ថៃដោះលែងសកម្មជនសិទ្ធមនុស្សពីរនាក់ ក្រោយចាប់ឃុំខ្លួន បានមួយយប់
នៅថៃ សកម្មជនសិទ្ធមនុស្សពីរនាក់ បានត្រូវដោះលែងមកវិញ ក្រោយពីត្រូវនគរបាលថៃចាប់ឃុំខ្លួន អស់មួយថ្ងៃមួយយប់។ ពួកគេទាំងពីរនាក់ ត្រូវប៉ូលិសចាប់ឃាត់ខ្លួន នៅល្ងាចថ្ងៃសុក្រ ហើយត្រូវដោះលែងវិញ នៅរសៀលថ្ងៃសៅរ៍ ទី៨សីហា។ ការដោះលែងនេះ ស្ថិតក្រោមសម្រែកទាមទារយ៉ាងខ្លាំង ពីសំណាក់បាតុករគាំទ្រចលនាសិទ្ធមនុស្ស រាប់រយនាក់ នៅមុខតុលាការក្រុងបាងកក។
ចុះផ្សាយនៅថ្ងៃ៖
ស្តាប់ - ០២:០៤
សកម្មជនសិទ្ធមនុស្សដែលត្រូវចាប់ខ្លួននិងដោះលែងវិញនេះ ម្នាក់អាយុ៣៥ឆ្នាំ ឈ្មោះ អានុន នំផា ជាមេធាវីជំនាញសិទ្ធមនុស្ស ហើយនិងម្នាក់ទៀត និស្សិតវ័យ២៣ឆ្នាំ ដែលពួកគេជាអ្នកជួរមុខនាំអាទិ៍គេធ្វើបាតុកម្មប្រឆាំងរដ្ឋាភិបាល និងទាមទារកែទម្រង់រាជនិយម។
កាលពីថ្ងៃសុក្រ ទី៧សីហា ប៉ូលិសក្រុងបាងកក បានចាប់ឃាត់ពួកទាំងពីរនាក់ ដោយសំអាងលើបទចោទប្រកាន់ ចំនួន៨ករណីឯណោះ។ ក្នុងនោះ មានទាំងបទល្មើសប្រមាថព្រះមហាក្សត្រ បង្ខូចសណ្តាប់ធ្នាប់សង្គម ហើយនិងការបំពានលើវិធានការទប់ស្កាត់ការរាតត្បាតជំងឺកូវីដ១៩ ជាដើម។ បើសិនជាសរុបទោស ពួកគេអាចនឹងត្រូវជាប់គុក មិនតិចជាង១៥ឆ្នាំនោះទេ។
នៅពេលឡើងតុលាការ នៅថ្ងៃសៅរ៍ មានក្រុមបាតុកររាប់រយនាក់ បានស្រែកទាមទារឱ្យដោះលែងរូបគេទាំងពីរនាក់ ជាសម្រែកយ៉ាងកក្រើក នៅមុខសាលាជម្រះក្តី ក្រុងបាងកក។ ទីបំផុត សកម្មជនទាំងពីរនាក់ ក៏ត្រូវដោះលែងមកវិញ ក្រោមលក្ខខណ្ឌនៅក្រៅឃុំបណ្តោះអាសន្ន ហើយអាជ្ញាធរថៃ ដាក់កំហិតកុំឱ្យពួកគេប្រព្រឹត្តបទល្មើសដដែលជាថ្មីទៀត។
ទោះយ៉ាងនេះក្តី ក្រុមបាតុករថៃទាំងឡាយ រួមទាំងមេៗក្រុមបាតុកម្មទាំងនេះ ភាគច្រើនជាយុវជននិងនិស្សិត បានត្រៀមខ្លួនជាស្រេច ថាត្រូវនឹងធ្វើបាតុកម្មជាថ្មី ហើយឱ្យធំជាងមុនទៅទៀត នៅថ្ងៃសៅរ៍ ទី១៦សីហា ខាងមុខនេះ។ បាតុកម្មរបស់ពួកគេ មានគោលបំណងទាមទារកំណែទម្រង់រដ្ឋាភិបាលថៃដែលដឹកនាំដោយរបបសឹកយោធា, កែច្បាប់ការពាររាជនិយម ដែលពួកគេចាត់ទុកថាតឹងតែជ្រុលពេក។ និយាយរួម ជាបាតុកម្មប្រឆាំងនឹងការដឹកនាំរបស់នាយករដ្ឋមន្ត្រី ប្រាយុទ្ធ ចាន់អូចារ ហើយនិងទាមទារឱ្យរៀបចំការបោះឆ្នោតជាតិសាជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ