ថៃ៖ការធ្វើតេស្តិ៍រកកូវីដ១៩ តាមរយៈការវិភាគលើសំណាកញើសទទួលបានលទ្ធផលគួរឲ្យជឿទុកចិត្ត
នៅក្នុងប្រទេសថៃ យុទ្ធនាការសាកល្បងធ្វើតេស្តិ៍រកមេរោគកូវីដ១៩ តាមរយៈការវិភាគលើសំណាកញើសទទួលបានលទ្ធផលគួរជាទីពេញចិត្ត។ លោកចាឌីន គល់ស៊ីង (Chadin Kulsing) អ្នកស្រាវជ្រាវនៅសកលវិទ្យាល័យជូឡាឡុងកនក្រុងបាងកក និងជាអ្នកបង្កើតឧបករណ៍ធ្វើតេស្តិ៍រកកូវីដ១៩ តាមញើសបានបញ្ជាក់ដោយធានាថា ការធ្វើតេស្តិ៍តាមការវិភាគលើសំណាកញើសនេះទទួលបានលទ្ធផលគួរឲ្យជឿទុកចិត្តចំនួន ៩៥%។ លោកគល់ស៊ីងសង្ឃឹមអាចដាក់វិធីសាស្រ្តថ្មីមួយនេះទៅក្នុងយុទ្ធនាការធ្វើតេស្តិ៍ស្វែងរកកូវីដ១៩ របស់រដ្ឋាភិបាលនាពេលឆាប់ៗខាងមុខ។
ចុះផ្សាយនៅថ្ងៃ៖
ស្តាប់ - ០២:១៦
រហូតមកទល់ពេលនេះ ការធ្វើតេស្តិ៍ស្វែងរកកូវីដ១៩ ត្រូវបានគេធ្វើឡើងដោយវិភាគលើសំណាកពីរន្ធច្រមុះ ពីក្នុងមាត់ ឬមួយក៏វិភាគឈាម។ តែចាប់ពីពេលនេះតទៅ ការវិភាគលើសំណាកញើសយកចេញពីក្លៀកអាចគ្រប់គ្រាន់ដើម្បីចង់ដឹងថា តើមនុស្សរូបនោះមានករណីវិជ្ជមានកូវីដ១៩ ឬអត់។ វិធីសាស្រ្តថ្មីមួយនេះដែលបានអភិវឌ្ឃដោយក្រុមអ្នកស្រាវជ្រាវថៃមានលក្ខណៈងាយស្រួលច្រើនណាស់ បើធៀបនឹងវិធីសាស្រ្តយកសំណាកដោយរុកតាមច្រមុះ។ ចំណែកលទ្ធផលដែលទទួលបានទៀតសោតក៏ដូចគ្នានឹងលទ្ធផលដែលរុកតាមរន្ធច្រមុះ ពោលលទ្ធផលគួរឲ្យជឿជាក់ ៩៥% នេះជាការធានារបស់លោកចាឌីន គុលស៊ីង អ្នកស្រាវជ្រាវនៅសកលវិទ្យាល័យជូឡាឡុងកនក្រុងបាងកក និងជាអ្នកបង្កើតឧបករណ៍ធ្វើតេស្តិ៍រកកូវីដ១៩ តាមការវិភាគលើសំណាកញើស។
ការហ៊ានសន្និដ្ឋានលើលទ្ធផលដែលទទួលបាននេះ គឺក្រោយពីក្រុមរបស់លោកគុលស៊ីងបានធ្វើតេស្តិ៍សាកល្បងលើមនុស្សចំនួន ២ ០០០នាក់។ មួយវិញទៀត ក្រុមរបស់លោកគុលស៊ីងធ្លាប់ធ្វើការពិសោធន៍ជាមួយសត្វឆ្កែជំនាញហិតក្លិនញើសដើម្បីរកអ្នកមានវិជ្ជមានកូវីដ១៩ ដែលគ្មានរោគសញ្ញា។ តាមលោកគុលស៊ីង មនុស្សដែលមានវិជ្ជមានកូវីដ១៩ មានបង្កប់ដោយក្លិនសារធាតុគីមីខុសប្លែកពីធម្មតា។ គួរបញ្ជាក់ថា ថៃមិនមែនជាប្រទេសដំបូងគេដែលបានផ្តោតលើការធ្វើតេស្តិ៍រកកូវីដ១៩ ដោយវិភាគលើសំណាកញើសទេ ព្រោះកន្លងមក គេឃើញមានប្រទេសអង់គ្លេស និងអាមេរិក។
លោកគុលស៊ីងសង្ឃឹមថា វិធីសាស្រ្តដែលកំពុងស្ថិតក្នុងដំណាក់ការពិសោធន៍មួយនេះអាចនឹងត្រូវយកទៅអនុវត្តជំនួយការធ្វើតេស្តិ៍ PCR ដែលត្រូវធ្វើការវិភាគនៅមន្ទីរពិសោធន៍ និងត្រូវចំណាយលុយច្រើន។ គួរបញ្ជាក់ថា ថៃ ពិសេសក្រុងបាងកកកំពុងប្រឈមនឹងសន្ទុះកំណើនករណីឆ្លងកូវីដ១៩ មិនធ្លាប់មាន។ គិតត្រឹមថ្ងៃទី៩ កញ្ញា ថៃមានករណីឆ្លងជិត ១,៥នាក់ និងមានស្លាប់ជិត ១៤ ០០០នាក់។ ចំណែកយុទ្ធនាការចាក់វ៉ាក់សាំងក៏មានការយឺតយ៉ាវ ព្រោះក្នុងចំណោមប្រជាជនថៃទាំង ៧០លាននាក់ មានតែ ១១លាននាក់ដែលបានចាក់វ៉ាក់សាំងចំនួនពីរដូស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ