំណែកក្នុងការជួយសង្គ្រោះជនរងគ្រោះពីហេតុការណ៍ផ្ទុះនៅបេរូត។
ក្រៅពីនេះ នៅក្នុងយន្តហោះទាំងពីរក៏មានផងដែរ អ្នកជំនាញផ្នែកសង្គ្រោះបន្ទាន់ដែលមានជំនាញខាងសារធាតុគីមី និងបច្ចេកទេសដែលអាចធ្វើការនៅកន្លែងកើតហេតុ ដើម្បីជួយកំណត់ថាតើមានហានិភ័យផ្សេងទៀតៗនៅក្នុងតំបន់បន្សល់ទុកដោយការផ្ទុះដែរឬទេ។ នេះ បើតាមការណ៍ឲ្យដឹងរបស់អ្នកនាំពាក្យនៃអង្គភាពសន្តិសុខជាតិបារាំងលោក ម៊ីឆាអ៊ែល ប៊ែរនីញ៉េ (Michael Bernier)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ