ខ្លាចផ្ទុះកូវីដ១៩រលកទីពីរ ថៃផ្អាកមិនទទួលបរទេសមួយរយៈទៀត
នាយករដ្ឋមន្ត្រីថៃលោក ប្រាយុទ្ធចាន់អូចា បានប្រកាសនៅថ្ងៃអង្គារទី ១៤កក្កដា២០២០ផ្អាក មិនទទួល រាល់គ្រប់ជើងហោះហើរមកពីបរទេស។ សេចក្តីសម្រេចនេះធ្វើឡើងបន្ទាប់ពីទាហានជាតិអេហ្ស៊ីបម្នាក់ ដែលមកបំពេញបេសកកម្មនៅក្នុងប្រទេសថៃ បានរំលោភច្បាប់ចត្តាឡីស័ក១៤ថ្ងៃ ដោយលួចធ្វើដំណើរទៅមជ្ឈមណ្ឌលពាណិជ្ជកម្ម ទាំងខ្លួនវិជ្ជមាននឹងកូរ៉ូណាវីរុសថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ថៃលែងរកឃើញមានករណីវិជ្ជមានកូវីដ១៩ក្នុងស្រុកសោះ ចំនួន៥០ថ្ងៃហើយ ហើយបានសម្រេចបើកច្រកអាកាសវិញដោយសន្សឹមៗ តាំងពីដើមខែកក្កដាមក ជាមួយបណ្តាប្រទេសមួយចំនួនប៉ុណ្ណោះ ដើម្បីស្តារសេដ្ឋកិច្ចឡើងវិញខ្លះ។ ប៉ុន្តែចាប់ពីថ្ងៃនេះទៅ ព្រំដែនអាកាសថៃត្រូវបិទទៅវិញ មួយរយៈទៀតសិន។
មូលហេតុមកពី កាលពីថ្ងៃទី ១០កក្កដា យោធាអេហ្ស៊ីបមួយក្រុមបានមកដល់ថៃ ចុះចតនៅអាកាសយានដ្ឋានយោធាចម្ងាយ១៥០គីឡូម៉ែត្រពីក្រុងបាកកក។ តាមធម្មតា យោធាទាំងនោះត្រូវឃុំខ្លួនឯងក្នុងសណ្ឋាគារ១៤ថ្ងៃសិន ប៉ុន្តែមានម្នាក់បានចេញទៅដើរហាងនៅក្នុងមជ្ឈមណ្ឌលពាណិជ្ជកម្មមួយ។ ហើយជាសំណាងអាក្រក់លទ្ធផលតេស្តបង្ហាញថាយោធាម្នាក់នោះវិជ្ជមាននឹងកូវីដ១៩។
ពេលនេះអាជ្ញាធរថៃកំពុងតាមស្វែងរកពលរដ្ឋទាំង១៧០០នាក់ ដែលបានទៅមជ្ឈមណ្ឌលពាណិជ្ជកម្ម ក្នុងថ្ងៃតែមួយ ឬជួបដោយមិនដឹងខ្លួន ជាមួយយោធាអេហ្ស៊ីបឈឺនោះ។
លោកនាយករដ្ឋមន្ត្រីថៃ បានចេញមុខទទួលត្រូវចំពោះហេតុការណ៍នេះនិងបានចេញមុខយ៉ាងកម្រសម្តែងការសុំទោស ចំពោះទង្វើប្រហែសនាំឱ្យខូចទំនុកចិត្តនិងសុវត្ថិភាពសាធារណៈ។ សូមបញ្ជាក់ថា គ្រប់អ្នកដំណើរមកដល់ថៃ មិនថាបរទេស ឬជនជាតិថៃផ្ទាល់ទេ សុទ្ធតែមានកាតព្វកិច្ចគោរពចត្តាឡីស័ក១៤ថ្ងៃសិនមុននឹងអាចចូលទឹកដីថៃបាន។ ប៉ុន្តែទាហាននិងអ្នកការទូត ត្រូវបំពេញលក្ខខណ្ឌនេះដោយគ្មានការតាមដាននិងត្រួតពិនិត្យទេ។ ថៃក៏កំពុងតាមស្រាវរកដាននៃការធ្វើបំលាស់ទីរបស់កូនស្រីមន្ត្រីទូតស៊ូដង់ម្នាក់ ដែលមានផ្ទុកកូវីដ១៩ និងដែលចូលមកដល់ប្រទេសថៃកាលពីថ្ងៃទី ១០កក្កដាដែរ។
ករណីពីរនេះបានមកពន្យឺតគម្រោងបើកព្រំដែនទទួលទេសចរបរទេសឡើងវិញ។ ដើម្បីស្តារសេដ្ឋកិច្ច ដែលរំពឹងយ៉ាងខ្លាំង(២០%)លើវិស័យទេសចរណ៍ ថៃចង់បើកទទួលភ្ញៀវទេសចរជាបឋមមកពីប្រទេសជិតខាងក្នុងតំបន់ ដែលគ្រប់គ្រងស្ថានភាពកូវីដ១៩បានដូចគ្នា ដោយសង្ឃឹមថានឹងទទួលទេសចរបាន១៤លាននាក់នៅឆ្នាំ២០២០ ទល់នឹង៤០លាននាក់នៅឆ្នាំ២០១៩។ កូវីដ១៩ដែលបានសម្លាប់ជីវិតជនជាតិថៃ ៥៨នាក់ និងចម្លងលើមនុស្សប្រមាណ៣២០០នាក់ បានធ្វើថៃខាតបង់ចំណូលរាប់សិបពាន់លានដុល្លារ អ្នកអត់ការងារធ្វើរាប់លាននាក់ តាំងពីខែមេសាមក និងបានធ្វើឱ្យផលិតផលក្នុងស្រុកធ្លាក់ចុះប្រមាណពី ៦ទៅ១០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ