UNICEF ៖ ដោយហេតុកូវីដ ក្មេងស្រី១០លាននាក់ប្រឈមនឹងការរៀបការដោយបង្ខំ
នៅលើពិភពលោក មានក្មេងស្រី ប្រមាណ១០០លាននាក់ ដែលត្រូវបានគេចាត់ទុកថាមានហានិភ័យប្រឈមនឹងគ្រោះចាប់ឱ្យរៀបការដោយបង្ខំ ពីពេលនេះ ដល់ដំណាច់ទស្សវត្សរ៍ (២០៣០)។ ក្មេងស្រីជាជនងាយរងគ្រោះស្រាប់ទៅហើយ វិបត្តិកូវីដបានជាន់ពន្លិចបន្ថែមមួយកំរិតទៀត។ បើតាមអង្គការយូនីសេហ្វ ជំងឺរាតត្បាតសកលកូវីដ១៩ អាចនឹងជំរុញឱ្យក្មេងស្រីប្រមាណ១០លាននាក់បន្ថែមទៀត បង្ខំចិត្តរៀបការមុនអាយុ១៨ឆ្នាំ។
ចុះផ្សាយនៅថ្ងៃ៖
“កូវីដ១៩ បានធ្វើឱ្យស្ថានភាពរបស់ក្មេងស្រីរាប់លាននាក់ដែលកំពុងជួបការលំបាកស្រាប់ កាន់តែធ្លាក់ធ្ងន់ធ្ងរថែមទៀត”។ នេះបើតាមសេចក្តីថ្លែងការណ៍របស់លោកស្រីនាយិកាអង្គការយូនីសេហ្វ ចេញផ្សាយនៅថ្ងៃចន្ទទី ៨ មីនា ទិវាសិទ្ធិនារីអន្តរជាតិ ដោយអះអាងបន្ថែមទៀតថា “យើងអាចបិទបញ្ចប់ និងត្រូវតែបិទបញ្ចប់ការចាប់ក្មេងស្រីឱ្យរៀបការដោយបង្ខំ”។
ប៉ុន្តែជំងឺរាតត្បាតសកលកូវីដ១៩ បានចូលមកគំរាមកំហែង និងបង្អាក់ការខិតខំប្រឹងប្រែង កន្លងមក។ បើតាមយូនីសេហ្វ ចំនួនក្មេងស្រីក្រោម១៨ឆ្នាំ ត្រូវរៀបការដោយបង្ខំ បានកើនឡើងវិញ ដោយកត្តាសំខាន់ច្រើនយ៉ាង គឺការបិទសាលារៀន ស្ថានភាពសេដ្ឋកិច្ចគ្រួសារធ្លាក់ចុះ សេវាសាធារណៈរអាក់រអួល និង មរណភាពរបស់ឪពុកម្តាយ។ កត្តាទាំងនេះ ជាផលវិបាកដែលបង្កឡើងដោយកូវីដ១៩។
ដូច្នេះពិភពលោកត្រូវតែចាត់វិធានការភ្លាមដើម្បីកំរិតផលវិបាកកុំឱ្យជះទៅលើក្មេងស្រីនិងគ្រួសាររបស់ក្មេងស្រីខ្លាំងពេក។ វិធានការត្រូវធ្វើមានជាអាទិ៍ បើកសាលារៀនឡើងវិញឱ្យបានឆាប់រហ័ស មានសេវាធានាថែទាំសុខភាព សង្គម និងការអនុវត្តច្បាប់ ឬនយោបាយហាមឃាត់អាពាហ៍ពិពាហ៍កុមារត្រឹមត្រូវ។ នេះបើតាមសំណើរបស់នាយិកាអង្គការយូនីសេហ្វ។
សូមបញ្ជាក់ថាក្នុងអំឡុងពេលមួយទស្សវត្សរ៍មកនេះ ពិភពលោកបានស្គាល់ភាពជឿនលឿនខ្លាំង ដោយបានបញ្ចៀសក្មេងស្រីក្រោយអាយុ១៨ឆ្នាំចំនួន ២៥លាននាក់ឱ្យរួចផុតពីការរៀបអាពាហ៍ពិពាហ៍ដោយបង្ខំ។ អត្រាក្មេងស្រីរៀបការមុនអាយុ១៨ឆ្នាំ បានធ្លាក់ចុះពីម្នាក់ក្នុងចំណោមបួននាក់ មកត្រឹមម្នាក់ក្នុងចំណោមក្មេងស្រី៥នាក់ នៅលើពិភពលោក។
បើតាមយូនីសេហ្វ មានក្មេងស្រីមិនទាន់ពេញវ័យ១៨ឆ្នាំ និងស្ត្រី ប្រមាណជាង៦៥០លាននាក់ត្រូវរៀបការដោយបង្ខំ នៅលើពិភពលោក។ ពាក់កណ្តាលជាក្មេងស្រីរស់នៅក្នុងប្រទេសចំនួន៥ គឺបង់ក្លាដែស ប្រេស៊ីល អេត្យូពី ឥណ្ឌា និងនីហ្សេរីយ៉ា។ អត្រាក្មេងស្រីការមុនអាយុ១៨ឆ្នាំបានឡើងដល់ទៅ ៧៦%នៅនីហ្សេ និង៦៨%នៅសាធារណរដ្ឋកុងហ្គោ នៅឆ្នាំ២០២០។ តែក្មេងប្រុសក្រោម១៨ឆ្នាំវិញ រៀបការដោយបង្ខំវិញមានកំរិតមិនដល់១/៦នៃចំនួនក្មេងស្រីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ