តើមេរោគកូរ៉ូណាថ្មីកំពុងទាញសេដ្ឋកិច្ចពិភពលោកឲ្យធ្លាក់ដូចវិបត្តិហិរញ្ញវត្ថុឆ្នាំ ២០០៨ ឬ?
ចុះផ្សាយនៅថ្ងៃ៖
ស្តាប់ - ០៦:២៩
មេរោគកូរ៉ូណាថ្មី ឬ Covid-១៩ ដែលកំពុងបន្តធ្លាក់ឥទ្ធិពលនៅក្នុងប្រទេសចិនហាក់កំពុងបង្កើនល្បឿនឆ្លងចូលប្រទេសកាន់តែច្រើនក្នុងលោក។ អង្គការសុខភាពពិភពលោកបានប្រកាសដំឡើងកម្រិតគំរាមកំហែងខ្ពស់បំផុត អំពាវនាវឲ្យប្រទេសទាំងអស់ក្នុងលោកត្រៀមទទួល Covid-១៩ និងព្រមានទុកជាមុនថា ប្រទេសណាមើលស្រាល ឬជឿជាក់គេចផុតពីការចម្លង Covid-១៩ គឺជាកំហុសឆ្គងមួយធ្ងន់ធ្ងរណាស់។ កំណត់សម្គាល់មួយទៀត មេរោគកូរ៉ូណាថ្មីកំពុងជះឥទ្ធិពលអាក្រក់ដល់សេដ្ឋកិច្ចក្នុងលោក។ ចិនបានប្រកាសក្នុងថ្ងៃសៅរ៍ ទី២៩ កុម្ភៈថា វិស័យកម្មន្តសាលបានធ្លាក់ទាបខ្លាំងជាប្រវត្តិសាស្រ្ត។ ការប្រកាសរបស់ចិនបានធ្វើឡើង បន្ទាប់ពីតម្លៃភាគហ៊ុននៅផ្សារភាគហ៊ុន Wall Street បានធ្លាក់ថ្លៃខ្លាំងមិនធ្លាប់មាន គិតតាំងពីវិបត្តិហិរញ្ញវត្ថុក្នុងលោកឆ្នាំ ២០០៨។
វាហាក់ដូចជារហ័សពេកដែលហ៊ានផ្តល់ចម្លើយច្បាស់ថា មេរោគកូរ៉ូណាថ្មីកំពុងសម្លាប់សេដ្ឋកិច្ចក្នុងលោកដូចវិបត្តិហិរញ្ញវត្ថុឆ្នាំ ២០០៨ ព្រោះអ្វីៗវាអាស្រ័យលើកត្តាច្រើន ពិសេសការវិវត្តន៍របស់ Covid-១៩។ Covid-១៩ ដែលមានប្រភពចេញពីចិនហាក់កំពុងថយល្បឿននៅចិនដោយចំនួនអ្នកស្លាប់ និងអ្នកឆ្លងមានការធ្លាក់ចុះគួរឲ្យកត់សម្គាល់។ តែទន្ទឹមគ្នានេះ Covid-១៩ ហាក់កំពុងបង្កើនការចម្លងនៅក្នុងប្រទេសមួយចំនួន និងមានប្រទេសកាន់តែច្រើនកំពុងទទួល Covid-១៩។ សូម្បីតែក្រុមអ្នកជំនាញផ្នែកជំងឺឆ្លងក៏មិនហ៊ានប្រមើលទុក និងមិនអាចនិយាយបានពីកំណើនឥទ្ធិពល និងពីថ្ងៃអវសានរបស់ Covid-១៩។ បើ Covid-១៩ បន្តមានឥទ្ធិពល និងវត្តមានកាន់តែយូរ ផលវិបាកក៏នឹងមានកាន់តែខ្លាំងចំពោះជីវិតមនុស្ស និងសេដ្ឋកិច្ចក្នុងលោក។
តែពេលខ្លះ ផលវិបាកនៃការភ័យខ្លាចហាក់បានគ្របដណ្តប់ខ្លាំងជាងផលវិបាកកើតចេញពី Covid-១៩ ពិតៗ។ ក្នុងសប្តាហ៍នេះ តម្លៃភាគហ៊ុននៅផ្សារភាគហ៊ុនក្នុងលោកបានដាំក្បាលចុះយ៉ាងខ្លាំង ពិសេសនៅក្នុងតំបន់អាស៊ីដូចយ៉ាងនៅចិន ហុងកុង ជប៉ុន កូរ៉េខាងត្បូង ហ្វីលីពីន ឬអូស្រា្តលី។ Moody’s ដែលជាទីភ្នាក់ងារវាយតម្លៃហានិភ័យប្រាក់បំណុលបានឲ្យដឹងថា អាស៊ីប៉ាស៊ីហ្វិកជាតំបន់ដែលកំពុងប្រឈមនឹងមេរោគកូរ៉ូណាថ្មីខ្លាំងជាងគេ។ នៅអាមេរិក តម្លៃភាគហ៊ុននៅផ្សារភាគហ៊ុន Wall Street បានធ្លាក់ចុះយ៉ាងខ្លាំង គិតតាំងពីវិបត្តិហិរញ្ញវត្ថុសកលក្នុងខែតុលា ឆ្នាំ ២០០៨។ ពេញមួយសប្តាហ៍នេះ តម្លៃភាគហ៊ុននៅផ្សារភាគហ៊ុន Wall Street បានបាត់បង់ជាង ១០% នៅពេលបិទទ្វារនាថ្ងៃសុក្រ ទី២៨ កុម្ភៈ។
វិស័យកម្មន្តសាលចិនដាំក្បាលចុះខ្លាំងក្នុងខែកុម្ភៈ
នៅចិន ផលវិបាកកើតចេញពីមេរោគកូរ៉ូណាថ្មីបានហុចលទ្ធផលជាក់ស្តែងលើកទី១។ រដ្ឋាភិបាលក្រុងប៉េកាំងបានប្រកាសនៅថ្ងៃសៅរ៍ ទី២៩ កុម្ភៈថា វិស័យកម្មន្តសាលបានធ្លាក់ចុះខ្លាំងក្នុងខែកុម្ភៈ។ គួរបញ្ជាក់ថា ចិនបានកំណត់យកលេខ ៥០ ជាតួលេខគោលដើម្បីកំណត់ពីសកម្មភាពនៅក្នុងវិស័យកម្មន្តសាល។ បើលើសពី ៥០ វិស័យកម្មន្តសាលមានសកម្មភាពស្វាហាប់ និងរីកចម្រើន ហើយបើក្រោម ៥០ គឺមានសកម្មភាពធ្លាក់ចុះ។ តាមការិយាល័យស្ថិតិជាតិចិន សកម្មភាពក្នុងវិស័យកម្មន្តសាលនាខែកុម្ភៈមានត្រឹម ៣៥,៧ ពោលគឺតិចជាងឆ្ងាយក្នុងខែមករាដែលមាន ៥០។ មួយវិញទៀត តួលេខ ៣៥,៧ គឺតិចជាងការប្រមើលទុករបស់ក្រុមអ្នកវិភាគដែលគិតថាអាចមាន ៤៥។ ដូច្នេះសម្រាប់ចិន នេះជាសញ្ញាមួយអាក្រក់ខ្លាំងមិនធ្លាប់មានសម្រាប់វិស័យកម្មន្តសាលរបស់ខ្លួន គិតតាំងពីវិបត្តិហិរញ្ញវត្ថុសកលក្នុងខែតុលា ឆ្នាំ ២០០៨។
មេរោគកូរ៉ូណាថ្មីជាដើមចម ព្រោះមេរោគថ្មីមួយនេះបានបង្ខំចិនឲ្យចាត់វិធានការតឹងតែង និងចាស់ដៃជាច្រើនក្នុងរយៈពេល ២ខែកន្លងទៅ។ វិធានការទាំងនោះមានដូចជា បិទការចេញ ចូលទីក្រុងវូហានដែលជាប្រភពផ្ទុះ Covid-១៩ និងរឹតបន្តឹងការធ្វើដំណើររបស់ពលរដ្ឋចិនរាប់លាននាក់។ វិធានការក្រុងមនុស្សរាប់លាននាក់មិនឲ្យធ្វើដំណើរនេះបានកម្រិតការចំណាយរបស់ពលរដ្ឋទាំងនោះជាស្វ័យប្រវត្តិ។ បន្ទាប់មក ការបង្ខំពលករចិនរាប់លាននាក់ឲ្យបន្តវិស្សមកាលចូលឆ្នាំចិនបានធ្វើឲ្យចង្វាក់ផលិកម្មគ្រប់ប្រភេទជាប់គាំង ពិសេសការផលិតគ្រឿងបន្លាស់ និងវត្ថុធាតុដើមគ្រប់ប្រភេទសម្រាប់ផ្គត់ផ្គង់ដល់តម្រូវការក្នុងលោក។ ក្រៅពីភាពរអាក់រអួលក្នុងវិស័យឧស្សាហកម្ម Covid-១៩ ក៏បានប៉ះពាល់ខ្លាំងក្នុងវិស័យសេវាជាច្រើន ពិសេសក្នុងផ្នែកដឹកជញ្ជូន សណ្ឋាគារ ភោជនីយដ្ឋាន និងទេសចរណ៍។
Covid-១៩ ធ្វើឲ្យកំណើនសេដ្ឋកិច្ចចិនធ្លាក់ចុះបន្ថែម ?
ស្ថានភាពសេដ្ឋកិច្ចពិភពលោក និយាយជារួម និងស្ថានភាពសេដ្ឋកិច្ចចិននិយាយដោយឡែក គឺអាស្រ័យលើការវិវឌ្ឍន៍របស់មេរោគកូរ៉ូណាថ្មី។ តែចិនហាក់មានសុទិដ្ឋិនិយមថា ការចុះថយឥទ្ធិពលរបស់ Covid-១៩ និងការគ្រប់បាននូវមេរោគមួយនេះអាចនឹងអនុញ្ញាតឲ្យខ្លួនផ្តើមចង្វាក់ផលិកម្មបន្តិចម្តងៗឡើងវិញ។ ខណៈនេះ រដ្ឋាភិបាលបានលើកទឹកចិត្តដល់រោងចក្រ សហគ្រាសមួយចំនួនឲ្យផ្តើមការងាររបស់ពួកគេឡើងវិញជាបណ្តើរៗ។ ក្នុងសប្តាហ៍នេះ រដ្ឋាភិបាលបានប្រកាសចេញនូវមហាផែនការមួយដើម្បីជួយគាំទ្រដល់រោងចក្រ សហគ្រាសខ្នាតតូច និងមធ្យម។ បន្ទាប់មក រដ្ឋាភិបាលក៏បានលើកទឹកចិត្តដល់ធនាគារឲ្យផ្តល់ប្រាក់កម្ចីក្នុងអត្រាការប្រាក់ទាប។
គួររម្លឹកថាកន្លងមក ពោលក្នុងពេលផ្ទុះមេរោគកូរ៉ូណាយ៉ាងពេញទំហឹង ក្រុងប៉េកាំងបានបញ្ចេញលុយជាង ១៧១ ០០០លានដុល្លារដើម្បីជួយគាំទ្រវិស័យសេដ្ឋកិច្ច។ បើតាមក្រុមអ្នកវិភាគ Covid-១៩ បានធ្វើឲ្យចិនបាត់បង់ទឹកប្រាក់សរុបជាង ១៤០ ០០០លានដុល្លារនៅក្នុងវិស័យសំខាន់ៗជាច្រើន។ តាមក្រុមអ្នកវិភាគដដែល ចិនដែលកំពុងមានកំណើនសេដ្ឋកិច្ចទាបខ្លាំងគិតក្នុងរយៈពេល ៣០ឆ្នាំចុងក្រោយអាចនឹងស្គាល់កំណើនសេដ្ឋកិច្ចធ្លាក់ចុះថែមទៀតដោយសារមេរោគកូរ៉ូណាថ្មី។ តែបើសេដ្ឋកិច្ចចិនធ្លាក់ សេដ្ឋកិច្ចពិភពលោកក៏មិនអាចគេចផុតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ