អាមេរិក សម្រេចលក់មីស៊ីលបំពាក់លើនាវាមុជទឹកក្នុងតម្លៃ ១៨០ លានដុល្លារឲ្យទៅតៃវ៉ាន់
សហរដ្ឋអាមេរិក បានសម្រេចលក់មីស៊ីលបំពាក់លើនាវាមុជទឹកចំនួន ១៨ គ្រឿង ក្នុងតម្លៃ ១៨០ លានដុល្លារ ទៅឱ្យកោះតៃវ៉ាន់។ នេះ បើតាមការប្រកាសរបស់ក្រសួងការបរទេសអាមេរិក កាលពីថ្ងៃពុធ ទី ២០ ឧសភាម្សិលមិញ។ សេចក្តីសម្រេចរបស់អាមេរិកបែបនេះ ទំនងជានឹងធ្វើឲ្យកើនឡើងនូវទំនាក់ទំនងតានតឹងដែលមានស្រាប់រវាងទីក្រុងវ៉ាស៊ីនតោន ជាមួយនឹងក្រុងប៉េកាំងដែលតែងតែអះអាងថា តៃវ៉ាន់គឺជាផ្នែកមួយនៃទឹកដីចិន។
ចុះផ្សាយនៅថ្ងៃ៖
ស្តាប់ - ០២:១៥
បន្ទាប់ពីមេដឹកនាំកោះតៃវ៉ាន់ លោកស្រី ឆៃ អ៊ីងវេន ប្រកាសប្តេជ្ញាពង្រឹងសមត្ថភាពការពារជាតិរបស់ខ្លួន សហរដ្ឋអាមេរិកដែលជាសម្ព័ន្ធមិត្ត ក៏បានសម្រេចលក់មីស៊ីលធន់ទំនើប បំពាក់លើនាវាមុជទឹកប្រភេទ MK-48 Mod6 ឲ្យទៅកោះតៃវ៉ាន់ភ្លាមភ្លែត។
សហរដ្ឋអាមេរិកបានពន្យល់ថា ការលក់សព្វាអាវុធទៅឲ្យតៃវ៉ាន់គឺជារឿងល្អទាំងសងខាង ទាំងសម្រាប់អាមេរិកខ្លួនឯងផ្ទាល់ និងសម្រាប់តៃវ៉ាន់ដែលជាអតិថិជន។ ក្រសួងការបរទេសអាមេរិក បានលើកឡើងថា អាវុធទាំងនោះ នឹងជួយឲ្យតៃវ៉ាន់អាចការពារខ្លួន ពីការគំរាមកំហែងនានា។
មួយវិញទៀត ការលក់អាវុធទៅឲ្យតៃវ៉ាន់ គឺវាបម្រើដល់ផលប្រយោជន៍សហរដ្ឋអាមេរិក ក្នុងការគាំទ្រដល់កិច្ចខិតខំប្រឹងប្រែងរបស់កោះតៃវ៉ាន់ ក្នុងការធ្វើទំនើបកម្មអាវុធយុទ្ធភណ្ឌ ដើម្បីអភិវឌ្ឍន៍នូវសមត្ថភាពការពារខ្លួនឲ្យកាន់តែខ្លាំងទ្វេឡើង។
គួរជ្រាបថា ការប្រកាសលក់អាវុធធន់ទំនើបរបស់អាមេរិកទៅឲ្យកោះតៃវ៉ាន់ធ្វើឡើងកាលពីថ្ងៃពុធម្សិលមិញ ពោលគឺនៅថ្ងៃតែមួយដែលតៃវ៉ាន់ ហើយនិងប្រទេសចិនផ្ទុះសង្គ្រាមពាក្យសម្តីនឹងគ្នា។
នៅថ្ងៃម្សិលមិញនេះ ក្នុងពេលស្បថចូលកាន់តំណែងជាប្រធានាធិបតីតៃវ៉ាន់សម្រាប់អាណត្តិទី២ លោកស្រី ឆៃ អ៊ីងវេន ដែលជាអ្នកឯករាជ្យនិយមបានអះអាងសាជាថ្មីថា តៃវ៉ាន់មិនព្រមជាដាច់ខាតក្លាយជាផ្នែកមួយរបស់ប្រទេសចិន។ ការប្រកាសបែបនេះ បានធ្វើឲ្យចិនប៉េកាំង ផ្ទុះកំហឹងជាខ្លាំងនិងឆ្លើយបកវិញភ្លាមថា មិនអនុញ្ញាតឲ្យតៃវ៉ាន់បំបែកខ្លួនចេញពីប្រទេសចិនបានជាដាច់ខាត។
គួរកត់សម្គាល់ថា ទោះបីជាសហរដ្ឋអាមេរិក ទទួលស្គាល់នយោបាយចិនតែមួយ ចាប់តាំងពីឆ្នាំ ១៩៧៩ យ៉ាងណាក្តី ក៏អាមេរិកនៅតែជាសម្ព័ន្ធមិត្ត និងជាអ្នកលក់អាវុធធំជាងគេបំផុតទៅឲ្យកោះតៃវ៉ាន់។
ទាក់ទងនឹងការប្រកាសរបស់អាមេរិក លក់មីស៊ីលបាញ់នាវាឲ្យទៅតៃវ៉ាន់នាពេលចុងក្រោយនេះ គេនៅមិនទាន់ឃើញចិនបញ្ចេញប្រតិកម្មអ្វីនៅឡើយនោះទេ។ ក៏ប៉ុន្តែ នៅគ្រាកន្លងមក ទីក្រុងប៉េកាំងតែងតែចេញមុខជំទាស់ទៅនឹងការលក់អាវុធរបស់អាមេរិកទៅឱ្យកោះតៃវ៉ាន់ ដោយលើកហេតុផលថាវាធ្វើឱ្យប៉ះពាល់ដល់អធិបតេយ្យភាព និងសន្តិសុខជាតិរបស់ចិន។ បន្ថែមលើនេះ ចិនធ្លាប់ទាំងបានគំរាមដាក់ទណ្ឌកម្ម លើក្រុមហ៊ុនអាមេរិកដែលលក់អាវុធទៅឲ្យតៃវ៉ាន់ទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ