ថៃទាញសញ្ញាអាសន្នពីការខ្វះគ្រែសម្រាប់ព្យាបាលអ្នកជំងឺកូវីដ
ក្រសួងសុខាភិបាលថៃ បានទាញសញ្ញាអាសន្នពីការខ្វះគ្រែ នៅតាមមន្ទីពេទ្យ និង មណ្ឌលចត្តាឡីស័កសម្រាប់ដាក់អ្នកជំងឺកូវីដ។ តាមការប្រកាសរបស់ក្រសួងសុខាភិបាលថៃ នៅថ្ងៃព្រហស្បតិ៍ ក្នុងរយៈពេលតែ ២៤ម៉ោង គេរាប់ឃើញអ្នកឆ្លងកូវីដថ្មី ចំនួន ១៧ ៦៦៩ និងមានអ្នកស្លាប់ដោយសារជំងឺកូវីដ ចំនួន ១៦៥នាក់។ នេះជាតួលេខដ៏ច្រើនបំផុត ដែលប្រទេសថៃ មិនធ្លាប់ជួបប្រទះ ចាប់តាំងពីជំងឺកូវីដ រាតត្បាតប្រទេស នៅដើមឆ្នាំ២០២០។
ចុះផ្សាយនៅថ្ងៃ៖
ស្តាប់ - ០២:៥២
ប្រឈមនឹងរលកទី៣នៃជំងឺកូវីដ ដែលបង្កដោយមេរោគបំប្លែងខ្លួន ដែលតា ប្រទេសថៃមានចំនួនករណីឆ្លងថ្មី និងអ្នកស្លាប់ដោយសារជំងឺកូវីដ កើនឡើង លឿនខ្លាំង នោះបើទោះបីរដ្ឋាភិបាលចេញវិធានការរឹតត្បិតនៅក្នុងខេត្តជុំវិញបាងកក និងបម្រាមគោចរ នៅពេលយប់ក្តី។
នៅថ្ងៃព្រហស្បតិ៍ ក្រសួងសុខាភិបាលថៃ បានប្រកាសតួលេខអ្នកឆ្លងកូវីដ ប្រមាណ ១៧ ៦៦៩នាក់ ក្នុងរយៈពេលតែ២៤ម៉ោង។ ចំណែកអ្នកស្លាប់មានចំនួន ១៦៥នាក់។ ជាចំនួនដ៏ច្រើនបំផុត ដែលធ្វើឲ្យប្រទេសថៃ មានមនុស្សស្លាប់ដោយសារជំងឺកូវីដ សរុប ៤៥៦២នាក់។
ការកើនឡើង ក្នុងសន្ទុះដ៏លឿន នៃចំនួនករណីអ្នកឆ្លងកូវីដថ្មី កំពុងទៅដាក់សម្ពាធប្រព័ន្ធសុខាភិបាលរបស់ប្រទេសថៃ។ នៅក្នុងសន្និសីទកាសែត កាលពីថ្ងៃព្រហស្បតិ៍ អគ្គនាយកនៃនាយកដ្ឋានសេវាវេជ្ជសាស្រ្តរបស់ក្រសួងសុខាភិបាលថៃ លោក ស៊ុំស័ក្ត អក្ខស៊ីន បានបញ្ជាក់ត្រង់ៗថា មន្ទីរពេទ្យគ្មានគ្រែគ្រប់គ្រាន់សម្រាប់ព្យាបាលអ្នកជំងឺកូវីដ។ នៅតាមមន្ទីរពេទ្យធំៗ បន្ទប់សង្រ្គោះបន្ទាន់ ត្រូវចាល់ដោយអ្នកជំងឺកូវីដ ព្រោះត្រូវទទួលព្យាបាលអ្នកជំងឺ លើសសមត្ថភាពដែលខ្លួនមាន។
ជាក់ស្តែង បើតាមលោក ស៊ុំស័ក្ត អក្ខរស៊ីន មន្ទីរពេទ្យនៅទីក្រុងបាងកកមានសមត្ថភាព ទទួលអ្នកជំងឺថ្មី ប្រមាណ១ពាន់នាក់ ក្នុងមួយថ្ងៃ ប៉ុន្តែ នៅថ្ងៃព្រហស្បតិ៍តែមួយថ្ងៃនេះ ចំនួនអ្នកកូវីដថ្មី ដែលត្រូវចូលព្យាបាលនៅមន្ទីរពេទ្យ មានដល់ទៅ ៤០០០នាក់។
តាមមន្រ្តីសុខាភិបាលថៃដដែល បើទោះបីជារដ្ឋាភិបាល ណែនាំឲ្យគេធ្វើចត្តាឡីស័ក នៅតាមផ្ទះ សម្រាប់អ្នកដែលមិនធ្លាក់ខ្លួនឈឺធ្ងន់ធ្ងរ ប៉ុន្តែ គេនៅតែប្រឈមបញ្ហាផ្គត់ផ្គង់ថ្នាំព្យាបាលសម្រាប់អ្នកជំងឺនៅតាមផ្ទះ។ លើសពីនោះ មណ្ឌលចត្តាឡីស័ករបស់ទីក្រុងបាងកក ចាប់ផ្តើមពេញ អស់កន្លែងសម្រាប់ទទួលអ្នកថ្មី។
នៅថ្ងៃ ពុធ អាជ្ញាធរថៃ បានប្រែក្លាយ ឃ្លាំងដាក់ទំនិញ នៅព្រលានយន្តហោះដនមឿងទៅជាមន្ទីរពេទ្យ សម្រាប់ដាក់គ្រែ ទទួលអ្នកជំងឺមិនសូវធ្ងន់ ចំនួន ១៨០០នាក់។ ប៉ុន្តែ បើតាម អគ្គនាយកនាយកដ្ឋានសេវាវេជ្ជសាស្រ្តថៃ បើទោះបីជាគេបន្ថែមគ្រែ និង សុំឲ្យមន្ទីរពេទ្យឯកជនថៃ បើកបន្ទប់សង្រ្គោះបន្ទាន់ សម្រាប់ ទទួលយកអ្នកជំងឺកូវីដ ក៏គេនៅតែមិនអាចមានគ្រែគ្រប់គ្រាន់ដើម្បីឆ្លើយតបនឹងលំហូរដ៏គំហុកនៃចំនួនអ្នកជំងឺកូវីដ សព្វថ្ងៃនេះទេ។
ទោះថៃ មានចំនួន អ្នកឆ្លងថ្មី កើនឡើងខ្លាំង នៅថ្ងៃព្រហស្បតិ៍ ប៉ុន្តែ អាជ្ញាធរនៅតែមិនទាន់ដឹងថា តើកំរិតកំពូលនៃចំនួនអ្នកឆ្លងច្រើនបំផុត នៅកើតឡើងនៅពេលណានោះទេ។
ធ្លាប់ធូរស្រាលអស់ជាង១ឆ្នាំ គិតចាប់តាំងពីមានវិបត្តិកូវីដនៅដើមឆ្នាំ ២០២០ ថៃ បានជួបរលកទី ៣ នៅខែ មេសាឆ្នាំនេះ ដោយសារករណីផ្ទុះឆ្លងខ្លាំង ដោយសារពិធីបុណ្យជប់លៀង ដែលមានជាប់ទាក់ទងនឹងអ្នកនយោបាយថៃ។ នាយករដ្ឋមន្រ្តីថៃ លោកប្រាយុទ្ធ ចាន់អូចា បានរងការរិះគន់ ក្នុងរឿងគ្រប់គ្រងវិបត្តិកូវីដមិនបានល្អ និងការដំណើរការចាក់វ៉ាក់សាំងដ៏យឺតយ៉ាវ។ រដ្ឋាភិបាលថៃមានគម្រោងចាក់វ៉ាក់សាំងដល់ប្រជាជនរបស់ខ្លួន ឲ្យបាន ៥០លាននាក់ ពីពេលនេះ រហូតដល់ចុងឆ្នាំ ២០២១នេះ ប៉ុន្តែ គិតមកដល់ពេលនេះ មានតែ ប្រជាជន ជាង ៥ភាគរយ (៥,៦%) នៃប្រជាជនសរុបជាង ៦៦លាននាក់ ដែលបានទទួលវ៉ាក់សាំង ពេញលេញ គ្រប់២ដូស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ