ប្រមុខការទូតបារាំង ទៅលីបង់ ដើម្បីរកវិធីជួយស្រោចស្រង់លីបង់ ពីការដួលរលំក្ស័យធន
លោកប្រមុខការទូតបារាំង បានទៅដល់ប្រទេសលីបង់ នៅថ្ងៃព្រហស្បតិ៍ ទី២៣កក្កដានេះ។ ជាដំណើរទស្សនកិច្ចដ៏សំខាន់ ដែលបារាំង កំពុងតែព្យាយាម រកផ្លូវជួយស្រោចស្រង់ប្រទេសនេះ ពីការដួលរលំក្ស័យធន។ ប្រមាណ១ឆ្នាំមកហើយ ដែលលីបង់ ស្ថិតក្នុងវិបត្តិសេដ្ឋកិច្ចដ៏ធ្ងន់ធ្ងរបំផុត មិនធ្លាប់មាន។ វិបត្តិដ៏គ្រោះថ្នាក់នេះ បានបូកបន្ថែមជាមួយនឹងវិបត្តិសេដ្ឋកិច្ចសកល បង្កឡើងដោយជំងឺកូវីដ១៩។ រដ្ឋាភិបាលលីបង់ កំពុងរង់ចាំជំនួយហិរញ្ញវត្ថុអន្តរជាតិ យ៉ាងបន្ទាន់បំផុត។
ចុះផ្សាយនៅថ្ងៃ៖
ស្តាប់ - ០២:១៤
ក្នុងទស្សនកិច្ច២ថ្ងៃ លោក Jean-Yves Le Dria n ប្រមុខការទូតបារាំង នឹងត្រូវជួបជាមួយលោក Michel Aoun ប្រធានាធិបតីលីបង់ លោក Hassan Diab នាយករដ្ឋមន្ត្រីលីបង់ និង Nabih Berri ប្រធានសភា។ ទស្សនកិច្ចរបស់លោកប្រមុខការទូតបារាំង ស្ថិតក្នុងបរិបទមួយដ៏លំបាក សម្រាប់លីបង់ ដែលកំពុងឆ្លងកាត់វិបត្តិសេដ្ឋកិច្ចធ្ងន់ធ្ងរបំផុត។
តម្លៃរូបិយបណ្ណលីបង់ បានធ្លាក់ចុះសែនថោក តម្លៃទំនិញវិញ ឡើងថ្លៃកប់ពពក ក្រុមហ៊ុនសហគ្រាស បានបិទទ្វារបញ្ឈប់បុគ្គលិកជាបន្តបន្ទាប់។ យោងតាមតួលេខផ្លូវការ ពាក់កណ្តាលនៃប្រជាជនលីបង់ រស់នៅក្រោមកម្រិតនៃភាពក្រីក្រ ហើយប្រមាណ៣៥%នៃមនុស្សពេញវ័យ គឺពុំមានការងារធ្វើទេ។ វិបត្តិសេដ្ឋកិច្ចដែលបានអូសបន្លាយ តាំងតែពីឆ្នាំ២០១៩នេះ បានឈានដល់ដំណាក់កាលដ៏ធ្ងន់ គ្មានពន្លឺសង្ឃឹម បន្ទាប់ពីពិភពលោកយើង ត្រូវពើបប្រទះនឹងវិបត្តិបង្កឡើងដោយជំងឺកូវីដ១៩។
សូមរំលឹកថា កាលពីខែមេសា រដ្ឋាភិបាលលីបង់បានប្រកាស ថាខ្លួនលែងមានលទ្ធភាពសងបំណុលហើយ ហើយបានអំពាវនាវរកជំនួយហិរញ្ញវត្ថុ ជាថ្នូរនឹងការសុខចិត្ត យល់ព្រមធ្វើកំណែទម្រង់នានា។ តែយ៉ាងណា ការចរចាជាមួយមូលនិធិរូបិយវត្ថុអន្តរជាតិ ដើម្បីបានប្រាក់១០ពាន់លានដុល្លារ បានជាប់គាំង ២ខែមកហើយ។ ជំនួយហិរញ្ញវត្ថុនេះសំខាន់ណាស់ សម្រាប់រដ្ឋាភិបាលលីបង់ ព្រោះវានឹងបើកផ្លូវ ឲ្យម្ចាស់បំណុលផ្សេងទៀត មានការទុកចិត្តមកលើលីបង់។
គួរកត់សំគាល់ បារាំងគឺជាប្រទេសតែមួយគត់ ដែលខំខ្នះខ្នែង ជួយលីបង់ ក្នុងនាមបារាំង ធ្លាប់ជាប្រទេសបង្អែករបស់លីបង់ កាលពីមុនសង្រ្គាមលោកលើកទី២។ កាលពីថ្ងៃទី៨កក្កដា លោកប្រមុខការទូតបារាំង បានលើកឡើង នៅចំពោះមុខព្រឹទ្ធសភាបារាំងថា លីបង់កំពុងប្រឈមនឹងការដួលរលំក្ស័យធនទាំងស្រុង។ លោកអះអាងថា បារាំងត្រៀមខ្លួន ជួយស្រោចស្រង់សេដ្ឋកិច្ចលីបង់ ក៏ប៉ុន្តែតោងថ្នាក់ដឹកនាំលីបង់ ស្រុះស្រួលគ្នា រួមគ្នាបើកផ្លូវឲ្យបារាំងអាចជួយបានដែរ។ យោងតាមប្រភពពីក្រសួងការបរទេសបារាំង រដ្ឋាភិបាលបារាំង បានសុខចិត្តចំណាយប្រាក់ ប្រមាណ១២លានអឺរ៉ូ ដើម្បីជួយលីបង់ ក្នុងរវាងប៉ុន្មានខែខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ