ថៃ ៖សកម្មជនប្រជាធិបតេយ្យ ជាប់ពន្ធនាគារនៅក្រុងបាងកកជាច្រើននាក់វិជ្ជមានកូវីដ១៩
មានអ្នកទោសរាប់ពាន់នាក់ ក្នុងនោះជាច្រើននាក់ជាសកម្មជននៃចលនាប្រជាធិបតេយ្យថៃផង បានឆ្លងមេរោគកូរ៉ូណាថ្មីនៃជំងឺកូវីដ១៩ នៅក្នុងពន្ធនាគារ។ នេះបើតាមការជូនដំណឹងរបស់អាជ្ញាធរថៃក្រោយពីមេដឹកនាំចលនាបាតុកម្មម្នាក់ បានទាញសញ្ញាអាសន្ន ស្តីអំពីករណីឆ្លងកូវីដ១៩នៅក្នុងពន្ធនាគារ។
ចុះផ្សាយនៅថ្ងៃ៖
ស្តាប់ - ០២:២៦
តាំងពីប៉ុន្មានសប្តាហ៍ចុងក្រោយមកនេះ រាជាណាចក្រថៃកំពុងរងរលករាតត្បាតកូវីដ១៩ជាថ្មី ដោយរាប់ឃើញមានអ្នកវិជ្ជមានកូវីដ ជិត ៩៥០០០ករណី និងមានចំនួនអ្នកស្លាប់ឡើងដល់៥១៨នាក់។ នៅក្នុងចំណោមអ្នកវិជ្ជមានកូវីដទាំងអស់នោះ ២៨៣៥នាក់ ជាអ្នកទោសជាប់ក្នុងពន្ធនាគារពីរ ដែលធំៗជាងគេនៅ ទីក្រុងបាងកក។ នេះបើតាមការអះអាងរបស់អ្នកនាំពាក្យមជ្ឈមណ្ឌលគ្រប់គ្រងជំងឺរាតត្បាតកូវីដ១៩ ដោយបញ្ជាក់ថាបានធ្វើតេស្តកូវីដលើគ្រប់អ្នកទោសទាំងអស់។ តើធ្វើតេស្តកាលពីពេលណា ? ពុំមានការលម្អិតទេត្រង់ចំណុចនេះ។
អាជ្ញាធរថៃបានបង្ហាញតួលេខនៃចំនួនអ្នកទោសឆ្លងកូវីដ នៅថ្ងៃព្រហស្បតិ៍ទី ១៣ឧសភា បន្ទាប់ពីមេដឹកនាំចលនាប្រជាធិបតេយ្យ ដែលបានដឹកនាំធ្វើបាតុកម្មទាមទារឱ្យនាយករដ្ឋមន្ត្រីចុះចេញពីតំណែងនិងទាមទារធ្វើកំណែទម្រង់របបរាជនិយមថៃ អស់ជិតពេញមួយឆ្នាំ ទាញសញ្ញាអាសន្នស្តីពីការឆ្លងកូវីដ១៩ក្នុងពន្ធនាគារ។ កាលពីថ្ងៃពុធ ទី ១២ឧសភា Panusaya Sithijirawattanakul ហៅរ៉ុង បានប្រកាសផ្សព្វផ្សាយតាមប្រព័ន្ធសង្គមថាវិជ្ជមានកូវីដ នៅ៥ថ្ងៃក្រោយពីបានទទួលការដោះលែងចេញពីពន្ធនាគារដោយមានលក្ខខណ្ឌ កាលពីដើមខែឧសភា។ មេដឹកនាំចលនាម្នាក់ទៀត ឈ្មោះ Panupong Jadnok ហៅ ម៉ាឃ ក៏វិជ្ជមានកូវីដ១៩ដែរ។ ហើយពេលនេះមេធាវីកំពុងដាក់សំណើសុំឱ្យនៅក្រៅឃុំបណ្តោះអាសន្ន។
ពុំមានទេទិន្នន័យទាក់ទងនឹងអ្នកទោសនៅក្នុងពន្ធនាគារផ្សេងទៀតក្នុងផ្ទៃប្រទេស និងគ្មានសោះតម្លាភាពជុំវិញការគ្រប់គ្រងរោគរាតត្បាតលើអ្នកជាប់ទោសក្នុងពន្ធនាគារ។ នេះបើតាមការថ្ងូចថ្ងូររបស់សកម្មជនប្រជាធិបតេយ្យម្នាក់ទៀត ឈ្មោះ Somyot Prueksakasemsuk ដែលទើបបានទទួលសេរីភាពដោយមានលក្ខខណ្ឌដែរកាលពីខែមេសា។ ប្រឈមនឹងស្ថានភាពបែបនេះ តំណាងអង្គការការពារសិទ្ធិមនុស្ស Human Rights Watch លោក Brad Adams បានប្រកាសទាមទារឱ្យរដ្ឋាភិបាលថៃ ហ៊ានដោះស្រាយវិបត្តិកូវីដ១៩ក្នុងប្រព័ន្ធពន្ធនាគារនិងទប់ស្កាត់កុំឱ្យមានការឆ្លងរាតត្បាតក្នុងរង្វង់អ្នកទោសធ្ងន់ធ្ងរជាងនេះ។
ថៃជាប្រទេសដែលមានអត្រាអ្នកទោសជាប់ពន្ធនាគារច្រើនជាងគេបំផុតមួយនៅលើពិភពលោក ព្រោះមានច្បាប់ប្រឆាំងគ្រឿងញៀនតឹងតែងខ្លាំង។ គិតត្រឹមថ្ងៃទី ១មេសា ២០២១ មានជនសង្ស័យ ៣០៨០០០ពាន់នាក់ ត្រូវបានកាត់ទោស និងរង់ចាំសាលក្រមដាក់ទោស កំពុងជាប់ពន្ធនាគារ នៅទូទាំងប្រទេសថៃ។ នេះបើតាមវិបសាយ Prisonstudies ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ