តុលាការយុត្តិធម៌អន្តរជាតិ ទទួលជំនុំជម្រះបណ្តឹងអ៊ីរ៉ង់ប្រឆាំងនឹងទណ្ឌកម្មអាមេរិក
សហរដ្ឋអាមេរិកបានសម្តែងការខកចិត្តយ៉ាងខ្លាំង ចំណែកអ៊ីរ៉ង់រីករាយណាស់ ក្រោយពី បានឮសេចក្តីសម្រេចចិត្តរបស់តុលាការយុត្តិធម៌អន្តរជាតិ។ នៅថ្ងៃពុធទី ៣កុម្ភៈ ម្សិលមិញ តុលាការយុត្តិធម៌អន្តរជាតិបានសម្រេចថាតុលាការមានយុត្តាធិកាក្នុងការជំនុំជម្រះបណ្តឹងរបស់ភាគីអ៊ីរ៉ង់ ប្រឆាំងនឹងទណ្ឌកម្មរបស់សហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:០៧
អាមេរិកគោរពតុលាការយុត្តិធម៌អន្តរជាតិណាស់ តែអាមេរិកខកចិត្តខ្លាំងដែលតុលាការព្រមស្តាប់ហេតុផលតាមផ្លូវច្បាប់របស់អាមេរិក ហើយបែរជាព្រមទទួលជំនុំជម្រះបណ្តឹងរបស់អ៊ីរ៉ង់។ នេះបើតាមប្រតិកម្មរបស់អ្នកនាំពាក្យក្រសួងការបរទេសអាមេរិក លោក Ned Price ។
អ៊ីរ៉ង់បានដាក់ពាក្យបណ្តឹងទៅតុលាការយុត្តិធម៌អន្តរជាតិ នៅឆ្នាំ២០១៨ ប្រឆាំងនឹងអាមេរិក ថាបានរំលោភសន្ធិសញ្ញាមិត្តភាពឆ្នាំ១៩៥៥ដែលប្រទេសទាំងពីរបានចុះហត្ថលេខារួមគ្នា ដោយដាក់ទណ្ឌកម្មប្រឆាំងនឹងអ៊ីរ៉ង់។ សហរដ្ឋអាមេរិកក្រោមរដ្ឋបាលលោកដូណាល់ ត្រាំ ដែលក្រោយពីបានចាកចេញពីកិច្ចព្រមព្រៀងនុយក្លេអ៊ែរសម្រេចបានកាលពីឆ្នាំ២០១៥រវាងអ៊ីរ៉ង់និងមហាអំណាចមក បានសើរើដាក់ទណ្ឌកម្មលើអ៊ីរ៉ង់ឡើងវិញ។ ទណ្ឌកម្មនេះជាដើមហេតុនាំឱ្យប្រទេសអ៊ីរ៉ង់រងទុក្ខធ្លាក់ក្នុងភាពលំបាក និងខូចខាតជីវិតរាប់លាននាក់។
សហរដ្ឋអាមេរិកបានបិទបញ្ចប់សន្ធិសញ្ញាមិត្តភាពឆ្នាំ១៩៥៥នោះ ជាផ្លូវការ នៅឆ្នាំ ២០១៨ នៅពេលតុលាការយុត្តិធម៌អន្តរជាតិបញ្ជាឱ្យបន្ធូរបន្ថយទណ្ឌកម្មលើអ៊ីរ៉ង់ ចំពោះផលិតផលមនុស្សធម៌។ អាមេរិកនិងតវ៉ាដោយបានលើកហេតុផល ច្បាប់ផង សន្តិសុខផង ថាតុលាការយុត្តិធម៌អន្តរជាតិដែលជាស្ថាប័នរបស់អង្គការសហប្រជាជាតិមានទីស្នាក់ការនៅទីក្រុងឡាអេប្រទេសហូឡង់ គ្មានយុត្តាធិកាជំនុំជម្រះបណ្តឹងអ៊ីរ៉ង់នេះទេ និងត្រូវតែទម្លាក់បណ្តឹងនេះចោល។ អាមេរិកបានពន្យល់តុលាការថា ទណ្ឌកម្មអាមេរិកដាក់លើអ៊ីរ៉ង់ ជាការចាំបាច់ ព្រោះ អ៊ីរ៉ង់ជាតំណាងនៃការគំរាមកំហែងសន្តិសុខអន្តរជាតិ។
ប៉ុន្តែក្រុមចៅក្រមរបស់តុលាការ បានច្រានចោលពាក្យតវ៉ារបស់សហរដ្ឋអាមេរិក។ ប្រធានតុលាការយុត្តិធម៌អន្តរជាតិ លោក Abdulqawi Ahmed Yusuf បានប្រកាសនៅថ្ងៃពុធទី ៣កុម្ភៈ ថាតុលាការមានយុត្តាធិកា ក្នុងការជំនុំជម្រះបណ្តឹងរបស់សាធារណរដ្ឋអ៊ីស្លាមអ៊ីរ៉ង់។ ពេលនេះ តុលាការចាប់ជំនុំជម្រះក្តីហើយ តែគេត្រូវរង់ចាំជាច្រើនខែ ឬឆ្នាំទៀត ទម្រាំតុលាការចេញសាលក្រម។
តែយ៉ាងណាក៏ដោយ ក៏រដ្ឋមន្ត្រីការបរទេសអ៊ីរ៉ង់បានចាត់ទុកជាសេចក្តីសម្រេចរបស់តុលាការនេះថាជាជោគជ័យមួយសម្រាប់អ៊ីរ៉ង់។
សូមបញ្ជាក់ថារដ្ឋបាលអាមេរិកថ្មីរបស់លោកចូបៃដិន កំពុងពិចារណាត្រលប់ចូលក្នុងកិច្ចព្រមព្រៀងនុយក្លេអ៊ែរវិញ តែអាមេរិកចង់ឱ្យអ៊ីរ៉ង់ដកបណ្តឹងនៅតុលាការយុត្តិធម៌អន្តរជាតិចេញវិញសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ