កូរ៉េខាងជើងប្រកាសផ្អាកផែនការយោធាប្រឆាំងនឹងកូរ៉េខាងត្បូង
បន្ទាប់ពីបានបញ្ចេញសកម្មភាពបង្កហេតុ ដំឡើងសម្ពាធយ៉ាងតានតឹងក្នុងឧបទ្វីបកូរ៉េអស់ជាច្រើនថ្ងៃមក កូរ៉េខាងជើងបានប្តូរផ្លាស់ជំហរ។ ប្រមុខដឹកនាំកូរ៉េខាងជើង លោក គីម ជុងអ៊ុន បានសម្រេចព្យួរផែនការយោធាប្រឆាំងនឹងកូរ៉េខាងត្បូង។ នេះបើតាមសេចក្តីប្រកាសរបស់សារព័ត៌មានផ្លូវការកូរ៉េខាងជើង នៅថ្ងៃពុធទី ២៤មិថុនា ២០២០នេះ។
ចុះផ្សាយនៅថ្ងៃ៖
ស្តាប់ - ០២:១៤
ផ្តាច់រាល់គ្រប់បណ្តាញទំនាក់ទំនងផ្លូវការជាមួយកូរ៉េខាងត្បូងជិតខាង បំផ្លាញការិយាល័យទំនាក់ទំនងអន្តរកូរ៉េនៅកែសុង បោះបោកពាក្យសំដីវាយប្រហារធ្ងន់ៗកាន់តែច្រើនឡើងៗនារយៈពេលប៉ុន្មានសប្តាហ៍កន្លងមកនេះ ជាចុងក្រោយយោធាកូរ៉េខាងជើង បានគំរាមថានឹងបង្កើនសកម្មយោធាប្រឆាំងនឹងកូរ៉េខាងត្បូង ដូចជាចូលកាន់កាប់មជ្ឈមណ្ឌលសហប្រតិបត្តិការអន្តរកូរ៉េ ដំឡើងប៉ុស្តិ៍យាមនៅតំបន់គ្មានកងទ័ព ឬបង្កើនសកម្មភាពធ្វើសមយុទ្ធយោធា ។ល។ និង។ល។
ការគំរាមកំហែងយោធា និងញុះញង់ពាក្យសំដីរបស់ប្អូនស្រីមេដឹកនាំកូរ៉េខាងជើង បានជំរុញឱ្យសេអ៊ូលបញ្ចេញប្រតិកម្មដាច់ណាត់ថាលែងអនុគ្រោះចំពោះ ទង្វើនិងភាសាអសុរសរបស់កូរ៉េខាងជើងទៀតហើយ។
ស្រាប់តែនៅថ្ងៃពុធនេះ កូរ៉េខាងជើងប្តូរចិត្តវិញ។ ភ្នាក់ងារសារព័ត៌មានផ្លូវការកូរ៉េខាងជើង ប្រកាសថា លោក គីមជុងអ៊ុន ដែលបានដឹកនាំបើកកិច្ចប្រជុំគណៈកម្មការយោធាមជ្ឈិមបក្សកាលពីល្ងាចមិញ បានសម្រេចព្យួរផែនការយោធាប្រឆាំងនឹងកូរ៉េខាងត្បូង។ ភ្នាក់ងារមិនបានពន្យល់លម្អិតអ្វីបន្ថែមទាក់ទងនឹងការប្តូរផ្លាស់យុទ្ធសាស្ត្រនេះទេ។
អ្នកជំនាញជាច្រើនសង្ស័យថា ក្នុងរយៈពេលចុងក្រោយនេះកូរ៉េខាងជើងរកលេស តាក់តែងបង្កើតឱ្យមានវិបត្តិលេចឡើង ក្រែងអាចទទួលសម្បទានអ្វីមកវិញខ្លះ ព្រោះការចរចានុយក្លេអ៊ែរជាមួយអន្តរជាតិកំពុងជាប់គាំងស្តូកស្តឹងទៅហើយ។ ហើយបណ្តោយឱ្យអ្នកផ្សេង (ប្អូនស្រី)ធ្វើសកម្មភាពជំនួសរបបកុម្មុយនិស្ត ទើបលោកគីម ជុងអ៊ុន ស្រួលស្ទាបស្ទង់ស្ថានការណ៍ ដើម្បីតម្រង់ទិសដឹកនាំ។
អ្នកជំនាញខ្លះទៀតយល់ថា គីមជុងអ៊ុន សុខចិត្តព្យួរសកម្មភាពយោធាប្រឆាំងនឹងកូរ៉េខាងត្បូងពេលនេះ ដោយសង្ឃឹមថានឹងអាចទទួលសម្បទានពីក្រៅមកខ្លះ ឬដោយត្រូវការទុកពេលវេលាឱ្យយោធាបង្កើនសមត្ថភាព រៀបចំការបង្កហេតុថ្មី។ អ្វីដែលអ្នកជំនាញប្រាកដក្នុងចិត្តខ្លាំង គឺកូរ៉េខាងជើងនឹងមិនបញ្ចប់ទង្វើគំរាមកំហែងកូរ៉េខាងត្បូង និងមហិច្ឆតានុយក្លេអ៊ែររបស់ខ្លួនឡើយ។
តាំងពីជំនួបរវាងលោកដូណាល់ត្រាំនិងលោកគីមជុងអ៊ុន នៅក្រុងហាណូយ កាលពីខែកុម្ភៈឆ្នាំ២០១៩ ទទួលបរាជ័យមក ទំនាក់ទំនងកូរ៉ខាងជើង-ត្បូង បានចុះដុនដាបជាលំដាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ