ថៃ៖ ករណីឆ្លងរាលដាលកូវីដ១៩ ខ្លាំងសម្បើម នៅតាមមន្ទីរឃុំឃាំង
នៅប្រទេសថៃ គេបានសង្កេតឃើញ មានករណីឆ្លងរាលដាលកូវីដ១៩ យ៉ាងច្រើនសម្បើម នៅតាមមន្ទីរឃុំឃាំង។ ក្នុងរវាងប៉ុន្មានសប្តាហ៍ចុងក្រោយនេះ មានអ្នកជាប់ទោស ប្រមាណ២២០០០នាក់ ដែលត្រូវបានគេធ្វើតេស្តរកឃើញ ថាមានវិជ្ជមានកូវីដ១៩។ បញ្ហានេះ បានធ្វើឲ្យមានការចោទសួរ អំពីការរស់នៅរបស់អ្នកទោស ក្នុងភាពណែនណាន់តាន់តាប់ នៅតាមមន្ទីរឃុំឃាំង ក្នុងប្រទេសថៃ។
ចុះផ្សាយនៅថ្ងៃ៖
ស្តាប់ - ០២:៥១
អាជ្ញាធរថៃ កំពុងតែប្រឈមនឹងករណីឆ្លងរាលដាល កូវីដ១៩ យ៉ាងលឿនរហ័ស ក្នុងចំណោមអ្នកជាប់ឃុំ នៅតាមពន្ធនាគារ។ កាលពីខែមេសា ករណីវិជ្ជមានកូវីដ១៩ ត្រូវបានគេរកឃើញ តែ១០ករណីប៉ុណ្ណោះ ក្នុងចំណោមអ្នកជាប់ឃុំនៅថៃ ក៏ប៉ុន្តែ គិតមកត្រឹមពេលនេះ មានអ្នកទោសយ៉ាងហោចណាស់២២០០០នាក់ ត្រូវបានគេរកឃើញថាមានវិជ្ជមានកូវីដ១៩។
ដើម្បីទប់ស្កាត់ការឆ្លងរាលដាលយ៉ាងលឿននេះ អាជ្ញាធរសុខាភិបាលថៃ បានបន្ថែមការធ្វើតេស្តនៅតាមមន្ទីរឃុំឃាំង។ ប្រព័ន្ធតុលាការថៃ ក៏បានសម្រេចដោះលែងអ្នកទោសមួយចំនួន ដែលមានបញ្ហាសុខភាពផងដែរ ដើម្បីកាត់បន្ថយភាពណែនណាន់តាន់តាប់ នៅតាមមន្ទីរឃុំឃាំង។ ប៉ុន្មានសប្តាហ៍ចុងក្រោយនេះ អាជ្ញាធរថៃ បានធ្វើតេស្តយកសំណាក ពីអ្នកជាប់ទោស ប្រមាណ៣៦០០០នាក់។
សូមបញ្ជាក់ថា ដំណឹងនៃករណីប្រឈមការឆ្លងកូវីដ១៩ នៅក្នុងពន្ធនាគារថៃនេះ ត្រូវបានទំលាយឲ្យដឹងតាមរយៈសកម្មជនប្រជាធិបតេយ្យមួយរូប ឈ្មោះ Somyot Prueksakasemsuk ដែលបានជាប់ឃុំមួយរយៈ ពីបទប្រមាថព្រះចេស្តាព្រះមហាក្សត្រ។ លោកបានអះអាង អំពីករណីធ្វេសប្រហែស មិនយកចិត្តទុកដាក់ចំពោះសុខភាពអ្នកជាប់ឃុំ ពីសំណាក់សមត្ថកិច្ចមន្ទីរឃុំឃាំង។ យ៉ាងណាមិញ កញ្ញា Rung ដែលជាយុវជនប្រជាធិបតេយ្យថៃដ៏ល្បីម្នាក់ដែរនោះ បានអះអាងថា នាងបានឆ្លងកូវីដ១៩ នៅក្នុងមន្ទីរឃុំឃាំង មុននឹងត្រូវបានគេដោះលែងមកវិញ នៅដើមខែឧសភា។
គួរកត់សំគាល់ថា ការរស់នៅក្នុងភាពចង្អៀតណែន គ្មានអនាម័យ គ្មានគំលាតសុវត្ថិភាព នៅតាមពន្ធនាគារ គឺជាកត្តាចំបង ដែលជំរុញការឆ្លងរាលដាលនេះលឿនរហ័ស។ យោងតាម អង្គការសហព័ន្ធអន្តរជាតិដើម្បីសិទ្ធិមនុស្ស ចំនួនមនុស្សនៅតាមមន្ទីរឃុំឃាំងក្នុងប្រទេសថៃ មានចំនួនប្រមាណ ៣១១០០០នាក់ ពោលគឺលើសពីកម្រិតសមត្ថភាព នៃប្រព័ន្ធពន្ធនាគារថៃ ដល់ទៅជាង២ដងឯណោះ។ អ្នកទោស៤នាក់ ក្នុងចំណោម៥នាក់ គឺសុទ្ធតែជាអ្នកពាក់ព័ន្ធនឹងករណីជួញដូរគ្រឿងញៀន។ មនុស្សអាចជាប់ទោស១០ឆ្នាំ ដោយគ្រាន់តែមានថ្នាំគ្រាប់មេតំហ្វេតាមីនជាប់ខ្លួន ប៉ុន្មានគ្រាប់។
លោក Somsak Thepsutin រដ្ឋមន្ត្រីក្រសួងយុត្តិធម៌ថៃ ក៏ធ្លាប់បានទទួលស្គាល់ដែរ កាលពីខែកុម្ភៈកន្លងទៅ ថានៅតាមបន្ទប់មន្ទីរឃុំឃាំង អ្នកទោសដេកគជើងគ្នា ចង្អៀតជាងដេកក្នុងម្ឈូសទៅទៀត។ លោក Brad Adams នាយកអង្គការ Human Rights Watch បានលើកឡើងថា ថៃត្រូវតែធ្វើកំណែទម្រង់ប្រព័ន្ធតុលាការ និងដោះលែងអ្នកទោសដែលជាប់ពន្ធនាគារ ដោយហេតុផលនយោបាយ និងបទល្មើសលហុបន្តិចបន្តួច ដើម្បីសម្រាលភាពចង្អៀតណែនតាមពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ