ចលនាទាមទារ ប្រជាធិបតេយ្យ ប្តេជ្ញាធ្វើបាតុកម្មរហូតដល់នាយករដ្ឋមន្រ្តីថៃ ចុះចេញពីតំណែង
៣ថ្ងៃក្រោយដាក់ឱសានវាទ ឲ្យនាយករដ្ឋមន្រ្តី ថៃ ត្រូវតែចុះចេញពីមុខតំណែង ចលនាទាមទារប្រជាធិបតេយ្យនៅប្រទេសថៃ បានត្រលប់មកប្រមូលផ្តុំ ធ្វើបាតុកម្មសាជាថ្មី នៅថ្ងៃអាទិត្យ នៅសង្កាត់ពាណិជ្ជកម្ម កណ្តាលក្រុងបាងកក។ បាតុករ ដែលភាគច្រើនជាយុវជន និស្សិត សិស្សសាលា នៅតែរក្សាការទាមទាររបស់ពួកគេដដែល នោះ គឺនាយករដ្ឋមន្រ្តី ថៃ លោកប្រាយុទ្ធ ចាន់អូចា ដែលចូលកាន់អំណាច តាំងពីរដ្ឋប្រហារយោធា ឆ្នាំ ២០១៤ ត្រូវតែចុះចេញពីតំណែង។ បាតុកម្មរបស់យុវជនថៃ ទាមទារឲ្យនាយករដ្ឋមន្រ្តីចុះចេញពីតំណែង និងទាមទារកំណែទម្រង់ រដ្ឋធម្មនុញ្ញថៃ កំពុងទាក់ទាញ ការគាំទ្រពីប្រជាជនថៃ នៅបរទេស ដូចជានៅប្រទេសជប៉ុន និងកូរ៉េខាងត្បូង។
ចុះផ្សាយនៅថ្ងៃ៖
ស្តាប់ - ០២:១៣
នៅប្រទេសថៃ ចលនាទាមទារប្រជាធិបតេយ្យមិនបានបន្ធូរបន្ថយ ការដកសម្ពាធ ទៅលើប្រមុខរដ្ឋាភិបាលនោះទេ។ នៅក្រោយ នាយករដ្ឋមន្រ្តីថៃ លោកប្រាយុទ្ធ ចាន់អូចា ព្រងើយកន្តើយ មិនព្រមចុះចេញពីតំណែង តាមការដាក់ឱសានវាទ ក្រុមបាតុករ ជាយុវជន និស្សិតសិស្សសាលា បានត្រលប់មកធ្វើបាតុកម្ម តវ៉ាសាជាថ្មី នៅក្រុងបាងកក។
នៅថ្ងៃសៅរ៍ លោកប្រាយុទ្ធ ចាន់អូចា ដែលបានចូលរួមក្នុងពិធីបុណ្យសាសនា សម្រាប់រំលឹកខួប នៃការចូលទីវង្គតរបស់ព្រះចៅភូមិបុល បានបញ្ជាក់សាជាថ្មី ថា លោកនឹងមិនចុះចេញពីតំណែងនោះទេ និងថា រាល់បញ្ហានឹងអាចដោះស្រាយ តាមរយៈ ការ យល់យោគ ចរចាគ្នាទៅវិញ ទៅមក។ សម្រាប់ ចាទុផាត់ ប៊ុនប៉ាតារ៉ា រាក់សា ដែលជាអ្នករៀបចំម្នាក់ នៃចលនាបាតុកម្មកាលពីថ្ងៃអាទិត្យ បើលោកប្រាយុទ្ធ នៅតែក្រាញ មិនព្រមចុះចេញពីអំណាច នោះ ប្រជាជននឹងនៅតែបន្តធ្វើបាតុកម្មដើម្បីទម្លាក់ លោកចេញពីតំណែង។
នៅក្នុងចលនាបាតុកម្មដែលគ្មានម៉ាស៊ីនដឹកនាំច្បាស់លាស់ ក្រុមបាតុករឯកភាពគ្នាទាំងស្រុង ដើម្បីផ្តួលរំលំរដ្ឋាភិបាលរបស់លោកប្រាយុទ្ធ ចាន់អូចា។ ប៉ុន្តែ នៅក្នុងចលនាបាតុកម្ម មានមនុស្សមួយក្រុមហ៊ានដល់ទៅ ទាមទារឲ្យគេធ្វើកំណែទម្រង់ ស្ថាប័នព្រះមហាក្សត្រ។ រូបភាពរបស់ព្រះមហាក្សត្រថៃ ព្រះមហាវិជ្ជរ៉ា ឡុងកន ដែលត្រូវបាតុករ សរសេរអក្សរបិទពីលើព្រះភ័ក្រ នៅក្នុងបាតុកម្មតវ៉ា ប៉ុន្មានខែមកនេះ គឺជារឿង ដែលគេមិនធ្លាប់ឃើញកើតមានទេ នៅក្រោមការគ្រងរាជ្យរបស់ព្រះមហាក្សត្រមុន គឺ ព្រះចៅភូមិបុល ព្រោះថា ច្បាប់ជេរប្រមាថ ព្រះមហាក្សត្រ ត្រូវបានអនុវត្តតឹងតែងសម្រាប់ពិន័យ ផ្តន្ទាទោសដាក់ពន្ធនាគារ រាល់អ្នកដែលហ៊ានរិះគន់ ប៉ះពាល់រូបភាពរាជវង្សថៃ។
នៅថ្ងៃអាទិត្យ បាតុករមួយក្រុម ដែលដាក់ឈ្មោះថា ចលនាប្រជាជន បានប្រកាសថា ពួកគេ នឹងដង្ហែក្បួន សំដៅ ស្ថានទូតអាល្លឺម៉ង់ ក្នុងទីក្រុងបាងកក នៅថ្ងៃចន្ទនេះ ដើម្បី សំដែងការមិនពេញចិត្ត ត្បិតថា ព្រះមហាក្សត្រថៃ ចំណាយពេលវេលា នៅប្រទេសអាល្លឺម៉ង់ ច្រើនជាងនៅប្រទេសថៃទៅទៀត។
ចាប់តាំងពីមានបាតុកម្មទាមទារឲ្យមានកំណែទម្រង់សា្ថប័នព្រះមហាក្សត្រ ព្រះមហាវិជ្ជរ៉ា ឡុងកន ទើបបានបង្ហាញព្រះភ័ក្រ្ត ជាលើកទី១ យាងជួបសំណេះសំណាល ជាមួយមហាជន នៅទីក្រុងបាងកក កាលពីថ្ងៃសុក្រ នៅក្នុងឱកាសប្រារព្ធខួបនៃការសោយទីវង្គត ព្រះបិតារបស់ព្រះអង្គ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ