ចិនចេញមុខជួយការពារអង្គការសុខភាពពិភពលោកដោយវាយបកដាក់អាមេរិកវិញ
អង្គការសុខភាពពិភពលោកហៅកាត់ជាភាសាអង់គ្លេស WHO បានបិទបញ្ចប់សម័យប្រជុំប្រចាំឆ្នាំរយៈពេល ២ថ្ងៃតាម video conference នៅល្ងាចថ្ងៃអង្គារ ទី១៩ ឧសភា។ ជាលទ្ធផល សមាជិកទាំង ១៩៤ប្រទេស ក្នុងនោះមានចិន និងអាមេរិកផងបានអនុម័តជាឯកច្ឆន្ទលើសេចក្តីសម្រេចមួយស្តីពីការវាយតម្លៃឯករាជ្យពីសំណាក់អង្គការសុខភាពពិភពលោកចំពោះការឆ្លងរាត្បាតនៃមេរោគកូរ៉ូណាថ្មី។ លទ្ធផលនេះបានធ្លាក់មក ខណៈដែលអាមេរិកបានចោទអង្គការអន្តរជាតិមួយនេះពីបទកាន់ជើងចិន និងគ្រប់គ្រងជំងឺកូវីដ ១៩ មិនបានល្អ។ ចំណែកចិនបានចេញមុខការពារ WHO ដោយចោទអាមេរិកពីបទគេចវេសមិនចង់គោរពកាតព្វកិច្ចរបស់ខ្លួនចំពោះ WHO។
ចុះផ្សាយនៅថ្ងៃ៖
សេចក្តីសម្រេចដែលអនុម័តដោយសមាជិកអង្គការសុខភាពពិភពលោកទាំង ១៩៤ប្រទេសគ្រោងបង្កើតចេញនូវនីតិវិធីវាយតម្លៃមួយមិនលំអៀង ឯករាជ្យ និងពេញលេញប្រឈមនឹងជំងឺឆ្លងរាតត្បាត។ កម្មវត្ថុនៃការបង្កើតឲ្យមាននីតិវិធីមួយនេះឡើង គឺដើម្បីធ្វើឲ្យប្រសើរនូវសមត្ថភាពបង្ការ ការរៀបចំ និងការឆ្លើយតបរបស់ WHO ទល់នឹងជំងឺឆ្លងរាតត្បាត។ តែខ្លឹមសារលំអិតនៅក្នុងនិតិវិធីមួយនេះហាក់នៅបន្តស្រពិចស្រពិលនៅឡើយ។ គួររម្លឹកថា វិបត្តិជំងឺកូវីត ១៩បានធ្វើឲ្យ WHO រងការរិះគន់មិនសំចៃមាត់ពីប្រធានាធិបតីអាមេរិកលោកដូណាល់ ត្រាំ។ លោកត្រាំបានចង្អុលមុខ WHO ពីបទគ្រប់គ្រងមិនបានល្អ និងចោទ WHO ជាអាយ៉ងរបស់ចិន។
នៅក្នុងន័យនេះ លោកត្រាំបានព្រមានបញ្ឈប់ការផ្តល់វិភាគទានប្រមាណជា ៤០០លានដុល្លារក្នុងមួយឆ្នាំៗទៅឲ្យWHO។ បន្ទាប់មក លោកត្រាំក៏បានគំរាមដកអាមេរិកចេញពីសមាជិករបស់ WHOដែរ។ យ៉ាងណាក៏ដោយ លោកត្រាំបានទុកពេល ៣០ថ្ងៃឲ្យ WHO ធ្វើកំណែទម្រង់លើការងារមួយចំនួនរបស់ខ្លួន។ កាលពីថ្ងៃចន្ទ ទី១៨ ឧសភា រដ្ឋមន្រ្តីសុខាភិបាលអាមេរិកបានបញ្ជាក់ថា បរាជ័យរបស់ WHO ក្នុងការគ្រប់គ្រងជំងឺកូវីដ ១៩ បានធ្វើឲ្យមនុស្សស្លាប់យ៉ាងច្រើន និងបានទាមទារឲ្យ WHO ធ្វើការឲ្យមានតម្លាភាពជាងនេះ។ ចំណែកចិននៅថ្ងៃអង្គារ ទី១៩ ឧសភាបានចេញមុខការពារ WHO ដោយយល់ថា រដ្ឋបាលអាមេរិកបានព្យាយាមគេចវេសមិនចង់គោរពកាតព្វកិច្ចរបស់ខ្លួនចំពោះ WHO និងបង្ខូចកិច្ចខិតខំប្រឹងប្រែងរបស់ចិនក្នុងការប្រឆាំងកូវីដ ១៩។
អគ្គលេខាធិការអង្គការសហប្រជាជាតិលោក Antonio Guterres បានបញ្ចេញប្រតិកម្មឌឺដងដាក់ប្រទេសមួយចំនួនដោយមិននិយាយចំឈ្មោះថា ប្រទេសទាំងនោះបានព្រងើយកន្តើយនឹងអនុសាសន៍របស់ WHO ដូចយ៉ាងមិនធ្វើតេស្តរកមេរោគ មិនក្រុងមនុស្សឲ្យនៅផ្ទះ រួមទាំងមិនគោរពគម្លាតសុវត្ថិភាពជាដើម។ ទោះបីជាលោក Guterres មិននិយាយចំឈ្មោះប្រទេសណាមួយក៏ដោយក៏គេដឹងថា លោកចង់និយាយសំដៅអាមេរិកដែលលោកត្រាំធ្លាប់បានមើលស្រាលលើកូវីដ ១៩ និងតែងជំទាស់នឹងការក្រុងមនុស្សមិនឲ្យចេញពីផ្ទះដោយគិតប្រយោជន៍សេដ្ឋកិច្ចធំជាងសុខភាពរបស់ពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ