ពលរដ្ឋថៃរាប់ម៉ឺននាក់ចុះធ្វើបាតុកម្មប្រឆាំងនឹងរដ្ឋាភិបាល
ចុះផ្សាយនៅថ្ងៃ៖
ស្តាប់ - ០៦:០៧
នៅក្នុងប្រទេសថៃ បាតុកររាប់ពាន់នាក់ ភាគច្រើនជាក្មេងៗ អាយុក្រោម៣០ឆ្នាំ បានប្រមូលផ្តុំគ្នានៅទីលានប្រជាធិបតេយ្យ នាទីក្រុងបាងកក នៅល្ងាចថ្ងៃសៅរ៍ទី ១៨កក្កដាម្សិលមិញដើម្បីបរិហារនយោបាយរបស់រដ្ឋាភិបាល។ គិតចាប់តាំងរដ្ឋប្រហារឆ្នាំ២០១៤មក នេះជា បាតុកម្មដ៏ធំដំបូងផងនិងដែលធ្លាក់មកចំពេលប្រទេសកំពុងមានវិបត្តិសេដ្ឋកិច្ចដ៏ធ្ងន់ធ្ងរ បង្កឡើងដោយកូវីដ១៩។
អ្វីជាគួរឱ្យកត់សម្គាល់និងខុសពីចលនាបាតុកម្មមុនៗ ដែលជាបាតុកម្មពណ៌ ជួនដោយក្រុមអាវក្រហម ជួនដោយក្រុមអាវលឿង យប់មិញ បាតុករភាគច្រើនជាយុវជនយុវនារី សិស្សនិស្សិត អាយុក្រោម៣០ឆ្នាំ និងបានជ្រើសរើសសម្លៀកបំពាក់ពណ៌ខ្មៅ ដូចអ្វីដែលគេធ្លាប់ឃើញនៅហុងកុង។
មានគ្នារាប់ពាន់នាក់ បាតុករបានទម្លាយរនាំងប៉ូលិស រហូតមានការប៉ះទង្គិចជាមួយភ្នាក់ងារនគរបាលផង សម្រុកចូលទៅជួបប្រជុំគ្នាទីលានប្រជាធិបតេយ្យ ដែលមានសំណាកជានិម្មិត្តរូបនៃបដិវត្តឆ្នាំ១៩៣២។
ពុំមានមេមានកើយ និងទិន្ននាការនយោបាយច្បាស់លាស់ទេ ចលនាដែលកកើតឡើងនិងប្រមូលផ្តុំដោយយុវបាតុករ និងសិស្សនិស្សិត មានសកម្មភាពនិងរៀបចំប្រកូកប្រកាសធ្វើបាតុកម្មឡើងបានតាមប្រព័ន្ធសង្គម ដើម្បីបញ្ចេញកំហឹងជារៀងរាល់ថ្ងៃប្រឆាំងនឹងរដ្ឋាភិបាល។
បាតុកម្មប្រឆាំង “រាជានិយម”
លាយលំដោយបទភ្លេងរ៉ាប់ បទភ្លេងយុវជនសម័យថ្មី បាតុករបាននាំគ្នាស្រែកជ័យឃោស បរិហាររដ្ឋាភិបាលរបស់លោក ប្រាយុទ្ធចាន់អូចា ដែលជាអតីតប្រមុខដឹកនាំយោធា និងទើបជាប់ឆ្នោតដ៏ចម្រូងចម្រាសជាថ្មីនៅឆ្នាំ២០១៩ និងបានទាមទារឱ្យដករដ្ឋាភិបាល យោធានេះចេញ។
“រដ្ឋាភិបាលមិនខ្វល់នឹងយើងទេ បើយើងមិនធ្វើបាតុកម្ម ក៏យើងត្រូវតែខាតនិងបាត់បង់ដែរ ច្បាប់ការពារតែអ្នកមាន ឯពលរដ្ឋក្រីក្រគ្មានបានទទួលបានអ្វីទេ !” នេះជាសម្រែករបស់និស្សិតម្នាក់អាយុ១៨ឆ្នាំ។ ខ្លះទៀតស្រែកទាមទារថា “ពលរដ្ឋថៃគួរតែទទួលបានលទ្ធិប្រជាធិបតេយ្យ ត្រូវតែចាប់ផ្តើមពីថ្ងៃនេះ ជាមួយនឹងការបិទបញ្ចប់សកម្មភាពបង្ក្រាបបំពានរបស់ប៉ូលិស”។
ក្រៅអំពីចង់បណ្តេញរដ្ឋាភិបាល បាតុករបានបរិហារច្បាប់ព្រហ្មទណ្ឌ ១១២ ដែលចែងការពារយ៉ាងមុតមាំរបបរាជានិយម និងគ្រួសាររាជវង្សថៃ។ ពួកគេចង់បានការធ្វើកំណែទម្រង់ប្រជាធិបតេយ្យ ធ្វើកំណែទម្រង់រដ្ឋធម្មនុញ្ញ រំលាយចោលច្បាប់ប្រឆាំងនឹងការប្រមាថព្រះចេស្តាព្រះមហាក្សត្រដ៏តឹងតែងជាងគេបំផុតមួយលើលោក។ បាតុករបានស្រែកយ៉ាងក្តែងៗ និងសរសេរបដាចំៗ បណ្តេញរាជានិយម។ ជាការទាមទារដែលពុំធ្លាប់កើតមានពីមុនមកទេ។ បើតាមច្បាប់ ការរិះគន់ប៉ះពាល់ដល់រាជានិយមនៅថៃ អាចនឹងត្រូវជាប់ទោសក្នុងពន្ធនាគារដល់ទៅ១៥ឆ្នាំ។
វិបត្តិសេដ្ឋកិច្ច
រដ្ឋាភិបាលថៃ អាចទប់ទល់នឹងវិបត្តិកូរ៉ូណាវីរុសបាន មិនឱ្យរងការរាតត្បាតកូវីដ១៩ខ្លាំង ប៉ុន្តែពិតជាពិបាកទប់កំហឹងរបស់ប្រជាពលរដ្ឋណាស់ នៅពេលសេដ្ឋកិច្ចជាតិជួបវិបត្តិដ៏ធ្ងន់ធ្ងរនោះ។
ដោយហេតុកូវីដ១៩ និងវិធានការទប់ស្កាត់កុំឱ្យមានការរាតត្បាត សកម្មភាពនាំចេញ ត្រូវបន្ថយល្បឿន ឯវិស័យទេសចរណ៍ដែលជាសរសរទ្រូងសេដ្ឋកិច្ចដ៏សំខាន់របស់ប្រទេសត្រូវគាំងស្តូក។ ជាលទ្ធផលសេដ្ឋកិច្ចថៃ នឹងត្រូវរួញ ថយចុះយ៉ាង១០%។ ហើយអ្នកដែលរងគ្រោះខ្លាំងជាងគេ គឺប្រជាពលរដ្ឋថ្នាក់កណ្តាលនិងក្រោម ព្រមទាំងយុវជនដែលត្រូវដល់វ័យចូលប្រលូកក្នុងទីផ្សារការងារដំបូង។ បើតាមការព្យាករមាននិស្សិតជាច្រើនម៉ឺននាក់ណាស់ ដែលនឹងត្រូវទាត់ខ្យល់ គ្មានការងារធ្វើនៅពេលបញ្ចប់ការសិក្សានិងបានទទួលសញ្ញាប័ត្រ។
ម្យ៉ាងវិញទៀត អ្នកវិភាគជាច្រើនបានសម្គាល់ឃើញថារាជាណាចក្រថៃ ដែលបានក្លាយជារបបរាជានិយមអាស្រ័យរដ្ឋធម្មនុញ្ញ នៅឆ្នាំ១៩៣២ ក្រោយចលនាបដិវត្តប្រជាជនមក ហាក់កំពុងដើរថយក្រោយ មានទំនោរត្រលប់ទៅរករបបរាជានិយមផ្តាច់ការវិញក្រោមការគ្រងរាជរបស់ព្រះមហាក្សត្រ មហាវិជ្ជរ៉ាឡុនកន និងការការពារទ្រទ្រង់របស់ក្រុមឧត្តមសេនីយ៍ ដ៏មហាអភិរក្សនិយម។
រងផលវិបាកសេដ្ឋកិច្ចខ្លាំងជាងគេ គ្មានការងារធ្វើ បូកផ្សំនឹងប្រវត្តិមិនល្អរបស់រដ្ឋាភិបាលដែលជាអតីតយោធាស្រាប់ផង ជាគ្រឿងផ្សំគ្រប់មុខនៃការបំផុសកំហឹងឱ្យឆាបឆេះឡើង ហើយក្លាយជាលេសរុញច្រានឱ្យក្រុមយុវជនងើបឡើងធ្វើបាតុកម្មប្រឆាំងនឹងរដ្ឋាភិបាល និងស្រែកទាមទារបែបប្រជាធិបតេយ្យ ប្រឆាំងនឹងរដ្ឋាភិបាល និងរាជានិយម។ ថ្ងៃនេះជាបាតុកម្មទ្រង់ទ្រាយធំ ចុះថ្ងៃស្អែកជាអ្វី ?! ពេលវេលាជាអ្នកសម្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ