អ៊ីរ៉ង់ប្រកាសចាប់ខ្លួន អ្នកពាក់ព័ន្ធនឹងការបាញ់ទម្លាក់យន្តហោះអ៊ុយក្រែន
ចុះផ្សាយនៅថ្ងៃ៖
ស្តាប់ - ០៨:១២
អ៊ីរ៉ង់នៅថ្ងៃអង្គារទី ១៤មករា បានប្រកាសចាប់ខ្លួន អ្នកដែលមានជាប់ពាក់ព័ន្ធនឹងការបាញ់ទម្លាក់យន្តហោះអ៊ុយក្រែន ដែលបានសម្លាប់មនុស្ស ១៧៦នាក់ កាលពីសប្តាហ៍មុន។ នៅមុនការប្រកាសរបស់អ្នកនាំពាក្យក្រសួងយុត្តិធម៌អ៊ីរ៉ង់ ប្រធានាធិបតី អ៊ីរ៉ង់ លោកហាសាន់ រូហានី បានអះអាងធានាថា ប្រទេសរបស់លោកនឹងដាក់ទោសរាល់អ្នកដែលទទួលខុសត្រូវ ធ្វើឲ្យមានសោកនាដកម្មសម្លាប់អ្នកដំណើររបស់យន្តហោះអ៊ុយក្រែន កាលពីថ្ងៃពុធសប្តាហ៍មុននេះ។ តើអ្នកណាខ្លះ ដែលអាជ្ញាធរអ៊ីរ៉ង់ ចាប់ខ្លួន ដោយសារហេតុការណ៍បាញ់ទម្លាក់យន្តហោះ អ៊ុយក្រែន?
ការប្រកាសរបស់ក្រសួងយុត្តិធម៌អ៊ីរ៉ង់ ធ្វើឡើង នៅក្រោយ ឆ្មាំបដិវត្តន៍អ៊ីរ៉ង់ ប្រកាសទទួលស្គាល់ កាលពីថ្ងៃសៅរ៍កន្លងទៅថា កងទ័ពអ៊ីរ៉ង់ បានច្រឡំ បាញ់ទម្លាក់យន្តហោះអ៊ុយក្រែន កាលពីថ្ងៃពុធកន្លងទៅ។
នៅក្នុងសន្និសីទកាសែត នៅថ្ងៃអង្គារនេះ អ្នកនាំពាក្យរបស់ក្រសួងយុត្តិធម៌ អ៊ីរ៉ង់ មិនបានប្រកាសចំនួន និងឈ្មោះអ្នកដែលត្រូវបានគេចាប់ខ្លួន នោះទេ។ លោក Gholamsossein Esmaili គ្រាន់តែនិយាយថា គេបានចាប់ផ្តើមបើកការស៊ើបអង្កេត ហើយនិងមានការចាប់ខ្លួន មនុស្សមួយចំនួន។
ទោះជាអ្នកនាំពាក្យរបស់ក្រសួងយុត្តិធម៌ មិនបានបញ្ជាក់ឈ្មោះ និងចំនួនមនុស្ស ដែលត្រូវបានគេចាប់ខ្លួន ប៉ុន្តែ តាមរយៈ សេចក្តីថ្លែងការណ៍ និងការបកស្រាយរបស់ឧត្តមសេនីយ៍នៃឆ្មាំបដិវត្តអ៊ីរ៉ង់ កាលពីថ្ងៃសៅរ៍ គេដឹងខ្លះៗហើយថា តើអ្នកណាខ្លះ ដែលមានជាប់ពាក់ព័ន្ធនឹងរឿងបាញ់ទម្លាក់យន្តហោះ អ៊ុយក្រែន។
កាលពីថ្ងៃសៅរ៍ ឧត្តមសេនីយ៍ Amir Ali Hajizadehដែលទទួលបន្ទុក កងទ័ពជើងអាកាសអ៊ីរ៉ង់ ទទួលស្គាល់ថា យន្តហោះអ៊ុយក្រែន ត្រូវបានបាញ់ទម្លាក់ដោយសារ កំហុសរបស់មនុស្ស។ បើតាមឧត្តមសេនីយ៍ Hajizadeh ទាហានអ៊ីរ៉ង់ដែលប្រចាំការនៅប្រតិបត្តិការមីស៊ីល ជាអ្នកចុចប៊ូតុង បាញ់មីស៊ីល សំដៅយន្តហោះ អ៊ុយក្រែន ដែលខ្លួនគិតស្មានថា ជាយន្តហោះចម្បាំងរបស់អាមេរិក។ ឧត្តមសេនីយ៍ Hajizadeh បានប្រកាសទទួលស្គាល់ការទទួលខុសត្រូវទាំងស្រុង នៅក្នុងហេតុការណ៍បាញ់ទម្លាក់ យន្តហោះអ៊ុយក្រែន ប៉ុន្តែ ជាមួយគ្នានេះ លោកក៏បានបញ្ជាក់ដែរថា ទាហានដែលបានចុចប៊ូតុង បាញ់មីស៊ីល សំដៅ យន្តហោះអ៊ុយក្រែន បានសម្រេចចិត្តដោយខ្លួនឯង គឺមិនបានជូនដំណឹងដល់រូបលោកនោះទេ ដោយសារតែមានបញ្ហាបច្ចេកទេស ក្នុងប្រព័ន្ធទំនាក់ទំនង នៅយប់ថ្ងៃកើតហេតុ។
ប្រធានាធិបតីអ៊ីរ៉ង់៖ មិនមែនមានតែអ្នកចុចប៊ូតុង ដែលមានកំហុស ប៉ុន្តែ នៅមានមនុស្សផ្សេងទៀត…
ការប្រកាសចាប់ខ្លួន អ្នកដែលពាក់ព័ន្ធនឹងហេតុការណ៍បាញ់ទម្លាក់យន្តហោះ អ៊ុយក្រែន ធ្វើឡើងនៅក្រោយ ការចេញមុខធានារបស់ប្រធានាធិបតី អ៊ីរ៉ង់ លោកហាសាន់ រូហានី ដែលថា រាល់អ្នកទទួលត្រូវដែលធ្វើឲ្យយន្តហោះអ៊ុយក្រែន ធ្លាក់ ត្រូវប្រឈមនឹងការកាត់ទោស។ តាមប្រធានាធិបតី រូហានី នៅក្នុងហេតុការណ៍លើកនេះ វាសំខាន់ណាស់ ដែលអ្នកប្រព្រឹត្តកំហុស និងអ្នកដែលធ្វេសប្រហែស នៅគ្រប់កម្រិត ត្រូវរងការដាក់ទោស តាមផ្លូវច្បាប់។ សម្រាប់ប្រធានាធិបតីអ៊ីរ៉ង់ មិនមែនមានតែអ្នកដែលចុចប៊ូតុង បាញ់មីស៊ីលទេ ដែលមានកំហុស គឺនៅមានមនុស្សផ្សេងទៀត។ លោកចង់ឲ្យមានការពន្យល់បកស្រាយពីរឿងនេះ ទៅដល់សាធារណជន ដោយគ្មានការលាក់លៀម។ ជាពិសេស កងទ័ពឆ្មាំបដិវត្តន៍អ៊ីរ៉ង់ត្រូវបកស្រាយ ថា ហេតុអ្វីបានជាគេត្រូវរង់ចាំ ដល់ថ្ងៃសៅរ៍ គឺ ៣ថ្ងៃ ក្រោយ ការបាញ់មីស៊ីល ទើបកងទ័ពចេញមុខអះអាងថា យន្តហោះអ៊ុយក្រែនធ្លាក់ដោយសាររងគ្រាប់មីស៊ីល អ៊ីរ៉ង់។ ជាមួយនឹងការទាមទារបែបនេះ ប្រធានាធិបតី អ៊ីរ៉ង់ ហាក់គ្មានជំហរនៅខាងកងទ័ពឆ្មាំបដិវត្តន៍ ដែលជាអ្នកមកពីខាងក្រុម អភិរក្សជ្រុលនិយមអ៊ីរ៉ង់។
នៅថ្ងៃអង្គារ ប្រធានាធិបតីអ៊ីរ៉ង់ នៅបានទាមទារឲ្យគេបង្កើតតុលាការពិសេសមួយ នៅអ៊ីរ៉ង់ ដោយមានការចូលរួមពីចៅក្រមជាន់ខ្ពស់ និងអ្នកជំនាញ ដើម្បី ជំនុំជម្រះអ្នកដែលទទួលខុសត្រូវនៃសោកនាដកម្មបាញ់ធ្លាក់យន្តហោះលើកនេះ ព្រោះថា “ពិភពលោកកំពុងតាមដានមើលរឿងនេះ”។
ការប្រកាសចាប់ខ្លួន អ្នកពាក់ព័ន្ធនឹងការបាញ់ទម្លាក់យន្តហោះអ៊ុយក្រែន ជាវិធានការជាក់ស្តែងថ្មីដំបូងគេ បន្ទាប់ពី កងទ័ពអ៊ីរ៉ង់ ប្រកាសទទួលស្គាល់ថ្ងៃសៅរ៍ ថា ខ្លួនបានច្រលំបាញ់ទម្លាក់យន្តហោះអ៊ុយក្រែន។
នៅថ្ងៃយន្តហោះអ៊ុយក្រែនធ្លាក់ នៅជាយក្រុងតេហេរ៉ង់ ប្រធានអាកាសចរណ៍ស៊ីវិលអ៊ីរ៉ង់ធ្លាប់បដិសេធថា យន្តហោះអ៊ុយក្រែន ធ្លាក់ គ្មានជាប់ទាក់ទងនឹងការបាញ់មីស៊ីល។ ប៉ុន្តែ បីថ្ងៃក្រោយ គឺនៅថ្ងៃសៅរ៍ ទី ១១កុម្ភៈ នៅទីបំផុត ទាំង កងទ័ពបដិវត្តន៍ និងរដ្ឋាភិបាលអ៊ីរ៉ង់ បានចេញមុខទទួលខុសត្រូវ និងទទួលស្គាល់វិញ ថា យន្តហោះអ៊ុយក្រែន បានធ្លាក់ ដោយសារគ្រាប់មីស៊ីលអ៊ីរ៉ង់។ អ៊ីរ៉ង់ ចេញមុខ ទទួលស្គាល់ ថាជាកំហុសរបស់ខ្លួន ព្រោះដោយសារគិតថា ខ្លួននឹងមិនអាចបដិសេធការពិតបានទេ ជាពិសេស នៅពេលក្រុមស៊ើបអង្កេតអន្តរជាតិ អាចវិភាគប្រអប់ខ្មៅ ហើយនិងស្លាកស្លាមផ្ទុះនៅលើសំបកយន្តហោះ។ ដោយប្រកាសទទួលស្គាល់ការពិត នៅមុនការវែកមុខ របស់អ្នកស៊ើបអង្កេត រដ្ឋាភិបាលអ៊ីរ៉ង់ បានបង្ហាញភាពថ្លៃថ្នូរ សេចក្តីក្លាហាន និងការទទួលខុសត្រូវមួយ ខ្ពស់ ដែលប្រទេសជាច្រើនទៀត មិនហ៊ានធ្វើ។ ដោយហ៊ានប្រកាសទទួលខុសត្រូវ និងមានចេតនាចង់កាត់ទោសអ្នកដែលទទួលខុសត្រូវ រដ្ឋាភិបាលអ៊ីរ៉ង់ ចង់បញ្ចុះបញ្ចូល កាត់បន្ថយកំហឹងរបស់បាតុករអ៊ីរ៉ង់ ដែលចោទរដ្ឋាភិបាលជាអ្នកនិយាយកុហក និងបិទបាំងមិនចង់កាត់ទោសមន្រ្តីអ៊ីរ៉ង់។
មួយវិញទៀត អ៊ីរ៉ង់ហ៊ានសំដែងភាពស្មោះត្រង់នៅពេលនេះ ដោយសារចង់បញ្ចុះបញ្ចូលមតិអន្តរជាតិ ដែលចាំតាមដានមើលអ៊ីរ៉ង់។ ជាក់ស្តែង អ៊ីរ៉ង់ បាននិយាយលើកហេតុផលថា ការបាញ់ទម្លាក់យន្តហោះអ៊ុយក្រែន គឺធ្វើដោយអចេតនា ជាកំហុសរបស់មនុស្ស ហើយវាកើតឡើង នៅក្នុងបរិបទ ដែលប្រព័ន្ធការពារលំហអាកាសរបស់អ៊ីរ៉ង់ ត្រូវបានរឹតបន្តឹងខ្លាំង នៅក្រោយ អ៊ីរ៉ង់ បាញ់មីស៊ីលសំដៅ មូលដ្ឋានទ័ពអាមេរិក នៅអ៊ីរ៉ាក់។ សម្រាប់អ៊ីរ៉ង់ អាមេរិកមានចំណែកទទួលខុសត្រូវ នៅក្នុងរឿងនេះដែរ ព្រោះអាមេរិក ជាអ្នកបង្កភាពភាពតានតឹងជាមួយអ៊ីរ៉ង់។ នៅក្រោយ អាមេរិក បាញ់សម្លាប់មេទ័ពអ៊ីរ៉ង់ លោកសូឡីម៉ានី អ៊ីរ៉ង់បានបាញ់មីស៊ីល សំដៅមូលដ្ឋានទ័ពអាមេរិក ប៉ុន្តែ មិនបានសម្លាប់មនុស្ស ឬទ័ពអាមេរិកម្នាក់ទេ។
នាយករដ្ឋមន្រ្តីកាណាដា៖ នឹងគ្មានការបាត់បង់ជីវិត
នៅក្នុងរឿងបាញ់ទម្លាក់យន្តហោះអ៊ុយក្រែន អ៊ីរ៉ង់ ចង់បង្ហាញថា ខ្លួនមានចំណែកទទួលខុសត្រូវ ជាអ្នកបាញ់មីស៊ីលច្រឡំ ប៉ុន្តែ រឿងនេះ ក៏ដោយសារតែអាមេរិកដែរ។ ចង់ឬមិនចង់ អ៊ីរ៉ង់ ចង់បានការយល់ សណ្តោស ប្រណីពីខាងក្រៅ ក្នុងនាមខ្លួនជាជនល្មើស ប៉ុន្តែ ចេះស្គាល់កំហុស ហើយប្រព្រឹត្តកំហុស ដោយសារតែចង់ការពារខ្លួន។
នាយករដ្ឋមន្រ្តីកាណាដា Justine Trudeau កាលពីថ្ងៃចន្ទ ម្សិលមិញ បាននិយាយថា យន្តហោះអ៊ុយក្រែន នឹងមិនធ្លាក់ ហើយក៏គ្មានជនរងគ្រោះស្លាប់ បើសិនជាគ្មាន ភាពតានតឹង ការប្រឈមមុខរវាងអ៊ីរ៉ង់ និងអាមេរិក។ ភាពតានតឹងដែលមួយចំណែក កើតឡើងដោយសារអាមេរិក នៅក្រោយអាមេរិកបាញ់សម្លាប់ មេទ័ពអ៊ីរ៉ង់។ នាយករដ្ឋមន្រ្តី កាណាដា បានសំដែងការខកចិត្ត ថា ទាហានកាណាដាមានប្រចាំការនៅអ៊ីរ៉ាក់ ក្នុងក្របខ័ណ្ឌកងទ័ពអូតង់ ប៉ុន្តែ អាមេរិកមិនបានជូនដំណឹង ភាគីកាណាដា ពីប្រតិបត្តិការយោធា បាញ់សម្លាប់មេដឹកនាំយោធាអ៊ីរ៉ង់ លោកសូឡីម៉ានីនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ