អ្នកនយោបាយនិងសេដ្ឋវិទូអាមេរិក ស្តីបន្ទោសលោកត្រាំដែលខកខានជួយសង្គ្រោះសេដ្ឋកិច្ចទាន់ពេល
ចុះផ្សាយនៅថ្ងៃ៖
ស្តាប់ - ០៨:២៧
គិតត្រឹមថ្ងៃសុក្រ ទី៣ មេសានេះ ចំនួនអ្នកឆ្លងកូវីដ១៩ កើនឡើងដល់ជាង ១លាននាក់ នៅទូទាំងសកលលោក។ សហរដ្ឋអាមេរិក នៅតែជាប្រទេសដែលមានករណីឆ្លងច្រើនជាងគេ ហើយបើតាមសេចក្តីរាយការណ៍ចុងក្រោយ អត្រាអ្នកស្លាប់នៅអាមេរិកមានចំនួនខ្ពស់បំផុតមិនធ្លាប់មានទេ ពោលគឺមានស្លាប់រហូតដល់ជាង ១ពាន់ ១រយនាក់ ក្នុងរយៈពេលត្រឹមតែ ២៤ ម៉ោងប៉ុណ្ណោះ។ រងផលប៉ះពាល់ខ្លាំងជាងគេពីកូវីដ១៩ ចំនួនអ្នកអត់ការងារធ្វើនៅអាមេរិកកើនឡើងជាគំហុក ហើយអាជីវកម្មក្នុងប្រទេសត្រូវបិទទ្វារបន្តកន្ទុយគ្នា។ ទិន្នន័យចុងក្រោយនេះ បានធ្វើឱ្យអ្នកវិភាគ និយាយអ្វីមិនចេញពីទំហំនៃការខូតខាតរបស់សេដ្ឋកិច្ចអាមេរិក ដែលបង្កដោយជំងឺរាតត្បាតកូវីដ១៩។
ស្ថានភាពទូទៅពាក់ព័ន្ធនឹងជំងឺរាតត្បាតសកល-កូវីដ១៩
ការឆ្លងរីករាលដាលខ្លាំងនិងឥតឈប់នៃវីរុសកូវីដ១៩ នៅតែជាបញ្ហាធំដែល ធ្វើឲ្យពិភពលោកទាំងមូលភ័យព្រួយបារម្ភខ្លាំង។ ទោះបីជា ប្រទេសជាងពាក់កណ្តាលនៃភពផែនដី កំពុងតែអនុវត្តនូវវិធានការរឹតត្បិតដូចជាបិទខ្ទប់ទីក្រុង ឬក៏ប្រទេសទាំងមូលយ៉ាងណាក្តី ក៏វីរុសកូវីដ១៩ នៅតែបន្តបោះពួយឆ្លងរាតត្បាតយ៉ាងលឿនគ្មានឈប់ដែរ។
បើតាមរាបាយការណ៍ជាផ្លូវការមួយ គិតត្រឹមថ្ងៃសុក្រ ទី៣ មេសានេះ អត្រាអ្នកឆ្លងកូវីដ១៩ នៅទូទាំងពិភពលោក កើនឡើងរហូតដល់ចំនួនជាង ១ លាន ៣ ម៉ឺននាក់ ហើយអ្នកស្លាប់កើនឡើងដល់ជាង ៥ ម៉ឺន ៤ ពាន់នាក់។
កូវីដ១៩ គឺជាវិបត្តិដ៏គ្រោះថ្នាក់បំផុតមួយ ដែលពិភពលោកមិនធ្លាប់បានជួបប្រទះទាល់តែសោះ ក្រោយសម័យសង្រ្គាមលោកលើកទី២។ ចំនួនអ្នកឆ្លងកូវីដ១៩ បន្តកើនឡើងយ៉ាងឆាប់រហ័ស ហើយប្រទេសជាច្រើនក្នុងពិភពលោក នៅតែមិនទាន់អាចរើរលាស់ខ្លួនចេញរួចពីការឆ្លងរីករាលដាលនៃកូវីដ១៩ឡើយ ជាពិសេសនៅអឺរ៉ុប និងសហរដ្ឋអាមេរិក។
នៅអាមេរិក គេចាប់អារម្មណ៍ឃើញថា ស្ថានការណ៍កំពុងធ្លាក់ក្នុងសភាពដុនដានខ្លាំងជាងគេ។ ចំនួនអ្នកឆ្លងកើនច្រើនខ្លាំង និងនាំមុខគេនៅទូទាំងពិភពលោក ចំណែកតួលេខអ្នកស្លាប់វិញ ក៏កើនឡើងខ្លាំងគួរឲ្យបារម្ភជាទីបំផុតដែរ រហូតលោកប្រធានាធិបតីអាមេរិក ដូណាល់ ត្រាំ ប្រកាសថាប្រទេសអាមេរិករបស់លោក កំពុងជួបគ្រោះអាក្រក់បំផុត។
គួរបញ្ជាក់ជូនថា រហូតមកទល់នឹងពេលនេះ អាមេរិកមានអ្នកឆ្លងកូវីដ ១៩ ចំនួនជាង ២៤ ម៉ឺន ៥ពាន់នាក់ និងមានស្លាប់កើនឡើងដល់ជាង ៦ពាន់នាក់ បន្ទាប់ពីមានអ្នកស្លាប់រហូតដល់ជាង ១ពាន់ ១រយនាក់ ក្នុងរយៈពេលត្រឹមតែ ២៤ ម៉ោងចុងក្រោយនេះ។
សេដ្ឋកិច្ចអាមេរិក កំពុងរងផលប៉ះពាល់ធ្ងន់ធ្ងរដោយសារវិបត្តិកូវីដ១៩
សហរដ្ឋអាមេរិក នាខណៈនេះ កំពុងស្ថិតនៅក្នុងកាលៈទេសៈដ៏អាក្រក់បំផុតមួយ។ មិនត្រឹមតែប្រជាពលរដ្ឋអាមេរិកនោះទេ ដែលធ្លាក់ខ្លួនក្លាយជាជនគ្រោះពីវិបត្តិកូវីដ១៩ ។ ក៏ប៉ុន្តែ សេដ្ឋកិច្ចអាមេរិក ក៏ដូចគ្នាចឹងដែរ។
សេដ្ឋកិច្ចរបស់អាមេរិក បានបង្ហាញសញ្ញាកាន់តែមិនល្អឡើងពីមួយថ្ងៃទៅមួយថ្ងៃ។ ប្រជាពលរដ្ឋអាមេរិក ធ្លាក់ខ្លួនឈឺ និងស្លាប់កាន់តែច្រើន រីឯទីក្រុងជាច្រើននៅក្នុងប្រទេសក៏ត្រូវបានបិទទ្វារ រហូតធ្វើឲ្យទីក្រុងមួយចំនួនក្លាយទៅជាស្ងាត់ជ្រងំ ហាក់បីដូចជាទីក្រុងខ្មោច។
សហរដ្ឋអាមេរិក ដែលធ្លាប់តែជាប្រទេសសកម្ម មានភាពអ៊ូអរ ក្លាយជាប្រទេសអសកម្ម មនុស្សមិនហ៊ានដើរចេញក្រៅបើគ្មានការចាំបាច់។ មួយវិញទៀត ហាង និងអាជីវកម្មនានា នៅទូទាំងប្រទេសអាមេរិក ត្រូវបង្ខំចិត្តបិទទ្វារ ដោយសារតែខ្លាចមេរោគឆ្លងរាតត្បាតសកល-កូវីដ១៩។ ទាំងនេះហើយ ដែលជាកត្តាធ្វើឲ្យសេដ្ឋកិច្ចអាមេរិក ត្រូវជួបគ្រោះអាសន្នធំដោយជៀសមិនរួចឡើយ។
ចំនួនអ្នកអត់ការងារធ្វើនៅអាមេរិក កើនឡើងជាគំហុកនៅមួយរយៈពេលចុងក្រោយនេះ។ បើយោងទៅតាម ការចុះផ្សាយរបស់ទីភ្នាក់ងារសារព័ត៌មានបារាំង AFP នៅថ្ងៃសុក្រនេះ ចំនួនអ្នកគ្មានការងារធ្វើនៅសហរដ្ឋអាមេរិក បានកើនដល់ប្រមាណជា ១០ លាននាក់ ក្នុងរយៈពេលពីរសប្តាហ៍ចុងក្រោយនៃខែមីនា។
អត្រាអ្នកគ្មានការងារធ្វើ នៅអាមេរិកអាចនឹងកើនឡើងទៅដល់ចំនួន ៤%។ មិនតែប៉ុណ្ណោះ គេព្យាករទៀតថា ចំនួនអ្នកគ្មានការងារនៅអាមេរិក នឹងកើនឡើងទ្វេដង នៅក្នុងខែមេសានេះ ពោលគឺនឹងមានចំនួន ២០ លាននាក់ ហើយនេះអាចរាប់ចាត់ទុកថា ជាវិបត្តិសេដ្ឋកិច្ចដ៏ធ្ងន់ធ្ងរបំផុតមួយរបស់អាមេរិក គឺធ្ងន់ធ្ងរជាងវិបត្តិហិរញ្ញវត្ថុសកលកាលពីឆ្នាំ ២០០៨ ទៅទៀត។
ទិន្នន័យចុងក្រោយនេះ ធ្វើឱ្យអ្នកវិភាគមួយចំនួន និយាយអ្វីមិនចេញឡើយពីទំហំនៃការខូតខាតរបស់សេដ្ឋកិច្ចអាមេរិក ដែលបង្កឡើងដោយវិបត្តិកូវីដ១៩។ ដោយឡែក សេដ្ឋវិទូខ្លះ បានព្យាករថា អត្រាអ្នកបាត់បង់ការងារនៅអាមេរិក នឹងយ៉ាប់យ៉ឺនបំផុត រាប់គិតចាប់តាំងពីសម័យសង្គ្រាមលោកលើកទី ២ មក។
តើអាមេរិកអាចរើខ្លួនរលាស់ចេញពីវិបត្តិដ៏ធ្ងន់ធ្ងរតាមវិធីណា?
កាលពីថ្ងៃទី១ មេសា លោកប្រធានាធិបតីអាមេរិក ដូណាល់ ត្រាំ បានប្រកាសឱ្យពលរដ្ឋអាមេរិក ត្រៀមខ្លួនទប់ទល់នឹងស្ថានការណ៍ដ៏លំបាកខ្លាំង និងគួរឲ្យសង្វេគជាទីបំផុត ជាពិសេសនៅក្នុងរយៈពេលពីរទៅបីសប្តាហ៍ខាងមុខ។
ជាមួយគ្នានេះ កាលពីថ្ងៃព្រហស្បតិ៍ម្សិលមិញ នៅក្នុងសន្និសីទសារព័ត៌មានមួយនៅឯសេតវិមាន ប្រមុខរដ្ឋអាមេរិកលោកដូណាល់ ត្រាំ បានបញ្ជាក់ប្រាប់អំពី កិច្ចខិតខំប្រឹងប្រែងរបស់រដ្ឋាភិបាល ក្នុងការជួយបុគ្គលិក និងអាជីវកម្មខាតតូចនៅក្នុងប្រទេស។
យ៉ាងណាក៏ដោយ ក្នុងពេលបច្ចុប្បន្ននេះ លោកដូណាល់ ត្រាំ រងសម្ពាធមិនតិចនោះទេ។ ជាប់ដៃរវល់ទប់ស្កាត់កូវីដ១៩ ហើយ លោកនៅត្រូវរងការរិះគន់ជាច្រើននៅក្នុងប្រទេសទៀត។ អ្នកនយោបាយ និងសេដ្ឋវិទូអាមេរិកជាច្រើន នាំគ្នាស្តីបន្ទោសអ្នកបង្កើតគោលនយោបាយ និងប្រធានាធិបតីដូណាល់ ត្រាំ ចំពោះបរាជ័យក្នុងការជួយសង្គ្រោះសេដ្ឋកិច្ចពីវិបត្តិកូវីដ១៩។
ជាក់ស្តែង លោកចូ បៃឌីន ដែលជាគូប្រកួតប្រជែងដណ្តើមយកតំណែងប្រធានាធិបតី ជាមួយលោកត្រាំ មកពីបក្សប្រជាធិបតេយ្យ បានស្តីបន្ទោសចំពោះការមើលស្រាលស្ថានការណ៍ និងការពន្យារពេលឆ្លើយតបទៅនឹងវិបត្តិកូវីដ១៩ របស់រដ្ឋបាលលោកដូណាល់ ត្រាំ។ តាមរយៈសេចក្តីថ្លែងការណ៍មួយ លោកចូ បៃឌីន បាននិយាយថា លោកដូណាល់ ត្រាំ ត្រូវតែទទួលខុសត្រូវចំពោះការខកខានមិនបានឆ្លើយតបនឹងបញ្ហាឲ្យបានទាន់ពេលវេលា។
គួរបញ្ជាក់ជូនថា កាលពីសប្តាហ៍មុន រដ្ឋាភិបាលអាមេរិកបានអនុម័តលើកញ្ចប់ជំនួយសង្គ្រោះចំនួនជាង ២ ទ្រីលានដុល្លារ ឬស្មើនឹងជាង ២០០ ម៉ឺនលានដុល្លារអាមេរិក ដើម្បីជួយពលរដ្ឋអាមេរិក រោងចក្រ ក្រុមហ៊ុន សហគ្រាស និងមន្ទីរពេទ្យ។
ទាក់ទងរឿងនេះដែរ នៅថ្ងៃសុក្រនេះ ធនាគារអភិវឌ្ឍន៍អាស៊ី (ADB) បានព្រមាន ថាការរីករាលដាលនៃជំងឺឆ្លងកូវីដ១៩ អាចធ្វើឱ្យខាតបង់ដល់សេដ្ឋកិច្ចពិភពលោកចំនួន ៤,១ ទ្រីលានដុល្លារ ដោយសារតែវាធ្វើឱ្យប៉ះពាល់ខ្លាំងដល់សេដ្ឋកិច្ចរបស់បណ្តាប្រទេសអ្នកមានជាច្រើនមានជាអាទិ៍ សហរដ្ឋអាមេរិក អឺរ៉ុប និងប្រទេសចិនជាដើម។
ផលប៉ះពាល់ ដែលបានប៉ាន់ស្មានដោយ ADB គឺស្មើនឹងជិត ៥ % នៃផលិតផលសរុបទូទាំងពិភពលោក។ ក៏ប៉ុន្តែ ដោយផ្អែកលើសេណារីយ៉ូមិនល្អទាល់តែសោះដូចពេលបច្ចុប្បន្ននេះ គេគិតថា ការខាតបង់ដែលបណ្តាលមកកូវីដ១៩ អាចខ្ពស់ជាងតួលេខរបស់ ADB ទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ