អង្គការសុខភាពពិភពលោក ៖ កុំធ្វើនយោបាយលើវិបត្តិកូវីដ១៩
នៅថ្ងៃព្រហស្បតិ៍ទី ៩មេសានេះ តៃវ៉ាន់ បានស្រែកទាមទារឱ្យនាយកអង្គការសុខភាពពិភពលោកសុំទោសតៃប៉ិ។ ចំណែក នាយកអង្គការសុខភាពពិភពលោកវិញ ឆ្លើយតបទៅនឹងការរិះគន់របស់ប្រធានាធិបតីអាមេរិក លោក តេដ្រូស (Tedros Adhanom Ghebreyesus) បានបរិហារ នៅក្នុងសន្និសីទកាសែតទីពីក្រុងហ្សឺណែវ ទង្វើកេងចំណេញនយោបាយពីចំណាត់ការដោះស្រាយវិបត្តិ និងបានអះអាងថាពេលនេះជាវេលាដែលចិននិងអាមេរិកគួរតែរួមដៃគ្នាកម្ចាត់មេរោគ។
ចុះផ្សាយនៅថ្ងៃ៖
ស្តាប់ - ០២:១២
“កុំយកចំណេញនយោបាយពីវិបត្តិកូវីដ១៩ ! អ្នកមានមធ្យោបាយច្រើនទៀតក្នុងការបង្ហាញស្នាដៃ ! កុំលេងនឹងភ្លើង !” នេះជាប្រសាសន៍របស់លោក តេដ្រូស នាយកអង្គការសុខភាពពិភពលោក នៅក្នុងសន្និសីទកាសែត កាលពីល្ងាចថ្ងៃពុធ ទី ៨ មេសា ដោយបានអំពាវនាវឱ្យចិននិងអាមេរិកប្រមូលថាមពល រួមដៃគ្នាកម្ចាត់កូរ៉ូណាវីរុសថ្មី។
នាយកអង្គការសុខភាពពិភពលោក បានទទួលការគាំទ្រភ្លាមពីប្រធានាធិបតីបារាំងនិងអគ្គលេខាធិការអង្គការសហប្រជាជាតិ។ នៅក្នុងសេចក្តីថ្លែងការណ៍ លោកអគ្គលេខាធិការអង្គការសហប្រជាជាតិ បានបញ្ជាក់ថា “ពេលនេះជាវេលានៃការរួបរួមគ្នាប្រយុទ្ធប្រឆាំងនឹងមេរោគកូរ៉ូណាថ្មី”។
សូមបញ្ជាក់ថា សេចក្តីអំពាវនាវសុំឱ្យពិភពលោកមានសាមគ្គីភាពប្រយុទ្ធប្រឆាំងនឹងជំងឺកូវីដ១៩របស់លោកតេដ្រូសនេះ ធ្វើឡើងតែមួយថ្ងៃក្រោយពីលោកដូណាល់ ត្រាំ បានរិះគន់ ថាលោក តេដ្រូសនិងអង្គការសុខភាពពិភពលោក ស្និទ្ធនឹងក្រុងប៉េកាំងជ្រុល មានចំណាត់ការដោះស្រាយវិបត្តិកូរ៉ូណាមិនល្អ និងបានគំរាមព្យួរជំនួយហិរញ្ញវត្ថុដល់អង្គការទៀត។ ប៉ុន្តែនៅក្នុងសន្និសីទកាសែត លោកនាយកអង្គការសុខភាពពិភពលោក ចៀសមិននិយាយឱ្យចំឈ្មោះលោកដូណាល់ត្រាំទេ។ បើតាមលោក តេដ្រូស ការវាយប្រហារបែបប្រកាន់ពូជសាសន៍ និងដោយចំពោះលើរូបលោក បែបមួលបង្កាច់ និងប្រមាថរិះគន់ មានមកពីខាងតៃវ៉ាន់កាលពីបីខែមុន។
គ្រាន់តែបានឮប្រសាសន៍របស់លោកនាយកអង្គការសុខភាពពិភពលោកភ្លាម តៃវ៉ាន់ខឹងសម្បារយ៉ាងខ្លាំង។ តៃប៉ិបានទាមទារឱ្យនាយកស្ថាប័នអង្គការសហប្រជាជាតិមួយនេះ ធ្វើការសុំទោស និងពន្យល់បំភ្លឺចំពោះពាក្យចោទប្រកាន់ដែលគ្មានមូលដ្ឋាន។ តៃវ៉ាន់និងអង្គការសុខភាពពិភពលោកគ្មានទំនាក់ទំនងល្អនឹងគ្នាទេ និងកាន់តែចុះដុនដាបខ្លាំងទៀត ក្នុងរយៈពេលបីខែចុងក្រោយនេះ បើទោះបីជាតៃវ៉ាន់ប្រយុទ្ធប្រឆាំងនឹងកូវីដ១៩បានល្អយ៉ាងណាក៏ដោយ។ ក្រោមសម្ពាធរបស់ចិន និងក្រោយពីលោកស្រី ត្សៃរ៍ អ៊ីនវ៉េន ឡើងកាន់អំណាចនៅឆ្នាំ២០១៦មក តៃវ៉ាន់ត្រូវបានខ្ទាតចេញពីអង្គការសុខភាពពិភពលោក និងពីអង្គការអាកាសចរណ៍ស៊ីវិលអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ