សេដ្ឋកិច្ច៖វិស័យនាំចេញរបស់ចិនក្នុងខែវិច្ឆិកា ២០២០ កើនឡើងចំនួន ២១,១%
នៅក្នុងប្រទេសចិនអគ្គនាយកដ្ឋានគយបានប្រកាសក្នុងថ្ងៃចន្ទ ទី៧ ធ្នូថា ការនាំចេញទូទៅបានកើនឡើងចំនួន ២១,១% ក្នុងខែវិច្ឆិកា។ កំណើនវិស័យនាំចេញនេះបានធ្វើឲ្យចិនមានអតិរេក (ផលសល់)ពាណិជ្ជកម្មកាន់តែច្រើន ពិសេសជាមួយសហរដ្ឋអាមេរិក។ ក្រៅពីវិស័យនាំចេញ វិស័យនាំចូលចិនមានកំណើន ៤,៥% ក្នុងខែវិច្ឆិកា ពោលកើនលើសតិចតួចធៀបនឹងខែតុលាដែលមាន ៤,៧%។
ចុះផ្សាយនៅថ្ងៃ៖
កំណើនវិស័យនាំចេញបានមកពីការនាំចេញច្រើននូវសម្ភារៈបរិក្ខារពេទ្យ។ ក្នុងចន្លោះខែមករា និងខែវិច្ឆិកា ការនាំចេញសម្ភារៈបរិក្ខារពេទ្យបានកើនឡើងចំនួន ៤២,៥%។ ចំណែកផលិតផលវាយនភ័ណ្ឌ ក្នុងនោះមានម៉ាសបានកើនឡើងចំនួន ៣៣%។ បុណ្យណូអែល និងចូលឆ្នាំសកលក៏ជាឱកាសសម្រាប់វិស័យនាំចេញរបស់ចិន ពិសេសការនាំចេញនូវផលិតផលអេឡិចត្រូនិក ហើយតម្រូវការផលិតផលអេឡិចត្រូនិកនេះមានការកើនឡើងខ្លាំងនៅក្នុងប្រទេសដែលតម្រូវឲ្យបុគ្គលធ្វើការពីផ្ទះ។ តែអ្នកជំនាញបានយល់ឃើញថា ការនាំចេញនូវសម្ភារៈបរិក្ខារពេទ្យអាចនឹងធ្លាក់ចុះបន្តិចវិញ នៅពេលដែលមានថ្នាំវ៉ាក់សាំង។
ដោយឡែកនៅក្នុងវិស័យនាំចូល ចិនបានស្គាល់កំណើន ៤,៥% ក្នុងវិច្ឆិកា។ តែមានការធ្លាក់ចុះបន្តិចបើធៀបនឹងខែតុលាដែលមាន ៤,៧%។ កំណើនវិស័យនាំចេញបានធ្វើឲ្យចិនមានផលលើសពាណិជ្ជកម្មច្រើន ពិសេសជាមួយសហរដ្ឋអាមេរិក។ ក្នុងខែវិច្ឆិកាកន្លងទៅ ទំនិញចិននាំទៅអាមេរិកមានទំហំច្រើនជាងទំនិញអាមេរិកនាំទៅចិនដែលគិតជាទឹកប្រាក់កើនចំនួន ៣៧ ៤០០លានដុល្លារ ពោលលើសខែតុលាដែលមាន ៣០ ៧៥០លានដុល្លារ។ គួរបញ្ជាក់ថា អតិរេក (ផលសល់)ពាណិជ្ជកម្មរវាងចិន និងអាមេរិកដែលបន្តកើនឡើងជាដំណឹងល្អសម្រាប់ចិន តែមិនល្អសម្រាប់អាមេរិក។
អតិរេក (ផលសល់)ពាណិជ្ជកម្មនេះជាផ្ទាំងស៊ីបនៃការវាយប្រហាររបស់លោកត្រាំលើចិន និងជាដើមចមនៃសង្រ្គាមពាណិជ្ជកម្មរវាងក្រុងប៉េកាំង និងក្រុងវ៉ាស៊ីតោនមកដល់សព្វថ្ងៃ។ អ្វីដែលលោកត្រាំចង់បាន គឺចង់ឃើញផលលើសពាណិជ្ជកម្មរវាងចិន និងអាមេរិកមានសមភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ