ប្អូនស្រីរបស់គីមជុងអ៊ុន ចេញមុខបរិហារ សមយុទ្ធរួមរវាងសហរដ្ឋអាមេរិកនិងកូរ៉េខាងត្បូង
សហរដ្ឋអាមេរិកនិងកូរ៉េខាងត្បូង តែងធ្វើសមយុទ្ធរួមគ្នា ជារៀងរាល់ឆ្នាំ ដែលត្រូវផ្តើម នៅឆ្នាំនេះ ចាប់ពីថ្ងៃអង្គារទី ១០ ខែសីហាទៅ។ ហើយដូចរាល់លើក កូរ៉េខាងជើងតែងបញ្ចេញប្រតិកម្មប្រឆាំង និងបរិហាររិះគន់យ៉ាងខ្លាំង។ ក្នុងថ្ងៃបើកហាត់ត្រៀមធ្វើសមយុទ្ធនៅថ្ងៃនេះ ប្អូនស្រីដ៏មានឥទ្ធិពលរបស់ប្រមុខដឹកនាំកូរ៉េខាងជើង គីម ជុងអ៊ុន បានចេញមុខមកបរិហារ កូរ៉េខាងត្បូងថាមានអាកប្បកិរិយាមិនគួរឱ្យទុកចិត្ត ដោយទៅធ្វើសមយុទ្ធរួមជាមួយសហរដ្ឋអាមេរិក។ សម្ព័ន្ធមិត្តទាំងពីរនឹងត្រូវប្រឈមមុខនឹងបញ្ហាសន្តិសុខយ៉ាងធ្ងន់ធ្ងរ។ នេះបើតាមការព្រមានរបស់លោកស្រី គីម យ៉ូជុង។
ចុះផ្សាយនៅថ្ងៃ៖
ស្តាប់ - ០២:០៥
នៅក្នុងសេចក្តីថ្លែងការណ៍ចុះផ្សាយដោយទីភ្នាក់ងារសារព័ត៌មានផ្លូវការកូរ៉េខាងជើង KCNA លោកស្រី គីម យ៉ូជុង ដែលជាប្អូនស្រីដ៏មានឥទ្ធិពល និងជាទីប្រឹក្សាដ៏ជំនិតបំផុតរបស់លោក គីម ជុងអ៊ុន បានបរិហារសមយុទ្ធរួមរវាងសេអ៊ូលនិងវ៉ាស៊ីនតោន ថាជាលំហាត់យោធាដ៏គ្រោះថ្នាក់ ព្រោះសម្រាប់ព្យុងយ៉ាងសមយុទ្ធនេះជាការហាត់ត្រៀមដើម្បីចូលឈ្លានពានកូរ៉េខាងជើង។
ដោយបង្ហាញការសោកស្តាយខ្លាំងចំពោះអាកប្បកិរិយាក្បត់របស់អាជ្ញាធរកូរ៉េខាងត្បូង ប្អូនស្រីរបស់លោកគីមជុងអ៊ុនបានព្រមានថា សមយុទ្ធរួមរវាងសហរដ្ឋអាមេរិក និងកូរ៉េខាងត្បូង គឺជាការគំរាមកំហែងសន្តិសុខធំធេងណាស់ កូរ៉េខាងជើងនឹងពង្រឹងពង្រីកសមត្ថភាពការពារជាតិ និងវាយប្រហារដើម្បីជាកិច្ចការពារខ្លួន។ កូរ៉េខាងជើងដែលនៅតែបន្តអភិវឌ្ឍកម្មវិធីនុយក្លេអ៊ែរនិងមីស៊ីលរបស់ខ្លួនរហូត ពេញមួយដើមឆ្នាំ២០២១ ដោយមិនខ្វល់នឹងបម្រាមរបស់អន្តរជាតិ និងស្ថានភាពសេដ្ឋកិច្ចជាតិដុនដាបទេ។ នេះបើតាមរបាយការណ៍សម្ងាត់របស់អង្គការសហប្រជាជាតិ ដែលភ្នាក់ងារសារព័ត៌មានរ៉យទ័រទទួលបានកាលពីថ្ងៃសុក្រទី៦សីហា។
អ្វីជាការកត់សម្គាល់ខ្លាំង សេចក្តីថ្លែងការណ៍បរិហារមិនសំចៃរបស់លោកស្រី គីម យ៉ូជុង បានធ្លាក់មកជួនចំពេលស្ថានភាពក្នុងឧបទ្វីបកូរ៉េ កំពុងមានលក្ខណៈធូរស្រាល តាមរយៈការផ្តោះប្តូរសារលិខិតគ្នា ជាលក្ខណៈបុគ្គលជាច្រើនរវាងមេដឹកនាំកូរ៉េខាងជើង គីម ជុងអ៊ុនជាបងប្រុស និងប្រធានាធិបតីខាងត្បូង លោក ម៉ូន ចែអ៊ីន។ មេដឹកនាំទាំងពីរ បានត្រូវរ៉ូវគ្នាស្តារទំនាក់ទំនងឡើងវិញ ជាក់ស្តែងតាំងពីខែមុនមក ស្ថានភាពនៅតាមព្រំដែនក៏មានសកម្មភាពប្រសើរឡើងវិញបន្តិច បន្ទាប់ពីអាក់ខាននិងផ្តាច់អស់រយៈពេលជាងមួយឆ្នាំ។
ឆ្នាំទៅ ក្នុងបំណងសម្រួលការចរចា សហរដ្ឋអាមេរិកនិងកូរ៉េខាងត្បូងដែលជាសម្ព័ន្ធមិត្តចងភ្ជាប់ដោយសន្ធិសញ្ញា ដោយអាមេរិកមានដាក់ទ័ពនៅកូរ៉េខាងត្បូងដើម្បីការពារទល់នឹងកូរ៉េខាងជើងដែលមានអាវុធនុយក្លេអ៊ែរ បានកំរិតការធ្វើសមយុទ្ធមិនឱ្យទ្រង់ទ្រាយធំសម្បើមទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ