តៃវ៉ាន់-ចិន ផ្ទុះសង្គ្រាមពាក្យសម្តីជាថ្មីក្នុងថ្ងៃដែលប្រធានាធិបតីតៃវ៉ាន់ស្បថចូលកាន់តំណែងអាណត្តិទី២
ចុះផ្សាយនៅថ្ងៃ៖
ស្តាប់ - ០៦:៤១
នៅក្នុងពេលស្បថចូលកាន់តំណែងអាណត្តិទី២ នាថ្ងៃពុធទី ២០ ឧសភានេះ ប្រធានាធិបតីតៃវ៉ាន់លោកស្រី ឆៃ អ៊ីងវេន បានអះអាងថា តៃវ៉ាន់ព្រមចូលតុចរចាជាមួយចិន ក៏ប៉ុន្តែតៃវ៉ាន់ មិនព្រមជាដាច់ខាតក្លាយជាផ្នែកមួយរបស់ប្រទេសចិន។ ការប្រកាសបែបនេះ បានធ្វើឲ្យចិនផ្ទុះកំហឹងជាខ្លាំង និងឆ្លើយតបវិញភ្លាមថា ទីក្រុងប៉េកាំង មិនអាចឈរឱបដៃមើលតៃប៉ិ បំបែកខ្លួនចេញពីប្រទេសចិននិងប្រកាសឯករាជ្យបានជាដាច់ខាត។
ហេតុអ្វីបានជាសង្គ្រាមពាក្យសម្តីរវាងចិននិងតៃវ៉ាន់ចាប់ផ្ទុះឡើងជាថ្មី?
បញ្ហាទាក់ទងនឹងប្រទេសចិន ហើយនិងកោះតៃវ៉ាន់ត្រូវបានគេចុះផ្សាយព្រោងព្រាតនៅតាមបណ្តាសារព័ត៌មានអន្តរជាតិធំៗនៅប៉ុន្មានថ្ងៃនេះ ជាពិសេសនៅថ្ងៃ ទី ២០ ឧសភា នេះតែម្តង។ ពោលគឺបន្ទាប់ពីលោកស្រី ឆៃ អ៊ីងវេន ប្រធានាធិបតីតៃវ៉ាន់ បាននិយាយបញ្ជាក់ពីចេតនារបស់តៃវ៉ាន់សាជាថ្មី ថា ព្រមចូលតុសន្ទនាជាមួយចិន ក៏ប៉ុន្តែតៃវ៉ាន់ មិនព្រមជាដាច់ខាតរស់នៅក្រោមការត្រួតត្រារបស់ចិនដីគោក ក្រោមនយោបាយប្រទេសមួយប្រព័ន្ធពីរ។ ជាគំរូនយោបាយបាយដូចដែលដែនដីហុងកុងអនុវត្តន៍ជាមួយរដ្ឋាភិបាលកុម្មុយនិស្តចិនដែរ។
ការប្រកាសរបស់លោកស្រី ឆៃ អ៊ីងវេន ខាងលើនេះធ្វើឡើងក្នុងពេលដែលលោកស្រីស្បថចូលកាន់តំណែងជាប្រធានាធិបតីតៃវ៉ាន់សម្រាប់អាណត្តិទី២ និងនៅក្នុងពេលដែលលោកស្រីថ្លែងសុន្ទរកថាអបអរចំពោះជោគជ័យរបស់កោះតៃវ៉ាន់ ក្នុងការប្រយុទ្ធប្រឆាំងទល់នឹងជំងឺរាតត្បាតសកលកូវីដ១៩។
មួយវិញទៀត គេកត់សម្គាល់ទៀតថា ការប្រកាសមិនទទួលស្គាល់ថាតៃវ៉ាន់ ជាផ្នែកមួយរបស់ចិននេះ ធ្វើឡើងភ្លាមៗផងដែរ ក្រោយពីអង្គការសុខភាពពិភពលោក មិនព្រមទទួលឲ្យតៃវ៉ាន់ចូលរួមក្នុងសន្និបាតប្រចាំឆ្នាំរបស់ខ្លួនទៅតាមការចង់បានរបស់ចិន។
តៃវ៉ាន់ ខឹងសម្បា និងខកចិត្តខ្លាំងមែនទែន ការណ៍ដែលខ្លួនមិនត្រូវបានអនុញ្ញាតឲ្យចូលរួមក្នុងមហាសន្និបាតប្រចាំរបស់អង្គការសុខភាពពិភពលោក បើទោះជាតៃវ៉ាន់ ជាប្រទេសទទួលបានជោគជ័យក្នុងការគ្រប់គ្រងជំងឺកូវីដ១៩ ក្តី និងបើទោះជា មានប្រទេសជាច្រើនដែលក្នុងនោះមានទាំងសហរដ្ឋអាមេរិកនិងនូវែលសេឡង់ផង គាំទ្រចំពោះបេក្ខភាពរបស់កោះតៃវ៉ាន់ក្នុងនាមជាប្រទេសអង្កេតការណ៍នៅអង្គការសុខភាពពិភពលោក។
ចិនថ្កោលទោសនិងខឹងសម្បាចំពោះការប្រកាសរបស់តៃវ៉ាន់
ក្រោយពីបានឮនូវការសម្រេចរបស់អង្គការសុខភាពពិភពលោកភ្លាម កោះតៃវ៉ាន់ បានចោទប្រកាន់ប្រទេសចិនភ្លាមតែម្តងថាបានដាក់សម្ពាធលើស្ថាប័នសុខភាពកំពូលមួយនេះ មិនឲ្យផ្តល់កៅអីជាអ្នកសង្កេតការណ៍មួយនៅអង្គការសុខភាពពិភពលោក។
តែសម្រាប់ក្រុងប៉េកាំងវិញ កោះតៃវ៉ាន់ គឺគ្រាន់តែជាខេត្តមួយរបស់ប្រទេសចិន ហើយតៃវ៉ាន់គ្មានសិទ្ធិឬក៏មានមុខមាត់អី អង្គុយលើកៅអីមួយក្នុងនាមជាប្រទេសសង្កេតការណ៍ របស់មហាសន្និបាតសុខភាពពិភពលោកឡើយ។
បន្ថែមលើនេះ នៅថ្ងៃពុធនេះ ចិនហាក់កាន់តែក្តៅស្លឹកត្រចៀកខ្លាំងទ្វេឡើងក្រោយបានឮ ប្រមុខរដ្ឋាភិបាលតៃវ៉ាន់លោកស្រីឆៃ អ៊ីងវេន បញ្ជាក់ពីគោលជំហរម៉ឺងម៉ាត់ ចង់បានស្វ័យភាព ឯករាជ្យ និងមិនទទួលយកនយោបាយប្រទេសមួយ ប្រព័ន្ធពីរ ដូចការស្នើរបស់ខ្លួន។
ជាក់ស្តែង អ្នកនាំពាក្យនៃស្ថាប័នកំពូលចិនមួយទទួលបន្ទុកកិច្ចការកោះតៃវ៉ាន់ បាននិយាយ នៅថ្ងៃពុធ ទី២០ ឧសភានេះថា តៃវ៉ាន់ គឺជាផ្នែកមួយ ជាខេត្តមួយរបស់ប្រទេសចិន ដូច្នោះហើយទីក្រុងប៉េកាំង នឹងមិនអាចឈរក្រពាត់ដៃមើល កោះតៃវ៉ាន់ ផ្តាច់ខ្លួនចេញពីប្រទេសចិនបានជាដាច់ខាត។
តើចិនអាចទន់ចិត្តបន្ទន់ជំហរខ្លះ និងព្រមជួបសន្ទនាជាមួយតៃវ៉ាន់ដែរឬទេ?
បើតាមប្រតិកម្មដាច់ណាត់របស់មន្ត្រីរដ្ឋាភិបាលចិន គេអាចសន្និដ្ឋានថា រដ្ឋាភិបាលក្រុងប៉េកាំង នឹងមិនព្រមចូលតុសន្ទនាជាមួយរដ្ឋាភិបាលកោះតៃវ៉ាន់ឡើយ ប្រសិនណាបើតៃវ៉ាន់នៅតែរក្សាចិត្ត ចង់បំបែកខ្លួនចេញពីចិន និងចង់ប្រកាសឯករាជ្យនៅទីបំផុតទៅ។
នយោបាយ “ចិនតែមួយ” គឺជានយោបាយដ៏សំខាន់បំផុតមួយរបស់រដ្ឋាភិបាលចិននៃលោកស៊ី ជីនពីង នាពេលបច្ចុប្បន្ន។ ចិន តែងតែចាត់ទុកថា តៃវ៉ាន់គ្រាន់តែជាផ្នែកមួយរបស់ខ្លួនតែប៉ុណ្ណោះ។ ការ ក្រសោបយកតៃវ៉ាន់ មកបញ្ចូលក្នុងទឹកដីចិនតែមួយវិញ គឺជាបញ្ហាទាក់ទងនឹងមោទនភាពជាតិ ព្រមទាំងភាពខ្លាំងរបស់ចិនដើម្បីឈោងទៅចាប់តំណែងជាមហាអំណាចពិភពលោកពីសហរដ្ឋអាមេរិក។ ដូច្នោះហើយ រឿងជួបសន្ទនាជាមួយរដ្ឋាភិបាលតៃវ៉ាន់ ដឹកនាំដោយអ្នកឯករាជ្យនិយមដូចជាលោកស្រី ឆៃ អ៊ីងវេននេះ គឺជារឿងពិបាកទៅរួចណាស់សម្រាប់ចិនប៉េកាំង។
ដោយឡែក ពីខាងក្រុងតៃប៉ិវិញ បើទោះបីជា នៅរក្សាជំហរ មិនព្រមរស់នៅក្រោមរបបចិនតែមួយ និងបានប្រកាសស្នើឲ្យចិន រស់នៅប្រកបដោយសន្តិភាពជាមួយគ្នា តែមេដឹកនាំតៃវ៉ាន់ ក៏បានប្រកាសព្រមចូលតុសន្ទនាជាមួយដើម្បីស្វែងរកសន្តិភាពជាមួយភាគីចិនដែរ។
ខណៈពេលដែលទីក្រុងប៉េកាំង មានប្រតិកម្មលាយឡំនឹងកំហឹង ចំពោះការថ្លែងរបស់លោកស្រី ឆៃ អ៊ីងវេន ក្នុងពេលស្បថចូលកាន់មុខតំណែងនាអាណត្តិទី ២ នេះ ក្រុមអ្នកវិភាគបាននិយាយថា ការប្រកាសរបស់លោកស្រី ឆៃ ពិតជាមានបង្កប់នូវសារផ្សះផ្សា និងគ្មានចេតនាចង់ឈ្លោះទាស់ទែងអ្វីជាមួយនឹងរដ្ឋាភិបាលដឹកនាំដោយបក្សកុម្មុយនិស្តចិនឡើយ។
ជាក់ស្តែង អ្នកជំនាញសិក្សាអំពីទំនាក់ទំនងចិន-តៃវ៉ាន់ លោកជេក ម៉ៃឃឺល បានមានប្រសាសន៍ថា ប្រធានាធិបតីតៃវ៉ាន់លោកស្រី ឆៃ អ៊ីងវេន បានគូសបញ្ជាក់យ៉ាងច្បាស់ និងបានបង្កើតឱកាសចរចាស្វែងរកសន្តិភាពជាមួយប្រទេសចិន។
ទាក់ទងរឿងនេះដែរ លោកហ្វាន ស៊ីពីង អ្នកវិទ្យាសាស្រ្តនយោបាយនៅសាកលវិទ្យាល័យជាតិតៃវ៉ាន់ បានបកស្រាយថា ការលើកឡើងរបស់មេដឹកនាំកោះតៃវ៉ាន់គឺជាចេតនាល្អ ហើយលោកស្រី ឆៃ ហាក់កំពុងធានាដល់ភាគីចិនថាសហរដ្ឋអាមេរិក នឹងគ្មានប្រតិកម្មអ្វីហើយក៏មិនធ្វើឲ្យមានបញ្ហាកើតឡើងដែរ ប្រសិនណាបើកិច្ចសន្ទនាគ្នារវាងកោះតៃវ៉ាន់ និងចិនពិតជាកើតឡើងមែននោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ