បារាំង ប្រកាសឈានចូលដល់ដំណាក់កាលរីករាលដាល នៃជំងឺកូវីត-១៩
ជំងឺ Covid-១៩ ឬ មេរោគកូរ៉ូណាថ្មី កំពុងបង្កើនល្បឿនឆ្លងនៅលើពិភពលោក ជាពិសេសនៅក្នុងប្រទេសកូរ៉េខាងត្បូង និងអ៊ីរ៉ង់។ នៅក្នុងប្រទេសបារាំង ចំនួនអ្នកឆ្លងថ្មី ក៏ចាប់កើនឡើងដែរ។ គិតត្រឹមរសៀលថ្ងៃសៅរ៍ វេលាម៉ោង ២ បារាំងរាប់ឃើញមានអ្នកឆ្លងមេរោគកូរ៉ូណាថ្មី ចំនួន ៧៣ករណី។ រដ្ឋាភិបាលបានប្រកាសថាករណីឆ្លងកម្រិតកូរ៉ូណាវីរុស បានឈានដល់កម្រិតទី២នៅថ្ងៃសុក្រ ទី២៨ កុម្ភៈ។ ក្រោយកិច្ចប្រជុំវិសាមញ្ញស្តីពីវិបត្តិ Covid-១៩ បារាំងសម្រេចលុបចោលរាល់កម្មវិធី ដែលមានការប្រមូលផ្តុំមនុស្សលើសពី៥ពាន់នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ដើម្បីវាយតម្លៃអំពីស្ថានភាពនៃការរាតត្បាតរបស់មេរោគកូរ៉ូណាវីរុសថ្មីលើទឹកដី លោក ប្រធានាធិបតីបារាំង អេម៉ានុយអែល ម៉ាក្រុង បានដឹកនាំបើកកិច្ចប្រជុំវិសាមញ្ញពីរ នៅព្រឹកថ្ងៃសៅរ៍ទី២៩កុម្ភៈនេះ គឺកិច្ចប្រជុំក្រុមប្រឹក្សាការពារជាតិ និងកិច្ចប្រជុំក្រុមប្រឹក្សាគណៈរដ្ឋមន្ត្រី។ ជំនួបប្រជុំពិសេសនេះ ជាឱកាសនៃការសម្រេចចិត្ត និងចេញវិធានការសំខាន់ៗ ដើម្បីបញ្ចៀសនិងទប់ស្កាត់កុំឱ្យមេរោគបន្តរីករាលដាល ទៅជាការរាតត្បាតទាន់ ព្រោះតាំងល្ងាចថ្ងៃសុក្រទី ២៨កុម្ភៈ បារាំងបានបោះជំហានចូលដល់ដំណាក់កាលថ្មីមួយទៀត គឺកម្រិតទីពីរនៃការប្រឈមនឹងជំងឺកូវីត-១៩ ក្រោយពីរកឃើញមានអ្នកឆ្លងថ្មីបន្ថែមទៀតចំនួន ១៩នាក់ ។
បារាំង មានផែនការប្រយុទ្ធប្រឆាំងនឹងកូវីត-១៩ ដែលចែកជាបីកម្រិត ៖
កម្រិតទី១ គឺដំណើរមកដល់នៃវីរុសលើទឹកដីបារាំង។ នៅដំណាក់កាលនេះ វីរុសមិនទាន់ធ្វើការចម្លងពីមនុស្សម្នាក់ទៅមនុស្ស ក្នុងចំណោមប្រជាពលរដ្ឋទូទៅទេ។
កម្រិតទី២ ជាដំណាក់កាល ដែលវីរុសចាប់រីករាលដាល និងចម្លង។ បារាំងបានឈានចូលដល់ដំណាក់កាលទីពីរនេះតាំងពីល្ងាចថ្ងៃសុក្រទី ២៨កុម្ភៈ។ មានន័យថា មេរោគ មានលេចចេញឆ្លងលើមនុស្សជាក្រុមៗ ដោយដុបៗ នៅតាមតំបន់ៗផ្សេង ក្នុងផ្ទៃប្រទេស។ ក្នុងដំណាក់កាលនេះ រដ្ឋាភិបាលអាចចេញសម្រេចចិត្តធំៗសំខាន់ៗ ដើម្បីពន្យឺតការរាលដាលនៃCovid-១៩ ដូចជា សម្រេចឱ្យបិទសាលាមតេយ្យ សាលារៀន ស្ថាប័នទទួលក្មេងមិនទាន់ពេញវ័យ នៅទូទាំងស្រុក-ខេត្ត ទូទាំងតំបន់ ឬអាចទូទាំងប្រទេសផង។ អាជ្ញាធរអាចនឹងប្រកាសហាមឃាត់មិនឱ្យទៅសួរសុខទុក្ខមនុស្សចាស់នៅតាមមណ្ឌលចាស់ជរា ព្រោះមនុស្សចាស់ចាប់ពីអាយុ៧០ឆ្នាំ ឬអ្នកមានជំងឺទឹកនោមផ្អែមឬជំងឺលើសឈាម ជាជនងាយរងគ្រោះឆ្លងកូរ៉ូណាវីរុសថ្មីជាងគេ។
ផែនការរបស់រដ្ឋាភិបាលក្នុងដំណាក់កាលនេះ ក៏មានភ្ជាប់ទៅដោយគម្រោងអំពាវនាវឱ្យប្រជាពលរដ្ឋកម្រិតការធ្វើដំណើរដែលមិនចាំបាច់ ផ្អាកការធ្វើដំណើរតាមមធ្យោបាយដឹកជញ្ជូនសាធារណៈ និងចេញសេចក្តីណែនាំមិនឱ្យមានការជួបជុំផ្តុំគ្នាច្រើន (ទៅមើលកុន-ល្ខោន មើលការប្រកួតកីឡាផ្សេងៗ ទៅមើលពិព័រណ៍ ការតាំងតុ ...)
កម្រិតទីបី ជាដំណាក់កាលនៃការរាតត្បាតរបស់វីរុស ដែលមានកម្រិតចម្លងខ្ពស់បំផុត ក្នុងចំណោមប្រជាពលរដ្ឋ ជាទូទៅ។ ដំណាក់កាលនេះ អាចអូសបន្លាយពេលវេលាពី៨ ទៅ១២សប្តាហ៍។ ចំនួនអ្នកឆ្លងមេរោគនឹងកើនឡើងខ្លាំងនិងលឿនបំផុតនៅសប្តាហ៍ដំបូងៗ។ បើឈានដល់ដំណាក់កាលនេះ អាទិភាពចំបងរបស់អាជ្ញាធរ គឺធ្វើយ៉ាងណាកុំឱ្យការរាតត្បាតមានសន្ទុះខ្លាំងពេក និងត្រូវប្រមូលផ្តុំបន្ថែមកម្លាំងក្នុងវិស័យសុខាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ