ហេតុអ្វី អង្គការសុខភាពពិភពលោកមិនទទួលឲ្យតៃវ៉ាន់ចូលរួមក្នុងមហាសន្និបាតប្រចាំឆ្នាំ
ចុះផ្សាយនៅថ្ងៃ៖
ស្តាប់ - ០៥:៤៤
តៃវ៉ាន់ដែលមានស្នាដៃ ជោគជ័យក្នុងការប្រយុទ្ធប្រឆាំងនឹងជំងឺកូវីដ មិនត្រូវបានគេអញ្ជើញឲ្យចូលរួមនៅក្នុងសន្និបាតប្រចាំឆ្នាំ របស់អង្គការសុខភាពពិភពលោក ដែលបានបិទបញ្ចប់ទៅ កាលពីថ្ងៃអង្គារម្សិលមិញនោះទេ។ អវត្តមានរបស់តៃវ៉ាន់ ធ្វើឲ្យគេចោទសួរឡើងពីឥទ្ធិពលរបស់ចិន ទៅលើ ស្ថាប័នសុខភាពរបស់អង្គការសហប្រជាជាតិ។ តើវាដូចការចោទប្រកាន់របស់អាមេរិកដែរឬទេ ដែលថាចិន បានដាក់សម្ពាធទៅលើអង្គការសុខភាពពិភពលោក ក្នុងរឿងតៃវ៉ាន់?
ខឹង និងខកចិត្តចំពោះការសម្រេចចិត្តរបស់អង្គការសុខភាពពិភពលោក។ នេះជាប្រតិកម្មរបស់អនុប្រធានមជ្ឈមណ្ឌលគ្រប់គ្រងជំងឺឆ្លងតៃវ៉ាន់ នៅបន្ទាប់ពីមហាសន្និបាតរបស់អង្គការសុខភាពពិភពលោក កាលពីថ្ងៃចន្ទបានសម្រេចលើកពេល ពិភាក្សាស្តីពីការចូលរួមរបស់តៃវ៉ាន់ ក្នុងនាមជាប្រទេសសង្កេតការណ៍ នៅក្នុង អង្គការសុខភាពពិភពលោក។
ខកចិត្ត ព្រោះថា ជាច្រើនសប្តាហ៍មកហើយ តៃវ៉ាន់ ដែលចង់ត្រលប់ទៅចូលរួមក្នុងកិច្ចប្រជុំរបស់អង្គការសុខភាពពិភពលោក នៅដើមសប្តាហ៍នេះ បានសម្រុកធ្វើនយោបាយការទូត ខ្លាំងណាស់ ដើម្បីស្វែងរកការគាំទ្រ ពីប្រទេសសមាជិករបស់អង្គការសុខភាពពិភពលោក។
នៅមុន បើកមហាសន្និបាត របស់អង្គការសុខភាពពិភពលោក ប្រទេសចំនួន ១៥ នៅអាមេរិកឡាទីន និងនៅមហាសមុទ្រប៉ាស៊ីហ្វិក ដែលនៅរក្សាចំណងការទូតជាមួយ តៃវ៉ាន់បានដាក់លិខិត សុំឲ្យអង្គការសុខភាពពិភពលោក ដាក់បញ្ចូលតៃវ៉ាន់ ក្នុងអង្គប្រជុំមហាសន្និបាតលើកនេះ។ អូស្ត្រាលី កាណាដា ជប៉ុន នូវែលសេឡង់ បានចូលរួមជាមួយសហរដ្ឋអាមេរិក ដើម្បីដាក់សម្ពាធ ទៅលើអង្គការសុខភាពពិភពលោក ឲ្យផ្តល់លក្ខន្តិកៈជាអ្នកសង្កេតការណ៍ ទៅឲ្យតៃវ៉ាន់។
សម្រាប់ឧបនាយករដ្ឋមន្រ្តីនូវែលសេឡង់ លោក Winston Peters តៃវ៉ាន់មានអ្វីជាច្រើនដែលត្រូវបង្រៀនដល់ពិភពលោក។ ប្រទេសទាំងអស់ រួមទាំងចិនផង ប្រាកដជាចង់ដឹងពីគន្លឹះសំខាន់ ដែលធ្វើឲ្យតៃវ៉ាន់ ទទួលជោគជ័យ ក្នុងការប្រយុទ្ធប្រឆាំងនឹងជំងឺកូវីដ ក្នុងទឹកដីរបស់ខ្លួន។
កោះតៃវ៉ាន់ ដែលស្ថិតនៅចម្ងាយប្រមាណ ១ពាន់គីឡូម៉ែត្រពីទីក្រុងវូហាន (ជំរកកើតដំបូង នៃជំងឺកូវីដ) មានអ្នកឆ្លងជំងឺកូវីដ១៩ តែ ៤៣៣នាក់ និងស្លាប់៧នាក់ប៉ុណ្ណោះ។ បើប្រៀបធៀបនឹងប្រទេសជុំវិញខ្លួន តៃវ៉ាន់មានចំនួនអ្នកឆ្លងតិច និងមិនដែលចាត់វិធានការបិទទីក្រុង ដាក់មនុស្សឲ្យនៅក្នុងផ្ទះ ដូចប្រទេសភាគច្រើន នោះទេ។ តៃវ៉ាន់មានចំនួនអ្នកឆ្លងតែ ៤៣៣នាក់ ក្នុងចំណោមប្រជាជនសរុប ២៣លាននាក់។ នេះក៏ព្រោះថា តៃវ៉ាន់ឆាប់ចាត់វិធានការ តាំងពីថ្ងៃចុងឆ្នាំ ២០១៩ម្ល៉េះ ដើម្បីទប់ស្កាត់ការចម្លងមេរោគកូរ៉ូណា ដូចជារឹតបន្តឹងការត្រួតពិនិត្យព្រំដែន ដាក់បង្ខាំងរយៈពេល ១៤ថ្ងៃ រាល់អ្នកដែលធ្វើដំណើរមកពីខេត្តហ៊ូពេប្រទេសចិន និងធ្វើតេស្ត តាមដានរាល់អ្នកដែលសង្ស័យ ជាប់ទាក់ទងជាមួយអ្នកជំងឺកូវីដ។
{{ scope.legend }}
© {{ scope.credits }}សម្រាប់ឧបនាយករដ្ឋមន្រ្តីនូវែលសេឡង់ ពិភពលោកត្រូវរៀនពីជោគជ័យរបស់តៃវ៉ាន់ និងត្រូវផ្តល់ទៅឲ្យតៃវ៉ាន់ នូវកៅអីជាអ្នកសង្កេតការណ៍នៅអង្គការសុខភាពពិភពលោក ដូចដែលតៃវ៉ាន់ធ្លាប់បាន រហូតដល់ឆ្នាំ ២០១៦។ សេចក្តីអំពាវនាវរបស់តំណាងរដ្ឋាភិបាលនូវែលសេឡង់បានរំញោចកំហឹងរបស់មហាអំណាចពិភពលោកទី២ ដែលបានគំរាមសងសឹកអ្នកដែលហ៊ានលើកស្ទួយតៃវ៉ាន់។ សម្រាប់អ្នកនាំពាក្យរបស់ក្រសួងការបរទេសចិន ប្រទេសចិនមានតែមួយ នៅក្នុងលោក ចំណែកតៃវ៉ាន់គ្រាន់តែជាចំណែក របស់ចិន ដោយមិនអាចប្រកែកបាន។ បើតាមអ្នកនាំពាក្យដដែល រដ្ឋាភិបាលរបស់លោកស្រី ត្សៃ អ៊ីងវេន (ប្រធានាធិបតីតៃវ៉ាន់) មានគោលដៅចង់យកបញ្ហាជំងឺកូវីដ ជាលេស ដើម្បីទាមទារឯករាជ្យរបស់ខ្លួន។
ជោគជ័យរបស់តៃវ៉ាន់ នៅចំពោះមុខជំងឺរាតត្បាតកូវីដ ១៩ កំពុងធ្វើឲ្យតៃវ៉ាន់ ទទួលបានកោតសរសើរ ដែលនេះមិនមែនជាអ្វីដែលទីក្រុងប៉េកាំងចង់ឃើញនោះទេ។ គេអាចថាវិបត្តិកូវីដ បានធ្វើឲ្យតៃវ៉ាន់ លេចមុខមាត់ឡើងវិញ នៅក្នុងឆាកអន្តរជាតិ ដែលធ្វើឲ្យមហាអំណាចចិន ព្រួយបារម្ភ។ ម្យ៉ាងវិញទៀត ការគ្រប់គ្រងវិបត្តិកូវីដ ដោយនៅរក្សាលទិ្ធប្រជាធិបតេយ្យ នៅតៃវ៉ាន់ ដូចជា បើកសិទ្ធិសេរីភាពឲ្យប្រជាជន នៅបន្ត ដើរចេញក្រៅ ធ្វើការ ដូចធម្មតា បានប៉ះពាល់ ផងដែរ នយោបាយឃោសនារបស់ចិន ដែលថា មានតែវិធានការផ្តាច់ការ ដូចជាបិទទីក្រុង ដាក់បង្ខាំងមនុស្ស ឲ្យនៅក្នុងផ្ទះ ទើបអាចជៀសផុតពីចម្លងរាតត្បាតរបស់ជំងឺកូវីដ១៩។
តៃវ៉ាន់បានផ្តើមសង្រ្គាមការទូត ដោយប្រយោល ជាមួយចិន តាមរយៈ ការតវ៉ាប្រឆាំងអង្គការសុខភាពពិភពលោក ដែលតៃវ៉ាន់ចោទថា បានភ្លេចវិជ្ជាជីវៈ និងអព្យាក្រឹតរបស់ខ្លួន ដោយសារតែហេតុផលនយោបាយ។ សម្រាប់ទីក្រុងតៃប៉ិ ដោយផាត់ចោល តៃវ៉ាន់ មិនឲ្យចូលរួមការងារក្នុងស្ថាប័ន អង្គការសុខភាពពិភពលោក ក្នុងនាមជាអ្នកសង្កេតការណ៍ អង្គការសុខភាពពិភពលោក បានបោះបង់ចោល ប្រជាជនតៃវ៉ាន់ ជាង ២៣លាននាក់ នៅចំពោះ ជំងឺរាតត្បាតកូវីដ។
តាមរដ្ឋមន្រ្តីក្រសួងសុខាភិបាលតៃវ៉ាន់ តៃវ៉ាន់ជូនដំណឹងទៅអង្គការសុខភាពពិភពលោក នៅថ្ងៃទី៣១ធ្នូ ពីលទ្ធភាពចម្លងមេរោគផ្លូវដង្ហើមថ្មី ពីមនុស្សទៅមនុស្ស នៅប្រទេសចិន ពោលគឺតាំងពីនៅមុនពេលដែលប្រទេសចិនជូនដំណឹងស្តីពីករណីមេរោគថ្មី ទៅ អង្គការសុខភាពពិភពលោកទៅទៀត។ កាលណោះ តៃវ៉ាន់បានសុំឲ្យអង្គការសុខភាពពិភពលោកចែករំលែក ព័ត៌មានជាមួយតៃវ៉ាន់ ដើម្បីតៃវ៉ាន់អាចរកវិធីបង្ការទុកមុន។ ប៉ុន្តែ អង្គការសុខភាពពិភពលោកមិនបានឆ្លើយតបអ្វីទេ ដែលជាហេតុធ្វើឲ្យតៃវ៉ាន់ ត្រូវចាត់វិធានការដោយខ្លួនឯង ដោយបានបិទព្រំដែន ទាំងនៅពេលដែលអង្គការសុខភាពពិភពលោកបានអំពាវនាវកុំឲ្យគេបិទព្រំដែនជាមួយចិន។
លើកនេះ ដោយចង់ត្រលប់ទៅចូលរួមក្នុងមហាសន្និបាតក្នុងនាមជាអ្នកសង្កេតការណ៍ តៃវ៉ាន់ ចង់បង្ហាញថា តៃវ៉ាន់ មានមធ្យោបាយ សមត្ថភាព ដោះស្រាយ ដ៏មានប្រសិទ្ធិភាព វិបត្តិកូវីដ បើទោះគ្មានជំនួយពី អង្គការសុខភាពពិភពលោក។ មួយវិញទៀត តៃវ៉ាន់ ចង់ចែករំលែក បទពិសោធន៍ ដ៏មានប្រសិទ្ធិភាព ដែលខ្លួនបានធ្វើ ដើម្បីគ្រប់គ្រងវិបត្តិកូវីដ។
ប៉ុន្តែ ដូចលើកមុន អង្គការសុខភាពពិភពលោក នៅស្ងៀម ដោយសម្រេចទម្លាក់ការទទួលខុសត្រូវទៅលើប្រទេសសមាជិក។ តាមអ្នកនាំពាក្យរបស់អង្គការសុខភាពពិភពលោក ប្រធានរបស់ស្ថាប័នអន្តរជាតិ មួយនេះ គ្មានសិទ្ធិអំណាចដើម្បីអញ្ជើញ តៃវ៉ាន់ឲ្យចូលរួមក្នុងមហាសន្និបាតនៅដើមសប្តាហ៍នេះទេ។ គឺសមាជិកទាំងអស់គ្នា ដែលជាអ្នកបោះឆ្នោត ហើយជាពិសេសគឺអាស្រ័យទៅលើប្រទេសពាក់ព័ន្ធ គឺចិនដែលជាអ្នកសម្រេច ព្រោះថា ចិនដែលនៅតែចាត់ទុកតៃវ៉ាន់ជាដីខេត្តមួយរបស់ខ្លួន កំពុងតំណាងឲ្យតៃវ៉ាន់រួចស្រេចហើយ នៅអង្គការសុខភាពពិភពលោក។
សូមរំលឹកថា ទីក្រុងប៉េកាំងធ្លាប់បានអនុញ្ញាតឲ្យតៃវ៉ាន់ មានកៅអីជាអ្នកសង្កេតការណ៍ នៅអង្គការសុខភាពពិភពលោក ពីឆ្នាំ ២០០៩ ដល់ឆ្នាំ ២០១៦ ក្នុងឈ្មោះថា ចិន តៃប៉ិ(Chinese Taipei) គឺនៅពេលរដ្ឋាភិបាលតៃវ៉ាន់ ដឹកនាំដោយបក្សគួកមីងតាង ដែលទំនោរទៅខាងរដ្ឋអំណាចចិន។ ប៉ុន្តែ រដ្ឋាភិបាលចិនបានប្តូរចិត្តមកវិញ ដោយលែងឲ្យតៃវ៉ាន់បានចូលរួម នៅអង្គការសុខភាពពិភពលោក តាំងពីឆ្នាំ ២០១៦ ពោលគឺនៅពេលតៃវ៉ាន់មានប្រធានាធិបតី ថ្មី គឺលោកស្រីត្សៃ អ៊ីងវេន មកពីក្រុមឯករាជ្យនិយម ដែលបដិសេធមិនទទួលគោលនយោបាយ ចិនតែមួយ របស់ទីក្រុងប៉េកាំង។
ចិនកំពុងសងសឹក ដាក់គំនាបលើរដ្ឋាភិបាលរបស់លោកស្រី ត្សៃ អ៊ីងវេន ដែលនឹងស្បថចូលកាន់តំណែងសម្រាប់អាណត្តិទី២ នៅចុងខែឧសភានេះ។ សម្រាប់ប្រធានមជ្ឈមណ្ឌលសិក្សាលើតៃវ៉ាន់ នៅសកលវិទ្យាល័យFudan នៅទីក្រុងសៀងហៃ គោលការណ៍របស់ចិន គឺច្បាស់ និងមិនប្រែប្រួល។ មធ្យោបាយតែមួយ ដែលធ្វើឲ្យតៃវ៉ាន់អាចបានត្រលប់ទៅចូលរួមនៅអង្គការសុខភាពពិភពលោក គឺតៃវ៉ាន់ ត្រូវទទួលស្គាល់ ការមូលមតិគ្នាឆ្នាំ ១៩៩២ដែលក្នុងនោះ ចិន និងតៃវ៉ាន់បានបញ្ជាក់ពីគោលការណ៍ “ចិនតែមួយ”។ លោកស្រី ប្រធានាធិបតីតៃវ៉ាន់ ដែលមានជំហរដាច់ខាត បដិសេធ មិនទទួលស្គាល់គោលការណ៍ចិន តែមួយ នឹងអាចធ្វើឲ្យតៃវ៉ាន់ ពិបាកនឹងកៅអី នៅអង្គការសុខភាពពិភពលោកមកវិញ នោះបើទោះបីតៃវ៉ាន់ បានការគាំទ្រពីអាមេរិក និងប្រទេសមួយចំនួនតូច ដែលមិនខ្លាចឥទ្ធិពលរបស់ចិនក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ